Nómba 11 - Bokyi Bible

Kyikit ńkyí badakó Tábéra

¹ Banet-Ézerel ba/kpet eshwôn ne Óburúkpâbí kyi-kim ne afaníkong ebe. Ké nkéré Óburúkpâbí o/jwo kámbé, kafâ ka/sa ǎ, ne nyǐ o-twóm kámbé bumang-okwâ. Okwâ ámu o-shí kámbé, o-bên dyishí-oshê dyibónge.

² Banet-Ézerel ba-tii ba-kó Músis ba/fu, ochwáp kámbé. Músis o-fé nshwam o-kye Óburúkpâbí, ne okwâ o-ríbî.

³ Ké bubwô ámbu, ba/fé kyikit ánkyi dyizîn, Tábéra, ké nǎ, ányi nké okwâ mú Óburúkpâbí o/shí kámbé.

Músis o/cá Banet-Ashí Bajam Bachât Esim Diǐkpú

⁴ Bacinbánet ba/mû mbe ba-cen n ne banet-Ézerel. Enyam eryí e/mû e-nyîn n kámbé kanong kanong, nyí e/chi banet-Ézerel bayén to ba-kpet eraa ba/fu, â byi/mû byi-man n ejá nang onyin-enyam.

⁵ Ké Éjip, be byi/mû byi-ryí i kángkáng ekworê nyí byi/mû byi-ryuu ng, ne byi/mû byi*fí byi-kyâ chwǒm ké nyǐ*. Byimu byi-zîim m to byirim-byichí ḿbyí badakó kúkimba ne watamélin ne lyîk ne eyím ne gálik ḿbyí byi/mû ne mbyí.

⁶ Nké kántîk, busa bu*fí bě to*. Chwǒm nang kyibónge kyi*fí ńkyí byidaryí* kyi-cibi ne berêt mún mú badakó mána nké nke* kángkáng ací*.

⁷ Berêt mú badakó mána o/mû wǎ boǒsáng-kyichí ḿbú mbu bukwa búkwa.

^8-9 Bu/mû bu-róng ng ké kafâ-oshê ne buchú cibicibi ne kyibû. Ké dyicófóróng, banet-Ézerel ba-byí kyíjí ba-da-bwóp kámbú, ba-kwa kámbú, bukíri ba-kíbî kámbú bu-firi wǎ filáwa mú badachi berêt. Ne mbé kâng ba-rám kámbú ba-bîi byirim-berêt ḿbyí gbalegbale ba-ká. Bu/mû bu-nyîn n éné wǎ berêt mú ba/ká ké bakút-ólif.

¹⁰ Músis o/jwo kángkáng banet ké ba/bwom ké azu ké azu mbe ba-shwôn n ne Óburúkpâbí ké ecím-afyi-bampyep ebe. Kyi*da/nyîn Músis* ké nǎ, Óburúkpâbí o/mû o-sa ng kafâ ne mbé.

¹¹ Ne Músis o-raa ne Óburúkpâbí o/fu, ebóng ńkyí wo a/chi kyi-bên kanong kanong ne me. Ebóng amu a-sa ng kafâ ne me. Ebóng kyi/chi ne a-kye mě bǎmkpóngé ḿbé banet ḿbén kángkáng etún.

¹² Me n*da/mee kámbé* n-fwon nang kámbé*. Ebóng ńkyí wo amu o-fu ng a/fu, me nkyú wǎ nnen bwǎn, n-kûyip kámbé ké abwô ejí wǎ bwǎn-bajújwô, tete m-byí ké esí nyí wo a/ryí banchí eten ḿbé kpákpá ocím.

¹³ Me n/chi m-man ejá enyam nyá nyí edakwárê kángkáng banet ḿbén. Mbé mbe ba-tii ng mě bukyû ké byiko, ba-bí ng mě ba/fu, me nkye kámbé enyam.

¹⁴ Me mm*man eníbî banet ḿbén kángkáng me kǎnchí*. Dyitû ńdyín dyi/shwôm mě.

¹⁵ Â wo a/chi a-kû mě echi něen, ri mě bafip, a-ju mě, eringe nyí nn*cíp to dyityém eyên ebên*.

¹⁶ Óburúkpâbí o-raa ne Músis o/fu, kó bajam-banyinchéng bachât esim diǐkpú ḿbé mbe ne ofê, ḿbé banet mbe ba-kúng ng kámbé wǎ banet-ashí a-tî kyikit kyibónge. Kúng kámbé a-bâ ne mbé ké mpyep mú mu n-kyú u, a-sét kámbé ba-bwom ányi ne wo.

¹⁷ Me n/chi n-shû m-bâ kyísí m-ba-pem ne wo ányi, ne n/chi n-koo kyicê-busa-Busun ejí ńkyí me n/kye ǒ n-kye kámbé. Mbé kâng ba/chi ba-chwáp ǒ ké bǎmkpóngé ḿbé banet ḿbén etún, ne wo aa*ba/chi a-chîtún kámbé kǎnchí*.

¹⁸ Kántîk, sét banet-Ézerel a/fu, soo n̂g byiko enen ké bubwô-dyicí ńdyí nencí. Ben ba/chi ba-já enyam nyí ben badaryí. Óburúkpâbí oo/jwo bukyû enen ḿbú bamu ba-tii ng, ba-raa ng ba/fu, kyi/mû kyi-kyú u kanong â ben ba/mû ba-ri ng enyam nyí ben badaryí, ne ben ba/fu to, kyi/mû běn kanong ké nkéré ben ba/mû ké Éjip. Kántîk, Óburúkpâbí o/chi o-kye běn enyam, ne ben ba-man ba-ryí kányí.

¹⁹ Ben ba-man ba-ryí kányí, *chí ké dyicí dyibónge nké nke* nang ké ací afee* nang atánge* nang diǐkpú* nang ké ací bujam*.

²⁰ Nké ké kyirim-otukáku kyimúmú tete e-kû běn ebyí ké omiríng, tete ba-kyee kyi-kim ne nyǐ. Ńkyín kyi/chi kyi-chi, ké nǎ, ben baa/né Óburúkpâbí mú mu nyín ne ben, ne ben baa/raa ne nyǐ ba/fu, ben ba/mû baa*ba/chi ba-dim ké Éjip*.

²¹ Músis o-bí Óburúkpâbí o/fu, banet ḿbé me mu n-tông ng kámbé kiǐfáng mbe égot-banet etánge etánge ké égot-byikit byichât, ne wo a/fu, wo a-kyâ kámbé enyam nyí edakwárê kámbé ké otukáku obónge dí.

²² Ba-man n eju bampong ne ebû nyí mbé badazût dí. Kángkáng ekworê nyí nyi ké kángkáng baya ḿbé baryên e-kwárê ng kámbé dí.

²³ Óburúkpâbí o-faa o/fu, busa ejí mbu ne bunyerenyere dí. Wo a/chi a-ri abeabe a/fu, nang ńkyí me n/fu, kyi/chi kyi-chi, kyi-chi i o, nang kii*chi o*.

²⁴ Músis o-dim kâng o-da-sét banet ńkyí Óburúkpâbí o/raa. Nyǐ o/kó banet-ashí bajam bachât esim diǐkpú o-tî kámbé ké mpyep mú Óburúkpâbí odakyú.

²⁵ Óburúkpâbí kâng o-shû ké kafâ-ófíbí o-ba-raa ne Músis. Nyǐ o/koo kyicê-busa-Busun emen ḿbú nyǐ o/mû o/kye Músis, o-kye banet-ashí ámbe bajam bachât esim diǐkpú. Ké nkéré busa bu/nung kámbé ké byiko, mbé ba/kpet eraa ne ejá kyíbóng kyíbóng wǎ bamkpábé ḿbé badasét byiraa-Osówo. Nké ba*da/raa ka-bwon*.

²⁶ Ké burwám-banet-ashí ámbe, ashí afee ḿbé ba/mû ba-bángê e Édat ne Médat ba/waa ké kafâ-oshê. Mbé ba*da/ce ké mpyep mú Óburúkpâbí odakyú*. Busa ḿbú Busun-Osówo bu-nung kámbé ké byiko ányi ké kafâ-oshê, ne mbé to ba-kpet eraa ne ejá kyíbóng kyíbóng wǎ bamkpábé ḿbé badasét byiraa-Osówo.

²⁷ Kyisat kyibónge kyi-byí ne ochéé kyi-da-sét Músis chwǒm ńkyí Édat ne Médat ba/mû ba-chi i.

²⁸ Jóshwa kâng mú wǎn-Nûn, mú oo/kyú onet-ochwâp mú Músis kyi-fím ké nkéré mú nyǐ o/mû o/tôong wǎsíng, o-raa ne Músis o/fu, bonchí, chi kámbé ba-mîng.

²⁹ Músis o-faa o/fu, orêm mu o-chi i ǒ kyi-kim ne me dí. Kyi/mû kyi-nyîn ne mě ńkyí Óburúkpâbí odakye kángkáng banet emen busa ḿbú Busun emen, o-chi kámbé ba-raa ne ejá kyíbóng kyíbóng wǎ bamkpábé ḿbé badasét byiraa-Osówo.

³⁰ Músis ne banet-ashí ámbe ba-bwa esim kâng ké kafâ-oshê.

Óburúkpâbí o/twóm Bunurung ḿbú badakó Kwâl

³¹ Ké abe ányi, Óburúkpâbí o-twóm afú nyí a/fím ne bunurung ḿbú badakó kwâl ké baya ḿbé baryên a-bâ ne mbú, ḿbú bu/mû bu*fí bu-byí i kyíbóng kyi-shwôm myíta obónge*. Mbú bu/tû kyísí ké kafâ-oshê ne ké bakô-oshê bamúmú ké bakyilómyíta chwóó.

³² Ké bubwô ámbu, dyicí ándyi kángkáng ne buchú bumúmú ne ké nnyinyěng-dyicí dyimúmú, banet-Ézerel ba/chi bǎmkpóngé ḿbé bunurung ámbu ekám. Onet o/mû o*fí* mú o*da/kám bu-ribi égot-bakyílogaram etánge*. Mbé ba/tát kámbú ké kafâ-oshê kamúmú eringe nyí badajan kámbú.

³³ Ké nkéré mbé ba/tôong ne enyam chwóó nyí mbé badaryí, kafâ ka/bírî Óburúkpâbí ne banet-Ézerel, ne o-chi orwôm o-róng kámbé.

³⁴ Ba/fé kyikit ánkyi dyizîn, Akun-Enyam eryuu, ké nǎ, ba/ryii banet ḿbé ba/mû ba/ryuu enyam ké kyikit ánkyi.

³⁵ Banet-Ézerel ba-dim ányi ba-jâ ḿbú Házerot, ké kyikit ńkyí mbé ba/bi oshê.