Nómba 1 - Bokyi Bible

Mbwôp Kashú-Banet epan ḿbé Ézerel

¹ Ké mbwôp kashú-dyicí ńdyí nnyinyěng-otukáku mú nnyinyěng-dyije, ké nkéré mú banet ḿbé Ézerel ba/mîng Éjip, Óburúkpâbí o/raa ne Músis ké mpyep mú Óburúkpâbí odakyú, ké kyikim-dyikán ńkyí kaku ńké Sána. Óburúkpâbí o/fu,

² wo ne Éron, pan n̂ ocím-banet ḿbé Ézerel ké byikim-banet ké byikim-banet ne ké byikû-banet. Sáng n̂g azîn nyí kángkáng banyinchéng

³ ḿbé baa/byí aje bujam ne ḿbé baa/kán ba-shwôm éné, ḿbé ba/kwárê ké bǎmkpóngé ḿbé súja echi.

⁴ Sét n̂g onet-dyishí ké kyikû-banet ké kyikû-banet ba-chwáp běn.

^5-16 Nyín něen banet-ashí ḿbé ba/cá kámbé ba/fu, bachi bǎmkpóngé ḿbén. Ké kyikû-banet ńkyí Rúben, Elyízu mú wǎn-Shédu nké o/mû onet-dyishí. Ké kyikû-banet ńkyí Syímyon, onet-dyishí o/mû Shelúmyel mú wǎn-Zúryishadyâ. Ké kyikû-banet ńkyí Júda, Náshwon mú wǎn-Amínádap nké o/mû onet-dyishí. Ké kyikû-banet ńkyí Ézaka, Netánel mú wǎn-Zúwa nké o/mû onet-dyishí. Ké kyikû-banet ńkyí Zébélon, onet-dyishí o/mû Élyap mú wǎn-Hélon. Ké kyikû-banet ńkyí Éferem, onet-dyishí o/mû Elyíshama mú wǎn-Amyíhut. Ké kyikû-banet ńkyí Manáse, Gamályel mú wǎn-Pédazu nké o/mû onet-dyishí. Ké kyikû-banet ńkyí Běnjámin, Abyídan mú wǎn-Gyídyonyi nké o/mû onet-dyishí. Ké kyikû-banet ńkyí Dǎn, Ahéze mú wǎn-Amyíshadyâ nké o/mû onet-dyishí. Ké kyikû-banet ńkyí Ásha, Págyel mú wǎn-Ókaran nké o/mû onet-dyishí. Ké kyikû-banet ńkyí Gât, Elyǎsap mú wǎn-Dúwel nké o/mû onet-dyishí. Ké kyikû-banet ńkyí Nafatályi, Ahíra mú wǎn-Énan nké o/mû onet-dyishí.

^17-18 Banyinchéng ḿbén ashí diǐkpú ne afee ba/chwáp Músis ne Éron ké bǎmkpóngé ḿbé kángkáng banet ekó ké mbwôp kashú-dyicí ńdyí nnyinyěng-otukáku, ba/fu, bacibi kyikit kyibónge, ba-sáng kángkáng banet azîn ké byikim-banet ne ké byikû-banet. Ba/sáng azîn nyí kángkáng banyinchéng ḿbé baa/byí aje bujam ne ḿbé baa/shwôm éné kyísí, ba-pan kámbé,

¹⁹ wǎ eringe nyí Óburúkpâbí o/kye busa. Músis o/sáng banet azîn kyísí ké kyikim-dyikán ńkyí kaku ńké Sána.

^20-46 Ba/sáng azîn-banyinchéng ḿbé baa/byí aje bujam ne ḿbé baa/shwôm éné, ḿbé ba/kwárê ké bǎmkpóngé-súja echi, ké byikim-banet ne ké byikû-banet. Ba/kpet ké kyikû-banet ńkyí Rúben mú mbwôp kashú-wǎn-Jekôp. Ocím-banet ké kyikû-banet ké kyikû-banet o/mû něen. Ké kyikû-banet ńkyí Rúben, ocím-banet kángkáng o/mû égot etánge etánge ké bajam-byikit bafee esim nyâchât ne égot efee esim bajam-banet batánge. Ké kyikû-banet ńkyí Syímyon, ocím-banet kángkáng o/mû égot etánge etánge ké bajam-byikit bafee esim-byikit onyiryiká ne byinyii esim-égot-banet ne kyicê. Ké kyikû-banet ńkyí Gât, ocím-banet kángkáng o/mû égot etánge etánge ké bajam-byikit bafee esim-byikit byitánge esim-égot-banet efee ne bajam-banet bafee esim diǐkpú. Ké kyikû-banet ńkyí Júda, ocím-banet kángkáng o/mû égot etánge etánge ké bajam-byikit bachât esim-byikit onyiryiká ne byinyii esim-égot-banet echât. Ké kyikû-banet ńkyí Ézaka, ocím-banet kángkáng o/mû égot etánge etánge ké bajam-byikit bafee esim-byikit diǐkpú ne byinyii esim-égot-banet efee. Ké kyikû-banet ńkyí Zébélon, ocím-banet kángkáng o/mû égot etánge etánge ké bajam-byikit bafee esim-byikit onyiryiká ne byifee esim-égot-banet efee. Ké kyikû-banet ńkyí Éferem, ocím-banet kángkáng o/mû égot etánge etánge ké bajam-byikit bafee esim-égot efee ne bajam-banet batánge. Ké byikû-banet ńkyí Manáse, ocím-banet kángkáng o/mû égot etánge etánge ké byikit bujam esim diǐkpú ne byifee esim-égot ebónge. Ké kyikû-banet ńkyí Běnjámin, ocím-banet kángkáng o/mû égot etánge etánge ké byikit bujam esim onyiryiká esim-égot efee. Ké kyikû-banet ńkyí Dǎn, ocím-banet kángkáng o/mû égot etánge etánge ké bajam-byikit bachât esim-byikit byifee ne égot echât esim bajam-banet batánge. Ké kyikû-banet ńkyí Ásha, ocím-banet kángkáng o/mû égot etánge etánge ké bajam-byikit bafee ne din esim-égot efee ne bajam-banet batánge. Ké kyikû-banet ńkyí Nafatályi, ocím-banet kángkáng o/mû égot etánge etánge ké bajam-byikit bafee esim diǐkpú ne byichât ne égot efee. Ocím-banet omúmú ké byikû-banet ámbyi kángkáng kyikit kyibónge o/mû égot etánge etánge ké égot-byikit echât esim-byikit byichât ne égot-banet efee esim-bajam-banet bafee esim diǐkpú.

⁴⁷ Ba*da/sáng azîn nyí kyikû-banet ńkyí Lyíva ne byikû-banet ḿbyí áku*

⁴⁸ ké nǎ, Óburúkpâbí o/mû o/sét Músis o/fu,

⁴⁹ ké nkéré a-kú a-pan n banyinchéng ḿbé ba/kwárê ké bǎmkpóngé-súja echi, *dachi a-pan ḿbé kyikû-banet ńkyí Lyíva*.

⁵⁰ Tî kámbé ba-kûtún mpyep ejí ne kángkáng byěm ḿbyí mpyep ámu. Mbé ba/chi ba-kûtû kámú ne byěm emen, ba-chi bǎmkpóngé ké mǔ, ba-bi boompyep ebe ba-wâng kámú.

⁵¹ Nang nkéré orá nké ba/jaa ne boompyep enen, banet-Lyíva ba-man ba-bú mpyep ámu ba-chîdabi kámú ké oshê enen mú ofyîfî. Onet okíri mú odafárâng mpyep mún, baju ǎ.

⁵² Banet-Ézerel ḿbé áku ba/chi ba-bi boompyep ebe ké kyikit ńkyí ba/tî kámbé, ké byikim ké byikim, kyikû-banet nang kyirá kyitî ekap nyí ebe.

⁵³ Nké banet ḿbé Lyíva ba/chi ba-bi ba-wâng mpyep ejí ba-kûbám kámú eringe onet nang obónge oo*fárâng kámú* o-chi kafâ ka-sa mě ne banet-Ézerel*.

⁵⁴ Banet-Ézerel kâng ba/chi kángkáng byěm ḿbyí Óburúkpâbí o/kye Músis busa o/fu, ochi.