Nehemyâ 9 - Bokyi Bible

Banet-Ézerel ba/sét Byibî Ebe

^1-2 Ké ací bujam ne anyii ké otukáku ámu obónge, banet-Ézerel ba/cibi kyikit kyibónge ké esong ecíp eringe nyí badatông ba/fu, byiko mbyi byi-kpú u kámbé ké byibî ebe. Mbé ba/mû baa/pap kángkáng bacinbánet ké burwám ebe. Mbé ba-fé byídí-dyikán eta ba-pwó édúkǎndú ké ashí ebe wǎ ekap nyí nyi e-tông ng bafip. Ne mbé kâng ba-bwom ba-kpet esét byibî ḿbyí mbé ne banchí ebe ḿbé kpákpá ba/chi.

³ Kyi/kúng égbáng nang echât nyí ba/kó Byije ḿbyí Osówo Óburúkpâbí ebe ba-sét kámbé, ne ké nnyinyěng-égbáng echât, mbé ba/sét byibî ebe, ba-kye Osówo Óburúkpâbí ebe ofê.

⁴ Kyikit ńkyí nyáám kyi/mû kyi/já bǎmgbán-nchi kyifen-Osówo, ne banet ḿbé ba/bwom ké nkyí ba/mû Jéshwa ne Bányi ne Kadyímyel ne Shebanyâ ne Búnyi ne Sherebyâ ne Bányi ne Kénanyi. Mbé ba/fé nshwam ne ejá kyíbóng kyíbóng ba-kye Osówo Óburúkpâbí ebe.

⁵ Bǎmgbán-nchi kyifen-Osówo ḿbé ba/sét ba/fu, mbé bakye Óburúkpâbí ofê ba/mû Jéshwa ne Kadyímyel ne Bányi ne Hashabanáya ne Sherebyâ ne Hodyâ ne Shebanyâ ne Petáya. Mbé ba-raa ba/fu, bûu n̂g nensang byi-kpee Osówo Óburúkpâbí eten. Kpee n̂g ǎ ne banyá ne banyá. Nang yeě okpee kiǐtí-dyizîn-Óburúkpâbí, nang ké akpee ekye nyí onet a*da/kwárê*.

Nshwam mú Byibî esét

⁶ Ne banet ḿbé Ézerel ba-fé nshwam mún ba/fu, Óburúkpâbí, wo kǎnchí nké amu Óburúkpâbí. Wo nké a/chi bubóng ne ékpére nyí bubóng. Wo nké a/chi esí ne baya ḿbé baryên ne kángkáng byěm ḿbyí mbyi ké mbyí. Wo nké a/kye kángkáng byěm dyikpen. Barím eyên ḿbé banong mbe ba-tíngê e kyísí ba-fé ǒ.

⁷ Wo, ǎ Osówo Óburúkpâbí, nké a/cá Ébaram a-fîm ǎ o-byí ké Ô mú mu ké Bábyílon. Wo a/yángê dyizîn emen dyi-firi Ébarahâm.

⁸ Wo a/ri a/fu, nyǐ o/fé dyityém ké wo, ne wo a/ryí ocím ne nyǐ a-sem dyizîn eyên. Wo a/ryí ǎ ocím a/fu, wo a-kyâ ǎ esí nyí banet-Kínan ne nyí banet-Hyítat ne nyí banet-Ámórit ne nyí banet-Périzit ne nyí banet-Jébus ne nyí banet-Gyígashit, a/fu, ekyú esí nyí bwǎn emen ba/chi ba-kyú. Wo a/tî ocím eyên mú a/ryí, ké nǎ, wo amu a-chi i kanong.

⁹ Wo a/ri eringe nyí banchí eten ḿbé kpákpá ba/ri busông ké Éjip. Wo a/jwo dyikô ebe ńdyí ba/kó ǒ ba/fu, wo achwáp kámbé ké baya ḿbé badakó Rêt.

¹⁰ Wo a/chi biinkaa byiko-byěm-akat byi-kim ne otu, byi-kim ne banet-ashí emen ne banet ḿbé esí emen, ké nǎ, wo a/mû a-nyît ng eringe nyí mbé ba/mû ba-cít ng banet eyên. Ne wo ké nkéré ámu a/koo kiǐtí-dyizîn ńdyí dyi/tôong tete kyirún.

¹¹ Wo a/chi kiǐfáng ké baya ḿbé baryên a-tî banet eyên a-sí kámbé ba-shwôm ké esí nyí yéyé. Banet ḿbé ba/mû ba-nwa ng ne mbé ba/jé ké kiǐríbíríbí-baya ḿbé baryên, wǎ buká ḿbú budaríbî ké baya.

¹² Wo a/kúng ófíbí a-sí kámbé ké nkéré mú esû, ne ké buchú, wo a/mee okwâ a-tông kámbé kiǐfáng.

¹³ Wo a/fím kyíbóng a-bâ kyísí ké kaku ńké Sána. Wo a/raa byiraa ne banet eyên, ne a/kye kámbé byise ḿbyí byinong, ne a/tángê kámbé byěm ḿbyí ntûntû.

¹⁴ Wo a/tángê kámbé eringe nyí mbé badatî dyicí-ékwâbashi ńdyí eyên kanong, ne ké abwô nyí Músis mú ḿgbán eyên nké wo a/kye kámbé byije eyên.

¹⁵ Ké nkéré esong e/mû e-nwa ng kámbé, wo a/kye kámbé berêt mú o/fím kyíbóng, ne a/kye kámbé omu mú o/fím ké buká ba-jwáp ké nkéré omu o/mû o-jê ng kámbé. Wo a/sét kámbé a/fu, bakoo esí nyí wo a/ryí ocím a/fu, a-kyâ kámbé.

¹⁶ Nké banchí eten ḿbé kpákpá ba/tông byiko ba-rêe atyém, ba-né byije eyên etî.

¹⁷ Mbé ba/né echi ńkyí wo a/sét. Mbé ba/ráp kángkáng byěm ḿbyí wo a/chi. Mbé ba/ráp biǐtí-akat ḿbyí wo a/chi. Ké byiko ebe etông, mbé ba/cá onet-dyishí ba/fu, obwa ne mbé esim ké Éjip wǎ básóng. Nké wo a-chi i Osówo mú mu o-pwoo ng banet. Wo amu kanong ne amu a-tông ng kyijé ne kafâ kaa*sa ǒ babap*. Bafip eyên ḿbé amu a-ri ng banet mbe kiǐtí. Wo a*da/né kámbé*.

¹⁸ Mbé ba/chi orím-bukye wǎ otyép-mpong ne ba/raa ba/fu, orím-bukye ámu nké o/fîm kámbé ba-byí ké Éjip. Óburúkpâbí, edángé nyí ba/kye ǒ ee*nwa eri*.

¹⁹ Nké wo a*da/mîng kámbé ányi ké kyikim-dyikán* ké nǎ, bafip eyên ḿbé adari banet mbe kiǐtí. Wo a*da/kúng kámbé ófíbí ne okwâ* ḿbyí byi/tông kámbé kiǐfáng ké buchú ne ké esû*.

²⁰ Ké kanong eyên, wo a/sét kámbé ńkyí badachi. Wo a/nen kámbé ké berêt mú badakó mána ne a/kye kámbé omu ba-jwáp.

²¹ Ké bajam-aje bafee, ké kyikim-dyikán, wo a/kye kámbé kángkáng byěm ḿbyí mbé ba/mû ba-ryuu ng. Byídí ebe byi*da/kâa* ne byiká ebe byi*da/mut*.

²² Wo a/kye kámbé busa ba-kpógê eshê ne batu ḿbé mbe ké esí nyí e/fárâng nyí ebe. Mbé ba/kpógê esí nyí Héshibon, nyí Otu Síhon o/mû otu, ne esí nyí Báshan nyí Otu Ôok o/mû otu.

²³ Wo a/kye kámbé bwǎn chwóó wǎ eringe nyí ékpére nyi kyíbóng, ne a-chi kámbé ba-kpógê, ba-kyú ké esí nyí a/ryí ocím a/fu, wo a-kyâ banchí ebe ḿbé kpákpá.

²⁴ Mbé ba/koo esí nyí Kínan, wo a/kpógê banet ḿbé ba/mû ba-kyú u ányi. Wo a/kye banet eyên busa ḿbú badachi eringe nyí kyi/nyîn kámbé ne banet cibicibi ne batu ḿbé Kínan.

²⁵ Banet eyên ba/koo eshê nyí ba/mû ba/ku kányí kanong kanong ne esí nyí edanwa byiryíng ne byise ḿbyí byi/mû ne esang pwat ne byikit ḿbyí badatim omu ḿbyí ba/mû baa/sím ne byifát-byichí ḿbyí byidazím byirim wǎ ólif. Mbé ba/ryí kángkáng byěm ḿbyí ba/mû ba-ryuu ng, ne ba/rêe baryên. Mbé ba/jwo bunyîn kángkáng byěm ḿbyí wo a/kye kámbé.

²⁶ Nké banet eyên ba/bírî bunwa ne wo ba-né echi ńkyí a/sét kámbé. Mbé ba/bírî byije eyên esim. Mbé ba/ju bamkpábé ḿbé badasét byiraa eyên, ḿbé ba/kuri kámbé ekó, mbé ba/sét kámbé ba/fu, babírî ba-kâm ǒ. Mbé ba/dángê ǒ kángkáng nkéré.

²⁷ Ké bubwô ámbu, wo a/mîng banet-bushwôn ebe ba-kpógê kámbé ba-firi batu ebe. Ké nkéré mú afaníkong ebe, mbé ba/kó ǒ ba/fu, wo achwáp kámbé, ne wo a/faa kámbé ejá áku kyíbóng. Ké kiǐtí-bafip eyên ńkyí amu a-ri ng banet, wo a/twóm kámbé banet-ashí ḿbé ba/nyii kámbé ké abwô-banet-bushwôn ebe.

²⁸ Ké nkéré afaníkong a*fí to* mbé ba/chîchi byibî, ne wo a/chîmîng banet-bushwôn ebe ba-kpógê kámbé. Nang ké nkyi éné, nkéré mú mbé ba/saa byiko ké byibî ebe ba-bí ǒ ba/fu, wo anyii kámbé, wo a/jwo áku kyíbóng, ne kampén chwóó ké kiǐtí-bafip eyên ḿbé amu a-ri ng banet, wo a/nyii kámbé.

²⁹ Wo a/kuri kámbé ekó a/fu, mbé bachi eringe nyí wo amu a-tángê e. Nké ké byiko etông, mbé ba/né byije eyên, nang ké byije eyên etî mbyi bukwóp-dyikpen. Ké dyishí eshwane, mbé ba/né echi ńkyí wo a/sét.

³⁰ Kángkáng aje, wo a/kuri kámbé ekó degere. Wo a/fé bamkpábé eyên byiraa a/fu, basét. Nké banet eyên ba/mû ba/tim atông. Ké bubwô ámbu, wo a/mîng eshê nyí áku e-kpógê kámbé.

³¹ Nang ké nkyi éné, ké bubwô-kiǐtí-bafip eyên ńkyí adari banet, wo a*da/né kámbé* a-ju nang kámbé. Wo amu Osówo mú mu kanong ne mú odari banet bafip.

³² Ô Osówo mú eten, wo a/rêe kanong kanong. Wo a-chi i bushî ne busa eyên boo*nwa eri*. Wo a-tî ng kanong kanong ocím eyên mú a/ryí. Kyi-fím ké nkéré mú batu ḿbé Asyírya ba/cít bě tete kántîk, be bii/ri busông kanong kanong. Batu eten ne banet-ashí eten ne banchi kyifen eten ne bamkpábé eten ḿbé badasét byiraa eyên ne banchí eten ḿbé kpákpá ne kángkáng banet eten baa/ri busông. Zîim a-ri eringe nyí be bii/ri busông.

³³ Wo a/chi kanong ńkyí a/kye bě busông. Wo amu a-chi i kanong nang ké be bii/chi byibî.

³⁴ Banchí eten ḿbé kpákpá ne batu eten ne banet-ashí eten ne banchi kyifen eten ba*da/tî byije eyên*. Mbé ba*da/jwo ńkyí wo a/sét* ne ekó nyí a/kuri*.

³⁵ Batu ḿbé wo a/cá ba/tún banet eyên ké nkéré mbé ba/mû ba-kyú u ké esí nyí e/rêe nyí edanwa byiryíng nyí wo a/kye kámbé. Nké mbé ba*da/né byibî echi* ba-kye ǒ ofê*.

³⁶ Kántîk, be byi/firi básóng ké esí nyí wo a/kye bě, ké esí ńnyín nyí edanwa, nyí nyi e-kyâ bě byiryíng.

³⁷ Ńkyí esí nyi e-kyâ nkyi kyi-jâ kyi-kâm batu ḿbé wo a/tî bě, ké nǎ, be byi/chi kyibî. Mbé mbe ba-chi i ńkyí kyi/nyîn kámbé ne be ne byitú eten, ne be byimu ké kiǐtí-bafip.

Banet-Ézerel ba/ryí Ocím ba-sáng Azîn Ebe Kyísí

³⁸ Ké bubwô ḿbú kángkáng byěm ḿbyí bii/chi, be banet ḿbé Ézerel nyín byi/ryí ocím byi-sem Óburúkpâbí byi-sáng kyísí, ne banet-ashí eten ne bǎmgbán-nchi kyifen eten ne banchi kyifen eten byi/tî ekap eten ké mǔ.