Nehemyâ 8 - Bokyi Bible

Ézara o/kó Byije o-sét Banet-Ézerel

¹ Ké nkéré kii/byí etukáku káchâtkányi, kángkáng banet ḿbé Ézerel baa/jê ké eshê ebe. Ké mbwôp kashú-dyicí ńdyí otukáku ámu, mbé kángkáng ba/cibi ké Jerúsélem, ké ntim-kyikit ké dyifyi ńdyí badakó Omu. Mbé ba-bí Ézara mú nchi kyifen-Osówo ne nkwâa Byije ḿbyí Óburúkpâbí o/kye Músis o-kye banet-Ézerel ba/fu, obâ ne Nwet-Byije-Músis.

² Ké bubwô ámbu kâng, Ézara o/kúng kámú o-bâ ne mǔ ké kyikit ńkyí banet baa/cibi, banyinchéng ne banyinyi ne bwǎsíng ḿbé baa/kán ba-byí ké chwǒm enyît.

³ Nyǐ o/kó Byije-Músis ányi ké ntim mú ké dyifyi o-sét kámbé kyi-fím ké dyicófóróng tete esû e-kán, ne mbé kángkáng ba/fwôo atông kanong kanong ba-jwo.

⁴ Ézara o/bwom kyíbóng-kyikit ńkyí ba/bi ké byichí ké bubwô-ncibi ámu. Banyinchéng ḿbé ba/bwom ǎ kyicê-bubwô-etyebéng ba/mû Matyítya ne Shéma ne Anáya ne Oráya ne Hyíkya ne Masáya, ne ḿbé ba/bwom ǎ kyicê-bubwô-eku ba/mû Pedáya ne Myíshal ne Makyíja ne Háshum ne Háshíbadana ne Zákaryâ ne Meshúlam.

⁵ Ńdyí Ézara mu cip ányi kyíbóng-kyikit ánkyi nyáám o-shwôm banet, mbé kángkáng ba/mû ba-tún n ǎ. Ńdyí nyǐ o-bâa ng nwet ámu o-bâ, mbé kángkáng ba/bûu nensang.

⁶ Ézara o-raa o/fu, kpee n̂g Óburúkpâbí mú mu kiǐtí-Osówo. Kángkáng banet ba-bêem abwô ebe kyíbóng ba-faa ba/fu, kyi/bát kyikyú éné. Mbé ba-tím arông kyísí ne bashú ebe kyísí ba-kye Óburúkpâbí ofê.

⁷ Mbé kâng ba-bûu ba-bwom ké byikit ebe ne bǎmgbán-nchi kyifen-Osówo ḿbé ba/sét kámbé kyikû ne dyishí-Byije-Músis ba/mû Jéshwa ne Bányi ne Sherebyâ ne Jámin ne Ákup ne Shabetyâ ne Hodyâ ne Masáya ne Kelyíta ne Azaryâ ne Józábat ne Hánan ne Pelyâ. [

⁸ Mbé ba/kó Byije ḿbyí Músis ké ejá-oshê ebe, ké nwet-byije ne ba/sét dyishí ne kyikû] eringe nyí banet badajwo kámbyí kanong kanong.

⁹ Ké nkéré banet-Ézerel ba/jwo ńkyí Byije-Músis mbyi byi-ryuu ng, byiko byi/kpú kámbé ḿbyí mbé ba/kpet etii bukyû. Ne Nehemyâ kâng mú onet-dyishí ne Ézara mú nchi kyifen-Osówo ne nkwâa Byije-Músis ne bǎmgbán-nchi kyifen-Osówo ḿbé ba/mû ba-sét ng kyikû ne dyishí-Byije ba-sét kángkáng banet ba/fu, dyicí ńdyí kyirún dyi/já Osówo-Óburúkpâbí enen. Ké bubwô ámbu, ben ba*dachi ba-tii bukyû* ba-ta nang dyikán*.

¹⁰ Kántîk, ca n̂g dyije kâng ba-da-chi dyijî. Kyii n̂g byiryíng enen ne bato ba-kye banet ḿbé ba*fí ne mbyí chwóó*. Dyicí ńdyí kyirún dyi/já Óburúkpâbí eten. Ké bubwô ámbu, *da n̂g ekyú ké bafip*. Bunyîn-dyityém ḿbú Óburúkpâbí mu o-kyâ běn bu/chi bu-chi běn ba-shwane.

¹¹ Bǎmgbán-nchi kyifen-Osówo ba-cen ké byikit ba-chee ng banet atyém ba-câ, ba-sét ng kámbé ba/fu, ba*dakyú ké bafip ké dyizong-dyicí wǎ ńdyín*.

¹² Ne kángkáng banet kâng ba/dim dyijê ba-da-ryí byiryíng ba-jwáp bato ké bunyîn-dyityém, ba-kyii ńkyí mbe ne nkyí ne barî, ké nǎ, mbé ba/jwo ńkyí ba/mû baa/kó ba-sét kámbé.

Dyijî-Kyifen ńkyí Boompyep ebi

¹³ Ké orî-dyicí, banet-ashí-byikû-banet cibicibi ne banchi kyifen-Osówo ne bǎmgbán-nchi kyifen-Osówo ba/dim ba-kâm Ézara byěm ekwâa ḿbyí Byije-Músis byi/sét.

¹⁴ Mbé ba/ri ba/fu, Byije ḿbyí Óburúkpâbí o/kye Músis o/fu, okye banet-Ézerel byi/kye busa byi/fu, banet-Ézerel bakûkyú ké boompyep ké dyijî-kyifen ńkyí boompyep ebi. [

¹⁵ Ké bubwô ámbu, mbé ba/twóm byiraa ḿbyín ba/fu,] basét ké Jerúsélem kángkáng ne eshê nyí áku, ba/fu, ca n̂g ké eku ba-bâ ne byire-byichí ḿbyí badakó pyîn ne ḿbyí ólif ne ḿbyí myítil ne ḿbyí byichí byikíri to ne achiche ḿbyí badachi boompyep wǎ eringe nyí ba/sáng ké Byije-Músis.

¹⁶ Banet kâng ba-kúng byire-byichí ba-bi boompyep kyíbóng-bambwôm-byise ebe ne ké bufâ-byibám ebe ne ké kafâ-kabám ńké kiǐtí-kyise-kyifen-Osówo echi ne ké bantim-byikit ebe ké dyifyi ńdyí badakó Omu ne ké ńdyí badakó Éferem.

¹⁷ Kángkáng banet ḿbé ba/fím ké byikit ḿbyí ba/mû ba/kúng kámbé ba-jâ ne mbé ba/bi boompyep ba-kyú ké mbú. Nyín kyi/mû mbwôp kashú-nkéré mú ba/chi kánkyí kyi-fím ké nkéré mú Jóshwa mú wǎn-Nûn, ne nang yeě o/mû ké bunyîn-dyityém.

¹⁸ Kyi-fím ké mbwôp kashú-dyicí ńdyí dyijî tete nkuli kyikû-dyicí, mbé ba/kó kyikim-Byije-Músis kángkáng dyicí. Mbé ba/chi kyifen ké ací káchâtkányi, ne ké dyicí ńdyí ací nyíryinyi, mbé ba/chi nkuli kyikû-kyifen wǎ eringe nyí Byije-Músis byi/sét.