Nehemyâ 6 - Bokyi Bible

Ba/nam Nehemyâ Dyiju

¹ Sábalat ne Tobyâ ne Géshem ne banet-bushwôn eten ḿbé áku ba/jwo ba/fu, be bii/bi ekpe e-man ne afîm a*fí to ké nyǐ* nang ké byi*da/fé ne afyi ké ecím-afyi*.

² Ké bubwô ámbu, Sábalat ne Géshem ba-twóm kyitwóm kyi-kâm mě ba/fu, me nkâm kámbé ké oshê obónge mú ké owo mú Onó. Nké mbé ba/mû ne kyibî-okabe kyi-kim ne me.

³ Me n/twóm banet-kyitwóm n/fu, basét kámbé ba/fu, me mu n-chi i kiǐtí-bǎmkpóngé ḿbé mm*ba/chi m-man ebê áku*. Me mm*ba/chi m-mîng bǎmkpóngé ba-waa m-bâ m-ba-ri běn*.

⁴ Mbé ba-twóm kyitwóm ánkyi kyibónge kampén kanyii kyi-kâm mě, nang nkéré orá, me n/twóm kámbé ejá ányi ebónge.

⁵ Sábalat o-twóm ḿgbán emen obónge o-kâm mě ne kyitwóm ké kampén katánge. Kyitwóm ńkyín kyi/mû wǎ léta mú ba*da/cít*.

⁶ Ba/sáng ba/fu, Géshem mu o-sét ng mě to o/fu, banet mbe ba-sét ng ké eshê ba-câ ba/fu, wo ne banet-Jûs bamu ba-nam m ba/fu, ben babírî bunwa. Bubwô ámbu nké ben bamu ba-bwât ng ekpe ba-bi. Nyǐ mu o-sét ng o/fu, wo a/tî okabe mú wo a/chi a-chi byiko eyên wǎ onet-dyishí,

⁷ ne wo aa/tóbê kyi-kim ne bamkpábé ḿbé badasét byiraa-Osówo, ḿbé ba/chi ba-sét ké Jerúsélem ba/fu, wo nké amu onet-dyishí mú Júda. Otu mú Pésha o/chi o-jwo kyi-kim ne nkyí. Bubwô ámbu nké me mu n-sét ng ǒ n/fu, wo kâm mě byi-raa kyi-kim ne nkyí.

⁸ Me n/twóm ba-sét ǎ n/fu, chwǒm kyi*fí nang kyibónge ńkyí amu a-sét ng ńkyí nkyi ntûntû*. Mbyí kángkáng byi/fím ké kakim eyên.

⁹ Mbé ba/mû ba-kan n ba/fu, mbé ba-fâ bě bushî be byi-mîng bǎmkpóngé. Me n-fé nshwam n/fu, kántîk, ǎ Osówo, chi mě n-shwane.

¹⁰ Ké nkéré ámu, me n/dim edari Shemáya mú wǎn-Dyiláya mú wǎn-Mehetábel, mú o/mû o*fí o-man n ebyí kyíjí*. Nyǐ o-sét mě o/fu, me ne wo byi-man byi-da-rem burwám ké ochíchí-nfût-ociring mú kiǐtí-kyise-kyifen-Osówo echi byi-fín afyi, ké nǎ, mbe ba-bâ ǒ ebaju. Mbe ba-bâ ǒ ebaju ne buchú.

¹¹ Ne n-faa n/fu, me n*fí dyizong-onet mú odachêe o-rem m*. Wo a/kabe a/fu, me n/chi n-kan enyii dyikpen ejí n-chêe n-rem ké kiǐtí-kyise-kyifen-Osówo echi*? Me nn*ce*.

¹² Ké nkéré nn/kabe kyi-kim ne nkyí, me n/nyît n/fu, Osówo o*da/twóm Shemáya* nké Tobyâ ne Sábalat nké baa/kye ǎ ngu ba/fu, osét mě éné.

¹³ Mbé ba/yámê ǎ ba/fu, ofé mě bushî n-róng ké byibî eringe mbé bada mě ebên dyizîn ba-dángê mě.

¹⁴ Me n-fé nshwam n/fu, Osówo, zîim ńkyí Tobyâ ne Sábalat baa/chi, a-kye kámbé busông. Zîim onyinyi ámu mú odabángê Nodyâ ne kángkáng bamkpábé ḿbé áku ḿbé ba/kan ba/fu, mbé ba-fâ mě bushî.

Bǎmkpóngé ba/man

¹⁵ Ké nkéré ací a/shwôm bajam bafee esim diǐkpú ne afee nyí ba/chi bǎmkpóngé, ekpe emúmú e/man ké ací bujam esim atánge ké otukáku mú Élul.

¹⁶ Ké nkéré banet-bushwôn eten ḿbé ké eshê nyí wângwâng ba/jwo ńkyín, mbé ba/ri ba/fu, éshwân ee/wuri kámbé, ké nǎ, nang yeě o/nyît o/fu, Osówo nké o/kye ochwâp ne bǎmkpóngé ámbe ba-man.

¹⁷ Ké nkéré ámu, kángkáng banet-ashí-banet-Jûs ba/mû mbe ba-sáng ng baléta ba-kyâ Tobyâ.

¹⁸ Banet chwóó ké Júda ba/mû ba/bwom ǎ ké esim, ké nǎ, Shekanyâ mú wǎn-Ára, mú mu bonchí-onyi emen o/mû onet-Jûs. Ké nnyinyěng, Jehohánan mú wǎn emen oo/bé wǎn-onyinyi mú wǎn-Meshúlam, mú wǎn-Berekyâ.

¹⁹ Banet ba/mû ba-bwom m mě ké bushú ba-raa ng kyi-kim ne kángkáng byěm ḿbyí byinong ḿbyí Tobyâ oo/chi, ne ba-sét ng ǎ kángkáng byěm ḿbyí me n/raa. Ne nyǐ o*da mě emîng baléta ḿbé mu o-fâ mě bushî esáng*.