Nehemyâ 13 - Bokyi Bible

Ba/pap Bacinbánet

¹ Ké nkéré mbe ba-kó ng byije-Músis ba-sét ng banet-Ézerel, ba/byí ké kyicê-nwet ńkyí kyi/fu, onet-Ámon nang mú Mówep o*fí nang obónge mú bada ǎ ebángê o-cibi ne banet-Osówo*.

² Ké nǎ, banet-Ámon ne ḿbé Mówep ba*da/kye banet-Ézerel byiryíng ne omu* ké nkéré banet-Ézerel mbe ba-mîng ng Éjip*. Mbé ba/bwa ba-kye Bálim akpuga ba/fu, oshú banet-Ézerel, nké Osówo eten o/pín kyishû ánkyi kyi-firi ojware.

³ Ké nkéré banet-Ézerel ba/jwo ké ba/kó kyije ńkyín, ba/pap kángkáng bacinbánet ké oshê.

Byěm ḿbyí Nehemyâ o/yángê

⁴ Elyǎship mú nchi kyifen-Osówo, mú o/mû onet-dyishí-banfût-byěm etî ḿbé kiǐtí-kyise-kyifen-Osówo echi, o/mû o-tyeem m ejá kanong kanong ne Tobyâ.

⁵ Nyǐ o/bángê Tobyâ o-kúng kiimbâng-nfût mú ba/mû ba/tî ba/fu, ba-kû ng etî eyáré nyí esang-byichí ne burwan ne byěm ḿbyí kiǐtí-kyise-kyifen-Osówo echi ne eyáré nyí e/já banchi kyifen-Osówo ne byicê-esang-byichí ne bato ne bakút-ólif ḿbyí ba/kyii ké byikim diǐkpú ba-kye bǎmgbán-nchi kyifen-Osówo ne bankim ane ḿbé kiǐtí-kyise-kyifen-Osówo echi ne bambâm kiǐtí-kyise-kyifen-Osówo echi kyibónge kyibónge.

⁶ Ké nkéré ámu, me m/mû n*fí ké Jerúsélem* ké nǎ, ké dyije ńdyí Otu Atazékez oo/rí aje bujam esim diǐkpú ne afee wǎ otu mú Bábyílon, me m/mû mm/bwa esim kyikit emen. Ka/chîrí kaǎnyín, me n-koo busa ne nyǐ

⁷ n-fyi ké Jerúsélem. Ányi ké Jerúsélem nké byiko byi/kaa mě ńdyí n/ri n/fu, Elyǎship oo/mîng Tobyâ ne nfût obónge mú kiǐtí-kyise-kyifen-Osówo echi.

⁸ Kafâ ka/bírî mě kanong kanong n-wuri byěm ḿbyí Tobyâ m-pwó kyíjí.

⁹ N-kye busa n/fu, basoo banfût ámbe ba-chîkye Osówo, ba-bwa ne byěm-kiǐtí-kyise-kyifen-Osówo echi ne esang-byichí ne burwan ḿbyí ba/yárê ba-fé ké kafâ.

¹⁰ Me n/jwo to ba/fu, bankim ane ḿbé kiǐtí-kyise-kyifen-Osówo echi ne bǎmgbán-nchi kyifen-Osówo ḿbé áku baa/dim ké Jerúsélem ba-bwa ké byifát ebe, ké nǎ, ba*fí ba-kyâ kámbé ńkyí badaryí kyi-kwárê kámbé*.

¹¹ Me n/raa ne banet-ashí-bǎmkpóngé-okákárá n/fu, ebóng kyi/chi ńkyí mbé ba/mîng banet ba*da/chîfé busa ké kiǐtí-kyise-kyifen-Osówo echi*. Ne n-da-kpî bǎmgbán-nchi kyifen-Osówo ne bankim ane ḿbé kiǐtí-kyise-kyifen-Osówo echi m-ba-tî ba-chîkpet bǎmkpóngé echi.

¹² Banet-Ézerel kángkáng kâng ba-chîkpet ebê ne byikit-esang-byichí ne bato ne bakút-ólif ebe kyibónge kyibónge ḿbyí ba/kyii ké byikit diǐkpú ba-fé ké banfût-byěm etî ḿbé kiǐtí-kyise-kyifen-Osówo echi.

¹³ Banet ḿbé me n/tî wǎ banet-ashí-banfût-byěm etî ba/mû Shelemyâ mú nchi kyifen-Osówo, ne Zádok mú nkwâa Byije-Músis, ne Pedáya mú ḿgbán-nchi kyifen-Osówo, Hánan mú wǎn-Záku mú o/mû wǎn-Matanyâ, o/mû onet mú odakûchwáp kámbé. Me m/mû n-nyît ng n/fu, banyinchéng ḿbén mbe banet ḿbé badatî dyityém ké mbé wǎ banet ḿbé baa*lángê álángé ké byěm ekyii ba-kye bábe-banet-bǎmkpóngé*.

¹⁴ Ne n-fé nshwam n/fu, Osówo ejí, kûzîim kángkáng byěm ḿbyín ḿbyí me nn/chi n-kye kiǐtí-kyise-kyifen eyên echi ne bǎmkpóngé ḿbé kyise eyên.

¹⁵ Ké nkéré ámu, me n/ri banet ké Júda mbe ba-nwárê ng byirim-byichí ba-fîm m babî ké dyicí-ékwâbashi eten. Bakíri ba/mû ba-bwá ng esang-byichí ne bato ne byirim-byichí ne byěm byikíri ké boonyam-atû ebe ba-yip ng kámbyí ba-jâ ne mbyí ké kafâ-Jerúsélem. Me n/kuri kámbé ekó n/fu, ba*dachi ba-shee chwǒm nang kyibónge ké dyicí-ékwâbashi eten*.

¹⁶ Banyinchéng ḿbé ba/fím oshê mú Táya ba/mû ba-kyú u ké Jerúsélem, ne mbé ba/bê ne ekworê ne kángkáng azong-byěm ké oshê ebashee banet eten ké dyicí-ékwâbashi.

¹⁷ Me n/raa ne banet-ashí ḿbé Jûs n/fu, kû n̂g eri kyibî ńkyí bamu ba-chi i. Ben bamu ba-bên n dyicí-ékwâbashi eten.

¹⁸ Ochíchí-chwǒm mún nké kyi/chi ne Osówo o-kye banchí enen ḿbé kpákpá busông ké nkéré o/bê ne bukyû ké oshê mún. Nang ké nkyi éné, ben bamu ba-chî ng efé busa ḿbú badachîchi Osówo o-sa kafâ ne Ézerel ké dyicí-ékwâbashi eten ńdyí bamu ba-bên n.

¹⁹ Ké bubwô ámbu, me n/kye busa n/fu, bakûcít afyi-oshê kyi-fím ké nkéré mú dyicí-ékwâbashi eten dyidakpet, ké dyikurúku-kyitwom-ékwâbashi, ne ba*dachi ba-bâa* tete dyicí-ékwâbashi dyi-shwôm. Me n/tî kyicê-banet ejí ké afyi n/fu, ba*dachi ba-bángê ba-bâ nang chwǒm kyibónge ké kafâ-oshê ké dyicí-ékwâbashi*.

²⁰ Bancen busî ḿbé mbe ba-shee ng kángkáng azong-byěm ba/rí ké esim-ekpe-oshê nyí kyíjí nang kabónge nang kafee, ké kyitwom-ékwâbashi eten.

²¹ Me n/kuri kámbé ekó n-sét kámbé n/fu, kii*chwáp běn ńkyí badakyú ányi kyíjí ba-bám m ba/fu, dyicófóróng dyicé*. Â ben ba/chîkan ńkyín, me n/chi n-nwa ne ben ké busa. Kyi-fím ké nkéré ámu kyi-ca kashú, mbé ba*da/chîbê ké dyicí-ékwâbashi eten*.

²² Me n/kye busa n/fu, bǎmgbán-nchi kyifen-Osówo basoo byiko ebe ba-kye Osówo, ba-dim edabám afyi ba-ri ba/fu, banet-Ézerel mbe ba-tî ng dyicí-ékwâbashi kanong. Me n/fé nshwam n/fu, ô Osówo, kû mě ezîim ké bubwô ńkyín to, ne ri mě bafip ké bubwô-kyijé eyên ńkyí kiǐtí.

²³ Me n/ri to ké nkéré ámu n/fu, banyinchéng-Jûs chwóó baa/bé banyinyi ḿbé ba/fím Áshídot ne Ámon ne Mówep.

²⁴ Kyicê-bwǎn ebe ba/mû ba-raa ng oshê mú Áshídot nang oshê okíri, ne ba/mû baa*man eraa oshê eten*.

²⁵ Me n/raa ne ḿbé banyinchéng n-kó Osówo n/fu, oshú kámbé, ne m/mín kámbé, n-tut kámbé eji. Ne n/chi kámbé ba-sem dyizîn ńdyí Óburúkpâbí ba/fu, mbé ne bwǎn ebe baa*ba/chi ba-chîbé barî ne bacinbánet ne banyá*.

²⁶ Me n/raa n/fu, banyinyi ḿbé bacinbánet nké ba/chi Otu Sólómon o-chi kyibî. Nyǐ o/mû onyinchéng mú o/mû kiǐtí o-shwôm otu nang orá mú eshê nyí áku. Nyǐ o/mû o-jê ng Osówo, ne Osówo o/chi ǎ otu mú Ézerel kángkáng, nké nyǐ o/róng ké kyibî ńkyín.

²⁷ Be byileme kyiká-bucen enen ké banyinyi-bacinbánet ebé byi-né echi ńkyí Osówo eten o/sét bě dí.

²⁸ Jwâda o/mû wǎn mú Elyǎship mú otu-nchi kyifen-Osówo. Nké wǎn mú Jwâda obónge o/bé wǎn-Sábalat mú onyinyi, mú o/fím oshê mú Bét-Hóron. Ké bubwô ámbu, me n/chi Jwâda o-dim ké Jerúsélem.

²⁹ N-chîfé nshwam n/fu, ô Osówo, kûzîim eringe banet ámbe ba/bên bǎmkpóngé ḿbé nchi kyifen eyên ne ocím eyên mú a/ryí ne banchi kyifen eyên ne bǎmgbán-nchi kyifen eyên.

³⁰ Me n/soo banet-Ézerel ké kángkáng byěm ḿbyí mbyi byěm-bacinbánet n-kye ǒ, ǎ Osówo. Me n/chi byije n-tî banchi kyifen eyên ne bǎmgbán-nchi kyifen eyên eringe nang yeě odanyît bǎmkpóngé ḿbé emen.

³¹ Me n/tóbê kyi-kim ne ekwón nyí badakúng ba-shí eyáré nyí bambwôp kashú-byíkwôn ḿbyí badafuu. Ô Osówo, kûzîim byěm ḿbyín kángkáng ké kanong ńké ejí.