Nehemyâ 12 - Bokyi Bible

Azîn-Banchi Kyifen-Osówo ne Bǎmgbán Ebe

¹ Nyín něen azîn-banchi kyifen-Osówo ne bǎmgbán-nchi kyifen-Osówo ḿbé ba/fím ba-fyi ne Zerubábel mú wǎn-Shátyel ne Jóshwa mú otu-nchi kyifen-Osówo ké eshê nyí ba/mû ba/kúng kámbé ba-jâ.

^2-7 Banchi kyifen-Osówo ba/mû Seráya ne Jeryimáya ne Ézara ne Amaryâ ne Máluk ne Hatúshi ne Shekanyâ ne Réhum ne Mérémot ne Édo ne Gyíneto ne Abyíja ne Myijámin ne Madyâ ne Byíga ne Shemáya ne Jwârip ne Jedáya ne Sálu ne Ámik ne Hyíkya ne Jedáya. Banyinchéng ḿbén ba/mû banet-ashí ké burwám-bábe-banchi kyifen-Osówo kángkáng ké nkéré mú Jóshwa.

⁸ Bǎmgbán-nchi kyifen-Osówo ḿbé ba/mû banet ḿbé badakwán ekwan nyí asǎma ekó ba/mû Jéshwa ne Byínwe ne Kadyímyel ne Sherebyâ ne Júda ne Matanyâ.

⁹ Banet ḿbé ba/mû ba-bángê e ekwan ányi ba/mû Bakabukyâ ne Onó ne bábe-bǎmgbán-nchi kyifen-Osówo.

Bwǎn-Jóshwa ne Otu-Nchi Kyifen-Osówo

¹⁰ Jóshwa o/mû bonchí mú Jwâkim. Jwâkim o/mû bonchí mú Elyǎship. Elyǎship o/mû bonchí mú Jwâda.

¹¹ Jwâda o/mû bonchí mú Jónátan ne Jónátan o/mû bonchí mú Jádwa.

Banet-Ashí-Byikû-Banet-Banchi Kyifen-Osówo

^12-21 Ké nkéré Jwâkim o/mû otu-nchi kyifen-Osówo, banchi kyifen-Osówo ḿbé ba/mû banet-ashí-byikû-banet-banchi kyifen-Osówo ba/mû Meráya mú o/mû onet-dyishí-kyikû-banet ńkyí Seráya ne Hanánya mú o/mû onet-dyishí-kyikû-banet ńkyí Jeryimáya ne Meshúlam mú o/mû onet-dyishí-kyikû-banet ńkyí Ézara ne Johohánan mú o/mû onet-dyishí-kyikû-banet ńkyí Amaryâ ne Jónátan mú o/mû onet-dyishí-kyikû-banet ńkyí Malúkyi ne Josêf mú o/mû onet-dyishí-kyikû-banet ńkyí Shebanyâ ne Ádina mú o/mû onet-dyishí-kyikû-banet ńkyí Hárim ne Hekyâ mú o/mû onet-dyishí-kyikû-banet ńkyí Meráyat ne Zákaryâ mú o/mû onet-dyishí-kyikû-banet ńkyí Édo ne Meshúlam mú o/mû onet-dyishí-kyikû-banet ńkyí Gyíneton ne Zíkiri mú o/mû onet-dyishí-kyikû-banet ńkyí Abyíja ne [mú] Myínyamin ne Pyityâ mú o/mû onet-dyishí-kyikû-banet ńkyí Mowadyâ ne Shámwa mú o/mû onet-dyishí-kyikû-banet ńkyí Byíga ne Jehónátan mú o/mû onet-dyishí-kyikû-banet ńkyí Shemáya ne Matenyâ mú o/mû onet-dyishí-kyikû-banet ńkyí Jwârip ne Óze mú o/mû onet-dyishí-kyikû-banet ńkyí Jedáya ne Kalyâ mú o/mû onet-dyishí-kyikû-banet ńkyí Salyâ ne Ebá mú o/mû onet-dyishí-kyikû-banet ńkyí Ámik ne Hashabyâ mú o/mû onet-dyishí-kyikû-banet ńkyí Hyíkya ne Netánel mú o/mû onet-dyishí-kyikû-banet ńkyí Jedáya.

Azîn-Byikû-Banet-Nchi Kyifen-Osówo ne ḿbyí Bǎmgbán Ebe

²² Ba/sáng byěm ba-tî kyi-kim ne banet-ashí-byikû-bǎmgbán-nchi kyifen-Osówo ne ḿbé ḿbyí banchi kyifen-Osówo ké bankéré ḿbé Elyǎship ne Jwâda ne Jónátan ne Jádwa ba/mû batu-banchi kyifen-Osówo. Ba/sáng byěm ḿbyín byi-man ké nkéré Otu Daráyas o/mû otu mú Pésha.

²³ Ba/sáng azîn nyí banet-ashí-kyikû-bǎmgbán-nchi kyifen-Osówo ké nwet-byěm esáng, tete ké nkéré mú Jónátan, mú bonchí emen mú kánkán o/mû o-bángê e Elyǎship.

Bǎmkpóngé echi ké Kiǐtí-Kyise-Kyifen-Osówo echi

²⁴ Hashabyâ ne Sherebyâ ne Jéshwa ne [Byínwe] ne Kadyímyel ḿbé banet-ashí-bǎmgbán-nchi kyifen-Osówo ba/kyii bǎmgbán-nchi kyifen-Osówo ké byikim ké byikim. Byikim byifee byi/kpee Osówo burwám byi-kó barî, byi-kó ǎ asǎma wǎ eringe nyí Otu Dívit mú onet-Osówo o/sét.

²⁵ Bambâm kiǐtí-kyise-kyifen-Osówo echi ḿbé ba/mû ba-bám m banfût-byěm etî, ḿbé ba/mû fáráng ké afyi-kiǐtí-kyise-kyifen-Osówo echi ba/mû ba-bángê e Matanyâ ne Bakabukyâ ne Obadyâ ne Meshúlam ne Támon ne Ákup.

²⁶ Banet ḿbén ba/mû ké Jerúsélem ké nkéré mú Jwâkim mú wǎn-Jóshwa, mú wǎn-Jehózádak, ne ké nkéré mú Nehemyâ mú onet-dyishí mú Júda, ne ké nkéré mú Ézara mú nchi kyifen-Osówo ne nkwâa Byije-Músis.

Nehemyâ o/jware Ekpe-Oshê nyí Jerúsélem o-kye Osówo

²⁷ Ké nkéré ba/jware ekpe-oshê nyí Jerúsélem ba-kye Osówo, ba/kó bǎmgbán-nchi kyifen-Osówo ḿbé mbe ba-kyú u nang ké ebóng kyikit ba-bâ eringe nyí badafé abwô ké ojware mú ekpe ányi ba-kye Osówo ké ekwan-asǎma ekwán ne ké ane ekim ké basámba ne ké ácîng.

²⁸ Bankim ane ḿbé byikû-bǎmgbán-nchi kyifen-Osówo ba-fím ké byikit ḿbyí ba/mû ba-kyú u fáráng ne Jerúsélem ne ké eshê nyí e/fárâng Netófa

²⁹ ne ké Bét-Gyígal ne ké Géba ne ké Azámábat.

³⁰ Banchi kyifen-Osówo ne bǎmgbán-nchi kyifen-Osówo ba-soo byiko ebe ne ḿbyí banet-Ézerel cibicibi ne afyi ne ekpe nyí oshê-Jerúsélem.

³¹ Me n/kó banet-ashí ḿbé Júda n/fu, babwom kyíbóng-ekpe nyí oshê-Jerúsélem n-tî kámbé n/fu, bakyú banet-ashí-azu-banet nyí aryên aryên afee, n/fu, bacen ba-wáp oshê ba-kó ng Osówo asǎma. Mbwôp kashú-dyizu-banet dyi/jé kyicê-bubwô-etyebéng ḿbú dyifyi ńdyí badakó Biǐbyém-Byiryíng.

³² Hosháya o/cen ké esim-bankwân ekwan, kyicê-banet-ashí ḿbé Júda ba-nye ǎ.

^33-35 Banchi kyifen-Osówo ḿbé ba/nye, ne ba/mû ba-jwá ng bantán, ba/mû ba-bángê e Azaryâ ne Ézara ne Meshúlam ne Júda ne Běnjámin ne Shemáya ne Jeryimáya. Nnyinyěng-onet o/mû Zákaryâ mú wǎn-Jónátan, mú wǎn-Shemáya. Banchí emen to ḿbé kpákpá ba/mû ba-bángê e Matanyâ ne Makáya ne Záku mú o/fím kyikû-banet ńkyí Ásap.

³⁶ Banet-kyikû-banet emen nké ba/mû ba/nye ǎ, ḿbé ba/mû ba-bángê e Shemáya ne Azárel ne Myilalyâ ne Gyilalyâ ne Máya ne Netánel ne Júda ne Hánanyi. Mbé kángkáng ba/kám azong-byitógé-ane ḿbyí Otu Dívit mú onet-Osówo o/mû o-kim m. Ézara mú nkwâa byěm nké o/bwóp dyizu-banet ńdyín kashú.

³⁷ Ba/fím ké dyifyi ńdyí badakó Kaǎwán-Kace ba-yú ké kyikit ńkyí nkyi kyi-jâ ké oshê mú Otu Dívit, ba-shwôm kyibám-butu ńkyí Otu Dívit ba-bwa esim ḿbú ekpe-oshê ké dyifyi ńdyí badakó Omu, ké kyicê-oshê ńkyí óbyísû mu o-byí i.

³⁸ Dyizu-banet ńdyí áku, ḿbé mbe ba-kó ng Osówo asǎma ba/jé ké kyicê-bubwô-eku kyíbóng-ekpe, ne me n/cen ne kyicê-banet ḿbé mbe ba-bâ kámbé ké kyikû. Be byi/cen byi-shwôm kiǐnyáám-kyikit-mbâm ńkyí badakó Byikit-Berêt erám, byi-byí ké ekpe nyí eryên.

³⁹ Ne byi-fím ányi byi-shwôm [dyifyi ńdyí badakó Éferem ne ńdyí badakó Jeshóna] ne ńdyí badakó Ekworê ne kiǐnyáám-kyikit-mbâm ńkyí Hánánel ne ńkyí badakó Banet-Ashí Bajam Batánge, byi-byí ké dyifyi ńdyí badakó Etám-Ebû. Bucen eten bu/nyere ké dyifyi ńdyí adajé ké kiǐtí-kyise-kyifen-Osówo echi.

⁴⁰ Ké bubwô ámbu kâng, azu-banet amúmú nyí a/mû a-kó ng Osówo asǎma ba/ribi ké kyikit ńkyí kiǐtí-kyise-kyifen-Osówo echi. Cibicibi ne banet-ashí ḿbé ba/mû ne me,

⁴¹ banet bakíri ḿbé ba/mû ké burwám-banet ejí ba/mû banchi kyifen-Osówo ḿbé ba/mû ba-jwá ng bantán, mbé ba/mû ba-bángê e Elyǎkim ne Masáya ne Myínyamin ne Makáya ne Elyěnya ne Zákaryâ ne Hanánya,

⁴² ne banet ḿbé ba/mû ba/nye kámbé ba/mû ba-bángê e Masáya ne Shemáya ne Elyǎza ne Óze ne Jehohánan ne Makyíja ne Élam ne Éze. Bankwân ekwan ḿbé Jezaráya o/mû kámbé onet-dyishí ba/kwán ekwan ne ejá kyíbóng kyíbóng.

⁴³ Ké dyicí ándyi, ba/chi byifen-Osówo chwóó, ne banet-Ézerel ba/mû ne bunyîn-dyityém chwóó, ké nǎ, Osówo o/chi kámbé ba-kyú ké bunyîn-dyityém kanong kanong. Banyinyi ne bwǎsíng ba/fé abwô ké ojware mú ekpe ne kyicoge ńkyí ba/mû ba-chi i kyi/byí nang nyá.

Eyáré nyí Kiǐtí-Kyise-Kyifen-Osówo echi

⁴⁴ Ké nkéré ámu, ba/tî banyinchéng ḿbé badakûtún kyi-kim ne banfût-byěm etî ḿbé ba/mû ba-típ ng byěm ḿbyí kiǐtí-kyise-kyifen-Osówo echi ba-tî, cibicibi ne eyáré nyí kyikit kyibónge ké byikit diǐkpú ḿbyí bambwôp kashú-byirim-byichí ne byíkwôn ḿbyí kángkáng aje. Banyinchéng ḿbén nké ba/mû banet ḿbé badakoo byěm ḿbyí mbe ba-típ ng ké byifát ḿbyí mbyi fáráng ké eshê ba-kye banchi kyifen-Osówo ne bǎmgbán-nchi kyifen-Osówo wǎ eringe nyí Byije-Músis byi/sét. Kángkáng banet ḿbé Júda ba/mû ne bunyîn-dyityém kyi-kim ne banchi kyifen-Osówo ne bǎmgbán-nchi kyifen-Osówo,

⁴⁵ ké nǎ, mbé ba/soo byiko ebe ne byěm byikíri ḿbyí Osówo o/kye busa. Bankim ane ḿbé kiǐtí-kyise-kyifen-Osówo echi ne bambâm kiǐtí-kyise-kyifen-Osówo echi ba/chi to bǎmkpóngé ebe wǎ eringe byije ḿbyí Otu Dívit ne Otu Sólómon mú wǎn emen ba/kye.

⁴⁶ Kyi-fím ké nkéré mú Otu Dívit ne Ásap mú nkim ane ké aje nyí a/shwôm ké esim, bankim ane ba-tông ng kashú ké ekwan-akpee ne asǎma ekó ba-kye Osówo.

⁴⁷ Ké nkéré mú Zerubábel ne ké nkéré to mú Nehemyâ, kángkáng banet-Ézerel ba/kye eyáré kángkáng dyicí eringe badakpêe bankim ane ḿbé kiǐtí-kyise-kyifen-Osówo echi ne bambâm kiǐtí-kyise-kyifen-Osówo echi. Banet-Ézerel ba/kye bǎmgbán-nchi kyifen-Osówo eyáré nyí e/já Osówo, ne bǎmgbán ámbe ba/kye banchi kyifen-Osówo kyicê ńkyí kyi/já kámbé.