Nehemyâ 10 - Bokyi Bible

¹ Mbwôp kashú-onet mú o/fé bubwô kyísí ké nwet-ocím eryí ámu o/mû Nehemyâ mú onet-dyishí mú Júda mú wǎn-Hakalyâ, ne Zedekyâ o-fé ḿbú emen kyísí. Banet ḿbé ba/fé to bubwô kyísí ké mǔ ba/mû

^2-8 banchi kyifen-Osówo. Azîn ebe a/mû Seráya ne Azaryâ ne Jeryimáya ne Páshu ne Amaryâ ne Makyíja ne Hatúshi ne Shebanyâ ne Máluk ne Hárim ne Mérémot ne Obadyâ ne Dányel ne Gyíneton ne Báruk ne Meshúlam ne Abyíja ne Myijámin ne Mazáya ne Byigyâ ne Shemáya.

^9-13 Bǎmgbán-nchi kyifen-Osówo ḿbé ba/fé bubwô ba/mû Jéshwa mú wǎn-Azanyâ ne Byínwe mú onet-dyishí-kyikû-banet ńkyí Hénadat ne Kadyímyel ne Shebanyâ ne Hodyâ ne Kelyíta ne Peláya ne Hánan ne Máka ne Réhop ne Hashabyâ ne Záku ne Sherebyâ ne Shebanyâ ne Hodyâ ne Bányi ne Benyínu.

^14-27 Banet-ashí ḿbé ba/fé bubwô kyísí ba/mû Paróshi ne Páhat-Mówep ne Élam ne Zátu ne Bányi ne Búnyi ne Ázagat ne Bebyâ ne Adónyija ne Byígeba ne Ádin ne Atá ne Hezekyâ ne Ázu ne Hodyâ ne Háshum ne Béza ne Hárip ne Anátot ne Nebyâ ne Magapyâshi ne Meshúlam ne Héze ne Meshezábel ne Zádok ne Jádwa ne Pelatyâ ne Hánan ne Anáya ne Hoshâ ne Hanánya ne Háshup ne Halóhéshi ne Pyíla ne Shóbek ne Réhum ne Hashabána ne Masáya ne Áhya ne Hánan ne Ánan ne Máluk ne Hárim ne Bána.

Ocím mú ba/ryí ba-sáng Kyísí

²⁸ Ba/sáng ba/fu, be banet-Ézerel ne banchi kyifen-Osówo ne bǎmgbán-nchi kyifen-Osówo ne bambâm kiǐtí-kyise-kyifen-Osówo echi ne bankim ane ḿbé kiǐtí-kyise-kyifen-Osówo echi ne banet-bǎmkpóngé-kiǐtí-kyise-kyifen-Osówo echi ne kángkáng banet ḿbé áku ḿbé ké ofê mú Byije ḿbyí Osówo baa/pap ne bacinbánet ḿbé mbe ba-kyú u ké esí eten, ne be, cibicibi ne banyi eten ne bwǎn eten kángkáng ḿbé ba-kú ba-nyît ng chwǒm,

²⁹ byi/cibi nyín ne banet-ashí eten byi-ryí ocím byi-sem Osówo byi/fu, Osówo oshú bě â byi/bên kámú, ne byi/fu, be byikyú wǎ eringe Byije ḿbyí Osówo byi/sét ḿbyí nyǐ o/kye Músis mú ḿgbán emen o-kye bě. Byi/fu, be byi-chi i kángkáng byěm ḿbyí Óburúkpâbí eten o/sét bě o/fu, byichi, ne byi/fu, byi-tî ng kángkáng byije emen ne byěm ḿbyí mbyí mbyi byi-ryuu ng.

³⁰ Be bii*bé barî ne bacinbánet ḿbé mbe ba-kyú u ké esí eten*.

³¹ Â bacinbánet ba/bê ne esang-byichí ne nang ebóng chwǒm kyikíri ba/fu, mbé ba-bâ ng bě eshee ké dyicí-ékwâbashi eten nang ké dyicí nang dyirá ńdyí dyi/já ǒ, be bii*ré*. Ké dyije nang dyirá ńdyí ké aje káchâtkányi be bii*kpang byiryíng* ne byi-byiryi ng kángkáng afwá.

³² Kángkáng dyije, be byi-típ ng bagarâm-syílyíba batánge batánge byi-chwáp ké bǎmkpóngé ḿbé kiǐtí-kyise-kyifen-Osówo echi.

³³ Be byi/chi byi-kye byěm ḿbyín, ḿbyí badakúng ba-kye ofê ké kiǐtí-kyise-kyifen-Osówo echi, berêt mú o/já ǒ ne esang-byichí-eyáré ekye nyí kángkáng dyicí ne byitú ḿbyí badakûshí kángkáng dyicí wǎ byifen eyên echi ne eyáré nyí e/já ǒ nyí ké ací-ékwâbashi eten ne eyáré nyí ajî-byifen ḿbyí otukáku mú ofyîfî ne eyáré nyí ajî-byifen byikíri ne eyáré ekíri nyí e/já ǒ ne eyáré nyí edafîm byibî ḿbyí banet-Ézerel ne nang ebóng chwǒm kyikíri ńkyí mbe ba-ryuu ng ké kiǐtí-kyise-kyifen eyên echi.

³⁴ Be banet-Ézerel ne banchi kyifen-Osówo ne bǎmgbán-nchi kyifen-Osówo byi/chi byi-kûtwóp ámám kángkáng dyije eringe byidanyît byikû-banet ḿbyí byidakye ekwón nyí badakûshí byifen ḿbyí ba/chi ba-kye Osówo Óburúkpâbí eten wǎ eringe Byije-Músis byi/sét.

³⁵ Be kángkáng dyije byi/chi byi-kúng eyáré nyí bambwôp kashú-byíkwôn ḿbyí byimu byi-fuu ng byi-kye ké kiǐtí-kyise-kyifen-Osówo echi ne eyáré-bambwôp kashú-byirim-byichí ḿbyí byidabwam ké asín-byichí eten.

³⁶ Be byi/chi byi-kúng mbwôp kashú-wǎn-onyinchéng mú byi/fwon byi-kye banchi kyifen-Osówo ké kiǐtí-kyise-kyifen-Osówo echi ne byi-kye Osówo wǎ eringe Byije-Músis byi/sét, byi-kye Osówo. Be byi/chi byi-kye Osówo to mbwôp kashú-wǎn-mpong mú bampong eten ba/fwon ne mbwôp kashú-wǎn-ebû eten e/fwon.

³⁷ Be byi/chi byi-kúng berêt mú byi/chi ké mbwôp kashú-esang-byichí eten nyí byi/fuu kángkáng dyije ne eyáré ekíri wǎ bato ne bakút-ólif ne kángkáng azong-byirim-byichí byi-da-kye banchi kyifen-Osówo ké kiǐtí-kyise-kyifen-Osówo echi. Be byi/chi byi-kyii byíkwôn ḿbyí eten ké byikit diǐkpú byi-kúng kyikit kyibónge byi-da-kye bǎmgbán-nchi kyifen-Osówo ḿbé mbe ba-koo ng kyikit kyibónge ké byikit diǐkpú ké eshê eten nyí nyi ne byifát.

³⁸ Banchi kyifen-Osówo ḿbé ba/fím ké kyikû ńkyí Éron ba/chi ba-kyú ne bǎmgbán-nchi kyifen-Osówo ké nkéré ba-kú ba-koo ng kyikit kyibónge ké byikit diǐkpú. Bǎmgbán-nchi kyifen-Osówo ba/chi ba-kyii byěm ḿbyí ba/koo ké byikit diǐkpú ba-kúng kyikit kyibónge ba-fé ké banfût-byěm etî ḿbé kiǐtí-kyise-kyifen-Osówo echi eringe nyí badakúng kámbyí ba-chi bǎmkpóngé ké kiǐtí-kyise-kyifen-Osówo echi.

³⁹ Banet-Ézerel ne bǎmgbán-nchi kyifen-Osówo ba/chi ba-kúng esang-byichí ne bato ne bakút-ólif ḿbyí banet ba/típ ba-da-fé ké banfût-byěm etî ḿbé mbe ba-tî ng byěm ḿbyí kiǐtí-kyise-kyifen-Osówo echi ne ké ḿbé banchi kyifen-Osówo ḿbé mbe ké bǎmkpóngé ne ḿbé bambâm kiǐtí-kyise-kyifen-Osówo echi ne banet-ekwan-kiǐtí-kyise-kyifen-Osówo echi mbe ba-kyú u. Be bii*ba/chi byi-mîng kyise ńkyí Osówo etún*.