MÂK BǍMPÉM ḾBÉ BANONG KYI-KIM NE JISOS KARÂS ERINGE NYÍ MÂK O/SÁNG 6 - Bokyi Bible

Ba/né Jisos ké Názáret

¹ Jisos o-mîng kyikit ánkyi o-bwa esim ké oshê emen. Bǎmgbán emen ba-dim to ne nyǐ ké kyikû.

² Ké dyicí-ékwâbashi, o-kpet etángê ké kyise-ékwâbashi ńkyí banet-Jûs. Banet ba/mû ányi chwóó. Ké nkéré mbé ba/jwo byiraa emen, byiko byi/kaa kámbé. Ba-kpet ebí barî ba/fu, byiraa ḿbyín, nyǐ o/fím ne mbyí nyá. Yeě o/kye ǎ byinyídíng ḿbyín. Nyǐ mu o-cen n nǎ ne o-chi i biǐtí-akat.

³ *Chí kápyínta mú wǎn-Méryi něen*? *Chí wǎn-boné-Jêmsyi ne Jǒsis ne Júdas ne Sámon*? Bwǎn-bané emen ḿbé banyinyi ba*fí nyín ne be*? Ne mbé ba-waa ányi ba-né Jisos.

⁴ Jisos o-raa ne mbé o/fu, mkpábé mú odasét byiraa-Osówo ba-kyâ ǎ ofê ké byikit byikíri, *chí ké oshê emen* ne ké kyikû-banet emen*.

⁵ Jisos o*da/tigi o-chi kiǐtí-akat nang kyibónge ké oshê emen* kyi-cibi ne abwô emen nyí o/twôom boǒnyín-banet ḿbé ba/mû mbe ba-rwôm m* ne o-chi kámbé ba-nyange*.

⁶ Kyi/chi ǎ chwǒm-akat kanong kanong ńkyí banet ḿbé oshê emen ba*da/fé dyityém ne nyǐ*. Ne Jisos o-dim o-tángê e banet o-câ ké eshê nyí e/kim ne oshê emen.

Jisos o/twóm Bǎmgbán Emen Ashí Diǐkpú ne Afee

⁷ Ne o-kó bǎmgbán emen ḿbé ashí diǐkpú ne afee o-tî kyikit kyibónge, ne o-twóm kámbé ashí afee afee. O-kye kámbé busa ḿbú badakpógê byibî-bací.

⁸ Ne o-nyibi kámbé atông o/fu, yip n̂g echí-bucen nké nke. *Da n̂g eyip chwǒm kyikíri* nang byiryíng* nang akpuga ké ekpat* nang kiimbam ńkyí badarém akpuga*.

⁹ Fé n̂g abe ne nkyû obónge obónge.

¹⁰ Nyǐ o-sét kámbé to o/fu, â ba/nung ké oshê, nang yeě nké o/koo běn kanong, kyú n̂g ké kyise emen tete ba-mîng oshê ámu.

¹¹ Nké â ba/ribi ké kyikit ńkyí banet ba*da běn ekoo kanong* nang ba/fu, mbé baa*fwôo atông ké byiraa enen* mîng n̂g kánkyí ba-pâ ecing nyí ké abe enen ba-pwó, ba-dim ba-mîng oshê ámu. Ńkyín kyi/chi kyi-kyú kámbé wǎ ekó ekuri.

¹² Ne bǎmgbán emen ámbe ba-dim kâng ba-da-sét banet ba/fu, byiko byikpú běn ba-mîng byibî echi.

¹³ Ba-ró byibî-bací chwóó ké enyam-byiko-banet byi-byí. Ba-ta to bakút ba-sabe bujê-banet ḿbé ba/mû ba-rwôm m, erwôm ebe e-man.

Bukyû ḿbú Jǒn mú Nkye Banet Osoo mú Osówo

¹⁴ Ne Otu Hérot o-jwo kyi-kim ne byěm ḿbyín kángkáng, ké ebóng, dyizîn ńdyí Jisos dii/káng ké kángkáng byikit. Kyicê-banet kyikíri kyi/mû kyi-raa ng kyi/fu, Jǒn mú Nkye banet osoo mú Osówo nké oo/jwóbê ké bukyû. Nkyí nké busa ḿbún bu/firi ǎ ké byiko.

¹⁵ Bakíri ba/fu, o-chi i Elája. Bakíri ba/bwa ba-fu, o-chi i mkpábé mú odasét byiraa-Osówo wǎ bamkpábé ḿbé kpákpá, ḿbé ba/mû ba-sét ng byiraa-Osówo.

¹⁶ Ké nkéré Otu Hérot o/jwo kánkyí éné, o-raa o/fu, onet mún o-chi i Jǒn mú Nkye banet osoo mú Osówo, mú me n/kye busa ba-két ǎ dyishí nké oo/jwóbê.

¹⁷ Otu Hérot oyén, ńdyí Jǒn o/mû o/tôong okpó, o/kye busa o/fu, bakám ǎ, ba-bwá ǎ erí, ba-fé ké mgbokobá. Otu Hérot o/chi ńkyín eringe kyidanyîn Heródyas mú o/mû onyi-Fyílip mú wǎn-boné emen, mú nyǐ oo/koo o-kú o-bé ng.

¹⁸ Jǒn mú Nkye banet osoo mú Osówo o/mû o-raa ng ne Otu Hérot o/fu, kyi/bên ne wo kanong kanong ńkyí amu a-bé ng onyi mú wǎn-boné eyên.

¹⁹ Ne Heródyas kâng o-kpet esa kafâ ne Jǒn. O-kpet ekyé akwóp nyí oda ǎ eju, nké Otu Hérot o*da ǎ ekye mpât*.

²⁰ Otu Hérot o/mû mu o-shî ng Jǒn, ké ebóng, nyǐ o/mû o-nyît ng o/fu, Jǒn mu onet mú onong ké bushú ḿbú Osówo ne ḿbú banet. Ké bubwô ámbu, o*da/bángê kyibî-chwǒm kyi-ta ǎ*. Byiraa ḿbyí Jǒn byi/mû byi-nyîn n ǎ ejwo, nang ké byi/mû byi-buu ng ǎ dyityém nang nkéré orá nké o/jwo kámbyí.

²¹ Ké nkuli kyikû, Heródyas o/já mpât. Kyi/mû ké dyicí ńdyí Otu Hérot o/chîkwárê dyije dyikíri, fím ké nkéré mú ba/fwon ǎ. Dyicí ándyi, Otu Hérot o/kó banet-ashí ḿbé biǐtí-bǎmkpóngé-okákárá ne banet-ashí-basúja ne biǐtí-banet ḿbyí Gályílyi dyijî.

²² Wǎn-Heródyas mú onyinyi o/banung o-ne ane nyí a/nyîn Otu Hérot ne banet ḿbé mbe ké dyijî kanong kanong. Ne Otu Hérot o-bí mú wǎsíng-onyinyi ámu o/fu, ebóng chwǒm kyida ǒ enyîn. Me n-kyâ ǒ nang ebóng ńkyí amu a-ryuu ng.

²³ Otu Hérot o-ryí ocím o-sem Osówo kampén kampén ne o-raa ne mú wǎsíng-onyinyi ámu o/fu, me n-kyâ ǒ nang ebóng chwǒm ńkyí wo a/bí mě, nang jangjang kafee byěm-butu ejí.

²⁴ Mú wǎsíng-onyinyi ámu kâng o-dim o-da-bí boné emen o/fu, me mbí ǎ o-kye mě ebóng. Boné emen o-sét ǎ o/fu, okye ǒ dyishí ńdyí Jǒn mú Nkye banet osoo mú Osówo.

²⁵ Ne mú wǎsíng-onyinyi ámu o-bwa esim babap o-kâm Otu Hérot, o-sét ǎ o/fu, me mu n-ryuu ng n/fu, kye mě dyishí ńdyí Jǒn mú Nkye banet osoo mú Osówo nyín ké ékóryá, kántîk kántîk.

²⁶ Ńkyín kyi/chi Otu Hérot o-firi bafip báfip, nké o*da/man ené ejá nyí mú wǎsíng-onyinyi ámu* ké bubwô-ocím mú nyǐ oo/ryí o-sem Osówo kampén kampén ké bushú ḿbú kángkáng banet ḿbé nyǐ o/kó kámbé dyijî ándyi*.

²⁷ Ne o-twóm kâng onet-mbâm obónge, o-kye ǎ busa o/fu, oca babap o-bâ ne dyishí ńdyí Jǒn. Onet-mbâm ámu o-dim o-ca ké kyise-mgbokobá o-da-két Jǒn dyishí.

²⁸ Ne o-bâ ne ndyí ké ékóryá, o-ba-kye mú wǎsíng-onyinyi ámu. Ne wǎn ámu o-yip kándyí o-da-kye boné emen.

²⁹ Ké nkéré bǎmgbán-Jǒn mú Nkye banet osoo mú Osówo ba/jwo ńkyí kyi/chi, mbé ba/bê ba-ba-yip kiikyuryukyuryu-enyam-byiko emen, ba-da-ryii.

Jisos o/nen Égot-Banet Bujam ne Etánge

³⁰ Banet-kyitwóm-Jisos ba-fyi ba-kâm Jisos. Ba-sét ǎ kángkáng byěm ḿbyí mbé ba/chi, ne ḿbyí ba/tángê.

³¹ Banet ba/mû ba/jê ḿbé ba/mû ba-nung ng ba-kâm m Jisos, ba-byí i. Ba*da/kye Jisos ne bǎmgbán emen nkéré mú badaryí nang byiryíng*. Ne Jisos o-sét bǎmgbán emen o/fu, bâ n̂g byi-dim kyikit kyikíri, eringe nyí ben badajáng ké kaǎnyín-nkéré.

³² Ne ba-nung ké ókpǐ mbé barî bári ba-dim ké kyikit ńkyí banet ba*fí*.

³³ Nké banet chwóó ba/ri kámbé, ne ba/cêe to kámbé ńdyí mbe ba-dim m éné. Ne banet ḿbé ké eshê ányi kángkáng ba-dim ké byiká ochéé óchee ba-ribi kpá ké kyikit ánkyi ba-sí Jisos ne bǎmgbán emen.

³⁴ Ké nkéré mú Jisos o/byí ké ókpǐ o-shû kyísí, o/ri bujê-banet ámbe. Byiko byi-kpú ǎ ne mbé, ké ebóng, banet ámbe ba/mû éné wǎ etám-ebû nyí e*fí ne onet mú odabám kányí*. Ne o-kpet kámbé etángê byěm chwóó chwóó.

³⁵ Ké nkéré mú busun boo/zóngê, bǎmgbán emen ba/ba ǎ ekâm. Ba-sét ǎ ba/fu, dyikurúku dii/fyi něen. Kyikit ńkyín oshê o*fí*.

³⁶ Sét banet ḿbén ba-dim, a-mîng kámbé ba-ca ké bampyep ne ké eshê nyí nyi nyín fáráng, eringe badaré chwǒm ba-ryí.

³⁷ Jisos o-faa o/fu, ben bayén, kye n̂g kámbé chwǒm ba-ryí. Mbé ba-bí ǎ ba/fu, wo amu a-ryuu ng a/fu, be byica byi-da-ré berêt ké kiimbam-akpuga kyibónge, byi-nen bujê-banet ḿbún dí.

³⁸ Jisos o-bí kámbé kâng o/fu, berêt o/waa nǎ, ca n̂g ba-da-tún. Ńdyí baa/datún, ba/sét ǎ ba/fu, byirim-berêt byitánge ne ekworê efee.

³⁹ Ne Jisos o-sét kâng bǎmgbán emen o/fu, bachi banet ámbe kángkáng ba-kyú me ké azu ké azu, ké biǐbyâa.

⁴⁰ Ne banet ámbe kâng ba-kyú me ké etáng ké etáng, ké azu ké azu. Azu akíri bajam-banet batánge, akíri bajam-banet bafee esim diǐkpú.

⁴¹ Jisos o-yip kâng byirim-berêt ámbyi byitánge ne ekworê efee, o-bêem achi kyíbóng, o-kó Osówo asǎma. O-ját byirim-berêt ámbyi o-kye bǎmgbán emen o/fu, bakyii banet ámbe. O-kyii to ekworê ányi efee o-kye kámbé ashí kángkáng.

⁴² Nang yeě o/ryí byi-kwárê ǎ.

⁴³ Ne bǎmgbán emen kâng ba-bwóp ekén-berêt ne nyí ekworê, nyí banet ba/ryí e-waa, e-sú bookye diǐkpú ne bufee.

⁴⁴ Ocím-banyinchéng ḿbé ba/ryí berêt ámu o/mû égot-banet bujam ne etánge.

Jisos o/cen Twóóm Kyíbóng-Kace

⁴⁵ Ké abe ányi, Jisos o-sét bǎmgbán emen o/fu, banung ké ókpǐ ba-bwóp ǎ kashú ba-dim Bét-Sáda, ké esim-baya nyí áku, ányi nyǐ o/tôong o-sét ng dyizu-banet ámbe o/fu, bajâ.

⁴⁶ Ké nkéré mú oo/sét bǎmgbán emen o/fu, baca kanong, nyǐ o/dim nshwam efé kyíbóng-kaku.

⁴⁷ Ké nkéré dyikurúku dii/fyi, ókpǐ o-ribi ne mbé ké otyém ótyem-baya, ányi Jisos o/mû o/tôong áku kǎnchí ké kaku.

⁴⁸ Ne nyǐ o/ri ké ókpǐ mu o-sóng ng bǎmgbán emen efung, ké ebóng, afú a/mû nyi a-tín n kámú o-bwa ng esim ésim. Ké nkéré mú kyi/firi ké otyém ótyem mú égbáng echât ne égbáng nyâchât nyí dyicófóróng, nyǐ o/cen kyíbóng-baya twóóm o-kâm kámbé. Nyǐ o/mû o-kú o-bâ eshwôm kámbé,

⁴⁹ nké mbé ba/ri ǎ mu o-cen n kyíbóng-baya twóóm. Ba-kabe ba/fu, okúsí, ne ba-wonge.

⁵⁰ Ké ebóng, ńdyí mbé ashí amúmú ba/ri ǎ, eja-dyishí e/ján kámbé. Jisos o-raa ne mbé ké abe ányi o/fu, kám m̂ atyém enen shwanshwan. Me nké mu m-bâ. *Da n̂g eshî*.

⁵¹ Ne nyǐ o-nung kâng ké ókpǐ ne mbé, ne afú a-chee beem. Byiko byi/kaa bǎmgbán emen kanong kanong.

⁵² Ké ebóng, mbé ba*da/nyît kyikû kyi-kim ne byirim-berêt ámbyi*. Atyém ebe a*da/man ekám kánkyí*.

Jisos o/chi Banet-Byirwóm ké Genézéret ba-nyange

⁵³ Ba-nyáng baya ámbe ne ba-ribi ké Genézéret. Ba-tú ókpǐ ányi.

⁵⁴ Ńdyí mbé ba-mîng ng ókpǐ ba-bâ, banet ba-waa ké abe ányi ba-cêe Jisos.

⁵⁵ Banet ámbe kâng ba-byí ne ochéé ba-ca ké kángkáng eshê nyí ké esí ányi, ba-yip ng banet ḿbé mbe ba-rwôm m ké byipe ba-dim m ne mbé ké kyikit nang kyirá ńkyí mbé ba/jwo ba/fu, Jisos mu ányi.

⁵⁶ Kángkáng byikit ḿbyí Jisos o/ce, nang ké eshê nang ké boǒshê nang ké bampyep, banet ba-yip ng banet ebe ḿbé mbe ba-rwôm m ba-dim m ne mbé ké bantim-busî ba-tîm m Jisos arông, eringe odamîng banet-byirwóm ámbe ba-ta nang ocím-nkyû emen mǔ mu. Ne kángkáng banet ḿbé ba/ta kámú, erwôm ebe e/man.