MÂK BǍMPÉM ḾBÉ BANONG KYI-KIM NE JISOS KARÂS ERINGE NYÍ MÂK O/SÁNG 3 - Bokyi Bible

Onyinchéng mú Bubwô Emen bu/nyîim

¹ Jisos o-bwa esim kâng ké kyise-ékwâbashi ńkyí banet-Jûs. Onyinchéng obónge mú bubwô emen bu/nyîim o/mû ányi.

² Banet ba/mû ányi ḿbé ba/mû ba-ryuu ng ba/fu, mbé ba-bât ng Jisos kyiraa ba/fu, o/chi kyibî. Ne mbé ba-kpet ǎ ebám kanong kanong ba/fu, mbé ba-ri ng, â Jisos o/chi o-chi onyinchéng ámu ké dyicí-ékwâbashi, o-nyange.

³ Jisos o-raa ne onyinchéng ámu mú bubwô emen bu/nyîim o/fu, bâ kwán ké kashú.

⁴ Ne Jisos o-bí kâng banet ḿbé mbe ányi o/fu, kyije eten kyi/fu, be byichi ebóng ké dyicí-ékwâbashi. Byichwáp aa, aa byi*dachwáp*. Byinyángê dyikpen-onet aa, aa byiju kándyí. Nké mbé ba*da/faa nang ojá*.

⁵ Jisos o-pín achi o-tún kámbé ne kafâ esa. Nké byiko to byi/waa ányi byi-kpú ǎ ne mbé, ké ebóng, mbé ba/mû ba-jang ng eshwane ashí, nang chwǒm to ba*fí ba-nyît ng*. Ne Jisos o-raa kâng ne onyinchéng ámu mú bubwô emen bu/nyîim o/fu, nabe bubwô eyên. Onyinchéng ámu o-nabe kámbú, ne bu-waa ányi bu-firi kanong wǎ eringe nyí bu/mû ǎ kpákpá.

⁶ Banet-Fárasyî kâng ba-byí ba-mîng kyise-ékwâbashi ánkyi, ne ba-da-cibi ocibíng ne banet-ncibi mú Otu Hérot. Ne ba-kpet etóbê eringe ba/chi ba-man Jisos dyikpen.

Bujê-Banet ké Bukô-Baya

⁷ Jisos ne bǎmgbán emen ba-dim ba-wâa ké baya ḿbé Gályílyi, ne bujê-banet ba-dim ne nyǐ ké kyikû. Banet ámbe, bakíri ba/fím Gályílyi, bakíri ba-fím Judyâ,

⁸ bakíri ba-fím Jerúsélem, bakíri ba-fím Edumyâ, bakíri ba-fím esim-kace ńké badakó Jódan, bakíri ba-fím kyicê ńkyí Táya ne Sádon. Bujê-banet ḿbén ba/bê ba-kâm Jisos, ké ebóng, mbé baa/jwo kyi-kim ne byěm ḿbyí o/mû mu o-chi i.

⁹ Banet ba/mû ba/jang ejê ba-shwôm, ne Jisos o-sét bǎmgbán emen o/fu, batî ǎ ókpǐ, eringe nyí baa*ba/chi ba-nye ǎ ba-ju*.

¹⁰ Nyǐ o/mû oo/chi banet chwóó erwôm ebe e-man, éné nké kángkáng banet-byirwóm ba/tôong ba-tín n ba-bâ ǎ ké byiko, eringe nyí mbé bada ǎ eta.

¹¹ Nang nkéré orá to nké banet ḿbé ba/mû ne byibî-bací ba/ri ǎ, ba-myii ng kyísí ké kashú emen, ba-wonge ba/fu, wo a-chi i Wǎn-Osówo.

¹² Jisos o-nyán byibî-bací ámbyi o/fu, byi*dachîsét dyizong-onet ńdyí nyǐ mu*.

Jisos o/cá Banet-Kyitwóm Emen Ashí Diǐkpú ne Afee

¹³ Jisos o-yú kâng kyíbóng-kaku, ne o-kó banet ḿbé nyǐ mu o-ryuu ng, ba-bâ ba-kâm ǎ.

¹⁴ Ne o-cá banet ashí diǐkpú ne afee ké burwám ebe ḿbé nyǐ o/kye kámbé dyizîn ńdyí dyidabángê banet-kyitwóm emen. O-sét kámbé o/fu, me nn/cá běn n/fu, kû n̂g ewaa ne me. Me n/chi n-twóm běn to kyíjí ba-kûsét Bǎmpém ḿbé Banong.

¹⁵ Ne ba/chi ba-firi to ne busa ḿbú badaró byibî-bací.

¹⁶ Nyín něen azîn-banet ámbe ashí diǐkpú ne bafee ḿbé nyǐ o/cá. Sámon, Jisos o/fu, okûbángê Pyíta,

¹⁷ Jêmsyi ne Jǒn ḿbé bonchí ebe o/mû o-bángê e Zébédyi, mbé Jisos o/fu, bakûbángê Bwǎnéjis. Ányi kyi/byí, banyinchéng ḿbé etare.

¹⁸ Ánduru ne Fyílip ne Batólómyi ne Mátyuu ne Tómos ne Jêmsyi mú bonchí emen o/mû o-bángê e Áfus ne Tádyos ne Sámon mú mu ne kiǐtí-kyijé ne oshê,

¹⁹ ne Júdas-Esakáryot mú o/chi ba-kám Jisos.

Jisos ne Bézíbul

²⁰ Jisos o-dim kâng dyijê. Bujê-banet bu-chîbwa bu-sú osúng ḿbú bu/chi Jisos ne bǎmgbán emen ba*da/chîjá nkéré mú badaryí nang byiryíng*.

²¹ Ké nkéré mú kyikû-banet emen ba/jwo kyi-kim ne chwǒm ńkyín, ba/dim ǎ ekpî, ké ebóng, banet ba/mû mbe ba-raa ng ba/fu, o-kú o-fún n.

²² Kyicê-bantánge Byije-Músis ḿbé ba/fím Jerúsélem ne ba-bâ, ba-kpet eraa ba/fu, Jisos mu ne Otu-Byibî-Barím mú odabángê Bézíbul ké byiko emen. Bakíri ba/fu, Otu-Byibî-Barím nké mu o-kyâ ǎ busa ámbu ḿbú mu o-ró ng bací ámbe o-twóp kyíjí.

²³ Jisos o-kó kâng banet ba-king ba-kâm ǎ, ne o-tím kámbé atím-ekan o/fu, kyi-cen n nǎ ne Sátan o-kûró byiko emen.

²⁴ Nké â oshê o/kyii ké byikim ké byikim ḿbyí mbyi byi-nwa ng ne barî, oshê ámu o/chi o-róng.

²⁵ Â banet ḿbé ba/fím kyikû-dyibóng kyibónge ba/pap ba-kpet enwa ne barî, kyikû-dyibóng ánkyi kii*ba/chi kyi-chîcibi*.

²⁶ Éné to nké â butu ḿbú Sátan bu/kyii ké byikim ké byikim, boo*bwom* nké bu/chi bu-róng bu-tánê.

²⁷ Onet o*fí mú odaman esé kyise ńkyí okân-onyinchéng o-nung o-kúng ǎ byěm* éné o-bwóp ng kpá kashú o-bwá okân-onyinchéng ámu erí, ne o-kûsé kyise o-yip byěm.

²⁸ Kû n̂g ezîim ńkyín ba/fu, Osówo o-man n epwoo banet ké byibî ebe kángkáng ne ké kángkáng byibî-byěm ḿbyí badaraa.

²⁹ Nké nang yeě nké o/raa byibî-byěm o-bât Busun-Osówo, Osówo oo*ba/chi o-pwoo ǎ ne banyá* ké ebóng, oo/chi kyibî ńkyí kyidawaa ne banyá.

³⁰ Jisos o/raa ńkyín, ké ebóng, kyicê-banet ba/fu, nyǐ mu ne kyibî-bucí.

Boné-Jisos ne Bwǎn-Bané-Jisos ḿbé Banyinchéng

³¹ Boné-Jisos kâng ne bwǎn-bané-Jisos ḿbé banyinchéng ba-ba-ribi. Ba-bwom kyíjí ké bukô-kyise, ne ba-twóm ba/fu, bakó ǎ.

³² Bujê-banet ba/mû ba/kyú ba-wáp Jisos ba-fé ké otyém, ne banet ámbe ba-sét Jisos ba/fu, bonchí, boné eyên ne bwǎn-bané eyên ḿbé banyinchéng mbe kyíjí ba-ryuu ng ǒ.

³³ Jisos o-bí banet ámbe o/fu, yeě mu boné ejí. Be yeě to mbe bwǎn-bané ejí.

³⁴ O-bírî achi o-tún banet ḿbé ba/kyú ányi ne nyǐ kerékeré, ne o-raa o/fu, dǐi kwán i, banet ḿbé ba/kyú něen nké mbe boné ejí ne bwǎn-bané ejí.

³⁵ Nang yeě nké o/chi ńkyí Osówo mu o-ryuu ng o/fu, ochi, onet ámu o-chi i wǎn-boné ejí ne boné ejí.