MÂK BǍMPÉM ḾBÉ BANONG KYI-KIM NE JISOS KARÂS ERINGE NYÍ MÂK O/SÁNG 2 - Bokyi Bible

Jisos o/chi Onyinchéng mú mu o-rwôm m Kyibok o-nyange

¹ Ńdyí boǒnyín-ací boo/shwôm, Jisos o/bwa esim ké Kapánum. Banet ba-jwo ba/fu, nyǐ oo/fyi ké byise.

² Ne bujê-banet ba-ba-sú ké kyise pwat. Mpât o*da/chîchi ké kafâ-kyise* nang kyíjí ké ocím-dyifyi*. Jisos o/mû o-pem m kámbé Bǎmpém ḿbé Banong,

³ nkéré mú banyinchéng ashí anyii ba/tû onyinchéng obónge mú mu o-rwôm m kyibok, ba-kâm ǎ.

⁴ Nké ké bubwô ḿbú banet ba/jang ejê ba-shwôm, ba*da/man eshwôm ne onyinchéng ámu ba-da-tông ǎ Jisos*. Ne ba-yú ba-da-rim mbwo kyíbóng-mbwôm dángdáng ké kyikit ńkyí Jisos mu. Ké nkéré mú baa/rim mbwo, ba-shwá onyinchéng ámu ké mǔ, ba-shû ǎ ké kyipe sáre tata o-ribi kyísí.

⁵ Jisos o-ri eringe nyí banet ámbe ba/fé dyityém ne nyǐ, ne o-raa ne onet-kyibok ámu o/fu, wǎn ejí, byibî eyên baa/pwoo ǒ ké mbyí.

⁶ Kyicê-bantánge Byije-Músis ḿbé ba/mû ba/kyú ányi ba/kabe mbé bayén báyen ba/fu,

⁷ kyi/cen nǎ ńkyí nyǐ mu o-cábê ng Osówo něen. Onet o*fí mú odaman epwoo orî-onet ké byibî* kyi-cibi ne Osówo kǎnchí*.

⁸ Jisos o-waa ányi o-nyît okabe ebe, ne o-raa kâng ne mbé o/fu, ebóng ben bamu ba-kabe ng azong-byěm ányi.

⁹ Kyirá ńkyí kyidasóng esét onet-kyibok mún, byibî eyên baa/pwoo ǒ ké mbyí aa, aa ńkyí nda ǎ esét n/fu, bûu nensang a-yip kyipe eyên a-kpet ecen.

¹⁰ Me n/chi n-tông běn wááng kâng n/fu, Wǎn-Onet mu ne busa ké ejíí ḿbú odapwoo banet ké byibî.

¹¹ Ne Jisos o-raa kâng ne onet-kyibok ámu o/fu, mu n-sét ng ǒ n/fu, bûu nensang a-yip kyipe eyên a-ca dyijê.

¹² Ńdyí kángkáng banet ba/bwom mbe ba-tún n, onyinchéng ámu o/bûu nensang o-yip kyipe emen o-dim odǐm babap. Mbé ashí amúmú byiko byi-kaa kámbé, ne ba-kpet ekpee Osówo ba/fu, be byi/mû byi*da/ri ne dyizong-chwǒm ńdyín*.

Jisos o/kó Onyinchéng mú odabángê Lyíva

¹³ Jisos o-chîbwa esim ké bukô-baya ḿbé Gályílyi. Bujê-banet ba-bâ ba-kâm ǎ, o-kpet etángê kámbé.

¹⁴ Nkéré mú Jisos mu o-cen n o-câ, o/ri nkoo akpuga-dyishí obónge mú odabángê Lyíva, mú wǎn-Áfus ké oo/kyú me, ké kyikit-bǎmkpóngé emen. Jisos o-raa ne nyǐ o/fu, bâ ne me ké kyikû. Lyíva o-bûu nensang o-dim ne nyǐ ké kyikû.

¹⁵ Ké kaǎnyín-nkéré, Jisos o/mû mu o-ryí i byiryíng ké kyise ńkyí Lyíva. Bujê-banet chwóó ḿbé bankoo akpuga-dyishí ne banet to chwóó ḿbé mbe ba-ri ng kámbé wǎ banchi byibî ba/mû mbe ba-cen n ne Jisos ké kyikû. Kyicê-banet ḿbén ba-kyú me ba-kpet eryí byiryíng to ne Jisos ne bǎmgbán emen.

¹⁶ Kyicê-bantánge Byije-Músis ḿbé banet-ncibi mú badakó Fárasyî ba/ri eringe nyí Jisos mu o-ryí i byiryíng ne banet ámbe ne ḿbé bankoo akpuga-dyishí. Ne ba-bí bǎmgbán emen ba/fu, ebóng kyi/chi ne Jisos mu o-ryí i byiryíng ne azong-banet ányi.

¹⁷ Jisos o-jwo ńkyí ba/bí éné, ne o-faa kámbé o/fu, banet ḿbé ba*fí ba-rwôm m* baa*ryuu nchi bakye* nké ḿbé mbe ba-rwôm m nké nke bada ǎ eryuu. Me m/bê banet ḿbé mbe ba-ri ng kámbé wǎ banchi byibî ekó n/fu, babâ ne me ké kyikû, *chí banet ḿbé mbe ba-ri ng kámbé wǎ banet ḿbé banong*.

Ḿbím kyi-kim ne Esong ecíp

¹⁸ Ké nkéré obónge, bǎmgbán-Jǒn mú nkye banet osoo mú Osówo, ne ḿbé banet-Fárasyî ba/mû mbe ba-cíp ng esong. Kyicê-banet ba-bâ ba-kâm Jisos, ba-bí ǎ ba/fu, ebóng ńkyí bǎmgbán-Jǒn mú o/mû o-kyâ banet osoo mú Osówo ne bǎmgbán ḿbé banet-Fárasyî mbe ba-cíp ng esong, ḿbé eyên baa*cíp*.

¹⁹ Jisos o-faa kámbé o/fu, ben ba/kabe ba/fu, banet ḿbé mbe ké dyijî-dyibé ba-cíp ng esong dí. Kii*man echi éné*. Â oyén-dyibé mu ányi ne mbé, baa*man ecíp esong*.

²⁰ Nké nkéré o/chi o-bâ mú ba/chi ba-yip kámbé oyén-dyibé. Nkéré mú dyicí ándyi dii/fyi, mbé kâng ba/chi ba-cíp esong.

²¹ Onet o*fí mú odakúng kaǎcê-kyídí ńké kafyîfî o-tim kyikit ńkyí kyi/járê ké okâa-nkyû*. Â o/chi éné, kyikit ńkyí kyifyîfî ánkyi kyi/chi kyi-ját kyicê ńkyí okâa, kyi-bwa kyi-chi mbwo o-rêe o-shwôm.

²² Nang onet to o*fí mú odakúng bato ḿbé dyicí o-fé ké okâa-kyiféng*. Â o/chi éné, bato ba/chi ba-chi okâa-kyiféng ámu o-ché. Bato ne kyiféng ánkyi byi/chi byi-bên. Aa*wááng*. Kyiféng ńkyí kyifyîfî nké badafé bato ḿbé dyicí.

Ḿbím kyi-kim ne Dyicí-Ékwâbashi

²³ Jisos o/mû mu o-shwôm m ké kafâ-byifát-esang-byichí, ké dyicí-ékwâbashi. Ńdyí bǎmgbán emen mbe ba-cen n ba-câ ne nyǐ, ba/kpet ebóng esang-byichí ányi.

²⁴ Ne banet-Fárasyî ba-sét Jisos ba/fu, kûri, nkyi kyije ké oshê eten, â bǎmgbán eyên ba/bóng esang-byichí ké dyicí-ékwâbashi.

²⁵ Jisos o-faa kámbé o/fu, nâng ben baa/kó ńkyí Otu Dívit o/chi ké nkéré o/mû mu o-kyé ng chwǒm ńkyí odaryí. Esong e/mû e-nwa ng ǎ ne banet emen.

²⁶ Ne nyǐ o/danung kâng ké kafâ-kyise ńkyí Osówo, o-da-ryí berêt mú ba/chi kyifen ba-kye Osówo. Ńkyín kyi/chi ké nkéré mú Abyǎta o/mû otu-nchi kyifen-Osówo. Wǎ eringe kyije eten kyi/sét, banchi kyifen-Osówo nké nke badaryí berêt mún. Nké Otu Dívit o/ryí kámú, o-bwa o-kye to banet emen.

²⁷ Ké nkuli kyikû, Jisos o/sét kámbé o/fu, Osówo o/tî dyicí-ékwâbashi ké kanong ńké onet, o*da/chi onet ké bubwô-dyicí-ékwâbashi*.

²⁸ Nkyí nké Wǎn-Onet mu Otu mú o-shwôm nang byije ḿbyí byi/kim ne dyicí-ékwâbashi.