MÂK BǍMPÉM ḾBÉ BANONG KYI-KIM NE JISOS KARÂS ERINGE NYÍ MÂK O/SÁNG 10 - Bokyi Bible

Jisos o/tángê kyi-kim ne Dyibé eman

¹ Ne Jisos o-dim ké kyikit ánkyi o-wâa Judyâ, ne o-nyáng kace ńké badakó Jódan. Bujê-banet bu-chîbwa bu-ba-sú ányi, ne o-chîkpet etángê kámbé wǎ eringe nyí mu o-fwam m echi kángkáng nkéré.

² Kyicê-banet-ncibi mú badakó Fárasyî ba/bê ba-kâm Jisos, eringe nyí mbé bada ǎ ekan. Ba-bí ǎ ba/fu, sét bě, kyije ńkyí eten kyi/bángê kyi/fu, onyinchéng o-man n eman dyibé ne onyi emen dí.

³ Jisos o-faa kámbé ne ḿbím o/fu, ebóng kyije ńkyí Músis o/kye běn.

⁴ Mbé ba-faa ǎ ba/fu, Músis o/kye bě busa o/fu, mú onyinchéng osáng ké kiǐbáá-nwet o-kye onyi emen o/fu, dyibé dyiman, ne o-kû ǎ eró.

⁵ Ne Jisos o-raa ne ḿbé Fárasyî ámbe o/fu, Músis o/sáng kyije ńkyín o-tî běn, ké nǎ, ben ba-sóng ng etángê.

⁶ Nké ké kiimkpet kyikû, ké nkéré mú Osówo o/chi ejíí, ba/mû ba/sét ba/fu, Osówo o/chi onyinchéng ne onyinyi.

⁷ Ké bubwô ḿbún, onyinchéng o-mîng ng bonchí ne boné, o-da-cibi ne onyi emen,

⁸ ne mbé ashí afee ba-firi onet obónge. Mbé kâng ba*fí to ashí afee*. Ba/firi onet obónge.

⁹ Onet o*dachi o-pap kâng ńkyí Osówo oo/cibi kyikit kyibónge*.

¹⁰ Ké nkéré mú Jisos ne bǎmgbán emen ba/bwa esim ké kafâ-kyise, bǎmgbán emen ba-bí ǎ kyi-kim ne kyiraa ánkyi.

¹¹ Jisos o-sét kámbé o/fu, â onyinchéng o/man dyibé ne onyi emen, o-bé onyinyi okíri, onyinchéng ámu mu o-chi i kyinam ké bushú-onyi emen.

¹² Eringe ebónge to nké â onyinyi o/man dyibé ne otyép emen, o-bé onyinchéng okíri, onyinyi ámu to mu o-chi i kyinam.

Jisos o/jware Boǒbwásíng

¹³ Kyicê-banet ba/bê ne boǒbwásíng ba-kâm Jisos, eringe nyí odata bwǎn ámbe abwô ké byiko. Nké bǎmgbán-Jisos ba/mû mbe ba-ró ng kámbé.

¹⁴ Ké nkéré mú Jisos o/ri ńkyí bǎmgbán emen mbe ba-chi i, kyi/sa ǎ. Ne o-raa ne bǎmgbán emen o/fu, mîng n̂g ḿbé boǒbwásíng ba-bâ ba-kâm mě. *Da n̂g echîku kámbé* ké nǎ, banjware ḿbé Butu ḿbú Osówo ba/já banet ḿbé mbe wǎ boǒbwásíng ḿbún.

¹⁵ Zîim m̂ ńkyín ba/fu, nang yeě nké o*da/bángê ne dyityém emen wǎ wǎn-ojújwô* o/fu, Osówo okyú Otu emen* oo*ba/chi o-nung ké Butu ḿbú Osówo*.

¹⁶ Ne Jisos o-kpaa kâng bwǎn ámbe o-fé ké byiká emen. O-yip abwô emen o-twôom kámbé ké byiko, ké onet ké onet, ne o-jware kámbé.

Nfang-Onyinchéng

¹⁷ Ńdyí Jisos o-kú o-bâ echîdim bucen, onyinchéng obónge o/byí ne ochéé, o-da-tím arông kyísí ké bushú ḿbú Jisos, ne o-bí Jisos o/fu, ntánge byiraa-Osówo mú o/nwa dyityém, me m-man n-chi ebóng ne n-firi ké dyikpen ńdyí ne banyá.

¹⁸ Jisos o-bí ǎ o/fu, ebóng ńkyí wo a/fu, me n/nwa dyityém. Onet o*fí mú o/nwa dyityém* kyi-cibi ne Osówo kǎnchí*.

¹⁹ Ná wo amu a-nyît ng ńkyí byije-Osówo byi/fu. Byi/fu, *daju onet* *dachi kyinam* *dajii kajii* *dasét kyisédéng* *daryí onet mpún* fé ńchân ne ńnân.

²⁰ Onyinchéng ámu o/fu, ntánge byiraa-Osówo, kyi-fím ne dyikwá ejí tete kántîk, me n*da/róng ne byije ḿbyín*.

²¹ Jisos o-tún onyinchéng ámu achi ké bushú cápcáp ne kyijé, ne o-sét ǎ o/fu, chwǒm kyi/waa ǒ kyibónge ńkyí adachîchi. Ca a-da-kúng byěm eyên ḿbyí amu ne mbyí a-shee kángkáng, a-yip akpuga ányi a-kye banet-byikpu, ne wo a/chi a-fang kyíbóng. Ne a-bâ a-kûcen ne me ké kyikû.

²² Ké nkéré onyinchéng ámu o/jwo ńkyí Jisos o/raa éné, kashú emen ka-bên, ne o-kám abwô o-dim ne busa-dyityém, ké ebóng, o/mû nfang-onet.

²³ Jisos o-bírî achi o-tún bǎmgbán emen, ne o-sét kámbé o/fu, kyi/chi kyi-sóng! ne banfang-banet ba-nung ké Butu ḿbú Osówo.

²⁴ Byiraa ḿbyín byi/kédê bǎmgbán emen ofong kanong kanong, nké Jisos o/chîsét kámbé o/fu, bwǎn ejí, Butu ḿbú Osówo bu-sóng ng enung!

²⁵ Kii*jang esóng kaanyam-atû eshwôm ké mbyí-ága* wǎ eringe nyí kyidasóng nfang-onet enung ké Butu ḿbú Osówo*.

²⁶ Bǎmgbán emen ba-waa ocím ké dyishí fúú ké nkéré ba/jwo kyiraa ńkyín, ne ba-kpet ebí barî ba/fu, yeě kâng mú Osówo o/chi o-nyii ǎ.

²⁷ Jisos o-tún bǎmgbán emen achi ké bushú cápcáp, ne o-faa kámbé o/fu, ńkyín banet baa*man echi* nké Osówo o-man n echi. Osówo o-man n echi kángkáng byěm.

²⁸ Ne Pyíta o-raa ne Jisos wááng o/fu, ké ntûntû, be bii/mîng kángkáng byěm byi-dim ne wo ké kyikû.

²⁹ Jisos o-faa kámbé o/fu, ntûntû me mu n-sét ng běn ńkyín n/fu, nang yeě nké o/mîng byise emen nang bwǎn-bané emen nang boné nang bonchí nang bwǎn emen nang akán-byifát emen ké bubwô ejí ne ké bubwô ḿbú Bǎmpém ḿbé Banong,

³⁰ onet ámu o/chi o-já byěm byi-jê byi-shwôm kántîk. O/chi o-firi ne bajam-byise batánge, bajam-bwǎn-bané batánge, bajam-bané batánge, bajam-bwǎn batánge ne bajam-akán-byifát atánge. Nyǐ to ba/chi ba-kye ǎ kyibî-busông, ne ké nkéré mú mu o-bâ, nyǐ o/chi o-já dyikpen ńdyí ne banyá.

³¹ Nké bujê-banet chwóó ḿbé ba/bwóp kashú kántîk ba/chi ba-ryí esim, ne bujê-banet chwóó to ḿbé ba/ryí esim kántîk ba/chi ba-bwóp kashú.

Jisos o/chîraa ké Kampén Kachât kyi-kim ne Bukyû Emen

³² Mbé ba/mû ké bukwóp ḿbú mbé mbe ba-dim m Jerúsélem. Jisos o/mû o-câ bǎmgbán emen kashú. Kyi/chi bǎmgbán emen wǎ chwǒm-akat, ne banet ḿbé ba/mû mbe ba-câ ne mbé ké kyikû to ba/mû ba-shî ng. Ne Jisos o-kó kâng bǎmgbán emen ḿbé ashí diǐkpú ne afee, o-kpet esét kámbé ńkyí kyi/chi kyi-chi ǎ nyǐ.

³³ O/fu, fwôo n̂g atông ba-jwo. Byimu byi-wâa ng Jerúsélem, oshê mú ba/chi ba-kám Wǎn-Onet ba-kye batu-banchi kyifen-Osówo ne bantánge Byije-Músis. Ba/chi ba-pan ǎ mpan ba/fu, baju ǎ. Ne ba/chi ba-kúng ǎ ba-kye banet ḿbé Rûm.

³⁴ Ne mbé ba/chi ba-fát ǎ kiikuku, ba-shú ǎ akorong, ba-mín ǎ, ne ba-ju ǎ. Ké ací achât, nyǐ o/chi o-jwóbê ké bukyû.

Chwǒm ńkyí Jêmsyi ne Jǒn mbe ba-ryuu ng

³⁵ Jêmsyi ne Jǒn ḿbé ba/mû bwǎn ḿbé Zébédyi ba/bê ba-kâm Jisos. Ba-raa ne nyǐ ba/fu, ntánge byiraa-Osówo, be byimu ne chwǒm ńkyí byimu byi-ryuu ng byi/fu, chi bě.

³⁶ Jisos o-bí kámbé o/fu, ebóng chwǒm ńkyí ben bamu ba-ryuu ng ba/fu, me nchi běn.

³⁷ Mbé ba-faa ba/fu, ké nkéré mú wo aa/kyú ké kakyúng-butu eyên ńké nke ké Butu ḿbú budasan ragerage, be byimu byi-ryuu ng byi/fu, mîng bě byi-kyú ne wo, onet obónge ké kyicê-bubwô-etyebéng eyên, obónge ké kyicê-bubwô-eku eyên.

³⁸ Jisos o-raa ne mbé o/fu, ben ba*fí ba-nyît ng ńkyí ben bamu ba-bí ng*. Ben ba-man n ejwáp ké mmîk-busông eri mú me n/chi m-man n-jwáp dí. Ben ba-man n běn ekye osoo mú Osówo wǎ eringe nyí me ba/chi ba-man ba-kye mě dí.

³⁹ Jêmsyi ne Jǒn ba-faa Jisos ba/fu, byi-man n echi. Jisos o-sét kámbé o/fu, ben ntûntû ba/chi ba-jwáp ké mmîk-busông eri mú me n/chi m-man n-jwáp, ne ba/chi ba-kye běn to osoo mú Osówo wǎ eringe nyí ba/chi ba-man ba-kye mě.

⁴⁰ Nké me n*fí ne busa ḿbú ndacá onet mú o/chi o-kyú ké kyicê-bubwô-etyebéng ejí ne ńkyí bubwô-eku ejí*. Osówo nké o/chi o-kye banet ḿbé oo/nap byikit ḿbyín o-tî kámbé.

⁴¹ Ké nkéré bǎmgbán-Jisos ḿbé áku ashí diǐkpú ba/jwo kyi-kim ne chwǒm ńkyín, ba-kpet esa kafâ ne Jêmsyi ne Jǒn.

⁴² Ne Jisos o-kó kâng kámbé ashí amúmú ba-kâm ǎ kyikit kyibónge. Ne o-raa ne mbé o/fu, ben bamu ba-nyît ng ba/fu, banet ḿbé ba/kúng kámbé wǎ banet-ashí nké mbe ne busa ḿbú banet badakyú ké bubwô ebe. Banet-ashí ámbe to mbe ne banet-ashí bakíri ḿbé badasét kámbé ńkyí badachi.

⁴³ Ńkyín kâng ne ben kyi*fí éné*. Â nang onet obónge ké burwám enen mu o-ryuu ng o/fu, nyǐ o-kyú u kiǐtí-onet, nyǐ o-man o-kyú ḿgbán enen ashí amúmú.

⁴⁴ Nké â nang onet obónge ké burwám enen to mu o-ryuu ng o/fu, nyǐ o-kyú u běn mbwôp kashú, nyǐ o-man o-kyú ósóng mú kángkáng banet.

⁴⁵ Ké ebóng, nang Wǎn-Onet o*da/bê o/fu, bakû ǎ ebángê byitwóm*. Nké nyǐ o/bê byitwóm ebángê, ne dyikpen emen ekye, eringe nyí odaré dyifwá ńdyí banet chwóó o-kye Osówo.

Jisos o/chi Batyimyôs mú o/mû oo*rángê* o-kpet erángê

⁴⁶ Jisos ne bǎmgbán emen ba/cen ba-da-ribi ké oshê mú badakó Jéríku. Ké nkéré Jisos ne bǎmgbán emen ne bujê-banet chwóó ba-kú ba-mîng ng oshê ámu, onyinchéng obónge mú o/mû o/sêe achi, mú odabángê Batyimyôs, mú wǎn-Tyimyôs o/mû o/kyú ké bukô-bukwóp mu o-rém m banet byěm.

⁴⁷ Ké nkéré Batyimyôs o/jwo ba/fu, Jisos mú o/fîm Názáret nké mu o-shwôm m, o-wonge kakânkakân o/fu, Jisos mú wǎn-Otu Dívit, ri mě bafip.

⁴⁸ Banet chwóó ba-kpet eraa ne nyǐ ba/fu, ocít ocím. Nké nyǐ o/bwa o-kpet ewonge kakânkakân o-shwôm oshwǒm o/fu, wǎn-Otu Dívit, ri mě bafip.

⁴⁹ Jisos o-bwom, ne o-raa o/fu, kó n̂g ǎ o-bâ. Ne ba-kó onyinchéng ámu mú o/sêe achi, ba-raa ne nyǐ ba/fu, jêe. Bûu nensang. Jisos mu o-kó ng ǒ.

⁵⁰ Onyinchéng ámu o-pii nkyú emen o-twóp kú, o-pyiryi kyíbóng o-ba-kâm Jisos.

⁵¹ Jisos o-bí ǎ o/fu, wo amu a-ryuu ng a/fu, me nchi ǒ ebóng. Nsêe achi ámu o-faa o/fu, ntánge byiraa-Osówo, me mu n-ryuu ng n/fu, n-chî ng erángê.

⁵² Jisos o-sét onyinchéng ámu o/fu, ca a-dim, dyityém eyên ńdyí a/fé ne me dii/chi ǒ a-nyange. Ké abe ányi, o-kpet erángê, ne o-kpet ecen o-ca ké bukwóp ne Jisos ké kyikû.