Mátyuu 7 - Bokyi Bible

Barî-Banet ebîn

¹ *Da n̂g echi ba-kûpan barî-banet mpan ké byiko* eringe nyí Osówo oo*ba/chi o-pan běn mpan*.

² Ké ebóng, Osówo o/chi o-pan ǒ mpan ké dyizong-bukwóp dyibónge ńdyí wo adapan barî-banet. Ne nyǐ o/chi o-pan ǒ to mpan ámu obónge mú wo a/pan barî-banet.

³ Ebóng kâng ńkyí wo amu a-kpúrî ng kiǐnfwarê ńkyí nkyi ké dyichi ńdyí wǎn-boné eyên, â wo a*fí a-kérê ng kyi-kim ne kiǐchwóm ńkyí nkyi ké dyichi ńdyí eyên wo oyén*.

⁴ Wo a-cen n nǎ ne a-rêe dyityém, a-sét wǎn-boné eyên a/fu, mîng mě n-fîm ǒ kiǐnfwarê ké dyichi, mú wo amu ne kiǐchwóm ké dyichi ńdyí eyên.

⁵ Ben bannîm banet, bwóp kpá kashú a-fîm kiǐchwóm ńkyí nkyi ké dyichi ńdyí eyên, ne kyi-fím ányi wo a/chi a-man eri ne a-fîm to wǎn-boné eyên kiǐnfwarê ké dyichi.

⁶ *Dachi a-kúng chwǒm-ociring a-kye bubyî* mbú bu/chi bu-bírî bu-bâ ǒ ne bunwa. *Dachi a-pwó byěm ḿbyí byidanwa byi-shwôm ké bushú-akûk* nyǐ a/chi a-cím kámbyí a-bên.

Bí, kyé, kíbî

⁷ Bí, ne a/chi a-koo. Kyé, ne a/chi a-já. Kíbî, ne dyifyi dyi/chi dyi-bâa dyi-tî ǒ.

⁸ Ké ebóng, nang yeě nké o/bí o/chi o-koo, ne nang yeě nké o/kyé o/chi o-já, ne dyifyi to dyi/chi dyi-bâa dyi-tî onet mú mu o-kíbî ng.

⁹ Ben mú bamu banchí-bwǎn, onet mu kô ké burwám enen mú o/chi o-kye wǎn emen buká? â o/bí ǒ o/fu, wo akye ǎ kyirim-berêt?

¹⁰ Wo a-kyâ ǎ efyi? â o/bí ǒ o/fu, wo akye ǎ kakworê?

¹¹ Ben mú bamu byibî-banet bamu ba-nyît ng eringe nyí badakye bwǎn enen byěm ḿbyí byinong byinong. Kyi-cen n nǎ kâng ne Bonchí enen mú kyíbóng oo*kye banet ḿbé ba/bí ǎ byěm ḿbyí byinong byinong*.

¹² Chi banet byěm wǎ eringe nyí wo amu a-ryuu ng a/fu, mbé bachi ǒ. Ké ebóng, ńkyín nké nkyi dyishí ńdyí Byije-Músis ne ńdyí bamkpábé ḿbé badasét byiraa-Osówo ba/tángê to.

Dyifyi ńdyí Kaǎníng

¹³ Shwôm m̂ ké dyifyi ńdyí kaǎníng ne ba-nung, ké ebóng, dyifyi ńdyí dyi/rêe ne bukwóp to ḿbú boo*sóng ecen* byi-jâ ké kyikit-busông eri. Ne banet ba/jê ḿbé mbe ba-cen n ké mbú.

¹⁴ Dyifyi ńdyí kaǎníng ne kiǐfáng to ńkyí kyidasóng ecen byi-jâ ké dyikpen. Ne banet ba*da/jê ḿbé mbe ba-ri ng kándyí*.

Kyichí ne Byirim Emen

¹⁵ Bám m̂ byiko enen kyi-kim ne bamkpábé ḿbé badasét byisédéng. Ba-ri ng kámbé ké enyam-byiko wǎ etám-ebû, nké atyém ebe nyi wǎ nyí ekpang.

¹⁶ Ben ba-man n ecêe kámbé ké édúú ebe. Kyika kii*zím émurúkú*. Ako to aa*zím osén*.

¹⁷ Kyichí ńkyí nkyi kyinong kyi-zím m to byirim ḿbyí byinong. Kyichí to ńkyí kyi*fí kanong* kyi-zím m to byibî-byirim.

¹⁸ Kyichí ńkyí nkyi kanong kii*zím byibî-byirim*. Kyichí to ńkyí kyi*fí kanong* kii*zím byirim ḿbyí byinong*.

¹⁹ Kyichí nang kyirá ńkyí kyi*fí kyi-zím m byirim ḿbyí byinong* ba-twom m kánkyí ba-fé ké okwâ.

²⁰ Éné nké ben to ba/chi ba-cêe bamkpábé ḿbé badasét byisédéng, ké édúú ebe.

Me nn*nyît Běn*

²¹ *Chí nang yeě nang yeě mú mu o-kó ng mě Otu Kyítá nké o/chi o-nung ké Butu ḿbú Osówo* kyi*da/shwôm banet ḿbé mbe ba-chi i byěm ḿbyí Bonchí ejí mú mu kyíbóng mu o-ryuu ng o/fu, bachi nké ba/chi ba-nung*.

²² Ké nkéré mú nkuli kyikû-dyicí ándyi dii/fyi, banet chwóó ba/chi ba-kû mě esét ba/fu, Otu Kyítá, be byi/mû byi-sét ng byiraa-Osówo ké dyizîn eyên. Ké dyizîn eyên to nké byi/mû byi-ró ng byibî-bací chwóó ké enyam-byiko-banet. Ké ndyí to nké byi/mû byi-chi i biǐtí-akat.

²³ Ányi nké me n/chi n-sét kámbé n/fu, me nn*nyît běn*. Dim m̂ mě ányi ké bushú, ǎ banchi byibî.

Bambi Kyise Ashí Afee

²⁴ Nké nang yeě kâng nké o/jwo byiraa ejí ḿbyín, o-chi to eringe nyí byi/sét, o/chi o-kyú wǎ onet mú mu ne bubong, mú o/bi kyise emen twóóm kyíbóng-buká.

²⁵ Omu o-na, buce bu-sú, afú a-tugi ké nkyí. Nké kyi*da/myii* ké ebóng, o/bi kánkyí twóóm kyíbóng-buká.

²⁶ Nké nang yeě nké o/jwo byiraa ejí ḿbyín, nké o*da/chi eringe nyí byi/sét* o/chi o-kyú wǎ enyam-onet mú o/bi kyise emen ké éshíshě.

²⁷ Omu o-na, buce bu-sú, afú a-tugi ké nkyí, kyi-myii. Dyimyii ándyi dii*nwa eri*.

Busa ḿbú Jisos

²⁸ Ké nkéré mú Jisos oo/raa byiraa ḿbyín, bujê-banet ḿbé ba/mû ányi byiko byi-kaa kámbé ké bukwóp ḿbú o/tángê.

²⁹ Nyǐ o/mû o*fí wǎ bantánge Byije-Músis ḿbé ebe*. Nké nyǐ o/tángê ne busa.