Mátyuu 5 - Bokyi Bible

Jisos o/tángê Bǎmgbán Emen Kyíbóng-Kaku

¹ Jisos o/ri bujê-banet ámbe, ne o-yú kyíbóng-kaku o-da-kyú me. Bǎmgbán emen ba-dim ba-kâm ǎ.

² O-kpet etángê kámbé o/fu,

³ bunyîn-dyityém mbu ne banet ḿbé mbe ba-nyît ng ba/fu, mbé ba-chi i banet-kyikpu ké bushú-Osówo, ké ebóng, banjware ḿbé Butu ḿbú Osówo ba/já kámbé.

⁴ Bunyîn-dyityém mbu ne banet ḿbé mbe ba-ta ng dyikán, ké ebóng, Osówo o/chi o-fé kámbé dyityém.

⁵ Bunyîn-dyityém mbu ne banet ḿbé mbe degere ké bushú ḿbú Osówo, ké ebóng, mbé ba/chi ba-koo ńkyí Osówo oo/ryí ocím.

⁶ Bunyîn-dyityém mbu ne banet ḿbé mbe ne kyijé chwóó ké byěm echi ḿbyí Osówo mu o-ryuu ng o/fu, banet bachi, ké ebóng, Osówo o/chi o-kye kámbé nang ebóng chwǒm ńkyí mbe ba-ryuu ng.

⁷ Bunyîn-dyityém mbu ne banet ḿbé mbe ba-ri ng barî-banet bafip, ké ebóng, Osówo o/chi o-ri kámbé to bafip.

⁸ Bunyîn-dyityém mbu ne banet ḿbé atyém ebe nyi kpárádádát, ké ebóng, mbé ba/chi ba-ri Osówo.

⁹ Bunyîn-dyityém mbu ne banet ḿbé mbe ba-chi i ba/fu, banet bakyú ké bunyîn-dyityém ne barî, ké ebóng, Osówo o/chi o-kó kámbé bwǎn emen.

¹⁰ Bunyîn-dyityém mbu ne banet ḿbé mbe ba-kyâ kámbé busông, ké ebóng, mbé mbe ba-chi i ńkyí Osówo mu o-ryuu ng o/fu, banet bachi, ké ebóng, banjware ḿbé Butu ḿbú Osówo ba/já kámbé.

¹¹ Bunyîn-dyityém mbu ne ben ké nkéré banet ba-kú ba-kyâ běn edángé, ba-kyâ běn busông, ba-bât ng běn kángkáng azong-byibî-byěm nyí a*fí ké kafâ* ké ebóng, bamu ba-cen n ne me ké kyikû.

¹² Jêe n̂g, ké ebóng, Osówo oo/tî běn kiǐtí-eyáré kyíbóng. Éné to nké banet ba/kye bamkpábé ḿbé badasét byiraa-Osówo ḿbé kpákpá busông.

Bano ne Kiinwángé

¹³ Ben bamu wǎ bano ḿbé badanyîn kángkáng banet. Nké â bano ba*fí to ne bunyîn ké byiko* bukwóp bu*fí to ḿbú badachîchi kámbé ba-chîkpet enyîn*. Bano ámbe baa/bên, ba-bwa kâng ne mbé ba-pwó kú. Banet ba-kûcím kámbé ké byiká.

¹⁴ Ben bamu wǎ kiinwángé ńkyí kyidasan kángkáng ejíí. Oshê mú ba/bi kámú ké kaku oo*nwa erôo*.

¹⁵ Onet o*fí* mú odamee otyuryíkáng o-yip dyicáng o-cít kámú*. Nké o-twôom m kámú ké kyikit ńkyí badatwôom otyuryíkáng, eringe nyí odatông nang yeě mú mu ké kyise kiinwángé.

¹⁶ Ké dyizong-bukwóp ándyi, kiinwángé enen to kyi-man kyi-kûsan ké bushú ḿbú banet, eringe nyí mbé badari byěm ḿbyí byinong ḿbyí bamu ba-chi i, ne ba-kye Bonchí enen mú mu kyíbóng akpee.

Byěm ḿbyí Jisos o/tángê kyi-kim ne Byije ḿbyí Músis

¹⁷ *Da n̂g echi ba-kabe ba/fu, me mm/bê ebafîm Byije ḿbyí Músis* ne byěm ḿbyí bamkpábé ḿbé badasét byiraa-Osówo ba/tángê*. Me n*da/bê ebafîm kámbyí* nké me m/bê ebachi byěm ebe ḿbyí ba/tángê byi-kyú ntûntû.

¹⁸ Zîim m̂ ńkyín ba/fu, â bubóng ne esí byi/tôong byi-câ kashú, kaapang-kyije ka*fí nang kabónge* ńké ba/chi ba-fîm kánké* tete ké nkuli kyikû mú kángkáng byěm.

¹⁹ Ké bubwô ámbu kâng, nang yeě nké o*fí o-fâ kaǎnyín-kyije ńké nang ka/sîi nǎ* ne mu o-tángê e to barî-banet o/fu, bachi dyizong ándyi, nyǐ o/chi o-kyú nryî esim-onet ké Butu ḿbú Osówo. Nké nang yeě mú mu o-fâ kámbyí, ne mu o-tángê e to barî-banet o/fu, bachi to éné, o/chi o-kyú kiǐtí-onet ké Butu ḿbú Osówo.

²⁰ Me mu n-sét ng běn kâng n/fu, ben baa*ba/chi ba-man enung ké Butu ḿbú Osówo* â ben ba*da/fé atyém enen chwóó ké byěm echi ḿbyí Osówo mu o-ryuu ng o/fu, banet bachi* ba-shwôm bantánge Byije-Músis ne banet-ncibi mú badakó Fárasyî*.

Byěm ḿbyí Jisos o/tángê kyi-kim ne Kafâ esa

²¹ Ben baa/jwo ńkyí Músis o/tángê běn ké byije-Osówo, o/fu, *dachi a-ju onet*. Nang yeě nké o/ju onet, ba/chi ba-kúng ǎ ba-ca ne nyǐ ké bushú ḿbú mpan banet bampan.

²² Nké kántîk, me mu n-sét ng běn n/fu, nang yeě nké mu o-sa ng kafâ ne wǎn-boné emen, ba/chi ba-ca ne nyǐ ké bushú ḿbú mpan banet bampan. Nang yeě nké o/sét wǎn-boné emen o/fu, wo a*fí onet* ba/chi ba-ca ne nyǐ ké esuk eten nyí eryên. Nké nang yeě to nké o/sét wǎn-boné emen o/fu, wo amu enyam-onet nyí e*fí ké chwǒm* o/chi o-bwom ké kyibî-bukwóp ńkyí odajé ké okwâ.

²³ Ké bubwô ámbu kâng, â wo a/mû a-kú a-bâ ekye Osówo eyáré ké kyikit-kyifen-Osówo echi, ne a-waa ké abe ányi a-zîim a/fu, wo amu ké bushwôn ne wǎn-boné eyên,

²⁴ mîng eyáré eyên ányi ké kyikit-kyifen-Osówo echi. Bwa esim kpá a-da-chi ba-firi ké bunyîn-dyityém ne wǎn-boné eyên ámu, ne a-bwa esim kâng, a-da-yip eyáré eyên ányi a-kye Osówo.

²⁵ Nké â wo a/chi onet kyibî, nké o/fé ǒ ké esuk, kyi-nwa ng ńkyí badatóbê kpá kyikû ké esim, ba-firi ké bunyîn-dyityém ne barî, ne ba-kûnung ké esuk. Ké ebóng, â wo a/mîng ba-wá ba-nung ké esuk, o/chi o-yip ǒ o-kye mpan banet bampan. Mpan banet bampan ámu o/chi o-yip ǒ o-kye bapuryíshi ḿbé ba/chi ba-fé ǒ ké mgbokobá.

²⁶ Me mu n-sét ng běn ntûntû n/fu, ányi nké wo a/chi a-waa tete a-kye kángkáng akpuga nyí bada ǒ ekét.

Byěm ḿbyí Jisos o/tángê kyi-kim ne Kyinam echi

²⁷ Ben baa/jwo to ńkyí Músis o/tángê běn ké byije-Osówo, o/fu, *dachi a-chi kyinam*.

²⁸ Nké kántîk, me mu n-sét ng běn n/fu, nang yeě nké o/ri onyi-onet, ne mu o-ryuu ng o/fu, nyǐ o-rí i ne nyǐ, onet ámu mu o-chi i kyinam ne onyinyi ámu ké dyityém.

²⁹ Nké â dyichi eyên ńdyí bubwô-etyebéng nké ndyi dyi-chi i ǒ a-chi i kyibî, zú kándyí a-twóp kú. Nkyi kanong ne wo ńkyí adatánê kyipang-enyam-byiko eyên kyibónge, kyi-shwôm ńkyí badakúng kyirim-enyam-byiko eyên kyimúmú ba-twóp ké kyikit-busông eri.

³⁰ Nké â bubwô-etyebéng eyên nké mbu bu-chi i ǒ a-chi i kyibî, két kámbú a-twóp kú. Nkyi kanong ne wo ńkyí adatánê kyipang-enyam-byiko eyên kyibónge, kyi-shwôm ńkyí kyirim-enyam-byiko eyên kyimúmú kyidajé ké kyikit-busông eri.

Byěm ḿbyí Jisos o/tángê kyi-kim ne Dyibé eman

³¹ Músis o/mû o/tángê běn to o/fu, nang yeě nké mu o-man n dyibé ne onyi emen, o-man o-kye ǎ nwet mú oda ǎ esét o/fu, dyibé ebe dyiman.

³² Nké me mu n-sét ng běn kántîk n/fu, â onyinchéng o/man dyibé ne onyi emen, nang ké mú onyinyi o*da/chi kyinam* mú onyinchéng kâng o/chi ǎ o-chi kyinam, â mú onyinyi ámu o/chîbé otyép okíri. Ne mú onyinchéng ámu to mú o/bé ǎ mu o-chi i kyinam.

Byěm ḿbyí Jisos o/tángê kyi-kim ne Osem mú Onet odasem Osówo

³³ Ben baa/jwo ńkyí Músis o/mû o/tángê běn to o/fu, *da n̂g echi ba-kûbên ocím enen mú ba/ryí* nké chi n̂g ńkyí ba/sem Otu Kyítá ba/fu, ba-chi i.

³⁴ Nké me mu n-sét ng běn kántîk n/fu, *da n̂g echi ba-sem Otu Kyítá* ké nkéré mú ba-kú ba-ryí i ocím ké chwǒm*. *Da n̂g echi ba-sem bubóng* ké ebóng, mbú bu-chi i kakyúng-butu ńké Osówo.

³⁵ Nang esí to, *da n̂g esem kányí* ké ebóng, nyǐ e-chi i kyikit ńkyí Osówo mu o-twôom m byiká emen. Nang Jerúsélem to, *da n̂g esem kámú* ké ebóng, mǔ nké mu oshê-Osówo mú mu kiǐtí-Otu.

³⁶ *Da n̂g echi ba-sem nang dyishí enen* ké ebóng, ben baa*man echi kyiká-oji kyi-firi kyiká-óbyî* nang kyiká-óbyî kyi-bwa kyi-firi pyampyam*.

³⁷ Kû n̂g ebángê, âa nkyi éné, aa kyi*fí éné* nké nke. Nang ebóng chwǒm kyikíri ńkyí adachîfu kyi/fím ne Otu-Byibî-Barím.

Byěm ḿbyí Jisos o/tángê kyi-kim ne Ewa esó

³⁸ Ben baa/jwo ńkyí Músis o/mû o/tángê běn to o/fu, â onet o/chi ǒ kyibî, a-chi ǎ to.

³⁹ Nké me mu n-sét ng běn kántîk n/fu, *da n̂g echi ba-kûsó onet ewa mú o/chi běn kyibî*. Â onet o/díp ǒ dyikwâ ké dyínán ńdyí bubwô-etyebéng, bírî dyínán ńdyí bubwô-eku to a-chî ǎ etông o-díp.

⁴⁰ Ne â onet o/kúng ǒ ba-wâa esuk o/fu, nyǐ o-kyâ ǒ nwet ké kyídí eyên, bwa ne nkyû eyên to a-kye ǎ.

⁴¹ Ne â onet-súja o/chi ǒ ké busa o/fu, wo atû kiimbam emen ké kyilómyíta obónge, chîtû kánkyí ké kyilómyíta okíri.

⁴² Â onet o/rém ǒ chwǒm, kye ǎ kánkyí. Nang nkéré orá nké onet mu o-ryuu ng o/fu, nyǐ o-pwoo ng chwǒm ne wo, pwoo ǎ kánkyí.

Kyijé ńkyí adakyú ne nkyí ne Banet-Bushwôn Eyên

⁴³ Ben baa/jwo ńkyí Músis o/mû o/tángê běn to o/fu, kyú ne kyijé ne bacín eyên, a-kyú ké busa-dyityém ne banet-bushwôn eyên.

⁴⁴ Nké me mu n-sét ng běn kántîk n/fu, kyú ne kyijé ne banet-bushwôn eyên, fé nshwam a-kye Osówo ké bubwô-banet ḿbé mbe ba-kyâ ǒ busông.

⁴⁵ Eringe nyí ben ba/chi ba-firi bwǎn ḿbé Bonchí enen mú kyíbóng. Ké ebóng, nyǐ mu o-chi i esû emen e-san n byibî-banet ne banet ḿbé banong eringe ebónge ké byiko. Ne nyǐ mu o-kyâ banet ḿbé mbe ba-chi i kanong ne ḿbé ba*fí ba-chi i kanong* omu.

⁴⁶ Osówo o-cen n nǎ ne o-kye ǒ eyáré, â wo amu ne kyijé ne banet ḿbé mbe ne kyijé ne wo nké nke. Nang bankoo akpuga-dyishí to mbe ba-chi i dyizong ándyi.

⁴⁷ Ne â wo amu a-ta ng bacín eyên kyiraa nké nke, wo amu a-chi i ńkyí baa*chi dí*. Nang banchi byibî mbe ba-chi i dyizong ándyi.

⁴⁸ Ben ba-man ba-kyú banet ḿbé mbe kanong kerededet, wǎ eringe nyí Bonchí enen mú kyíbóng mu.