Mátyuu 3 - Bokyi Bible

Jǒn mú Nkye Banet Osoo mú Osówo o/sét Banet Byiraa-Osówo

¹ Ké nkéré ámu, Jǒn mú Nkye banet osoo mú Osówo o/bê o-ba-kpet banet esét ké kyikim-dyikán ńkyí ké esí nyí Judyâ

² o/fu, byiko byikpú běn ba-mîng byibî echi, ké ebóng, Butu ḿbú Osówo bu/firi jwángjwáng.

³ Jǒn o-chi i onet ámu mú mkpábé mú odasét byiraa-Osówo, mú odabángê Azáya o/mû mu o-sét ng kyi-kim ne nyǐ, ké nkéré o/fu, onet obónge mu o-wonge e ké kyikim-dyikán o/fu, nap n̂g bukwóp ḿbú Otu Kyítá ba-tî ǎ, chi n̂g kiǐfáng ńkyí dángdáng, ńkyí Otu Kyítá odacen.

⁴ Byídí ḿbyí Jǒn o/mû o-bwá ng ba/chi kámbyí ké eríp-kaanyam-atû. O/mû o-sît ng emâp ké busín nyí ba/chi ké ekwop-enyam, o-ryí i agurubí ne bakút-bukwan.

⁵ Banet ba-fím ké Jerúsélem ne ké Judyâ ne ké kángkáng eshê nyí nyi ké bukô-kace ńké badakó Jódan ba-bâ ba-kâm Jǒn.

⁶ Ba-sét byibî ebe ḿbyí ba/chi, ne nyǐ o-kye kámbé osoo mú Osówo ké kace ánke.

⁷ Ké nkéré mú Jǒn o/ri banet-ncibi mú badakó Fárasyî ne ḿbé Sádusyî ashí chwóó mbe ba-bâ ba-kâm ǎ, eringe nyí odakye kámbé osoo mú Osówo, nyǐ o-raa ne mbé o/fu, ben ḿbé bamu wǎ efyi, yeě o/sét běn o/fu, ben ba-man n efem ké busông ḿbú Osówo ḿbú bu-kú bu-bâ ebê.

⁸ Chi n̂g byěm ḿbyí byidatông byi/fu, byiko bii/kpú běn ba-mîng byibî echi.

⁹ Nké *da n̂g echi ba-kabe ba/fu, â ben ba/sét ba/fu, ben ba-chi i banet ḿbé ba/fím ké kyikû ńkyí Ébarahâm ńkyí nkyí kyi/chi kyi-chwáp běn*. Me mu n-sét ng běn n/fu, Osówo o-man n ekúng aká ńnyín o-chi kányí a-firi banet ḿbé ba/fím ké kyikû ńkyí Ébarahâm.

¹⁰ Dyikye dyi/firi kyísí ńdyí badasím byichí ké eriri ba-twóp kyísí. Kyichí nang kyirá ńkyí kyi*fí kyi-zím m byirim ḿbyí byinong* ba/chi ba-twom kánkyí ba-twóp ké okwâ.

¹¹ Me mu n-yip ng omu ne n-kyâ běn osoo mú Osówo, eringe nyí kyidatông kyi/fu, byiko bii/kpú běn ba-mîng byibî echi, nké onet mú mu o-bâ mě ké esim o/chi o-yip Busun-Osówo ne okwâ ne o-kye běn osoo mú Osówo. Nyǐ o/rêe o-shwôm mě kanong kanong. Me n*da/kwárê mú ndakúng nang abe emen*.

¹² Nyǐ oo/kám kiincage esang-byichí emen ké abwô ńkyí odacage kángkáng esang-byichí. O/chi o-wuri esang-byichí emen o-bwât o-tî, nké o/chi o-shí boǒmpwǎt ké okwâ mú oo*ríbî ne banyá*.

Jǒn o/kye Jisos Osoo mú Osówo

¹³ Ké nkéré ámu, Jisos o/dim ké Gályílyi o-ca ké kace ńké badakó Jódan, ne o-kâm Jǒn o/fu, okye ǎ osoo mú Osówo.

¹⁴ Nké Jǒn o/kan o/fu, nyǐ o-chi i ǎ o-yángê okabe emen. O-sét ǎ o/fu, me n/kwárê mú ndakoo osoo mú Osówo ne wo, nké wo a/bwa a-bâ a-kâm mě me dí.

¹⁵ Nké Jisos o/faa ǎ o/fu, mîng kánkyí kyi-kyú éné kántîk. Ké ebóng, ké bukwóp ḿbún, be byi/chi byi-chi kángkáng ńkyí Osówo mu o-ryuu ng. Jǒn o-bángê kâng.

¹⁶ Jisos o-koo ng osoo mú Osówo o-bâ, o-byí ké kafâ-kace. Bubóng bu-firi bâabâa, ne Jisos o-ri Busun-Osówo ké mbu bu-shû ng bu-bâ éné wǎ karúú, bu-ba-tû ǎ ké byiko.

¹⁷ Ne ejá e-fím kyíbóng e-raa kâng e/fu, nyín něen wǎn ejí mú dyityém, mú dyityém ndyi dyi-nyîn n mě ne nyǐ kanong kanong.