Mátyuu 25 - Bokyi Bible

Dyitím-Ekan kyi-kim ne Bwǎn-Banyinyi Ashí Diǐkpú

¹ Ké dyicí ándyi, Butu ḿbú Osówo bu/chi bu-kyú wǎ bwǎn-banyinyi ashí diǐkpú ḿbé ba/kúng etyuryíkáng ebe ba-dim ba-wâa edakâm onyinchéng mú mu o-bé ng dyibé.

² Ashí atánge ba/mû enyam-banet, ne ashí atánge ba/mû ne bubong.

³ Ḿbé mbe enyam ba/kúng etyuryíkáng ebe, nké ba*da/kúng bakút bakíri*.

⁴ Nké ḿbé mbe ne bubong ba/kúng byiféng ne bakút ányi súsú, ne etyuryíkáng ebe.

⁵ Onyinchéng ámu mú mu o-bé ng dyibé o/mû o*da/wá ebê* ne bwǎn-banyinyi ámbe kâng ba-róng ké burê.

⁶ Kyirê-buchú kyi/mû kii/kán, ńdyí ba/wonge ba/fu, onyinchéng mú mu o-bé ng dyibé o-kú o-bâ. Bâ n̂g ba-kâm ǎ.

⁷ Ḿbé bwǎn-banyinyi ámbe ba-jwóbê, ba-yú etyuryíkáng ebe kyíbóng.

⁸ Ḿbé mbe enyam ba-raa kâng ne ḿbé mbe ne bubong ba/fu, kye n̂g bě onyin-bakút enen, ké ebóng, etyuryíkáng eten e-kú e-ríbî ng.

⁹ Nké ḿbé mbe ne bubong ba/faa ba/fu, aa*wááng*. Bakút baa*ba/chi ba-kwárê bě ne ben*. Ca n̂g ba-da-ré ḿbé enen ké kyise-kasî.

¹⁰ Bwǎn-banyinyi ámbe kâng ḿbé mbe enyam ba-dim ba-wâa bakút edaré, ne ké nkéré mú mbé baa/dim, onyinchéng ámu mú o-bé ng dyibé o-ba-ribi. Ḿbé bwǎn-banyinyi ḿbé ashí atánge ḿbé ba/mû baa/kpá byiko ba-nung ne nyǐ ké kyikû, ké dyijî-dyibé. Ba-bwa ne dyifyi ba-fín.

¹¹ Ké nkéré mú kaa/bwon, ḿbé bwǎn-banyinyi ámbe ba-ba-ribi, ba-wonge ba/fu, bonchí, bonchí, mîng bě byi-nung.

¹² Nké nyǐ o/faa o/fu, ké ntûntû, me mu n-sét ng běn n/fu, me n*fí n-nyît ng běn*.

¹³ Ne Jisos o-kúlî o/fu, kû n̂g ebám byiko kâng, ké ebóng, ben ba*fí ba-nyît ng dyicí ándyi* nang ochíchí-nkéré*.

Dyitím-Ekan ńdyí Bǎmgbán Ashí Achât

¹⁴ Butu ḿbú Osówo bu/chi bu-kyú to wǎ onyinchéng mú o/mû o-kú o-dim m bucen. O-kó bǎmgbán emen, o-bwa ne byěm emen o-fé kámbé ké abwô.

¹⁵ Ḿgbán emen nang orá, o/kye ǎ eringe nyí busa emen mbu. Obónge, o/kye ǎ biimbam-akpuga byitánge. Mú obónge, o-kye ǎ biimbam-akpuga byifee. Ne mú obónge to, o/kye ǎ kiimbam-akpuga kyibónge. Ne o-dim kâng bucen emen.

¹⁶ Ḿgbán emen ámu mú o/kye ǎ biimbam-akpuga byitánge o-dim odǐm o-da-kpet ecen kasî ne akpuga ányi. O-chîryí mpún to ké biimbam-akpuga byitánge.

¹⁷ Ké dyizong-bukwóp ámbu to dyibónge, ḿgbán mú o/koo biimbam-akpuga byifee o-chîryí mpún to ké biimbam-akpuga byifee.

¹⁸ Nké ḿgbán mú o/koo kiimbam-akpuga kyibónge o/dim o-da-sím dyibíng, o-rôo akpuga-bonchí emen.

¹⁹ Ké nkéré mú kaa/rí, bonchí-bǎmgbán ámbe o/fyi, ba-tóbê kyi-kim ne akpuga ányi.

²⁰ Ḿgbán ámu mú o/koo biimbam-akpuga byitánge o/banung o-bwa ne biimbam-akpuga ḿbyí áku byitánge o-kye bonchí. O-raa o/fu, wo a/kye mě biimbam-akpuga byitánge, ǎ bonchí. Nyín něen biimbam-akpuga byikíri byitánge ḿbyí n/ryí mpún.

²¹ Bonchí emen o-faa o/fu, a/chi kanong kanong, wo a-chi i ḿgbán mú onong ne mú mu ne ofê. Wo aa/kye mě ofê ké boǒnyín-akpuga eníbî, ké bubwô ámbu kâng, me n/chi n-tî ǒ onet-dyishí mú akpuga nyí chwóó eníbî. Nung a-bâ a-ba-kyú to ké bunyîn-dyityém ne me.

²² Ḿgbán kâng mú o/koo biimbam-akpuga byifee o-ba-nung. O-raa o/fu, wo a/kye mě biimbam-akpuga byifee, ǎ bonchí, nyín něen biimbam-akpuga byikíri byifee ḿbyí n/ryí mpún.

²³ Bonchí emen o-faa o/fu, a/chi kanong kanong, wo a-chi i ḿgbán mú onong ne mú mu ne ofê. Wo aa/kye mě ofê ké boǒnyín-akpuga eníbî, ké bubwô ámbu kâng, me n/chi n-tî ǒ onet-dyishí mú akpuga nyí chwóó. Nung a-bâ a-ba-kyú to ké bunyîn-dyityém ne me.

²⁴ Ḿgbán kâng mú o/koo kiimbam-akpuga kyibónge o-ba-nung. O-raa o/fu, bonchí, me mu n-nyît ng n/fu, édúú eyên e-sóng ng. Wo amu a-fuu ng byiryíng ké kyikit ńkyí wo a*da/kpang* ne amu a-bóng ng esang-byichí ké kyikit ńkyí wo a*da/kwón*.

²⁵ Kyi/chi mě bushî, n-kúng kâng akpuga eyên n-da-sím n-rôo. Nyín něen akpuga eyên.

²⁶ Bonchí emen o-faa o/fu, wo a-chi i onet-dyidare ne kyibî-ḿgbán. Wo amu a-nyît ng a/fu, me mu n-fuu ng byiryíng ké kyikit ńkyí me n*da/kpang* ne mu m-bóng ng esang-byichí ké kyikit ńkyí me n*da/kwón esang-byichí*.

²⁷ Ebóng kâng ńkyí wo a*da/kúng akpuga ejí a-da-fé ké kyikit ńkyí okákárá odarôo akpuga* něen nn/koo kányí ne mpún kyíbóng ké nkéré mú n/fyi.

²⁸ Koo n̂g kâng akpuga ányi ne nyǐ ba-kye onet mú mu ne biimbam-akpuga byitánge.

²⁹ Ké ebóng, nang yeě nang yeě mú mu ne chwǒm ba/chi ba-chî ǎ ekye kyi-jê kyi-shwôm éné, ne nyǐ o/chi o-firi ne nkyí kyi-jê kyi-shwôm eringe nyí mu o-ryuu ng. Nké onet mú o*fí ne chwǒm* nang kaǎnyín ńké mu ne nké, ba/chi ba-koo ǎ kánké.

³⁰ Kyi-kim kâng ne ḿgbán mún mú o*da/byí chwǒm* níbî n̂g ǎ ba-twóp ké kyifip. Ányi nké nyǐ o/chi o-kûtii o-ryí i asháng.

Nkuli Kyikû-Mpan

³¹ Ké nkéré mú Wǎn mú Onet o/chi o-bâ wǎ Otu ne kángkáng barím ḿbé banong ké kyikû, nyǐ o/chi o-kyú ké kakyúng-butu emen ńké ragerage,

³² ne kángkáng banet ba/chi ba-ba-cibi ké bushú emen. Ányi kâng nké nyǐ o/chi o-kyii kámbé ké byikim byifee, wǎ eringe nyí mbâm ebû odapap etám-ebû ne ebúbǔu.

³³ Nyǐ o/chi o-tî etám-ebû ké bubwô-etyebéng emen, ebúbǔu ké bubwô-eku emen.

³⁴ O-raa kâng ne banet ḿbé ké bubwô-etyebéng emen o/fu, bâ n̂g kwán, ben ḿbé Bonchí ejí oo/jware běn. Bâ n̂g ba-ba-koo Butu ḿbú Bonchí ejí oo/nap o-tî běn, kyi-fím ké nkéré mú nyǐ o/chi ejíí.

³⁵ Ké ebóng, me esong e/mû nyi e-nwa ng mě, ben ba/kye mě byiryíng. Omu o/mû mu o-jê ng mě, ben ba/kye mě kámú n-jwáp. Me m/mû ocinónet, ben ba/koo mě ba-tî ké byise enen.

³⁶ M/mû to osíndyíbang, ben ba/kye mě kyídí m-bwá. Me m/mû mu n-rwôm m, ben ba/bám mě. Me m/mû ké mgbokobá, ben ba/ba mě eri.

³⁷ Banet ámbe kâng ḿbé ba/kwárê ké bushú ḿbú emen ba/chi ba-faa ǎ ba/fu, Otu Kyítá, nkéré orá mú be byi/ri ǒ esong nyi e-nwa ng ǒ, ne byi-kye ǒ byiryíng a-ryí, aa nkéré orá mú omu o/mû mu o-jê ng ǒ, ne byi-kye ǒ a-jwáp.

³⁸ Nkéré orá to mú be byi/ri ǒ amu ocinónet, ne byi-koo ǒ byi-tî ké byise eten, aa nkéré orá to mú a/mû osíndyíbang, ne byi-kye ǒ kyídí.

³⁹ Nkéré orá to mú be byi/ri ǒ amu a-rwôm m, nang amu ké mgbokobá, ne byi-ba-ri ǒ.

⁴⁰ Otu ámu o/chi o-faa kámbé o/fu, me mu n-sét ng běn ké ntûntû n/fu, nang nkéré orá nké ben ba/chi ńkyín ba-kye wǎn-boné ejí mún mú kyísí kyísí obónge, ben ba/chi kánkyí ba-kye mě me.

⁴¹ Ne o/chi o-raa kâng ne banet ḿbé ké kyicê-bubwô-eku emen o/fu, dim m̂ mě me nyín, ben ḿbé Osówo oo/shú běn. Ca n̂g ba-jâ ké okwâ mú ne banyá, mú Osówo oo/nap o-tî Otu-Byibî-Barím ne barím emen.

⁴² Me esong e/mû nyi e-nwa ng mě, nké ben ba*da mě ekye byiryíng*. Omu o/mû mu o-jê ng mě, ben ba*da mě ekye n-jwáp*.

⁴³ Me m/mû ocinónet, nké ben ba*da mě ekoo ba-tî ké byise enen*. M/mû osíndyíbang, nké ben ba*da mě ekye kyídí m-bwá*. Me m/mû mu n-rwôm m, ne m/mû to ké mgbokobá, nké ben ba*da mě etún*.

⁴⁴ Mbé kâng ba/chi ba-faa ǎ ba/fu, Otu Kyítá, nkéré orá mú be byi/ri ǒ esong nyi e-nwa ng ǒ, nang omu mu o-jê ng ǒ, nang a/bê ocinónet, nang amu osíndyíbang, nang amu a-rwôm m, nang amu ké mgbokobá, ne be byi*da ǒ echwáp*.

⁴⁵ Otu ámu o/chi o-faa kámbé o/fu, me mu n-sét ng běn ké ntûntû n/fu, nang nkéré orá nké ben ba/né echwáp onet mú kyísí kyísí mún obónge, ben ba/né mě echwáp.

⁴⁶ Ḿbén kâng nké nyǐ o/chi o-twóm kámbé ba-jâ ké busông ḿbú ne banyá. Banet ḿbé ba/kwárê ké bushú ḿbú emen ba/chi ba-jâ ké dyikpen ńdyí ne banyá.