Mátyuu 22 - Bokyi Bible

Dyitím-Ekan ńdyí Dyijî-Dyibé

¹ Jisos o/chîraa ne banet ámbe ké atím-ekan o/fu,

² Butu ḿbú Osówo mbu wǎ otu obónge mú o/kó dyijî-dyibé ńdyí wǎn emen mú onyinchéng.

³ O-twóm bǎmgbán emen o/fu, bada-sét banet ḿbé nyǐ o/kó kámbé ba-bâ ké dyijî, nké banet ámbe ba*fí ba-ryuu ng ba/fu, mbé ba-bâ*.

⁴ Ne o-chîtwóm bǎmgbán emen bakíri o-sét kámbé o/fu, sét n̂g banet ḿbé n/kó kámbé ba/fu, me mm/kpá byiko ké dyijî ejí. Baa/ju bampong ejí ḿbé baryên baryên ba-fee, ne kángkáng byěm to byi/firi kyísí. Bâ n̂g ké dyijî-dyibé.

⁵ Nké banet ḿbé nyǐ o/mû o/kó kámbé ba*da/fwôo ofwǒng atông*. Onet ne onet o-dim kiǐfáng ńkyí emen. Onet obónge o/dim ké kyifát emen, mú obónge o-dim ké kyise-kasî emen.

⁶ Banet ámbe bakíri ba-bwa ba-níbî bǎmgbán emen ámbe ba-ju.

⁷ Kafâ ka-bírî otu ámu, ne o-twóm basúja emen ba-da-ju banet ámbe ḿbé ba/ju bǎmgbán emen, ne ba-shí eshê ebe.

⁸ Ne otu ámu o-kó bǎmgbán emen o/fu, me mm/kpá byiko ké dyijî ejí echi, nké banet ḿbé me m/mû n/kó kámbé ba*da/chîkwárê mú badakyú ké ndyí*.

⁹ Kántîk, ca n̂g ké étíbingé-eshê ba-da-kó banet nang nǎ ḿbé ben ba/chi ba-ri.

¹⁰ Bǎmgbán emen ba-dim kâng ké étíbingé-eshê ba-da-wuri kángkáng banet ḿbé mbé ba/ri, ḿbé banong ne ḿbé byibî. Ne banet ba-sú kâng ké kyise-dyibé pwat.

¹¹ Otu ámu o-dim o/fu, nyǐ o-da ng eri bacinbánet emen ámbe ḿbé ba/bê ké dyijî, ne o-ri onyinchéng obónge mú o*da/fé byídí-dyibé*.

¹² Otu ámu o-bí ǎ o/fu, ocín, wo a/cen nǎ ne a-nung nyín, byídí-dyibé a*da/fé*. Nké onyinchéng ámu o*da/faa ojá*.

¹³ Ne otu ámu o-waa ányi o-sét bǎmgbán emen o/fu, bwá n̂g ǎ abwô ne byiká ba-twóp ǎ kyíjí ké kyifip. Ányi nké o/chi o-kûtii o-ryí i asháng.

¹⁴ Ne Jisos o-kúlî bǎmpém emen o/fu, Osówo o-kó ng bujê-banet chwóó, nké o-cá ng boǒnyín o-fîm.

Ḿbím kyi-kim ne Akpuga-Dyishí ekye

¹⁵ Banet-Fárasyî ba/dim ba-da-wuri eju, eringe nyí mbé badabí Jisos bǎmbím, ba-chi ǎ o-róng ké ocím.

¹⁶ Ne ba-twóm kyicê-bǎmgbán ebe ne kyicê-banet-ncibi mú ba/bángê ne Otu Hérot, ba-kâm Jisos. Banet ámbe ba-raa ne Jisos ba/fu, ntánge byiraa-Osówo, be byimu byi-nyît ng byi/fu, wo a-sét ng ntûntû. Wo amu a-tángê e bukwóp ḿbú ntûntû kyi-kim ne okabe mú Osówo o/tî ne banet, nang okére aa*kérê* kyi-kim ne eringe nyí banet mbe ba-kabe ng*. Ké nǎ, wo a*fí a-shî ng achi nyí onet nang obónge*.

¹⁷ Sét bě kâng, wo a/kabe nǎ. Byije eten byi/ciring otu mú Rûm akpuga-dyishí ekye? aa byi*da/ciring*?

¹⁸ Jisos kâng o/mû mu o-nyît ng kyibî-okabe ebe, ne o-waa ányi o-raa ne mbé o/fu, ben ba-chi i bannîm banet. Ebóng bamu ba-kan n mě ba/fu, me nróng ké ocím.

¹⁹ Tông n̂g mě akpuga nyí bamu ba-kúng ng ne ba-kye akpuga-dyishí. Mbé ba-bâ ne akpuga ányi ba-kye ǎ.

²⁰ Ne Jisos o-bí kámbé o/fu, nyín bushú ḿbú yeě, ne dyizîn ńdyí yeě to nké ba/fé ké akpuga nyín.

²¹ Mbé ba-faa ǎ ba/fu, ḿbyí otu mú Rûm. Ne Jisos o-sét kámbé o/fu, ehê, kye n̂g kâng otu mú Rûm ńkyí kyi/já ǎ, ba-kye to Osówo ńkyí kyi/já ǎ.

²² Ké nkéré mú mbé ba/jwo ńkyín, ba/waa ocím ké dyishí fúú, ne ba-waa ányi ba-dim ba-mîng ǎ.

Ḿbím kyi-kim ne Ojwóbe ké Bukyû

²³ Ké dyicí ándyi dyibónge, kyicê-banet-ncibi mú badakó Sádusyî ba/bê ba-kâm Jisos. Mbé ba-chi i banet ḿbé mbe ba-sét ng ba/fu, banet baa*ba/chi ba-jwóbê ké bukyû*.

²⁴ Ba-raa ne nyǐ ba/fu, ntánge byiraa-Osówo, Músis o/tángê o/fu, â onyinchéng mú o*da/fwon wǎn* o/kpú, wǎn-boné emen o-man o-bé mú onyǐnkú, eringe nyí badafwon bwǎn ba-kye onet mú oo/kpú.

²⁵ Banyinchéng ba/mû kâng nyín ashí káchâtkányi ḿbé ba/fím ne barî. Mú okínkán o-bé onyi, o-kpú, wǎn o*da/fwon* o-mîng kâng onyǐnkú emen ne wǎn-boné emen.

²⁶ Dyizong-chwǒm ándyi dyibónge nké dyi/chi to ne wǎn-boné emen mú nnyinyěng, ne mú o/chînye, tete kyi-ribi ké ashí ebe káchâtkányi.

²⁷ Ké nkuli kyikû, onyinyi ámu to o-kpú.

²⁸ Ké bubwô ámbu, ké dyicí ńdyí bakúsí badajwóbê ké bukyû, onyinyi ámu o/chi o-kyú onyi mú yeě, ké ebóng, mbé ashí kángkáng baa/bé ǎ.

²⁹ Jisos o-faa kámbé o/fu, ben ba*da/man eraa*. Nkyi éné, ké nǎ, ben ba*fí ba-nyît ng ejá-Osówo nyí ba/sáng kyísí* nang busa ḿbú Osówo*.

³⁰ Ké ebóng, ké nkéré mú bakúsí baa/jwóbê ké bukyû, mbé ba/chi ba-firi wǎ barím ḿbé banong ḿbé mbe kyíbóng, ne banyinchéng ne banyinyi baa*ba/chi ba-chîbé barî*.

³¹ Kyi-kim kâng ne bakúsí ejwóbê ké bukyû, ben baa/kó ńkyí Osówo o/sét běn. O/fu,

³² me n-chi i Osówo mú Ébarahâm ne Osówo mú Ázik ne Osówo mú Jekôp. Ńkyín kyi/byí kyi/fu, nyǐ o-chi i Osówo mú banet bakpó, *chí mú bakúsí*.

³³ Ké nkéré mú bujê-banet ba/jwo ńkyín, ba/waa ocím ké dyishí fúú ké byěm emen ḿbyí mu o-tángê e.

Kiǐtí-Kyije-Músis

³⁴ Ké nkéré mú banet-Fárasyî ba/jwo ba/fu, Jisos oo/kpógê banet-Sádusyî, mbé ba/bacibi kyikit kyibónge.

³⁵ Ne onet ebe obónge mú o/mû ntánge Byije-Músis o-kan o/fu, nyǐ o-bí ng Jisos ḿbím, eringe nyí nyǐ odachi Jisos o-róng ké ocím.

³⁶ Ne o-bí Jisos o/fu, ntánge byiraa-Osówo, ebóng kyije-Músis nkyi kiǐtí kyi-shwôm.

³⁷ Jisos o-faa ǎ o/fu, Osówo Óburúkpâbí o-man o-jê ǒ ne dyityém eyên kángkáng ne busun eyên kángkáng ne okabe eyên kángkáng.

³⁸ Ńkyín nké nkyi kiǐtí-kyije, ne kyi/rêe kyi-shwôm kángkáng byije.

³⁹ Nnyinyěng-kyije ńkyí kyi/rêe to kyi-shwôm, nkyi to wǎ nkyí, orî-onet o-man o-jê ǒ, wǎ eringe nyí enyam-byiko eyên nyi e-jê ng ǒ.

⁴⁰ Kángkáng Byije-Músis ne byěm ḿbyí bamkpábé ḿbé badasét byiraa-Osówo ba/tángê byi/jêem esim ké byije ḿbyín byifee.

Ḿbím kyi-kim ne Onet mú Osówo o/kúng ǎ Butu

⁴¹ Nkéré mú banet-Fárasyî ba/bacibi kyikit kyibónge, Jisos o/bí kámbé o/fu,

⁴² ben bamu ba-kabe ng nǎ kyi-kim ne onet mú Osówo o/kúng ǎ butu. Nyǐ o/fím ké kyikû ńkyí yeě. Ḿbé Fárasyî ba-faa ǎ ba/fu, o/fím ké kyikû ńkyí Otu Dívit.

⁴³ Jisos o-waa ányi o-bí kámbé o/fu, ebóng kyi/chi ne Otu Dívit ké busa ḿbú Busun-Osówo, o/bwa o-kó ǎ Otu Kyítá. Ké nǎ, Otu Dívit o/mû o/raa něen o/fu,

⁴⁴ Osówo Óburúkpâbí o/sét Otu Kyítá ejí o/fu, kyú me nyín ké kyicê-bubwô-etyebéng ejí tete n-ren banet-bushwôn eyên kyísí a-cím kámbé byiká.

⁴⁵ Nké â Otu Dívit kâng o/kó ǎ Otu Kyítá, kyi-cen n nǎ ne onet mú Osówo o/kúng ǎ butu o-bwa o-firi wǎn mú Otu Dívit.

⁴⁶ Ne onet o*fí nang obónge mú o/man ǎ efaa ojá*. Ne kyi-fím ké dyicí ándyi kyi-ca kashú, onet o*fí to mú o/chîkan o/fu, nyǐ o-bí ng Jisos bǎmbím*.