Mátyuu 12 - Bokyi Bible

Ḿbím kyi-kim ne Dyicí-Ékwâbashi

¹ Ka*da/rí* Jisos o/mû mu o-shwôm m ké byifát-esang-byichí, ké dyicí-ékwâbashi. Esong e/mû nyi e-nwa ng bǎmgbán emen. Ne ba-kpet ebóng esang-byichí ányi ba-ryí i.

² Ké nkéré mú banet-ncibi mú badakó Fárasyî ba/ri ńkyín, ba-raa ne Jisos ba/fu, ké ntûntû, kyije eten kyi*da/bángê kyi/fu, bǎmgbán eyên bachi ńkyín ké dyicí-ékwâbashi*.

³ Jisos o-faa kámbé o/fu, nâng ben baa/kó ńkyí Otu Dívit o/chi ké nkéré ámu mú nyǐ ne basúja emen esong e/mû nyi e-nwa ng kámbé.

⁴ Nyǐ o/nung ké kyise ńkyí Osówo, ne nyǐ ne basúja emen ba/ryí berêt mú ba/chi kyifen ba-kye Osówo, nang ké kyi/mû nkyi ké kyije ńkyí mbé baa*ryí berêt ámu*. Kyi*da/shwôm banchi kyifen-Osówo nké nke badaryí berêt ámu*.

⁵ Nang ké Nwet-Byije-Músis to ben baa/kó ba/fu, kángkáng dyicí-ékwâbashi, banchi kyifen-Osówo ḿbé ké kiǐtí-kyise-kyifen-Osówo echi mbe ba-róng ng kyije ńkyí ékwâbashi ké ntûntû, nké Osówo o*fí o-fâ ké dyityém emen o/fu, mbé ba/chi kyibî*.

⁶ Me mu n-sét ng běn n/fu, onet mu nyín mú o/rêe o-shwôm kiǐtí-kyise-kyifen-Osówo echi.

⁷ Ejá-Osówo nyí ba/sáng kyísí e/fu, me n*fí n-ryuu ng kyifen echi ńkyí byirim-byitú* nké mu n-ryuu ng n/fu, banet bari barî bafip. Â ben bamu ba-nyît ng ké ntûntû eringe nyí ńkyín kyi/byí, ben ba/mû baa*ba/chi ba-két mpan o-bên banet*.

⁸ Ké ebóng, Wǎn mú Onet mu Otu mú o/shwôm nang byije ḿbyí byi/kim ne dyicí-ékwâbashi.

Onyinchéng mú Bubwô Emen bu/nyîim

⁹ Jisos o-mîng kyikit ánkyi, o-dim o-wâa ké kyise-ékwâbashi ebe kyibónge.

¹⁰ Onyinchéng obónge o/mû ányi mú bubwô emen bu/nyîim. Banet bakíri ba/mû ányi ḿbé ba/mû mbe ba-ryuu ng ba/fu, mbé babât Jisos ba/fu, o/chi kyibî. Ba-sét ǎ kâng ba/fu, ké ntûntû, kyije eten kyi*da/bángê kyi/fu, bachi onet o-nyange ké dyicí-ékwâbashi eten*.

¹¹ Jisos o-faa kámbé o/fu, â nang onet obónge ké burwám enen mu ne etám-ebû, ne â e/róng ké kiǐríbíríbí-dyibíng ké dyicí-ékwâbashi, wo aa*ba/chi a-níbî kányí a-fîm kányí e-byí*?

¹² Ne onet o/rêe kampén kampén o-shwôm etám-ebû. Ké bubwô ámbu kâng, kyije eten kyi/bángê bě kyi/fu, be byichwáp onet ké dyicí-ékwâbashi eten.

¹³ Ne o-raa kâng ne mú onyinchéng ámu o/fu, nabe bubwô eyên. O-nabe kámbú, bu-bwa bu-firi kanong wǎ eringe nyí bubwô ḿbú áku.

¹⁴ Banet-Fárasyî ba-dim ba-da-tóbê eringe nyí mbé badaju Jisos.

Ḿgbán mú Osówo o/cá

¹⁵ Ké nkéré mú Jisos o/jwo kyi-kim ne nkyí, o-dim o-mîng kyikit ánkyi. Bujê-banet ba-dim ne nyǐ ké kyikû. O-chi kángkáng banet ḿbé ba/mû mbe ba-rwôm m ba-nyange.

¹⁶ Ne o-kuri kámbé ekó o/fu, ba*dachi ba-sét banet ḿbé áku kyi-kim ne nyǐ*

¹⁷ eringe nyí ńkyí Osówo o/raa ké ocím mú mkpábé mú odasét byiraa emen, mú odabángê Azáya kyidakyú ntûntû.

¹⁸ Ńkyí o/fu, nyín něen ḿgbán ejí mú me nn/cá, mú oda mě ejê, mú dyityém ejí ndyi dyi-nyîn n mě ne nyǐ kanong kanong. Me n/chi n-fé ǎ Busun ejí ké byiko, ne nyǐ o/chi o-sét kángkáng banet kyi-kim ne mpan ejí mú me mu m-pan n banet.

¹⁹ Nké nyǐ oo*ba/chi o-kán ké dyishí* o-wonge nang owonge* o-raa nang wááng ké etyém-étíbingé*.

²⁰ Nyǐ oo*ba/chi o-jâa mgbang-kyichí mú oo/sep* o-rîp nang otyuryíkáng mú o*fí o-mang ng kanong*. Nyǐ o/chi o-bwom tete o-chi mpan ejí o-bwom.

²¹ Ne kángkáng banet ba/chi ba-fé ekabe ebe ne nyǐ.

Jisos ne Bézíbul

²² Banet bakíri kâng ba-níbî onyinchéng obónge mú achi a/sêe ǎ, ne kyiraa to o*fí o-man n eraa* ké ebóng, o/mû ne kyibî-bucí, ba-ba-kye Jisos. Jisos o-chi onyinchéng ámu o-nyange, o-kpet eman eraa kyiraa, o-rángê e to achi.

²³ Bujê-banet ámbe kángkáng ba-waa ocím ké dyishí fúú. Ba-kpet ebí ba/fu, nang nyǐ nké mu wǎn-Otu Dívit ámu o.

²⁴ Ké nkéré mú banet-Fárasyî ba/jwo ńkyín, ba-faa ba/fu, nyǐ mu o-ró ng byibî-bací ké enyam-byiko-banet, ké ebóng, Otu-Byibî-Barím mú odabángê Bézíbul ne Sátan nké mu o-kyâ ǎ busa.

²⁵ Jisos o-nyît ńkyí ba/mû mbe ba-kabe ng, ne o-faa kámbé o/fu, oshê nang orá mú o/kyii ké byikim ké byikim ḿbyí mbyi byi-nwa ng ne barî o/chi o-róng. Ne nang oshê orá nang kyikû-banet to kyirá nké ba/kyii ké byikim ké byikim ḿbyí mbyi byi-nwa ng ne barî baa*ba/chi ba-bwom*.

²⁶ Ké bubwô ámbu kâng, â kyikim kyibónge kyi-kú kyi-nwa ng ne kyikíri ké butu ḿbú Sátan, ńkyín kyi/byí kyi/fu, butu ḿbú Sátan boo/kyii ké byikim ké byikim, ne bu/chi bu-róng abeabe.

²⁷ Ben bamu ba-raa ng ba/fu, me mu n-ró ng byibî-bací, ké ebóng, Bézíbul nké mu o-kyâ mě busa o/fu, nró kámbyí. Aa yeě kâng mú mu o-kyâ bánen-banet-Jûs busa, ḿbé mbe ba-ró ng kámbyí. Bánen-banet-Jûs nké mbe ba-tông ng ba/fu, ben ba*da/man eraa*.

²⁸ Kyi*fí éné*. Busun-Osówo nké mbu bu-kyâ mě busa ḿbú mu n-ró ng byibî-bací, ányi kyi/byí, nkéré mú Osówo odatún banet emen oo/fyi.

²⁹ Onet o*fí nang obónge mú odaman esé kyise ńkyí okân-onyinchéng o-nung o-kúng ǎ byěm* tete o-bwóp kpá kashú o-bwá okân-onyinchéng ámu erí. Kyi-fím ányi kâng, nyǐ o-man n ǎ esé kyise.

³⁰ Nang yeě nké o*fí ne me* onet ámu o-chi i onet-bushwôn ejí. Nang yeě nké o*fí o-chwáp ng mě ekpaa byi-tî kyikit kyibónge* onet ámu mu o-jaa ng ojǎng.

³¹ Ké bubwô ḿbún, me mu n-sét ng běn ntûntû n/fu, Osówo o-man n epwoo banet ké kyibî nang kyirá ne ké kyibî-kyiraa to nang kyirá ńkyí badaraa. Nké nang yeě nké o/raa byibî-byiraa o-bât Busun-Osówo, Osówo oo*ba/chi o-pwoo ǎ*.

³² Nang yeě nké o/raa chwǒm o-bât Wǎn mú Onet, Osówo o-pwoo ng ǎ. Nké nang yeě nké o/raa chwǒm o-bât Busun-Osówo, Osówo oo*ba/chi o-pwoo ǎ kántîk* nang ne banyá*.

Kyichí ne Byirim Emen

³³ Â wo a/fu, a-já ng kyirim-kyichí ńkyí kyinong, a-man a-kwón dyisín-kyichí ńdyí dyinong. Â wo amu ne dyisín-kyichí ńdyí dyi*fí kanong* wo a/chi a-já kyibî-kyirim-kyichí. Ké ebóng, kyichí ba-nyît ng kánkyí ké dyizong-kyirim ńdyí kyidazím.

³⁴ Ben mú bamu wǎ efyi, ben ba-cen n nǎ ne ba-kûraa byěm ḿbyí byinong, mú ben ba*fí ba-nwa ng*. Ké ebóng, ocím o-raa ng ńkyí nkyi ké dyityém.

³⁵ Onet mú onong o-raa ng byěm ḿbyí byinong, ḿbyí byida ǎ efím ké dyityém emen ńdyí dyinong. Kyibî-onet kyi-raa ng byibî-byěm ḿbyí byida ǎ efím ké kyibî-dyityém emen.

³⁶ Me mu n-sét ng běn ńkyín n/fu, ké Dyicí-Mpan ándyi, nang yeě nang yeě o/chi o-man o-pan mpan kyi-kim ne kángkáng byibî-byiraa ḿbyí nyǐ oo/raa ké dyikpen emen.

³⁷ Ké ebóng, Osówo o-kúng ng ejá eyên ne o-pan ǒ mpan. Ne o-sét ǒ â a/chi kyibî, nang a*da/chi*.

Banet ba/bí ba/fu, Jisos ochi Akat o-tông Kámbé

³⁸ Kyicê-bantánge Byije-Músis ne kyicê-banet-Fárasyî ba-faa kâng ba/fu, ntánge byiraa-Osówo, be byimu byi-ryuu ng byi/fu, chi akat abónge be byi-ri.

³⁹ Jisos o-faa kámbé o/fu, bwǎn-bafî ba/bên! ne Osówo to mú ba*fí ba-fâ ǎ*. Ben ba/bí mě ba/fu, nchi akat? Aa*wááng*. Akat nyí me n/chi n-tông běn, kyi*da/shwôm akat nyí Osówo o/tông Jóna* mú o/mû mkpábé mú odasét byiraa-Osówo*.

⁴⁰ Ké dyizong-bukwóp dyibónge ńdyí Jóna o/rí ací achât ké dyifít ńdyí kiimbâng-kakworê, éné to nké Wǎn mú Onet o/chi o-rí ací achât to ké kafâ-ecing.

⁴¹ Ké Dyicí-Mpan ándyi, banet ḿbé Nyínyíve ba/chi ba-bwom ba-sét běn ba/fu, ben ba/chi kyibî, ké ebóng, mbé byiko byi/kpú kámbé, ba-mîng byibî ebe ké nkéré mú Jóna o/sét kámbé byiraa-Osówo. Ne me mu n-sét ng běn n/fu, onet mu nyín mú o/shwôm Jóna.

⁴² Ké Dyicí-Mpan ándyi, onyinyi mú o/mû o/ryí butu, mú o/fím ké kyicê ńkyí busyísen, o/chi o-bwom o-sét běn o/fu, ben ba/chi kyibî, ké ebóng, nyǐ o/fím kyicê ńkyí tíbítíbí o-bâ, eringe nyí odajwo byěm-bubong ḿbyí Otu Sólómon o/mû o-tángê e. Ne me mu n-sét ng běn n/fu, onet mu nyín mú o/shwôm Otu Sólómon.

Esim ebwa nyí Kyibî-Bucí

⁴³ Â kyibî-bucí kyi/byí onet ké byiko, kyi-cen n ké biǐjúnjwóm-byikit kyi-kyé ng kyikit ńkyí kyidakyú kyi-jáng. Â kyi*da/ri kyikit*

⁴⁴ kyi-raa ne byiko emen kyi/fu, n/chi m-bwa esim ké kyise ejí ńkyí m/mû. Kyi-bwa kâng esim, kyi-da-ri kyise kafâ dyikáá, kpárádádát ne byěm ḿbyí baa/nap ba-tî.

⁴⁵ Ne kyi-byí kâng kyíjí, kyi-da-kpî byibî-bací byikíri káchâtkányi ḿbyí byi/bên byi-shwôm kánkyí, byi-bâ byi-kûkyú ányi. Ké bubwô ámbu, nkuli kyikû-dyikpen ńdyí onet ámu dyi/chi dyi-bên dyi-shwôm nkéré mú nyǐ o/mû kpákpá. Něen nké kyi/chi kyi-chi bambên atyém-banet ḿbé mbe nyín kurún.

Boné-Jisos ne Bwǎn-Bané-Jisos ḿbé Banyinchéng

⁴⁶ Jisos o/mû o/tôong o-pem m banet ámbe ńdyí boné emen ne bwǎn-bané emen ḿbé banyinchéng ba/baribi. Ba-bwom kyíjí mbe ba-bí ng ba/fu, mbé ba-pem m ne Jisos.

⁴⁷ Onet obónge kâng mú o/mû ányi o-sét Jisos o/fu, bonchí, boné eyên ne bwǎn-bané eyên ba/bwom kyíjí, ne mbe ba-ryuu ng ba/fu, mbé ba-pem m ne wo.

⁴⁸ Jisos o-faa o/fu, yeě mu boné ejí. Be yeě to mbe bwǎn-bané ejí.

⁴⁹ Ne o-tông kâng bǎmgbán emen kafwa o-raa o/fu, ké ntûntû, nyín něen boné ejí ne bwǎn-bané ejí.

⁵⁰ Ké ebóng, nang yeě nké mu o-chi i ńkyí Bonchí ejí mú kyíbóng mu o-ryuu ng o/fu, nyǐ ochi, onet ámu o-chi i wǎn-boné ejí ne boné ejí.