Mátyuu 10 - Bokyi Bible

Banet-Kyitwóm-Jisos ḿbé Ashí Diǐkpú ne Afee

¹ Jisos o-kó bǎmgbán emen ḿbé ashí diǐkpú ne afee kyikit kyibónge. O-kye kámbé busa ḿbú badaró byibî-bací ké enyam-byiko-banet, ne ḿbú badachi kángkáng azong-byirwóm ne kángkáng azong-busông to nyí banet mbe ba-ri ng byi-man.

² Nyín něen azîn nyí banet-kyitwóm emen ámbe ashí diǐkpú ne afee. Mbwôp kashú, Sámon mú odabángê to Pyíta, ne wǎn-boné emen mú odabángê Ánduru ne Jêmsyi ne wǎn-boné emen mú odabángê Jǒn ḿbé bwǎn-Zébédyi,

³ ne Fyílip ne Batólómyi ne Tómos ne Mátyuu mú nkoo akpuga-dyishí ne Jêmsyi mú wǎn-Áfus, ne Tádyos

⁴ ne Sámon mú o/mû ne kyijé ne oshê, ne Júdas-Esakáryot mú o/chi ba-kám Jisos.

Bǎmkpóngé ḿbé Banet-Kyitwóm-Jisos ḿbé Ashí Diǐkpú ne Afee ba/chi

⁵ Jisos o-twóm banyinchéng ḿbén ashí diǐkpú ne afee, o-sét kámbé o/fu, *da n̂g echi ba-ca ké esí nyí banet ḿbé ba*fí banet-Jûs* nang ké eshê nyí banet-Samérya*.

⁶ Nké ca n̂g kyikit-etám-ebû nyí banet-Ézerel nyí ee/tánê.

⁷ Ba-sét ng kámbé ba-câ ba/fu, Butu ḿbú Osówo bu/firi jwángjwáng.

⁸ Chi n̂g banet-byirwóm ba-nyange, ba-jwóbê banet ḿbé baa/kpú, ba-ró to byibî-bací ké enyam-byiko-banet. Ben baa/koo chwǒm ńkyí ben ba*da/ré ké akpuga* ké bubwô ámbu, kye n̂g to banet, nang chwǒm, *da n̂g echi ba-koo*.

⁹ *Da n̂g echi ba-kúng nang akpuga ké biimbam-byidóng enen*.

¹⁰ *Da n̂g echi ba-kúng kiimbam-akpuga erém ké bucen ḿbún* nang nkyû okíri mú badayángê byiko* nang abe* nang ochí-bucen*. Onet-bǎmkpóngé ba-man ba-kye ǎ ńkyí mu o-ryuu ng.

¹¹ Â ba/ribi ké oshê nang ké kaǎshê, nung n̂g ké mǔ ba-da-kyé onet mú nkyi kyi-nyîn n ǎ o/fu, nyǐ o-koo ng běn kanong, ba-kyú to ne nyǐ tete ba-mîng oshê ámu.

¹² Â ba/nung ké kyise, sét n̂g oyén-kyise ba/fu, bunyîn-dyityém bukyú ne wo.

¹³ Â banet ḿbé mbe ké kyise ánkyi ba/koo běn kanong, mîng n̂g kyiraa eta enen ńkyí bunyîn-dyityém kyi-waa ne mbé. Nké â ba*da běn ekoo kanong* kyiraa eta enen ánkyi ńkyí bunyîn-dyityém kyiwaa ne ben.

¹⁴ Ne â nang kyise ńkyí banet mbe ba-kyú u nang oshê okíri ba*da běn ekoo kanong* nang ba*da/fwôo atông ké ńkyí ba/sét kámbé* mîng n̂g kyikit ánkyi, ba-pâ ecing nyí ké abe enen ba-pwó wǎ ekó ekuri.

¹⁵ Zîim m̂ ńkyín ba/fu, ké Dyicí-Mpan ándyi, Osówo o/chi o-ri banet ḿbé oshê mú badakó Sódom ne ḿbé Gomóra bafip o-shwôm banet ḿbé oshê ámu.

Busông ḿbú mbu bu-bâ

¹⁶ Fwôo n̂g atông ba-jwo, me mu n-twóm m běn wǎ etám-ebû nyí nyi e-wâa ng e-kâm ekpang. Ben ba-man ba-chwoo byiko enen wǎ etong, ne ba-man to ba-kyú ne dyityém ńdyí degere wǎ ńdyí karúú.

¹⁷ Bám m̂ byiko enen, ké ebóng, banet ba/chi ba-kyú ḿbé ba/chi ba-kám běn ba-ca ne ben ké esuk, ne mbé ba/chi ba-kû běn emín ké byise-ékwâbashi ebe.

¹⁸ Ba/chi ba-pan běn mpan ké bushú-banet-ashí ne ḿbú batu, ké bubwô ejí, eringe nyí badasét kámbé Bǎmpém ḿbé Banong, ba-sét to banet ḿbé ba*fí banet-Jûs*.

¹⁹ Ké nkéré mú baa/níbî běn ba-kú ba-bâ běn mpan epan, *da n̂g echi ba-kédê ofong kyi-kim ne ńkyí badasét* nang eringe nyí badasét kánkyí*. Ké nkéré mú nkéré ámu oo/fyi, Osówo o/chi o-kye běn ńkyí badasét.

²⁰ Ké ebóng, ejá nyí ben ba/chi ba-sét ee*ba/chi e-kyú nyí enen*. E/chi e-fím ne Busun ḿbú Bonchí enen ḿbú bu/chi bu-raa ké ocím enen.

²¹ Banet ba/chi ba-kûníbî bwǎn-bané ebe ba-kye ba/fu, baju. Ne banchí-bwǎn ba/chi ba-chi bwǎn ebe dyizong ándyi to. Bwǎn ba/chi ba-bírî bunwa ne banchí ne bané ebe, ba-sét ba/fu, baju kámbé.

²² Ben ba/chi ba-kûsa kángkáng banet kafâ ké bubwô ejí. Nké nang yeě nké o/ryí ofit tete o-fyi nkuli kyikû, Osówo o/chi o-nyii ǎ.

²³ Ne ké nkéré mú ba-kú ba-kyâ běn busông ké oshê obónge, chêe n̂g ba-jâ oshê okíri. Me mu n-sét ng běn ntûntû n/fu, ben baa*ba/chi ba-man bǎmkpóngé ké eshê-Ézerel kángkáng* ne Wǎn-Onet o-bâ*.

²⁴ Wǎn-nwet o*fí nang obónge mú odashwôm onet mú mu o-tángê e ǎ*. Ósóng to o*fí nang obónge mú odashwôm bonchí emen*.

²⁵ Ké bubwô ámbu, kyi-man kyi-kwárê wǎn-nwet ké dyityém ńkyí odafiri wǎ onet mú mu o-tángê e ǎ. Ne kyi-man kyi-kwárê ósóng to ké dyityém ńkyí odafiri wǎ bonchí emen. Â mbe ba-kó ng onet-dyishí mú kyikû-banet, Bézíbul mú mu Otu-Byibî-Barím, banet ḿbé ba/fím ké kyikû-banet ánkyi, ba/chi ba-kó kámbé azîn nyí a/bên a-shwôm éné.

Onet mú bada ǎ eshî

²⁶ *Da n̂g echi ba-kûshî banet kâng*. Ké ebóng, nang ebóng chwǒm nké ba/cít kánkyí ba/chi ba-bâa kánkyí. Nang ebóng chwǒm to ńkyí ké kadip ba/chi ba-chi kánkyí kyi-byí kyíjí.

²⁷ Ńkyí me mu n-sét ng běn ké kyifip ben ba-man ba-raa kánkyí ké kiinwángé ńkyí dyicí. Ne ńkyí ben baa/jwo to ké booju, ben ba-man ba-sét kánkyí kyíjí ké ótíbingé.

²⁸ *Da n̂g echi ba-kûshî banet ḿbé badaman eju kiintaa-enyam-byiko* nké baa*man eju busun*. Nké shî n̂g Osówo mú odaman eju kiintaa-enyam-byiko cibicibi ne busun ké kyikit-busông eri.

²⁹ Ben ba-man eré agbâng afee ké kóbo. Nké dyigbâng dyi*fí nang dyibónge ńdyí dyidaróng kyísí* ńdyí Bonchí enen o*fí o-nyît ng*.

³⁰ Nké nang eji nyí nyi běn ké dyishí Osówo oo/pan kányí kángkáng.

³¹ *Da n̂g echi ba-kûshî kâng* ké ebóng, ben ba/rêe kanong kanong ba-shwôm agbâng chwóó.

Kanong esét kyi-kim ne Karâs, ne Karâs ené

³² Nang yeě nké mu o-sét ng kyíjí wááng o/fu, nyǐ mu ne me, me to n/chi n-sét éné ké bubwô emen, ké bushú-Bonchí ejí mú kyíbóng.

³³ Nké nang yeě nké mu o-né ng kyíjí wááng o/fu, nyǐ o*fí ne me* me to kâng n/chi n-né ǎ ké bushú-Bonchí ejí mú kyíbóng.

Jisos o*da/bê Bunyîn-Dyityém ekye*

³⁴ *Da n̂g echi ba-kûkabe ba/fu, me mm/bê ne bunyîn-dyityém ké ejíí*. Kyi*fí éné*. Me n*da/bê ne bunyîn-dyityém* nké m/bê ne kashwám.

³⁵ Me m/bê ebachi bwǎn-banyinchéng ba-bírî bunwa ne banchí ebe, bwǎn-banyinyi ba-bírî bunwa ne bané ebe, bwǎn-banyinyi ba-bírî to bunwa ne bané-batyép ebe.

³⁶ Kyibî-onet-bushwôn-onet o/chi o-kyú onet mú o/fím ké kyikû emen.

³⁷ Nang yeě mú bonchí nang boné emen mu o-jê ng ǎ o-shwôm mě me, nyǐ o*da/kwárê ké bushú ejí*. Nang yeě mú wǎn emen mu o-jê ng ǎ o-shwôm mě me, nyǐ o*da/kwárê ké bushú ejí*.

³⁸ Nang yeě nké o*da/kúng kyikwap emen ńkyí bada ǎ eshwân o-bâ ne me ké kyikû* nyǐ o*da/kwárê ké bushú ejí*.

³⁹ Nang yeě nké mu o-jang ng eryú kyi-kim ne dyikpen emen, dyikpen emen dyi/chi dyi-tánê ǎ. Nang yeě nké dyikpen emen dyi/tánê ǎ ké dyishí ejí o/chi o-kpen.

Eyáré ekoo

⁴⁰ Nang yeě nké o/koo běn kanong o/koo mě me. Nké nang yeě nké o/koo mě kanong o/koo nyǐ mú o/twóm mě.

⁴¹ Nang yeě nké o/koo onet-kyitwóm-Osówo kanong, ké ebóng, onet ámu o-chi i onet-kyitwóm-Osówo, nyǐ o/chi o-nung to ké eyáré nyí onet-kyitwóm-Osówo ámu o/koo. Nké nang yeě nké o/koo onet mú onong, ké ebóng, onet ámu mu dyizong ándyi, nyǐ o/chi o-nung to ké eyáré nyí onet ámu.

⁴² Nké zîim m̂ ńkyín ba/fu, nang yeě nké o/kye ḿgbán ejí mú kyísí kyísí nang obónge omu mú okun mǔ mu o-jwáp, ké ebóng, ḿgbán ejí ámu mu o-cen n ne me ké kyikû, nyǐ o/chi o-koo eyáré emen ntûntû.