Mátyuu 1 - Bokyi Bible

Ba/sáng Kyísí kyi-kim ne Kyikû-Banet ńkyí Jisos

¹ Nyín něen eringe nyí ba/sáng kyi-kim ne kyikû-banet ńkyí Jisos Karâs mú o/fím ké kyikû-banet ńkyí Otu Dívit. Otu Dívit mú o/fím ké kyikû-banet ńkyí Ébarahâm.

² Ébarahâm o/mû bonchí mú Ázik. Ázik o/mû bonchí mú Jekôp. Jekôp o/mû bonchí mú Júda ne bwǎn-bané-Júda ḿbé banyinchéng.

³ Júda o/mû bonchí mú Pérez ne Zéra. Boné ebe o/mû o-bángê e Táma. Pérez o/mû bonchí mú Hézoron. Hézoron o/mû bonchí mú Râm.

⁴ Râm o/mû bonchí mú Amínádap. Amínádap o/mû bonchí mú Náshwon. Náshwon o/mû bonchí mú Sálamon.

⁵ Sálamon o/mû bonchí mú Bówaz. Boné-Bówaz o/mû o-bángê e Ráhap. Bówaz o/mû bonchí mú Obêt. Boné-Obêt o/mû o-bángê e Rût. Obêt o/mû bonchí mú Jésyi.

⁶ Jésyi o/mû bonchí mú Otu Dívit. Otu Dívit o/mû bonchí mú Otu Sólómon. Boné-Otu Sólómon o/mû o-bé ng Oryâ.

⁷ Otu Sólómon o/mû bonchí mú Otu Ryíhobâm. Otu Ryíhobâm o/mû bonchí mú Otu Abyíja. Otu Abyíja o/mû bonchí mú Otu Ása.

⁸ Otu Ása o/mû bonchí mú Otu Jehósháfat. Otu Jehósháfat o/mû bonchí mú Otu Jehóram. Otu Jehóram o/mû bonchí mú Otu Ozáya.

⁹ Otu Ozáya o/mû bonchí mú Otu Jótam. Otu Jótam o/mû bonchí mú Otu Éhaz. Otu Éhaz o/mû bonchí mú Otu Hezekyâ.

¹⁰ Otu Hezekyâ o/mû bonchí mú Otu Manáse. Otu Manáse o/mû bonchí mú Otu Ámon. Otu Ámon o/mû bonchí mú Otu Josáya.

¹¹ Otu Josáya o/mû bonchí mú Otu Jehóyákin ne bwǎn-bané-Otu Jehóyákin ḿbé banyinchéng, ké nkéré mú ba/kám banet-Ézerel wǎ básóng ba-jâ ne mbé Bábyílon.

¹² Ńdyí baa/kúng kámbé ba-jâ ne mbé Bábyílon, Otu Jehóyákin o-fwon Shátyel. Shátyel o/mû bonchí mú Zerubábel.

¹³ Zerubábel o/mû bonchí mú Ábyut. Ábyut o/mû bonchí mú Elyǎkim. Elyǎkim o/mû bonchí mú Ázo.

¹⁴ Ázo o/mû bonchí mú Zádok. Zádok o/mû bonchí mú Ákim. Ákim o/mû bonchí mú Élyot.

¹⁵ Élyot o/mû bonchí mú Elyǎza. Elyǎza o/mû bonchí mú Mátan. Mátan o/mû bonchí mú Jekôp.

¹⁶ Jekôp o/mû bonchí mú Josêf mú otyép-Méryi. Méryi o-fwon Jisos mú bada ǎ ekó Karâs.

¹⁷ Ké bubwô ámbu kâng, byitông-banchí ne bwǎn byi/mû diǐkpú ne byinyii fím ké Ébarahâm a-ba-ribi ké Otu Dívit. Ne fím to ké Otu Dívit a-ribi ké nkéré mú ba/kúng banet-Ézerel ba-jâ ne mbé Bábyílon, byitông-banet to diǐkpú ne byinyii. Ne fím to ké nkéré ámu a-ribi ké nkéré mú ba/fwon Karâs, byitông-banet to diǐkpú ne byinyii.

Eringe nyí ba/fwon Jisos Karâs

¹⁸ Nyín něen eringe nyí ba/fwon Jisos Karâs. Méryi mú boné emen, Josêf o/mû oo/ryí ocím o/fu, nyǐ o-bé ng ǎ. Nké ne ba-kûbé barî, Méryi o/mû oo/nyît o/fu, nyǐ o/chi o-fwon wǎn ké busa ḿbú Busun-Osówo.

¹⁹ Josêf ámu mú o/mû o/firi ké búkyî ne nyǐ, o/mû onet mú mu o-chi i byěm kángkáng nkéré ké bukwóp ḿbú bunong. Ne nyǐ o/mû o*fí o-ryuu ng o/fu, nyǐ o-fâ Méryi éshwân*. O-tî kâng okabe o/fu, nyǐ o-chi i dyibé ebe dyi-man ké kadip.

²⁰ Ké nkéré mú nyǐ mu o-kabe ng kyi-kim ne ńkyín, orím mú onong mú Otu Kyítá o/byí o-kâm ǎ ké burê, o-sét ǎ o/fu, Josêf mú o/fím ké kyikû-banet ńkyí Otu Dívit, *dachi a-shî Méryi ekúng a/fu, okyú onyi eyên*. Ké ebóng, ké busa ḿbú Busun-Osówo nké nyǐ oo/koo dyifít.

²¹ Nyǐ o/chi o-fwon wǎn-onyinchéng, ne wo a/chi a-fé ǎ dyizîn ńdyí badakó Jisos, ké ebóng, wǎn ámu o/chi o-nyii banet emen ké byibî ebe.

²² Kángkáng byěm ḿbyín byi/chi eringe nyí ńkyí Otu Kyítá o/mû o/sét ké ocím mú mkpábé obónge, mú odasét byiraa-Osówo, kyidakyú ntûntû.

²³ O/fu, wǎsíng-onyinyi mú o*da/nyît ne onyinchéng* o/chi o-koo dyifít, o-fwon wǎn-onyinchéng, ne ba/chi ba-kûkó wǎn ámu, Émánwel. Ányi kyi/byí, Osówo mu ne be.

²⁴ Ké nkéré mú Josêf o/jwóbê kâng, o/chi ńkyí orím mú onong mú Otu Kyítá o/sét, o-bé Méryi.

²⁵ Nké Josêf o*da/rí ne Méryi* tete o-fwon wǎn-onyinchéng. Ne Josêf o-fé ǎ dyizîn ńdyí badakó Jisos.