Máka 7 - Bokyi Bible

Byibî-Édúú ḿbyí Banet-Ézerel

¹ Kyi/bên ne me kanong kanong. Me n/firi wǎ onet mú esong nyi e-nwa ng ǎ, mú o*fí o-man n eri kyirim-kyichí nang kyibónge*. Baa/bóng kángkáng byirim-byichí, cibicibi ne ḿbyí byidanyîn.

² Onet mú odasét ntûntû o*fí to nang obónge mú o/waa ké oshê eten*. Onet o*fí mú mu o-chi i ńkyí Osówo mu o-sét ng*. Nang yeě mu o-kyé ng bukwóp ḿbú odaju onet. Nang yeě mu o-kyé ng onet-oshê emen mú oda ǎ echi kyibî.

³ Mbé kángkáng baa/kpí byibî echi kanong kanong. Banet-ashí-oshê ne bampan bampan mbe ba-bí ng banet bangu. Onet mú mu ne busa ké oshê mu o-sét ng kámbé ńkyí nyǐ mu o-ryuu ng, [ne ké bubwô ámbu, ba-kpet enam byibî-byěm kyikit kyibónge.]

⁴ Nang banet ḿbé mbe kanong ba-shwôm kámbé, ḿbé baa*sét kyisédéng ké burwám ebe* ba*da/byí ké chwǒm* wǎ biǐbyâa. Dyicí dii/fyi ńdyí Osówo o/chi o-kye banet ḿbé Ézerel busông, wǎ eringe nyí o/kuri kámbé ekó ké ocím mú bamkpábé ḿbé badasét byiraa emen. Kántîk, mbé ba*fí to ba-nyît ng ńkyí badachi*.

⁵ *Dabángê ńkyí orî-onet eyên mu o-sét ng ǒ* nang ocín-dyityém eyên, *dafé dyityém ne nyǐ*. Bám byiko eyên nang ké ńkyí adasét onyi eyên.

⁶ Ké ací nyí kántîk, bwǎn-banyinchéng ba-kú ba-kúng ng banchí ebe wǎ enyam-banet. Bwǎn-banyinyi ba-kú ba-kán n bané ebe ké dyishí, ne ásé a-kú a-shwôn n ne bané-batyép ebe. Banet-bushwôn-onet ba/firi banet-kyikû emen.

⁷ Nké me n/chi m-bám Óburúkpâbí. Me n/chi m-bám Osówo ne dyityém dyibónge, mú o/chi o-nyii mě. Osówo ejí o/chi o-jwo mě.

Óburúkpâbí mu o-bâ ne Onyii

⁸ Banet-bushwôn eten ba*fí ne bukwóp ḿbú bada bě ejwó*. Be bii/róng, nké byi/chi byi-chîbûu. Be byimu ké kyifip kántîk, né Óburúkpâbí o/chi o-kye bě kiinwángé.

⁹ Be bii/chi byibî ké bushú ḿbú Óburúkpâbí, ne ké bubwô ámbu, be byi-man byi-cíp busa-dyityém emen ké kaǎnyín-nkéré. Nké ké nkuli kyikû, nyǐ o/chi o-bwom bě ké esim, o-chi byibî ḿbyí banet baa/chi bě byi-firi kanong. O/chi o-fîm bě o-tî ké kiinwángé. Be byi/chi byi-kpen byi-ri nkéré mú nyǐ o/chi o-nyii bě.

¹⁰ Banet-bushwôn eten ba/chi ba-ri kâng ńkyín, éshwân e-wuri kámbé, banet-bushwôn ámbe babónge ḿbé ba/mû ba-fât ng bě kiikuku, ba-bí ng bě ba/fu, Óburúkpâbí mú mu Osówo enen mu nyá. [Byi/chi byi-ri nkéré mú ba/chi ba-kpógê kámbé, ba-cím] kámbé ba-fé kyísí wǎ biǐntóng ḿbyí ké byiká-oshê.

¹¹ Banet ḿbé Jerúsélem, nkéré mú badabwât ekpe nyí e/wáp oshê e-fé ké kafâ ba-bi, o-kú o-bâ. Ké nkéré ámu, ba/chi ba-nere esí enen.

¹² Banet enen ba/chi ba-fím ké kángkáng byikit ba-bwa esim ba-kâm běn. Ba/chi ba-fím Asyírya, ké kyicê ńkyí esû nyi e-byí i, ba-fím Éjip, ké kyicê ńkyí busyísen, ba-fím ké kyikim-esí ńkyí kace ńké Yuférétyis, ba-fím ké baya ḿbé tíbítíbí ne ké eku nyí tíbítíbí.

¹³ Nké esí nyí banet-bushwôn eten e/chi e-firi kyikim-dyikán ké bubwô ḿbú dyityém ebên ńdyí banet ḿbé mbe ba-kyú u ké nyǐ.

Óburúkpâbí o/ri Ézerel Bafip

¹⁴ Óburúkpâbí, yip ochí eyên wǎ mbâm ebû a-kûbám banet eyên ḿbé wo aa/cá. Nang ké mbe ba-kyú u cátcatcát ké kyikim-dyikán, esí nyí edabát byiryíng e/wâng kámbé e-fé ké kafâ. Mîng kámbé ba-bwa esim ba-da-ryí baryî ké aro nyí anong anong nyí Báshan ne Gyílet, wǎ eringe nyí ba/mû ba/ryí ké nkéré mú o/shwôm ké esim chwóó.

¹⁵ Óburúkpâbí, [chi akat a-tông bě,] wǎ eringe nyí a/mû a/chi ké ací nyí a/fîm bě byi-byí ké Éjip.

¹⁶ Banet-bushwôn eten ba/chi ba-ri akat ńnyín éshwân e-wuri kámbé, nang ké nyǐ nyi ne busa. Ké byiko ḿbyí byidakaa kámbé, mbé ba/chi ba-cít ocím ebe ne atông ebe.

¹⁷ Mbé ba/chi ba-kûtut bukim ké édúkǎndú wǎ efyi. Ba/chi ba-byí ké byikit ebe ḿbyí mbe ba-bwom m ba-nwa ng byití ba-tím m banê ne bushî. Mbé ba/chi ba-kpet eshî Óburúkpâbí mú mu Osówo eten.

¹⁸ Osówo okíri o*fí to wǎ wo* ǎ Óburúkpâbí*. Wo amu a-pwoo ng byibî ḿbyí banet eyên ḿbé baa/fem. Wo aa*waa ké busa-dyityém ne banyá* nké kyi-nyîn n ǒ be kyijé eyên etông ńkyí kii*man*.

¹⁹ Wo a-chî ng bě echîri bafip. Wo a/chi a-cím byibî eten ké byiká, a-yip kámbyí a-pwó byi-ribi byi-jâ ké kyikû-baya ḿbé baryên.

²⁰ Wo a/chi a-tông banet eyên ḿbé kyikû-banet ńkyí Ébarahâm ne Jekôp dyityém ńdyí a/fé ne mbé ne kyijé eyên to ńkyí kii*man* eringe nyí a/ryí banchí eten ḿbé kpákpá ocím ké nkéré mú o/shwôm ké esim chwóó.