Máka 6 - Bokyi Bible

Mpan mú Osówo mu ne mǔ ne Banet ḿbé Ézerel

¹ Fwôo n̂g atông ba-jwo mpan mú Óburúkpâbí mu ne mǔ ne banet ḿbé Ézerel. Bûu, ǎ Óburúkpâbí, a-sét mpan eyên. Eku nang erá ejwo ńkyí amu a-sét ng.

² Ben, ǎ ecím-eku nyí bamu byikû-ekpe ḿbyí ejíí ḿbyí bii*náng* fwôo n̂g atông ba-jwo mpan mú Óburúkpâbí. Óburúkpâbí mu ne mpan ne banet emen. O/chi o-sét banet ḿbé Ézerel kyibî ńkyí ba/chi.

³ Óburúkpâbí o/raa o/fu, banet ejí, me n/chi běn ebóng. Me mu n-kyâ běn afaníkong nǎ. Faa n̂g ńkyí mu m-bí ng běn.

⁴ Me n/fîm běn ba-byí ké Éjip, n-nyii běn ké búsóng. Me n/twóm Músis ne Éron ne Myíryam ba-tông běn kiǐfáng.

⁵ Banet ejí, zîim m̂ ńkyí Otu Bálek mú Mówep o/kabe o/fu, nyǐ o-chi i běn, ne eringe nyí Bálim mú wǎn-Bého o/faa ǎ. Zîim m̂ eringe nyí ben ba/nyáng kace ńké Jódan, ké nkéré mú ba/fím Akákya ba-kú ba-wâa ng Gyígal. Zîim m̂ byěm ḿbyín ne ben ba/chi ba-nyît ńkyí me n/chi n/fu, n-nyii ng běn.

Ńkyí Óburúkpâbí mu o-ryuu ng

⁶ Me m-bâ ng ekye Osówo Óburúkpâbí mú kyíbóng ebóng, ké nkéré mm/bê ǎ ofê ebakye. M-bâ ne bampong ḿbé ba/nwa ba-shwôm m-ba-chi kyifen n-kye ǎ?

⁷ Óburúkpâbí o/chi o-kyú ké bunyîn-dyityém, â m/bê ǎ ne égot-ebû? nang bakút ḿbé baa*nwa eri*? N-yip ng ókpá-wǎn-onyinchéng ejí n-chi kyifen n-kye ǎ ké dyishí-byibî ejí?

⁸ Aa*wááng*. Óburúkpâbí oo/sét bě ńkyí nkyi kanong. Ńkyí nyǐ mu o-ryuu ng o/fu, be byichi nkyi něen, o/fu, be byichi ńkyí nkyi ntûntû, byi-tông to kyijé ńkyí kii*man* byi-kyú to ne Osówo eten degere.

⁹ Nkyi chwǒm-bubong ńkyí adashî Óburúkpâbí. Nyǐ mu o-kó ng banet-oshê-Jerúsélem o/fu, ben banet-Júda ḿbé ba/cibi ké oshê,] fwôo n̂g atông ba-jwo. [

¹⁰ Akpuga nyi ké byise ḿbyí byibî-banet, nyí ba/já ké bukwóp ḿbú boo*nwa*. Mbe ba-kúng ng byiféng ḿbyí badaryí banet mpún ba-kan n byěm. Chwǒm ánkyi kyi-sa ng mě kafâ.]

¹¹ Me n-cen n nǎ ne m-pwoo banet ḿbé mbe ba-shee ng banet byěm ké byiféng ne érúmá nyí ee*kan byěm kanong*.

¹² Banfang-banet enen mbe ba-cít ng banet-byikpu, ne ben ashí kángkáng ba-chi i bansêt byisédéng.

¹³ Ké bubwô ámbu, me [mm/kpet ebê ne] busông ne dyiju enen ké bubwô-byibî enen.

¹⁴ Ben ba/chi ba-ryí byiryíng, nké baa*ba/chi ba-zût*. Ké ntûntû, esong e-chî ng běn ekpet enwa. Ben ba/chi ba-fuu byiryíng, nké baa*ba/chi ba-man enyii kámbyí byi-waa ḿbyí enen*. Nang ebóng chwǒm ńkyí ben badanyii ba-koo, m-bên n kánkyí ké byití.

¹⁵ Ben ba/chi ba-kwón esang-byichí, nké baa*ba/chi ba-bóng esang nyí edazím*. Ben ba/chi ba-chi bakút-ólif, nké baa*ba/chi ba-sabe kámbé ké byiko*. Ben ba/chi ba-chi bato, nké baa*ba/chi ba-jwáp kámbé*.

¹⁶ Ńkyín kyi/chi kyi-chi, ké nǎ, ben baa/kúng kyibî-édúú ńkyí Otu Ómiryi ne ńkyí wǎn emen Otu Éhap. Ben bamu ba-câ kashú ne kyiká-bucen ebe, ne ké bubwô ámbu, me n/chi m-bâ běn ne bukyû, ne nang yeě nang yeě o/chi o-jwó běn. [Banet nang bará ba/chi ba-kû běn echi byěm ḿbyí byida běn ewuri éshwân.]