Máka 5 - Bokyi Bible

¹ Banet ḿbé Jerúsélem, wuri n̂g banet-byití enen. Baa/wâng bě ba-fé ké kafâ. Ba-kú ba-kyâ otu mú Ézerel bunwa.

Osówo o/ryí Ocím o/fu, Nyǐ o/chi o-kúng Onet mú o/fím Bételehêm Butu

² Óburúkpâbí o/raa o/fu, Bételehêm-Efyírata, wo nké amu oshê mú o/sîi o-shwôm ké Júda, nké ké kafâ eyên nké n/chi n-kúng otu mú Ézerel, mú kyikû-banet emen kyi/fím ké bankéré ḿbé kpákpá.

³ Óburúkpâbí kâng o/chi o-né banet emen o-kye banet-bushwôn ebe tete onyinyi mú bufwon bu-kú bu-nwa ng ǎ o-fwon wǎn-onyinchéng emen. Ne banet-oshê emen kâng ḿbé mbe ba-kyú u ké eshê ekíri wǎ básóng ba/chi ba-chîcibi ne banet ebe.

⁴ Ké nkéré nyǐ o/chi o-bâ, nyǐ o/chi o-tún banet emen wǎ mbâm ebû ne busa ḿbú mbu bu-fím m ne Óburúkpâbí, ne butu ḿbú Osówo Óburúkpâbí emen oyén. Banet emen ba/chi ba-kyú afaníkong aa*ta kámbé* ké nǎ, banet ḿbé ké ejíí emúmú ba/chi ba-nyît busa emen,

⁵ ne o/chi o-bâ ne bunyîn-dyityém. Â banet ḿbé Asyírya ba/nung ké oshê eten, ba-bên byise eten ḿbyí byidabwom byi-nwa byití, be byi/chi byi-twóm banet-ashí eten ḿbé mbe ne busa ba-shwôm ba-nwa ne mbé.

Onyii ne Busông

⁶ Ba/chi ba-nwa byití ba-kpógê banet ḿbé Asyírya, ne [ba/chi ba-nyii] bě ké abwô ebe â ba/bê ebanung ké oshê eten.

⁷ Banet ḿbé Ézerel ḿbé ba/chi ba-fem ba/chi ba-kyú wǎ kyibû ńkyí kyidachee byiko, ńkyí Óburúkpâbí o/twóm o-kye eshê chwóó, ba-kyú u to wǎ omu mú odana ké byíkwôn. Mbé ba/chi ba-jêem esim ne Osówo, *chí ne onet*.

⁸ Banet ḿbé ba/chi ba-waa ké eshê nyí banet-bushwôn ebe ba/chi ba-kyú wǎ ekpang nyí nyi e-kyé ng enyam ne byitú ḿbyí edaryí. E-nung ng ké dyibóng-ebû, e-kám kányí, e-ját kányí boǒcê boǒcê, ne onet o*fí mú o/chi o-man enyii kányí o-koo*.

⁹ Banet ḿbé Ézerel ba/chi ba-kpógê banet-bushwôn ebe ba-ju kámbé kángkáng.

¹⁰ Óburúkpâbí o/raa o/fu, ké nkéré ámu, n/chi n-ju bubyî-orá-byití enen, m-bên bamútu enen ḿbé bubyî-orá budatut.

¹¹ N/chi m-bên eshê nyí ké esí enen ne kángkáng byikit enen ḿbyí badabwom ba-nwa byití.

¹² N/chi m-bên bakye enen ḿbé bamu ba-sháng ng, n-chi běn baa*kyú to ne bansô epé*.

¹³ N/chi m-bên erím-bakye enen ne aká-ociring enen. Baa*ba/chi ba-chîkye byěm ḿbyí ben bayén ba/chi ofê*.

¹⁴ N/chi m-bên orím-bukye-osówo-onyinyi mú bamu ba-kó ng Ashéra ké esí enen, m-bên eshê enen.

¹⁵ Ne ké busa-dyityém ejí ḿbú buryên, n/chi n-só kángkáng eshê nyí e*da mě ekye ofê* ewa.