Máka 2 - Bokyi Bible

Ńkyí kyi/chi kyi-chi Banet ḿbé mbe ba-cít ng Banet-Byikpu

¹ Kyi/chi kyi-bên kanong kanong ne banet ḿbé mbe ba-waa ng achi fúú ba-nam m byibî. Â dyicófóróng dyi/cé, ba-ri ng mpât ba-bâ, ba-chi kyibî ánkyi ńkyí ba/mû ba/kabe ne buchú.

² Â mbe ba-ryuu ng byifát, ba-bam m kámbyí ba-koo. Â mbe ba-ryuu ng byise, ba-koo. Onet o*fí mú kyikû-banet emen ne esí emen byi/chi byi-waa kerededet*.

³ Ké bubwô ámbu, Óburúkpâbí o/raa o/fu, me mu n-nam m busông ḿbú n/chi m-bâ běn ne mbú, ne onet o*fí mú o/chi o-fem ké mbú*. Ben ba/chi ba-nung ké afaníkong ne baa*ba/chi ba-chîman etông byiko*.

⁴ Ké nkéré mú nkéré ámu oo/fyi, banet ba/chi ba-kúng kiǐshwô enen wǎ ekap nyí busông, ne ba/chi ba-kwán ekwan mún, mú dyinyánge dyi*fí to* kyi-kim ne ńkyí kyi/chi běn, ba/fu, be bii/kpú kángkáng. Óburúkpâbí oo/koo bě esí eten o-kye [banet ḿbé ba/kám bě wǎ básóng.]

⁵ Máka o/raa o/fu, ké bubwô ámbu kâng, ké nkéré mú nkéré o/chi o-fyi mú ba/chi ba-bwa ne esí ba-kye banet ḿbé Óburúkpâbí, ben nang onet obónge mú o/chi o-koo nang kaǎnyín o*fí*.

⁶ Banet mbe ba-sét ng mě ba/fu, *da bě echîsét chwǒm*. *Da bě esét ńkyí amu a-sét ng éné*. Osówo oo*ba/chi o-fé bě éshwân*.

⁷ Wo amu a-kabe ng a/fu, [Osówo oo/shú] banet ḿbé Ézerel? Óburúkpâbí o-kú o-sa ng kafâ dí. Nyǐ o/chi o-chi azong-byěm ányi ké ntûntû? [Nyǐ] o*fí o-pem m ké bunyîn-dyityém ne banet ḿbé mbe ba-chi i kanong*? [

⁸ Óburúkpâbí mu o-faa ng o/fu, ben bamu ba-kyâ banet ejí bunwa wǎ banet-bushwôn. Banyinchéng mbe ba-fyi ng byití, ba-kabe ng ba/fu, byise mbyi kanong, nké ben bamu ké byise ba/fu, ben ba-jii ng kámbé bankyû ké esim.]

⁹ Ben bamu ba-ró ne banyinyi ḿbé banet ejí ké byise ḿbyí mbyi byi-jê ng kámbé, ne baa/jii banjware ḿbé me m/mû n/chi n-kye bwǎn ebe ba-dim ne mbé ne banyá ne banyá.

¹⁰ Bûu n̂g nensang ba-dim. Kyikit ńkyín nkyi kyi-nut ng Óburúkpâbí. Byibî enen bii/chi ǎ o-bên kánkyí.

¹¹ Banet ḿbén mbe ba-ryuu ng mkpábé mú odasét byiraa ejí, mú odayêe ké byikit o-sét ng byisédéng, o-nîm m banet o/fu, me nn/ri n/fu, ben ba/chi ba-já bato chwóó.

¹² Nké me n/chi m-kpaa běn kángkáng banet-Ézerel ḿbé ba/waa n-cibi kyikit kyibónge. Me n/chi m-bâ ne ben kyikit kyibónge wǎ ebû nyí nyi e-bwa ng esim ké nkám ebe. Esí enen e/chi e-chîsú ne banet chwóó wǎ eringe nyí aro adasú ne ebû.

¹³ Osówo o/chi o-bâa bukwóp o-tî kámbé, o-tông kámbé kiǐfáng ba-byí ké oshê mú mbé ba/mû ba-kyú u wǎ básóng. Ba/chi ba-sé afyi-oshê ba-dim dyijê. Óburúkpâbí oyén mú mu Otu ebe nké o/chi o-tông kámbé kiǐfáng ba-byí.