Máka 1 - Bokyi Bible

¹ Ké nkéré mú Otu Jótam ne Otu Éhaz ne Otu Hezekyâ ba/mû batu ḿbé Júda, Óburúkpâbí o/twóm mkpábé mú emen mú odabángê Máka, mú o/fím oshê mú badakó Móréshet kyitwóm ńkyín. Óburúkpâbí o/sét Máka kángkáng byěm ḿbyín kyi-kim ne Samérya ne Jerúsélem.

Máka o/tii Bukyû kyi-kim ne Samérya ne Jerúsélem

² O/fu, jwo n̂g ńkyín, ben eshê emúmú. Fwôo n̂g atông ba-jwo ńkyín, ben kángkáng banet ḿbé bamu ba-kyú u ké ejíí. Óburúkpâbí mú mu Otu Kyítá o/chi o-wú běn byibî ḿbyí bamu ba-chi i. Fwôo n̂g atông, nyǐ o/bwom ké kiǐtí-kyise-kyifen emen echi ńkyí kyíbóng mu o-raa ng.

³ Óburúkpâbí mu o-fím m kyíbóng o-bâ. Nyǐ o/chi o-shû kyísí o-kûcen kyíbóng-eku.

⁴ Eku nyí o/chi o-cím kányí éné e/chi e-nyange wǎ burwan ḿbú badafé ké okwâ, ne e/chi e-sen e-nung ké ewo wǎ omu mú odasen kyíbóng-kaku o-róng kyísí.

⁵ Kángkáng ḿbyín byi/chi byi-chi, ké nǎ, banet ḿbé Ézerel baa/chi kyibî ba-bwom bunwa ne Osówo. Ba-bîn n yeě ké bunwa ḿbú Ézerel ba/bwom ne Osówo. Onet okíri o*fí mú bada ǎ ebîn* kyi-cibi ne Samérya mú mu dyityém-oshê ńdyí Ézerel*. Yeě mu o-sháng ng bakye ké Júda. Oshê mú Jerúsélem oyén.

⁶ Ké bubwô ámbu, Óburúkpâbí mu o-raa ng o/fu, me n/chi m-bú Samérya o-firi biǐbwô-byise ḿbyí onet o*fí ké mbyí* o-firi kyikit ńkyí badakwón byíkwôn. N/chi m-bírî byěm-oshê ebe ḿbyí byi/chi byi-sêe rugirugi m-pwó ké owo, ne n/chi m-bú kángkáng ekpe-oshê kyi-waa byikû emen nké nke.

⁷ N/chi n-sé erím-bakye nyí ba/fé dyityém ké nyǐ rugirugi. Okwâ o/chi o-shí kángkáng byěm ḿbyí ba/kye banyinyi-akpara ké kyise-bakye esháng ebe, ne kángkáng erím-bakye ebe e/chi e-firi dyizu-biǐbyém. Ba/kye banet-Samérya byěm ḿbyín ba/fu, byibâ ne bufwon, nké kántîk banet-bushwôn emen ba/chi ba-kúng kámbyí ba-kûdakye kámbyí ofê ké byikit byikíri.

⁸ Ne Máka o-raa kâng o/fu, ké bubwô ḿbún, me n/chi n-ta dyikán. N/chi n-cen byiká dyikáá m-bwá byídí-dyikán eta. N/chi n-wonge wǎ enyam, n-tii wǎ kanurung.

⁹ Byinêm ḿbyí Samérya bii*kpú to* ne Júda to o-kú o-bâ eri dyizong-busông ándyi dyibónge. Bukyû boo/ribi ké afyi nyí Jerúsélem oyén, ké kyikit ńkyí banet ejí mbe ba-kyú u.

Banet-Bushwôn ba/fárâng Jerúsélem

¹⁰ *Da n̂g echi ba-sét banet-bushwôn eten ḿbé mbe ké Gât kyi-kim ne dyikpóge eten*. *Da n̂g ebángê kámbé ba-ri bukyû ḿbú ben ba/chi ba-tii*. Ben banet ḿbé Bét-Láfara, bírî n̂g ba-rí ké ecing ba-tông ba/fu, dyinyánge dyi*fí běn to*.

¹¹ Ben banet ḿbé Sháfa, jaa n̂g ba-jâ oshê okíri ké busa, ba-firi wǎ básóng, esínábang ne éshwân. Banet ḿbé mbe ba-kyú u ké Zánan ba*dachi ba-byí ké oshê ba-bâ kyíjí*. Â ba/jwo ké banet ḿbé Bétézel ba-kú ba-tii ng, ben ba/chi ba-nyît ba/fu, kyikit-dyirem kyi*fí áku*.

¹² Banet ḿbé Márot ba-kú ba-bám m ne dyityém ké bubwô ba/fu, ochwâp obâ, ké nǎ, Óburúkpâbí oo/bê ne busông fáráng ké Jerúsélem.

¹³ Ben mú bamu ba-kyú u ké Lákyishi, ziri n̂g bubyî-orá ké bamútu enen ba-chêe. Ben ba/leme byibî ḿbyí Ézerel, ba-chi banet ḿbé Jerúsélem ba-chi kyibî.

¹⁴ Ben banet ḿbé Júda, sét n̂g oshê mú Móréshet-Gât ba/fu, oca kanong, ké nǎ, banet-bushwôn eten baa/bê. Oshê mú Ákyizip oo*ba/chi o-chwáp batu ḿbé Júda*.

¹⁵ Ben banet ḿbé Marésha, Óburúkpâbí o/chi o-kám běn o-kye onet-bushwôn enen mú o/chi o-koo oshê enen. Biǐtí-banet ḿbyí Júda byi/chi byi-da-rem ké bucim ḿbú mbu ké Adúlam.

¹⁶ Banet ḿbé Ézerel, pwát n̂g ashí ba-ta dyikán ké dyishí-bwǎn enen ḿbé bada běn ejê. Pwát n̂g ashí a-firi kpárádádát wǎ nyí biinfuu akun, ké nǎ, ba/chi ba-kúng bwǎn enen ba-dim ne mbé wǎ básóng.