Lyívyítyíkus 9 - Bokyi Bible

Éron o/chi Byifen o-kye Óburúkpâbí

¹ Ké orî-dyicí mú baa/chi kángkáng byifen ḿbyí ba/jware kámbé ba-firi banchi kyifen-Osówo, Músis o/kó Éron ne bwǎn emen ne banet-ashí-Ézerel.

² O-sét Éron o/fu, okúng kyisu-otyép-mpong ne otyítǎm ḿbyí byi*fí ne kyinêm ké byiko* o-chi kyifen o-kye Óburúkpâbí, okúng kyisu-mpong o-chi kyifen-byibî efîm, o-kúng otyítǎm o-chi kyifen ńkyí badashí kyitú kyimúmú.

³ Osét banet-Ézerel ba-kúng otúbû ba-chi kyifen-byibî efîm, ba-kúng wǎn-mpong mú oo/rí dyije dyibónge ne wǎn-etám-ebû mú oo/rí to dyije dyibónge, ḿbyí byi*fí ne kyinêm ké byiko* ba-chi kyifen ńkyí badashí byitú,

⁴ ba-kúng kyisu-otyép-mpong ne otyítǎm ba-chi kyifen ńkyí okwáre ne Óburúkpâbí. Bayip kámbyí ba-cibi ne kyifen-esang-byichí ńkyí badafé bakút-ólif ba-chi kyifen ba-kye Óburúkpâbí. Ba-man ba-chi byifen ḿbyín, ké nǎ, Óburúkpâbí o/chi o-byí o-kâm kámbé kurún.

⁵ Ba-bâ ne kángkáng byěm ḿbyí Músis o/sét kámbé ké bushú-mpyep mú Óburúkpâbí odakyú, ne kángkáng banet-Ézerel ba-bâ ányi ba/fu, mbé ba-bâ ng ekye Óburúkpâbí ofê.

⁶ Músis o-sét kámbé o/fu, Óburúkpâbí nké o/sét běn o/fu, ben bachi kángkáng byifen ḿbyín, eringe nyí busan ḿbú ragerage ḿbú bu/fím ké bushú ḿbú emen budabyí bu-kâm běn.

⁷ Ne o-raa ne Éron o/fu, ca ké kyikit-kyifen echi a-da-chi kyifen ńkyí kyidafîm byibî ne ńkyí badashí kyitú, eringe nyí Óburúkpâbí oda ǒ efîm byibî ne ḿbyí banet-Ézerel. Chi kyifen ńkyín ńkyí kyidafîm byibî ḿbyí banet-Ézerel, wǎ eringe nyí Óburúkpâbí oo/sét.

⁸ Éron o-dim ké kyikit-kyifen echi o-da-ju kyisu-mpong ńkyí odachi kyifen ńkyí kyida ǎ efîm byibî ḿbyí emen nyǐ oyén.

⁹ Bwǎn emen ba-bâ ǎ ne baróng, ne o-lip kafwa emen ké mbé o-sabe ké etwóm nyí nyi ké bakô-kyikit-kyifen echi, o-yip ḿbé ba/waa o-pwó ké kyikû-kyikit-kyifen echi.

¹⁰ Ne o-yip kâng bafwám emen ne bampî ne kyikit-dyityém-enyam ńkyí kyidanyîn kyi-shwôm o-shí ké kyikit-kyifen echi, wǎ eringe nyí Óburúkpâbí o/sét Músis.

¹¹ Nké o/yip enyam eyén ne ekwop emen o-byí ne nyǐ kyíjí ké kafâ-oshê, o-da-shí.

¹² O-ju kyitú ńkyí odachi kyifen ńkyí emen nyǐ oyén, ńkyí odashí kánkyí. Bwǎn emen ba-yip baróng ba-kye ǎ, ne o-yip kámbé o-pwó kerékeré o-wáp kyikit-kyifen echi.

¹³ Ba-yip dyishí-enyam ányi ne byikim-enyam ḿbyí áku ba-kye ǎ, ne o-shí kámbyí ké kyikit-kyifen echi.

¹⁴ Ne o-soo efong-enyam ne aman emen o-twôom kámbyí ké byipang-enyam ḿbyí badashí, o-shí kámbyí ké kyikit-kyifen echi.

¹⁵ Ké nkéré mú oo/chi ḿbyín, o-yip kyifen ńkyí banet-Ézerel o-chi. O/yip ebû nyí odachi kyifen ńkyí byibî ḿbyí banet-Ézerel, o-ju kányí, o-chi kyifen wǎ eringe nyí o/chi kyifen ńkyí kyi/fîm byibî ḿbyí emen nyǐ oyén.

¹⁶ O-kúng to enyam nyí odachi kyifen ńkyí badashí kyirim-enyam kyimúmú o-chi kyifen ké nyǐ, wǎ eringe kyije kyi/sét.

¹⁷ O-chi kyifen-esang-byichí, ne o-kpere dyikwâ-filáwa mú badachi berêt o-shí ké kyikit-kyifen echi. O/chi ńkyín o-nye ne kyifen ńkyí badashí kyirim-enyam kyimúmú, ńkyí badachi kángkáng dyicí.

¹⁸ O-ju kyisu-mpong ne otyítǎm o-chi kyifen ńkyí okwáre ne Óburúkpâbí, ké dyishí ńdyí banet-Ézerel. Bwǎn emen ba-kúng baróng ba-kye ǎ, ne o-pwó kámbé kerékeré o-wáp kyikit-kyifen echi.

¹⁹ Éron o-kúng byipang-kyisu-mpong ne ḿbyí otyítǎm, ḿbyí mbyi ne bafwám

²⁰ o-twôom ké bukim-enyam ányi, o-yip kámbyí kángkáng o-dim ne mbyí ké kyikit-kyifen echi. O-yip bafwám o-shí ké kyikit-kyifen echi,

²¹ o-kúng bukim ne anam nyí bubwô-etyebéng wǎ eyáré-dyityém nyí e/fím ké abwô-banchi kyifen-Osówo o-kye Óburúkpâbí, wǎ eringe nyí Músis o/sét.

²² Ké nkéré mú Éron oo/man kángkáng byifen ámbyi echi, o/yip abwô emen kyíbóng o-jware kángkáng banet, ne o-shû kyísí.

²³ Músis ne Éron ba-da-nung ké mpyep mú Óburúkpâbí odakyú, ne ké nkéré mú ba/byí, ba/jware banet ḿbé ba/mû ányi, ne busan ḿbú ragerage ḿbú bu/fím ké bushú ḿbú Óburúkpâbí bu-byí bu-kâm kángkáng banet.

²⁴ Ké abe ányi, Óburúkpâbí o/twóm okwâ o-shí kángkáng enyam ne bafwám ḿbyí byifen ḿbyí byi/mû ké kyikit-kyifen echi. Ké nkéré banet-Ézerel ba/ri kánkyí, mbé kángkáng ba-wonge ba-tíngê bashú ebe kyísí.