Lyívyítyíkus 8 - Bokyi Bible

Ba/chi Éron ne Bwǎn Emen ba-firi Banchi Kyifen-Osówo

¹ Óburúkpâbí o/sét Músis o/fu,

² kúng Éron ne bwǎn emen ḿbé banyinchéng a-bâ ne mbé ké ocím-dyifyi-mpyep mú ndakyú. Bâ ne byídí-banchi kyifen-Osówo ne bakút-ociring ne kyisu-otyép-mpong ńkyí badachi kyifen-byibî efîm ne etyítǎm efee ne kaakye-berêt mú ba*da/fé bukye o-mut*.

³ Kó kángkáng banet ḿbé Ézerel ba-bâ ányi.

⁴ Músis o/chi wǎ eringe nyí Óburúkpâbí o/sét ǎ, ne ké nkéré mú kángkáng banet baa/bê kyikit kyibónge,

⁵ o-sét kámbé o/fu, ńkyí mu m-bâ echi kántîk, Óburúkpâbí nké o/sét mě o/fu, me nchi.

⁶ Músis o-kúng Éron ne bwǎn emen o-bâ ne mbé ké kashú, o-sét kámbé o/fu, bakôo omu ké bushú ḿbú Óburúkpâbí.

⁷ O-kúng nkyû ne ágbádá o-fé Éron ké byiko, o-sît ǎ kyicê-kyídí ké osín. O-kúng kyídí-kakim o-fé ǎ, o-kúng emâp nyí ba/tím kanong kanong o-sît ǎ ké osín, e-sît kyídí-kakim ánkyi.

⁸ O-kúng kiimbam-kakim o-fé ǎ, o-yip ámám nyí badakó búrim ne túmim o-fé ké kafâ-kiimbam ánkyi.

⁹ O-yip kyídí-dyishí o-cít ǎ, o-yip ekap-ociring nyí ba/chi ké gûl, nyí ba/sáng ányi ké nyǐ ba/fu, kyi/já Óburúkpâbí, o-bwá ǎ ké bushú-kyídí-dyishí ánkyi, wǎ eringe Óburúkpâbí o/sét ǎ.

¹⁰ Ne Músis o-yip kâng bakút-ociring o-sabe ké mpyep mú Óburúkpâbí odakyú, ne kángkáng byěm ḿbyí byi/mû ké mǔ, ne ké bukwóp ḿbún o-jware kámbé kángkáng o-kye Óburúkpâbí.

¹¹ O-yip onyin-bakút o-myî kampén káchâtkányi ké kyikit-kyifen echi ne byipang emen ne ké dyicáng-abwô ne byiká esoo ne kyikû emen, eringe nyí odajware kámbyí o-kye Óburúkpâbí.

¹² O-yip onyin-bakút ámbe o-pwó Éron ké dyishí, o-jware ǎ o-firi nchi kyifen-Osówo.

¹³ Ńdyí o/man ne Éron, Músis o/kúng bwǎn-Éron o-bâ ne mbé ké kashú, o-fé kámbé bankyû, o-bwá kámbé byicê-byídí ké osín, o-bwá kámbé byídí-ashí ké dyishí, wǎ eringe nyí Óburúkpâbí o/sét ǎ.

¹⁴ Ne Músis kâng o-bâ ne kyisu-otyép-mpong, ne Éron ne bwǎn emen ba-twôom kánkyí abwô ké dyishí.

¹⁵ Músis o-ju kánkyí, o-kúng kyicê-baróng o-lip kafwa ké mbé o-sabe ké etwóm nyí nyi ké bakô-kyikit-kyifen echi, eringe nyí odajware kánkyí. O-kúng kyicê-baróng ńkyí kyi/waa o-pwó ké kyikû-kyikit-kyifen echi. Ké bukwóp ḿbún, o-jware kánkyí, o-fîm byibî ké nkyí.

¹⁶ Músis o-kúng kángkáng bafwám ḿbé ké kafâ-dyifít ne kyikit-dyityém ńkyí kyidanyîn kyi-shwôm ne bampî ne bafwám ḿbé mbe ké mbé, o-shí kámbyí ké kyikit-kyifen echi.

¹⁷ O-kúng enyam nyí áku, cibicibi ne ekwop ne efong o-byí ne mbyí ké kafâ-oshê o-da-shí, wǎ eringe nyí Óburúkpâbí o/sét ǎ.

¹⁸ Ké nnyinyěng, Músis o-bâ ne otyítǎm mú badachi kyifen ńkyí badashí kyirim-enyam kyimúmú, ne Éron ne bwǎn emen ba-twôom abwô ebe ké dyishí emen.

¹⁹ Músis o-ju kámú o-yip baróng emen o-pwó kerékeré ké kyikit-kyifen echi.

^20-21 O-kpút otyítǎm ámu byikim byikim, o-soo efong ne byiká emen ké omu, o-yip enyam ányi kángkáng ne dyishí ne bafwám o-shí ké kyikit-kyifen echi, wǎ eringe nyí Óburúkpâbí o/sét ǎ. Kyifen-enyam eshí ńkyín kyi/mû kyifen-byiryíng, ne kyinung emen kyi-nyîn n Óburúkpâbí.

²² Ne Músis o-bâ kâng ne nnyinyěng-otyítǎm mú badachi kyifen ńkyí badajware onet o-firi nchi kyifen-Osówo, ne Éron ne bwǎn emen ba-twôom kámú abwô ebe ké dyishí.

²³ Músis o-ju kámú, o-yip onyin-baróng emen o-ta Éron ké butông ḿbú bubwô-etyebéng ne ké otyép-kafwa mú bubwô-etyebéng ne mú kyiká-bubwô-etyebéng.

²⁴ Ne o-bâ ne bwǎn-Éron ké kashú, o-ta kámbé to baróng ké atông nyí bubwô-etyebéng ne batyép-efwa nyí bubwô-etyebéng ne nyí kyiká-bubwô-etyebéng. Músis o-yip baróng ḿbé ba/waa o-pwó kerékeré ké kyikit-kyifen echi.

²⁵ O-kúng bafwám ne ocî ne bafwám ḿbé ké kafâ-dyifít ne kyikit-dyityém ńkyí kyidanyîn kyi-shwôm ne bampî ne bafwám ḿbé mbe ké mbé ne bunam ḿbú bubwô-etyebéng.

²⁶ Ne o-kúng kâng byirim-berêt kyibónge ké kaakye-berêt mú ba*da/fé bukye ḿbú odamut* mú baa/chi kyifen ba-kye Óburúkpâbí ne kyirim kyibónge ńkyí ba/fé bakút-ólif ne kaarim kabónge ńké ba/chi wǎ bakye, o-yip kámbyí o-twôom ké bafwám ne ké bunam-enyam ámbu.

²⁷ O-yip kángkáng byiryíng ḿbyín o-fé Éron ne bwǎn emen ké abwô, ne ba-yip kámbyí wǎ eyáré-dyityém ba-kye Óburúkpâbí.

²⁸ Ne Músis o-koo byiryíng ámbyi ké abwô ebe o-shí kámbyí ké kyikit-kyifen echi, kyíbóng-kyifen ńkyí badashí kyirim-enyam kyimúmú, wǎ kyifen ńkyí badajware onet o-firi nchi kyifen-Osówo. Kyifen ánkyi kyi/mû kyifen-byiryíng, ne kyinung emen kyi-nyîn n Óburúkpâbí.

²⁹ Ne Músis o-kúng kakim emen kâng o-kye Óburúkpâbí wǎ eyáré-dyityém. Kyipang-enyam ánkyi nké kyi/já Músis ké enyam nyí badajware onet o-firi nchi kyifen-Osówo. Músis o/chi kángkáng byěm kerededet wǎ eringe nyí Óburúkpâbí o/sét ǎ.

³⁰ Músis o-yip onyin-bakút-ociring ámbe ne onyin-baróng ḿbé ba/mû ké kyikit-kyifen echi o-myî Éron ne bwǎn emen ké byiko ne ké byídí ebe. Ké bukwóp ḿbún kâng, o-jware kámbé ne byídí ebe o-kye Óburúkpâbí.

³¹ Músis o-sét Éron ne bwǎn emen o/fu, kúng n̂g enyam ba-ca ne nyǐ ké ocím-dyifyi-mpyep mú Óburúkpâbí odakyú, ba-rám kányí, ba-kyú ányi ba-ryí cibicibi ne berêt mú mu ké kaakye ńké ba/fé byěm ḿbyí ba/jware běn ba-firi banchi kyifen-Osówo, wǎ eringe nyí Óburúkpâbí o/sét.

³² Nang ebóng enyam ne berêt nké byi/waa, shí n̂g kámbyí.

³³ *Da n̂g echi ba-mîng ocím-dyifyi-mpyep* tete ací káchâtkányi, tete ba-chi kángkáng byěm ḿbyí ba/jware běn ba-firi banchi kyifen-Osówo byi-man.

³⁴ Óburúkpâbí nké o/kye bě busa o/fu, be byichi ńkyí bii/chi kurún, eringe nyí oda běn efîm byibî enen ké byiko.

³⁵ Ben ba-man ba-kyú ké ocím-dyifyi-mpyep ké ací káchâtkányi, ba-chi ńkyí Óburúkpâbí oo/sét o/fu, ben bachi. Â ba*da/chi* ba/chi ba-kpú. Něen nké Óburúkpâbí o/sét mě.

³⁶ Ne Éron ne bwǎn emen kâng ba-chi kángkáng byěm ḿbyí Óburúkpâbí o/sét Músis o/fu, osét kámbé ba-chi.