Lyívyítyíkus 7 - Bokyi Bible

Byifen ḿbyí Dyifwá eré

¹ Nyín byije ḿbyí byi/kim ne byifen ḿbyí dyifwá eré, ḿbyí mbyi biǐtí-byifen-ociring.

² Enyam nyí badachi kyifen ńkyín ba-ju ng kányí ké kyicê-bushûyû-kyikit-kyifen echi, ké kyikit ńkyí badaju enyam nyí badachi kyifen ńkyí badashí byirim-byitú. Bakúng baróng emen ba-pwó ké kángkáng bakô-kyikit-kyifen echi banyii.

³ Bafîm kángkáng bafwám emen ba-chi kyifen ké kyikit-kyifen echi, bafwám ḿbé kyikû-ocî ne bafwám ḿbé kafâ-dyifít ne

⁴ bampî ne bafwám ḿbé mbe ké mbé ne kyikit-dyityém-enyam ńkyí kyidanyîn kyi-shwôm.

⁵ Nchi kyifen-Osówo oshí kángkáng bafwám ámbe ké kyikit-kyifen echi wǎ kyifen-byiryíng o-kye Óburúkpâbí. Kyifen ánkyi kyi-chi i kyifen ńkyí dyifwá eré.

⁶ Wǎn-onyinchéng mú Éron nang orá o-man n eryí enyam ányi, nké ba-man ba-ryí kányí ké kyikit-ociring, ké nǎ, e-chi i kiǐtí-enyam-ociring.

⁷ Kyije nkyi kyibónge ńkyí kyi/ta kyifen-byibî epwoo ne kyifen ńkyí dyifwá eré. Enyam nyí byifen ámbyi byifee e/já nchi kyifen-Osówo mú odachi byifen ámbyi.

⁸ Ekwop-enyam nyí badachi kyifen ńkyí badashí kyirim-enyam kyimúmú e/já nchi kyifen-Osówo mú odachi kyifen ánkyi.

⁹ Kyifen-esang-byichí nang kyirá ńkyí ba/ká berêt emen ké kafâ-katí-ecing, nang ba/ká kámú ké dyicáng nang ké ḿkpângokunge kyi/já nchi kyifen-Osówo mú odakúng kánkyí o-kye Osówo.

¹⁰ Nké kángkáng byifen-esang-byichí nyí ba*da/rám* nang ba/fé bakút nang ba*da/fé* byi/já kángkáng banchi kyifen-Osówo, ne ba-man ba-kyii kánkyí jangjang ne barî.

Byifen-Okwáre ne Óburúkpâbí

¹¹ Nyín byije ḿbyí byi/kim ne byifen ḿbyí okwáre ne Óburúkpâbí, ḿbyí badakye Óburúkpâbí.

¹² Â onet o/chi kyifen ńkyín wǎ kyifen ńkyí odakó Osówo asǎma, onet ámu okye byěm ḿbyín cibicibi ne enyam nyí odachi kyifen, ochi kyifen ké berêt mú baa*fé bukye ḿbú odamut*. Â berêt ámu o*da/kyú mú byirim ḿbyí byiryên* mú ba/fé bakút-ólif* okyú mú ba/chi wǎ bakye, mú ba/sabe kámú bakút nang mú ba/fé bakút-ólif, ba-chi wǎ bakye.

¹³ Ocibi to ne berêt mú baa*fé bukye ḿbú budachi kámú o-mut*.

¹⁴ O/chi o-kúng kyicê kyibónge kyibónge ké kángkáng azong-berêt ányi wǎ eyáré nyí kiǐtí o-kye Óburúkpâbí. Byicê-berêt ámbyi byi/já nchi kyifen-Osówo mú odayip baróng-enyam ányi o-pwó ké kyikit-kyifen echi.

¹⁵ Baryí enyam-kyifen ányi ké dyicí ńdyí badachi kyifen ánkyi, ba*dachi ba-mîng kyipang emen nang kyibónge kyi-rí dyicí*.

¹⁶ Â onet o/bachi kyifen ńkyí okwáre ne Óburúkpâbí ké ocím mú o/mû o/ryí, nang eyáré nyí o/kye okyěng ké bunyîn-dyityém, â ba*da/ryí kánkyí kángkáng ké dyicí ándyi ńdyí odachi kyifen* ba-man n eryí ńkyí kyi/waa ké orî-dyicí.

¹⁷ Â enyam e/waa e-rí ací achât, ba-man ba-yip kányí ba-shí.

¹⁸ Onet mú odaryí kányí ké nkéré ee/rí ací achât, Osówo oo*ba/chi o-koo kyifen ńkyí onet ámu*. Osówo oo*ba/chi o-kpee ǎ ké kyifen emen ánkyi* nké o-kúng ng kánkyí wǎ kiinunut-chwǒm, ne nang yeě nké o/ryí enyam-kyifen ánkyi, Osówo o-kyâ ǎ busông.

¹⁹ Â enyam ányi e/ta chwǒm ńkyí badaciring kánkyí, baa*man ba-ryí kányí* ba-man ba-shí kányí. Nang yeě nké oo/soo byiko emen ké bushú ḿbú Osówo, o-man n eryí enyam ányi,

²⁰ nké nang yeě mú mu onet mú bada ǎ eciring nké o/ryí, Osówo oo*kúng to onet ámu wǎ onet emen*.

²¹ Â nang onet to nang obónge o/ryí enyam-kyifen ńkyín ké nkéré mú oo/ta chwǒm ńkyí badaciring, nang onet nang enyam, onet ámu oo*kyú to onet mú Osówo*.

²² Óburúkpâbí o/kye Músis byije ḿbyín o/fu,

²³ okye banet ḿbé Ézerel. O/fu, ba*dachi ba-ryí bafwám-mpong* nang ḿbé ebû nang erá*.

²⁴ Nang bafwám-enyam nyí e/kpú okpúng nang enyam nké e/ju kányí, ba*dachi ba-ryí*. Ba-man n ekúng kámbé ba-chi chwǒm kyikíri.

²⁵ Nang yeě nké o/ryí bafwám-enyam nyí ba/chi kyifen-byiryíng ba-kye Óburúkpâbí, onet ámu oo*kyú to onet mú Osówo*.

²⁶ Nang banet ḿbé Ézerel ba-kyú nyá, mbé baa*man ba-ryí baróng-enyam* nang ḿbé kanurung*.

²⁷ Nang yeě nké o/bên kyije ńkyín oo*kyú to onet mú Osówo*.

²⁸ Óburúkpâbí o/kye Músis byije ḿbyín o/fu,

²⁹ okye banet ḿbé Ézerel. O/fu, nang yeě nké o/chi kyifen ńkyí okwáre ne Óburúkpâbí, o-man o-kúng kyicê kyibónge wǎ eyáré-dyityém o-ba-kye Óburúkpâbí.

³⁰ Okúng kánkyí ké abwô emen o-ba-kye wǎ kyifen-byiryíng. Obâ to ne bafwám-enyam ányi ne kakim emen wǎ eyáré-dyityém o-ba-kye Óburúkpâbí.

³¹ Nchi kyifen-Osówo o-kúng ng bafwám ámbe o-shí ké kyikit-kyifen echi, nké kakim ka/já banchi kyifen-Osówo.

³² Bunam ḿbú bubwô-etyebéng-enyam ányi, bakúng kámbú wǎ kiǐtí-eyáré ba-kye

³³ nchi kyifen-Osówo mú odakúng baróng ne bafwám ḿbé kyifen ánkyi o-kye Óburúkpâbí.

³⁴ Kakim-enyam ányi ka-chi i eyáré-dyityém ne bunam ḿbú bubwô-etyebéng bu-chi i kiǐtí-eyáré ńkyí Óburúkpâbí oo/koo ké abwô nyí banet-Ézerel o-kye banchi kyifen-Osówo. Byěm ḿbyín nké banet-Ézerel badakûkye banchi kyifen-Osówo ké kángkáng bankéré ḿbé mbe ba-bâ.

³⁵ Kyicê-byiryíng ńkyín ḿbyí ba/chi kyifen ba-kye Óburúkpâbí nké ba/mû ba/kye Éron ne bwǎn emen ké dyicí ńdyí ba/jware kámbé ba-firi banchi kyifen-Osówo.

³⁶ Ké dyicí ándyi, Óburúkpâbí o/sét banet ḿbé Ézerel o/fu, bakye kámbé kyicê-enyam-kyifen ńkyín. Nkyi kyije ńkyí banet-Ézerel badakûtî ké kángkáng bankéré ḿbé mbe ba-bâ.

³⁷ Byije ḿbyín kángkáng kâng nké mbyi byije ḿbyí byi/kim ne byifen ḿbyí badashí byirim-byitú, ne byifen-esang-byichí ne byifen-byibî epwoo ne byifen ḿbyí dyifwá eré ne byifen ḿbyí badajware onet o-firi nchi kyifen-Osówo ne byifen ḿbyí okwáre ne Óburúkpâbí.

³⁸ Ké kaku ńké Sána, ké kyikim-dyikán nké Óburúkpâbí o/kye Músis byije ḿbyín, ké dyicí ńdyí o/sét banet ḿbé Ézerel o/fu, bachi byifen ebe.