Lyívyítyíkus 6 - Bokyi Bible

¹ Óburúkpâbí o/kye Músis byije ḿbyín o/fu,

² bachi kyifen ńkyí onet odachi kyibî ké bushú ḿbú Óburúkpâbí, â onet ámu o/né ebwa esim ne chwǒm ńkyí orî-onet-Ézerel o/kye ǎ o/fu, otî, nang o/jii chwǒm-onet-Ézerel, nang o/ryí ǎ mpún

³ nang o/sét kyisédéng kyi-kim ne chwǒm ńkyí kyi/tánê, o-ryí ocím o/fu, nyǐ o*da/ri kánkyí*.

^4-5 Â onet nang orá o/chi kyibî ké bukwóp ḿbún, o-man o-ré dyifwá ké nang ebóng chwǒm ńkyí o/koo ké bukwóp ḿbú boo*nwa*. Ké dyicí ńdyí badanyît ba/fu, o/chi kyibî ánkyi, o-man o-só oyén byěm ámbyi kerededet, o-twôom kyikit kyibónge ké byikit byitánge kyíbóng.

⁶ O-man o-bâ ne otúbû nang otyítǎm mú o*fí ne kyinêm ké byiko* o-ba-kye nchi kyifen-Osówo mú o/chi o-kye Óburúkpâbí wǎ kyifen-dyifwá eré. Bari eringe nyí kyi-kwárê wǎ eringe kyije kyi/sét.

⁷ Nchi kyifen-Osówo ochi kyifen ké dyishí-kyibî-onet ámu, ne me n/chi m-pwoo ǎ ké kyibî ánkyi.

Byifen ḿbyí badashí Byirim-Byitú

⁸ Óburúkpâbí o/sét Músis o/fu,

⁹ osét Éron ne bwǎn emen byije ḿbyín kyi-kim ne byifen ḿbyí badashí byirim-byitú. Kyifen ńkyí badashí byěm kyi-man kyi-waa ké kyikit-kyifen echi ké buchú bumúmú, okwâ o-mang ng ké nkyí.

¹⁰ Nchi kyifen-Osówo oda-fé ebáta ne nkyû mú otangotang, o-kúng atông nyí adawaa ké kyikit-kyifen echi o-tî kányí ké bukô-kyikit-kyifen echi ánkyi.

¹¹ Â nkéré oo/tî kányí, oyángê byídí emen, o-yip kányí o-byí ké kafâ-oshê, o-ca ké kyikit-ociring.

¹² Okwâ mú ké kyikit-kyifen echi o-man o-kûmang o-câ kashú, baa*mîng kámú o-ríbî*. Nchi kyifen-Osówo o-fâ ekwón ké mǔ kángkáng dyicófóróng, o-nap kyifen ńkyí badashí o-fé ké mǔ, o-yip bafwám ḿbé kyifen-okwáre ne Óburúkpâbí o-shí.

¹³ Okwâ o-man o-kûmang kángkáng nkéré ké kyikit-kyifen echi, baa*mîng kámú o-ríbî*.

Kyifen-Esang-Byichí

¹⁴ Óburúkpâbí o/sét Músis o/fu, tî n̂g byije ḿbyín kyi-kim ne kyifen-esang-byichí. Nchi kyifen-Osówo mú wǎn-Éron nké odachi kyifen-esang-byichí o-kye Óburúkpâbí ké bushú-kyikit-kyifen echi.

¹⁵ Â o-kú o-chi i kánkyí, okpere dyikwâ-filáwa mú badachi berêt, o-fé bakút ne burwan ké mǔ, o-yip kámú o-shí ké kyikit-kyifen echi, eringe nyí kyidatông kyi/fu, baa/kúng filáwa ámu kángkáng ba-chi kyifen ba-kye Óburúkpâbí. Kyinung ńkyí kyidafím ké kyifen ńkyín kyi-nyîn n Óburúkpâbí.

^16-17 Banchi kyifen-Osówo bakúng kyicê ńkyí kyidawaa ba-ryí. Bakúng kánkyí ba-chi berêt mú baa*fé bukye ḿbú odamut* ba-ryí kámú ké kyikit-ociring, ké kafâ-kabám ńké mpyep mú Óburúkpâbí odakyú. Óburúkpâbí oo/kúng kámú o-kye banchi kyifen-Osówo wǎ kyicê-kyifen-esang-byichí ńkyí kyi/já kámbé. Kyifen ánkyi kyi-chi i kiǐtí-kyifen-ociring wǎ kyifen-byibî epwoo ne kyifen-dyifwá eré.

¹⁸ Ké kángkáng bankéré ḿbé mbe ba-bâ, bwǎn-Éron ḿbé banyinchéng ba-man n eryí kánkyí wǎ kyicê-byiryíng ḿbyí ba/chi kyifen ba-kye Óburúkpâbí ńkyí kyi/já kámbé, ńkyí badakûryí ba-câ kashú. Nang yeě okíri mú o/ta kyifen-byiryíng, busa-ociring ḿbú kyifen ánkyi bu/chi bu-némê ǎ.

¹⁹ Óburúkpâbí o/kye Músis byije ḿbyín,

²⁰ ḿbyí badajware wǎn mú Éron o-firi nchi kyifen-Osówo. Ké dyicí ńdyí bada ǎ ejware o-firi nchi kyifen-Osówo, o/chi o-chi kyifen o-kye Óburúkpâbí ké kyílogaram-filáwa mú badachi berêt obónge, eringe ebónge wǎ kyifen-esang-byichí ńkyí badachi kángkáng dyicí, kyicê kyibónge ké dyicófóróng ne kyicê kyibónge ké dyikurúku.

²¹ Bacibi kámú ne bakút, ba-ká ké ḿkpângokunge, ba-sé kámú, ba-yip ba-kye Óburúkpâbí wǎ kyifen-esang-byichí ńkyí kyinung emen kyida ǎ enyîn.

²² Ké kángkáng bankéré ḿbé mbe ba-bâ, wǎn-Éron nang orá mú mu o-chi i bǎmkpóngé wǎ otu-nchi kyifen-Osówo, ochi kyifen ńkyín. Bashí kánkyí kángkáng wǎ kyifen ńkyí badachi ba-kye Óburúkpâbí.

²³ Ba*dachi ba-ryí kyipang-kyifen-esang-byichí* ńkyí nchi kyifen-Osówo odachi nang kyibónge*. Ba-man ba-shí kánkyí kángkáng.

Kyifen-Byibî epwoo

²⁴ Óburúkpâbí o/sét Músis o/fu,

²⁵ osét Éron ne bwǎn emen byije ḿbyín kyi-kim ne kyifen-byibî epwoo. Enyam nyí kyifen-kyibî epwoo baju kányí ké kyicê-kyikit-kyifen echi ńkyí bushûyû, ké kyikit ńkyí badaju enyam nyí kyifen ńkyí badashí byirim-byitú. Kyifen ńkyín nkyi kiǐtí-kyifen-ociring.

²⁶ Nchi kyifen-Osówo mú odakúng enyam ányi o-chi kyifen, o-ryí i kányí ké kyikit-ociring, ké kafâ-kabám-mpyep mú Óburúkpâbí odakyú.

²⁷ Nang ebóng chwǒm nang onet nké o/ta enyam ányi, busa-ociring ḿbú kyifen ánkyi bu/chi bu-némê ǎ. Nang ebóng kyídí nké baróng-enyam ányi e/ta kánkyí, ba-man ba-soo kánkyí ké kyikit-ociring.

²⁸ Katí-ecing nang kará nké ba/rám enyam ányi ké nké, basé kánké, ne â ba/rám ké katí-kiǐré, bakwám kánké ba-sâ kánké ké omu.

²⁹ Wǎn-onyinchéng mú Éron nang orá o-man n eryí enyam-kyifen ányi. E-chi i kiǐtí-enyam-ociring.

³⁰ Nké â ba/kúng kyicê-baróng-enyam ányi ba-bâ ne mbé ké kafâ-mpyep-Óburúkpâbí, bakúng kámbé ba-chi kyifen-kyibî epwoo, baa*man ba-ryí enyam ányi*. Ba-man ba-shí kányí.