Lyívyítyíkus 5 - Bokyi Bible

Byibî ḿbyí Banet badachi ne ba-chi Byifen-Byibî epwoo

¹ Ké akwóp ńnyín nké ben ba/chi ba-kûchi byifen ḿbyín, ḿbyí byibî epwoo. Â ba/kye onet nwet ké esuk ba/fu, oba-kye ejá ké esuk, ne o*da/kye ejá ké chwǒm ńkyí o/ri* o-jwo nang ké atông* onet ámu oré kyiraa ké kyisédéng emen ánkyi.

² Â onet o*da/tigi ne o-ta chwǒm nang kyirá ńkyí badaciring kánkyí* wǎ kyikwóm-enyam, onet ámu o/róng kyije, ne o-firi ng onet mú bada ǎ eciring, â o-nyît ng o-bâ kyi-kim ne ńkyí nyǐ oo/chi.

³ Â onet o*da/tigi ne o-ta chwǒm nang kyirá ńkyí badaciring* ńkyí kyi/fím ké byiko ḿbyí onet, nang kyi-bwa kyi-kyú ebóng dyizong-chwǒm, onet mú o/róng kyije, â o-nyît ng o-bâ kyi-kim ne nkyí nyǐ oo/chi.

⁴ Â onet o/ryí ocím mú o*da/kabe* nang o/kim ne ebóng chwǒm, onet ámu o/róng kyije, â o-nyît ng o-bâ kyi-kim ne ńkyí nyǐ oo/chi.

⁵ Â onet o/chi kyibî, o-man o-sét kyibî ánkyi,

⁶ ne ké dyishí-kyibî ánkyi ńkyí o/chi, o-man o-bâ ne buma-ebúbǔu nang buma-etám-ebû o-ba-chi kyifen o-kye Óburúkpâbí. Nchi kyifen-Osówo o-kúng ng kyifen ánkyi o-chi ké bubwô-kyibî ńkyí onet ámu.

⁷ Â onet ámu oo*já ebúbǔu* nang etám-ebû* o-man n ebê ne ámalê afee nang bootǒmtǒm bufee o-ba-kye Óburúkpâbí ké dyishí-kyibî emen. Kanurung kabónge bachi kyifen-kyibî epwoo, ńké kabónge ba-chi kyifen ńkyí badashí kyirim-kanurung kyimúmú.

⁸ Onet ámu obâ ne bunurung ámbu o-ba-kye nchi kyifen-Osówo, mú o/chi o-bwóp kpá kashú o-chi kyifen ńkyí kyibî epwoo. O-bún n kanurung ánke kyitông oo*zú kánké dyishí*

⁹ o-myî kyicê-baróng emen ké bukô-kyikit-kyifen echi. Baróng ḿbé badawaa opwó kángkáng ké kyikû-kyikit-kyifen echi. Kyifen ńkyín nké kyi/chi kyi-fîm kyibî ánkyi.

¹⁰ O/chi o-kúng kâng nnyinyěng-kanurung o-chi kyifen ńkyí badashí kyirim-kyitú kyimúmú, wǎ eringe kyije kyi/sét. Ké bukwóp ḿbún nké nchi kyifen-Osówo o/chi o-chi kyifen ánkyi ké dyishí-kyibî-onet ámu, ne n/chi m-pwoo ǎ ké kyibî ánkyi.

¹¹ Â onet oo*já ámalê afee nang bootǒmtǒm bufee* o-man n ebê ne kyílogaram-filáwa mú badachi berêt o-ba-chi kyifen-byibî epwoo. O*dachi o-fé bakút-ólif nang burwan ké filáwa ámu* ké nǎ, kyifen ánkyi ńkyí byibî efîm, *chí ńkyí esang-byichí*.

¹² O-kúng filáwa ámu o-ba-kye nchi-kyifen-Osówo mú o/chi o-kpere dyikwâ emen eringe kyidatông kyi/fu, baa/kye Óburúkpâbí filáwa ámu kángkáng. Oyip kyicê-filáwa ánkyi o-shí kánkyí ké kyikit-kyifen echi wǎ kyifen-byiryíng. Kyi-kyú u kyifen ńkyí kyidafîm kyibî.

¹³ Ké bukwóp ḿbún nké nchi kyifen-Osówo odachi kyifen ké dyishí-kyibî-onet ámu, ne me n/chi m-pwoo ǎ ké kyibî ánkyi. Filáwa mú áku, mú odawaa, o/já nchi kyifen-Osówo, wǎ eringe kyidachi kyi-kim ne kyifen-esang-byichí.

Byifen ḿbyí Dyifwá eré

¹⁴ Óburúkpâbí o/kye Músis byije ḿbyín o/fu,

¹⁵ â onet o*da/tigi ne o-chi kyibî ńkyí o/né ekye Óburúkpâbí byěm-ociring ḿbyí byi/já ǎ* onet ámu obâ ne otyítǎm mú o*fí ne kyinêm ké byiko* o-ba-kye Óburúkpâbí wǎ kyifen-dyifwá eré. Bari eringe nyí ebû ányi e/kwárê ne eringe nyí badakan byěm ké mpyep-ociring.

¹⁶ Onet ámu o-man o-kye byěm ḿbyí o/né ekye, ne o-man o-twôom kyikit kyibónge ké byikit byitánge kyíbóng. Okúng otyítǎm ámu o-kye nchi kyifen-Osówo, ne nchi kyifen-Osówo o/chi o-kúng kámú o-chi kyifen ké dyishí-kyibî-onet ámu, ne n/chi m-pwoo ǎ ké kyibî ánkyi.

¹⁷ Â onet o/chi kyibî ńkyí o/bên kyije ńkyí Óburúkpâbí o*da/nyît* onet ámu o/róng kyije, ne o-man o-ré dyifwá ké nkyí.

¹⁸ O-man o-bâ ne otúbû nang otyítǎm mú o*fí ne kyinêm ké byiko* o-ba-kye nchi kyifen-Osówo wǎ kyifen-dyifwá eré. Bari eringe nyí ebû ányi e/kwárê wǎ eringe kyije kyi/sét. Nchi kyifen-Osówo o/chi o-kúng ebû ányi o-chi kyifen ké dyishí-kyibî-onet ámu, ne n/chi m-pwoo ǎ ké kyibî ánkyi.

¹⁹ Kyifen ánkyi kyi-kyú u kyifen-dyifwá eré ké kyibî ńkyí onet ámu o/chi ké bushú-Óburúkpâbí.