Lyívyítyíkus 4 - Bokyi Bible

Byifen ḿbyí Byibî ḿbyí Onet o*da/tigi ne o-chi*

¹ Óburúkpâbí o/sét Músis o/fu,

² osét banet ḿbé Ézerel o/fu, nang yeě mú o*da/tigi ne o-chi kyibî* nang o-bên kyije-Óburúkpâbí, o-man o-tî byije ḿbyín.

³ Â otu-nchi kyifen-Osówo nké o/chi kyibî ánkyi, ne ké bubwô ámbu, o-tut kyibî o-bâ ne banet emen ké byiko, o/chi o-kye kyisu-otyép-mpong ńkyí kyi*fí ne kyinêm ké byiko* o-chi kyifen o-kye Óburúkpâbí ké bubwô-kyibî emen.

⁴ O-bâ ne kyisu-mpong ánkyi ké ocím-dyifyi-mpyep, o-yip bubwô emen o-twôom kánkyí ké dyishí, o-ju kánkyí ányi ké bushú-Óburúkpâbí.

⁵ Otu-nchi kyifen-Osówo kâng o/chi o-kúng kyicê-baróng-enyam ányi o-nung ne mbé ké kafâ-mpyep.

⁶ O/chi o-yip kafwa emen o-lip ké baróng ámbe o-myî kámbé ké bushú-ékpígí nyí edacít mkpukpu-byěm-Osówo kampén káchâtkányi.

⁷ O-kúng to kyicê-baróng o-sabe ké etwóm nyí ké bakô-kyikit-kyifen echi, ké kafâ-mpyep. O-kúng kyicê-baróng ḿbé ba/waa o-pwó ké kyikû-kyikit-kyifen ńkyí badashí kyifen, ńkyí nkyi ké ocím-dyifyi-mpyep.

⁸ Ofîm kángkáng bafwám ḿbé kyisu-mpong ánkyi, bafwám ḿbé ké kafâ-dyifít

⁹ ne bampî ne bafwám ḿbé mbe ké mbé ne kyikit-dyityém-enyam ńkyí kyidanyîn kyi-shwôm.

¹⁰ Nchi kyifen-Osówo o/chi o-yip bafwám ámbe o-shí kámbé ké kyikit-kyifen echi ńkyí badashí byifen, wǎ eringe mu o-chi i ne bafwám ḿbé mbe ba-chi i kyifen ńkyí okwáre ne Óburúkpâbí.

¹¹ Nké o/chi o-kúng ekwop emen ne enyam emen kángkáng ne dyishí ne byiká ne abwô ne kángkáng byidóng emen ḿbyí ké kafâ,

¹² o-yip kámbyí kángkáng o-byí ne mbyí ké kafâ-oshê, o-da-twôom kámbyí ké ekwón, o-shí ké kyikit-ociring ńkyí mbe ba-pwó ng atông.

¹³ Â oshê omúmú mú Ézerel nké ba/chi kyibî, ba-bên kyije ńkyí Óburúkpâbí, ńkyí ba*da/tigi*.

¹⁴ Â ba-nyît ng kyibî ánkyi ba-bâ, oshê omúmú babâ ne kyisu-otyép-mpong ńkyí badachi kyifen ńkyí byibî epwoo. Babâ ne kyisu-mpong ánkyi ké mpyep mú Óburúkpâbí odakyú.

¹⁵ Banet-ashí-oshê-Ézerel bayip abwô ebe ba-twôom kánkyí ké dyishí, ba-ju kánkyí ányi.

¹⁶ Otu-nchi kyifen-Osówo okúng kyicê-baróng-kyisu-mpong ánkyi o-nung ne mbé ké kafâ-mpyep,

¹⁷ o-lip kafwa emen ké mbé, o-myî ké bushú-ékpígí nyí edacít mkpukpu-byěm-Osówo kampén káchâtkányi.

¹⁸ O-sabe to kyicê-baróng ké etwóm nyí ké bakô-kyikit-kyifen echi, ké kafâ-mpyep, o-yip ḿbé ba/waa o-pwó ké kyikû-kyikit-kyifen ńkyí badashí kyifen, ńkyí nkyi ké ocím-dyifyi-mpyep.

¹⁹ Ne o-kúng kâng kángkáng bafwám emen o-shí ké kyikit-kyifen ńkyí badashí kyifen.

²⁰ Ochi eringe ebónge ne kyisu-mpong ńkyín wǎ eringe odachi ne kyisu-mpong ńkyí kyifen ńkyí byibî epwoo, ne ké bukwóp ámbu, o/chi o-chi kyifen-kyibî ńkyí kángkáng banet, ne n/chi m-pwoo kámbé ké kyibî ebe.

²¹ Â o/chi éné, okúng kâng kyisu-mpong ánkyi o-byí ne nkyí ké kafâ-oshê, o-da-shí kánkyí wǎ eringe nyí odashí kyisu-mpong ńkyí odachi kyifen ké dyishí-kyibî ńkyí emen nyǐ oyén. Ńkyín nké nkyi kyifen ńkyí kyidafîm kyibî ńkyí oshê omúmú.

²² Â otu-oshê nké o/chi kyibî ánkyi, o/bên kyije ńkyí Óburúkpâbí, ńkyí o*da/tigi*

²³ nké â ba-sét ng ǎ kyibî ánkyi ba-bâ, obâ ne otúbû mú o*fí ne kyinêm ké byiko* o-ba-chi kyifen-byibî epwoo.

²⁴ Oyip bubwô emen o-twôom obúbû ámu ké dyishí, o-ju kámú ké kyicê-kyikit-kyifen echi ńkyí bushûyû, ké kyikit ńkyí mbe ba-ju ng enyam nyí badachi kyifen ńkyí badashí kyirim-enyam kyimúmú. Ńkyín kyi-chi i kyifen ńkyí byibî epwoo.

²⁵ Nchi kyifen-Osówo olip kafwa emen ké baróng o-sabe kámbé ké etwóm nyí ké bakô-kyikit-kyifen echi, o-kúng kyicê ńkyí kyidawaa o-pwó ké kyikû-kyikit-kyifen echi.

²⁶ O-kúng kâng kángkáng bafwám emen o-shí ké kyikit-kyifen echi, wǎ eringe nyí odashí bafwám-enyam nyí badaju ké kyifen echi ńkyí okwáre ne Óburúkpâbí. Ké bukwóp ḿbún nké nchi kyifen-Osówo odachi kyifen ńkyí kyibî ńkyí otu-oshê, ne n/chi m-pwoo ǎ ké kyibî emen ánkyi.

²⁷ Â onet mú kwán nké o/chi kyibî ńkyí o/bên kyije ńkyí Óburúkpâbí, ńkyí o*da/tigi*

²⁸ nké â ba-sét ng ǎ kyibî emen ánkyi ba-bâ, obâ ne buma-ebúbǔu ḿbú bu*fí ne kyinêm ké byiko* o-ba-chi kyifen.

²⁹ Oyip bubwô emen o-twôom ebû ányi ké dyishí, o-ju kányí ké kyicê-kyikit-kyifen echi ńkyí bushûyû, ké kyikit ńkyí badaju enyam nyí badachi kyifen ńkyí kyirim-enyam kyimúmú.

³⁰ Nchi kyifen-Osówo olip kafwa emen ké baróng-ebû ámbe o-sabe ké etwóm nyí ké bakô-kyikit-kyifen echi, o-yip baróng ḿbé badawaa o-pwó ké kyikû-kyikit-kyifen echi ánkyi.

³¹ Ofîm kâng kángkáng bafwám emen, wǎ eringe nyí badafîm bafwám ḿbé enyam nyí badachi kyifen ńkyí okwáre ne Óburúkpâbí, o-shí kámbé ké kyikit-kyifen echi, eringe nyí kyinung emen kyidanyîn Óburúkpâbí. Ké bukwóp ḿbún nké nchi kyifen-Osówo o/chi o-chi kyifen ńkyí kyibî ńkyí onet ámu, ne n/chi m-pwoo ǎ ké nkyí.

³² Â onet o/bê ne etám-ebû nyí odachi kyifen-byibî epwoo, ebû ányi e-man e-kyú buma ḿbú bu*fí ne kyinêm ké byiko*.

³³ Oyip bubwô emen o-twôom ebû ányi ké dyishí, o-ju kányí ké kyicê-kyikit-kyifen echi ńkyí bushûyû, ké kyikit ńkyí badaju enyam nyí badachi kyifen ńkyí badashí kyirim-enyam kyimúmú.

³⁴ Nchi kyifen-Osówo olip kafwa emen ké baróng-enyam ányi, o-sabe kámbé ké etwóm nyí ké bakô-kyikit-kyifen echi, o-yip ḿbé badawaa o-pwó ké kyikû-kyikit-kyifen echi ánkyi.

³⁵ Ofîm kâng kángkáng bafwám emen, wǎ eringe nyí badafîm bafwám ḿbé etám-ebû nyí badaju ké kyifen echi ńkyí okwáre ne Óburúkpâbí, o-shí kámbé ké kyikit-kyifen echi, cibicibi ne kyifen-byiryíng ńkyí badachi ba-kye Óburúkpâbí. Ké bukwóp ḿbún nké nchi kyifen-Osówo odachi kyifen-kyibî ńkyí onet ámu, ne n/chi m-pwoo ǎ ké kyibî emen ánkyi.