Lyívyítyíkus 3 - Bokyi Bible

Byifen ḿbyí Kyikwáré ne Óburúkpâbí

¹ Nang nkéré orá nké onet o/yip mpong emen o-chi kyifen ńkyí kyikwáré ne Óburúkpâbí, mpong ámu o-man o-kyú otyép nang buma ḿbú bu*fí ne kyinêm ké byiko*.

² Onet ámu otwôom kámú bubwô ké dyishí, o-ju kámú ké ocím-dyifyi mú mpyep mú Óburúkpâbí odakyú. Banchi kyifen ḿbé bwǎn-Éron bayip baróng emen ba-pwó ké bakô-kyikit-kyifen echi ámbe banyii,

³ ba-kúng byipang-enyam ḿbyín wǎ kyifen-byiryíng ba-kye Óburúkpâbí, kángkáng bafwám ḿbé ké kafâ-dyifít

⁴ ne bampî ne bafwám ḿbé badakyú ké mbé ne kyikit-dyityém-enyam ńkyí kyidanyîn kyi-shwôm.

⁵ Banchi kyifen ejí ba/chi ba-kúng ḿbyín kángkáng cibicibi ne kyifen ńkyí badashí byěm ba-shí ké kyikit-kyifen echi. Kyinung ńkyí kyidafím ké kyifen-byiryíng ńkyín kyi-nyîn n Óburúkpâbí.

⁶ Â onet ámu o/kúng ebúbǔu nang etám-ebû o-chi kyifen-kyikwáré ne Óburúkpâbí, ebû ányi e-man e-kyú otyép nang buma, nké ee*man e-kyú ne kyinêm ké byiko*.

⁷ Â o/chi kyifen ánkyi ké etám-ebû,

⁸ otwôom kányí bubwô ké dyishí, o-ju kányí ké ocím-dyifyi-mpyep. Banchi kyifen-Osówo bakúng baróng emen ba-pwó ké kángkáng bakô-kyikit-kyifen echi banyii,

⁹ ba-kúng byipang-enyam ḿbyín ba-kye Óburúkpâbí wǎ kyifen-byiryíng, bafwám ne ocî kángkáng mú badakét fáráng ne kyikúú-nkong ne kángkáng bafwám ḿbé kafâ-dyifít

¹⁰ ne bampî ne bafwám ḿbé mbe ké mbé ne kyikit-dyityém-enyam ńkyí kyidanyîn kyi-shwôm.

¹¹ Nchi kyifen-Osówo oshí ḿbyín kángkáng ké kyikit-kyifen echi o-kye Óburúkpâbí wǎ kyifen-byiryíng.

¹² Â onet ámu o/chi kyifen ánkyi ké ebúbǔu,

¹³ otwôom kányí bubwô ké dyishí, o-ju kányí ké ocím-dyifyi-mpyep. Banchi kyifen-Osówo bakúng baróng emen ba-pwó ké kángkáng bakô-kyikit-kyifen echi banyii,

¹⁴ ba-kúng byipang-enyam ḿbyín ba-kye Óburúkpâbí wǎ kyifen-byiryíng, kángkáng bafwám ḿbé ké kafâ-dyifít

¹⁵ ne bampî ne bafwám ḿbé mbe ké mbé, ne kyikit-dyityém-enyam ńkyí kyidanyîn kyi-shwôm.

¹⁶ Nchi kyifen-Osówo oshí ḿbyín kángkáng ké kyikit-kyifen echi wǎ kyifen-byiryíng ńkyí kyidanyîn Óburúkpâbí. Kángkáng bafwám-enyam ba/já Óburúkpâbí.

¹⁷ Onet-Ézerel o*dachi o-ryí bafwám* nang baróng-enyam*. Nyín kyije ńkyí kángkáng banet-Ézerel badatî ne banyá, nang mbe ba-kyú u nyá.