Lyívyítyíkus 27 - Bokyi Bible

Byije kyi-kim ne Eyáré nyí badakye Óburúkpâbí

¹ Óburúkpâbí o/kye Músis

² byije ḿbyín o/fu, osét banet ḿbé Ézerel o/fu, â baa/kúng onet ba-kye Óburúkpâbí ké bubwô-kiǐtí-ocím mú onet o/ryí, onet ámu o-chî ng epá byiko emen â o/kye ocím-akpuga mún

^3-7 mú kyije kyi/fu, bakûkye. Onyinchéng mú oo/kán o-rí kyi-fím ké aje bujam kyi-ribi ké bujam-aje bachât, okye akpuga-syílyíba bajam bafee esim diǐkpú. Onyinyi mú oo/kán o-kye akpuga-syílyíba bujam esim diǐkpú. Wǎn-kyisat mú oo/rí kyi-fím ké aje atánge kyi-ribi ké aje bujam o-kyâ akpuga-syílyíba bujam. Wǎn-onyinyi o-kye akpuga-syílyíba diǐkpú. Wǎn-onyinchéng mú ké abwô, mú o*da/byí ne aje atánge* o-kyâ akpuga-syílyíba atánge, mú onyinyi o-kyâ akpuga-syílyíba achât. Onyinchéng mú oo/shwôm bajam-aje bachât o-kyâ akpuga-syílyíba onyiryiká. Onyinyi mú oo/shwôm to bajam-aje bachât o-kye akpuga-syílyíba diǐkpú.

⁸ Â onet mú o/ryí ocím mu kyikpu o-shwôm mú oo*man ekye akpuga nyí ba/tî* babâ ne onet ámu ké kyikit-nchi kyifen-Osówo, ne nchi kyifen ámu o/chi o-tî ǎ ocím mú kyísí mú onet ámu odaman ekye.

⁹ Â ocím eryí ámu o/kim ne enyam nyí badaman echi kyifen ké nyǐ ba-kye Óburúkpâbí, dyizong-eyáré ándyi nang dyirá dyi-kyú u eyáré-ociring,

¹⁰ ne onet mú o/ryí ocím ámu oo*man ekye enyam ekíri o-cít dyikíp*. Â o/kye enyam ekíri, enyam ányi emúmú e/já Óburúkpâbí.

¹¹ Nké â ocím eryí ámu o/kim ne enyam nyí badaciring, nyí Óburúkpâbí oo*koo kányí ké kyifen echi* onet ámu okúng enyam ányi o-ca ne nyǐ ké kyikit-nchi kyifen-Osówo.

¹² Nchi kyifen-Osówo o/chi o-sét ocím-akpuga mú onet ámu odakye ké dyishí emen, mú o/kwárê ne eringe enyam ányi nyi kanong, nang e*fí kanong* ne ocím mú odasét o-waa ng éné.

¹³ Â onet ámu o/fu, nyǐ o-bwa ng esim o-ré enyam ányi, o-man o-kye ocím-akpuga ámu o-nye kyikit-akpuga kyibónge ké byikit-akpuga byitánge kyíbóng.

¹⁴ Â onet o/kúng kyise emen o-kye Óburúkpâbí, nchi kyifen-Osówo nké odafé ocím-kasî-kyise ánkyi, o-tún achi ké byěm ḿbyí mbyi kanong ne ḿbyí byi*fí kanong* ne ocím-kasî mú odafé o-waa ng ké ejá emen.

¹⁵ Â onet mú o/kye kyise ánkyi o/fu, nyǐ o-bwa ng esim o-ré kánkyí, o-man o-kye ocím-akpuga ámu, o-twôom kyikit-akpuga kyibónge ké byikit-akpuga byitánge kyíbóng.

¹⁶ Â onet o/kúng kyicê-esí emen o-kye Óburúkpâbí, ba-fâ kasî ńké kadatyeem ne esang-byichí nyí badakó bályi, nyí edakwárê ne ba-kwón ké esí ányi, ké akpuga-syílyíba diǐkpú ké bakyílogaram-esang-byichí bujam.

¹⁷ Â o/kye esí ányi ké dyije ńdyí ba-só ng byěm ba-bâ, o-kyâ osím-akpuga kerededet.

¹⁸ Â kyi/rí ne o-kye kányí, nchi kyifen-Osówo o/chi o-kabe ocím-kasî mú o/chi o-tyeem ne aje nyí a/waa ne dyije ńdyí badasó byěm dyi-fyi, o-fé ocím-akpuga o-bwa kyísí.

¹⁹ Â onet mú o/kye esí ányi o/fu, nyǐ o-bwa ng esim o-ré kányí, o-man o-kye akpuga ányi, o-nye kyikit-akpuga kyibónge ké byikit byitánge kyíbóng.

²⁰ Â o/kúng esí ányi o-shee onet okíri, â o*da/bwóp kpá kashú o-ré Óburúkpâbí dyifwá* e-firi nyí emen* oo*man to echîman eré kányí e-firi nyí emen*.

²¹ Â kyi/ribi ké nnyinyěng-dyije ńdyí ba/chi ba-só byěm, esí ányi e-firi ng nyí Óburúkpâbí ne banyá, ne e/chi e-já banchi kyifen-Osówo.

²² Â onet o/kúng esí nyí o/ré oréng o-kye Óburúkpâbí,

²³ nchi kyifen-Osówo o/chi o-kabe kasî emen ka-tyeem ne aje nyí a/waa ne dyije ńdyí badasó byěm dyi-fyi, ne onet ámu o-man o-kye akpuga ányi ké dyicí ándyi. Akpuga ányi a/já Óburúkpâbí.

²⁴ Ké dyije ńdyí byěm esó, ba-bwa ng ne esí ányi ba-só oyén nang bwǎn emen.

²⁵ Ba-fâ kángkáng ecím e-tyeem ne akpuga nyí mbe ba-kan n ké mpyep-ociring.

²⁶ Mbwôp kashú-wǎn-enyam nang orá mú ba/fwon o/já Óburúkpâbí, ne ké bubwô ámbu, onet o*dachi o-kúng kámú o-kye Óburúkpâbí wǎ eyáré nyí e/fím ǎ ké dyityém ne o-kye*. Wǎn-mpong nang mú otyítǎm nang mú otúbû o/já Óburúkpâbí.

²⁷ Nké mbwôp kashú-wǎn-enyam nyí badaciring, ba-man n ebwa esim ba-ré kámú ké ocím-akpuga mú kyije kyi/fu, ba-twôom kyikit-akpuga kyibónge ké byikit-akpuga byitánge kyíbóng. Â ba*da/bwa esim ba-ré kámú* ba-man n eyip kámú ba-shee nang yeě ké ocím-akpuga mú kyije kyi/fu.

²⁸ Onet o*dachi o-shee* nang orê o*dachîbwa esim o-ré chwǒm ńkyí o/kye o/fu, babên ba-kye Óburúkpâbí wǎ kiǐtí-eyáré* nang nkyi onet* nang enyam* nang esí*. Chwǒm ánkyi kyi/já Óburúkpâbí ne banyá.

²⁹ Nang onet mú ba/kúng ǎ ba-kye Óburúkpâbí wǎ kiǐtí-eyáré, baa*man to ebwa esim ba-chîré dyifwá ké dyishí emen*. Ba-man ba-ju ǎ.

³⁰ Nang ebóng chwǒm nké ba/fuu ké esí enen, ba-kyii ng kánkyí ké byikit diǐkpú, kyikit kyibónge kyi-já Óburúkpâbí.

³¹ Â onet mu o-ryuu ng o/fu, nyǐ o-bwa ng esim o-ré esang-byichí ányi nang erá, o-man o-kye ocím-akpuga mú ba/tî, o-twôom kyikit-akpuga kyibónge ké byikit byitánge kyíbóng.

³² Kyitú kyibónge ké burwám-byitú diǐkpú kyi/já Óburúkpâbí. Â ba/pan byitú, kyitú ńkyí nryî esim ké burwám byitú diǐkpú kyi/já Óburúkpâbí.

³³ Oyén-byitú o*dachi o-nap byitú ámbyi* eringe nyí odacá kaalongelonge-kyitú o-kye Óburúkpâbí* ne nang kyirá nké kyi/tyeem, o*dachi o-yángê*. Â o/yángê kyitú o-kye Óburúkpâbí kyikíri o-cít dyikíp, byitú ámbyi byifee byi-já ng Óburúkpâbí, ne baa*man to ebwa esim ba-ré kámbyí*.

³⁴ Ḿbyín nké mbyi byije ḿbyí Óburúkpâbí o/kye Músis kyíbóng-kaku ńké Sána o/fu, osét banet-Ézerel.