Lyívyítyíkus 26 - Bokyi Bible

Banjware ḿbé Onet odakoo â o/chi ńkyí Óburúkpâbí o/sét

¹ Óburúkpâbí o/fu, *da n̂g esím erím-bakye* ba-sím byichí nang aká* ba-bi nang aká-ociring* ba-kye kányí ofê*. Me n-chi i Óburúkpâbí mú mu Osówo enen.

² Tî n̂g kángkáng ací-ociring enen, ba-kye kyikit ńkyí ben bamu ba-fâ mě ofê. Me n-chi i Óburúkpâbí.

³ Â bamu ba-kyú u wǎ eringe byije ejí byi/sét,

⁴ me n-twóm m běn omu ké nkéré mú o/kwárê, eringe nyí esí edabát byiryíng, byichí byi-zím byirim.

⁵ Byíkwôn enen byi-jê ng ḿbyí badawaa ké esang-byichí ebóng, ké nkéré mú ba/mû ba/chi ba-kpet ebóng byirim-byichí, ne ba-waa ng ké byirim-byichí ebóng ké nkéré mú ba/mû ba/chi ba-kpet esang-byichí ekwón. Ben ba-já ng kángkáng byiryíng ḿbyí badaryí, ne ba/chi ba-kyú ké esí chwǒm kii*chi běn*.

⁶ Me n/chi n-kye běn bunyîn-dyityém ké esí enen, ne ba/chi ba-kûrê baa*shî ba/fu, onet o/chi o-chi běn chwǒm*. N/chi n-fîm byibî-enyam ḿbyí mbyi ké esí, ne byití bii*chi to*.

⁷ Ben ba/chi ba-kpógê banet-bushwôn enen.

⁸ Banet ashí atánge ké burwám enen ba-man n ekpógê bajam-banet batánge, ne bajam-banet batánge ba-man n ekpógê égot-banet etánge etánge ké byikit diǐkpú.

⁹ Me n/chi n-jware běn, n-kye běn bwǎn chwóó. Me n/chi n-tî ocím mú ejí, mú n/ryí ne ben.

¹⁰ Byiryíng enen ḿbyí badafuu byi-jê ng ḿbyí byidarí dyije, nang byi-rí éné, ba-chî ng ekúng kyicê ńkyí kyidawaa ké bankám enen ba-pwó, eringe nyí badajá mpât mú badatî ḿbyí byifyîfî.

¹¹ Me n/chi n-kyú ké burwám enen ké kafâ-mpyep-ociring ejí, ne mm*ba/chi m-bírî běn esim*.

¹² Me n/chi n-kyú ne ben. N/chi n-kyú Osówo enen, ben ba-kyú banet ejí.

¹³ Me Óburúkpâbí mú mu Osówo enen nké n/fîm běn ba-byí ké Éjip eringe nyí baa*kyú to básóng*. Me m/kpógê busa ḿbú bu/mû bu/níbî běn, n-chi běn ba-cen ne byiko etông.

Busông ḿbú Onet odari â o/né echi ńkyí Óburúkpâbí o/sét

¹⁴ Óburúkpâbí o/raa o/fu, â ba*da/chi ńkyí n/sét běn* n-kyâ běn busông.

¹⁵ Â ba/né etî byije ejí, ba-bên to ocím mú nn/ryí ne ben,

¹⁶ n-kyâ běn busông. M-bâ běn ne kiǐtí-bushî cibicibi ne byirwóm ḿbyí byi*fí ne bukye* ne ḿbyí byida běn esé achi byi-ju běn. Ben ba-kwón n esang-byichí enen, nké ee*ba/chi e-chwáp běn* ké nǎ, banet-bushwôn ba/chi ba-kpógê běn ba-ryí nang ebóng chwǒm ńkyí ba/kwón.

¹⁷ Me n/chi m-bírî běn esim eringe nyí bada běn ekpógê, ne banet ḿbé bamu ba-sa ng kámbé kafâ nké ba/chi ba-firi batu enen. Bushî bu/chi bu-róng běn ḿbú ba/chi ba-kûchêe nang onet o*fí o-nwa ng ne ben*.

¹⁸ Â nang kángkáng byěm ḿbyín byi/chi, nké ben ba/tôong ba*fí ba-chi i ńkyí n/sét běn* n/chi n-chi busông enen bu-jê kampén bujam.

¹⁹ N/chi m-man ne byiko enen etông ḿbyí ba*fí ba-mîng ng*. Omu oo*ba/chi o-chîna* ne esí enen e/chi e-jwóm e-kûshwane wǎ biǐré.

²⁰ Kángkáng bǎmkpóngé enen ḿbé bamu ba-chi i ba-fâ busa, baa*ba/chi ba-chwáp běn* ké nǎ, esí enen ee*ba/chi ebát byiryíng* ne byichí bii*ba/chi byi-zím byirim*.

²¹ Â ba/waa bamu ba-shwane e ashí ba-câ, ba*fí ba-chi i ńkyí mu n-sét ng běn* n-chî ng echi busông enen bu-chîjê ké kampén bujam.

²² N/chi n-twóm byibî-enyam ké burwám enen, ne byi/chi byi-ju bwǎn enen ne byitú enen e-mîng běn boǒnyín ḿbú banet baa*chi to ḿbé badachîcen ké akwóp enen*.

²³ Â ké nkéré nn/kye běn kángkáng busông ḿbún, ben ba/waa ba-câ kashú, ba*fí ba-jwo ng mě* ba-waa ng ba-cábê ng mě,

²⁴ n/chi m-bírî běn esim kâng, n-kye běn busông ḿbú budabán kampén bujam bu-shwôm ḿbú kashú.

²⁵ Me n/chi m-bâ běn ne byití, n-kye běn busông ké ocím eten eryí mú ba/bên, ne â ba/dacibi ké eshê enen ba/fu, ba-fem m, n-twóm m běn byirwóm ḿbyí byi*fí ne bukye* ḿbyí byi/chi běn ba-yip byiko enen ba-da-kye banet-bushwôn enen.

²⁶ N/chi n-chi byiryíng enen byi-man, ḿbyí byi/chi byi-chi banyinyi ashí diǐkpú ba-kyú ne akúrúng-okwâ abónge nké nke nyí badachi kángkáng berêt mú mbe ne mǔ. Ba/chi ba-kyii kámú boǒnyín boǒnyín, ne ké nkéré mú baa/ryí kámbú, esong e-chî ng běn echîkpet enwa.

²⁷ Â ḿbyín kángkáng byi/chi, ben ba/tôong ba-câ kashú ba-cábê ng mě, ba-né ng echi ńkyí mu n-sét ng běn,

²⁸ ké busa-dyityém ejí kâng, n/chi m-bírî běn esim, n-chîchi busông enen bu-bên kampén bujam bu-shwôm ḿbú kashú.

²⁹ Esong enen e/chi e-jê nyí badakpet eryí bwǎn enen.

³⁰ N/chi m-bên byikit enen ḿbyí bamu ba-fâ erím-bakye kyíbóng-eku, m-bên byikit-byifen echi enen ḿbyí bamu ba-shí i burwan n-yip byikwóm-enyam-byiko enen m-pwó ké erím-bakye enen nyí ee/myii. Ké kafâ ejí ńké ka/chi ka-bírî mě,

³¹ n/chi n-chi eshê enen e-bírî biǐbwô-byise, m-bên byikit enen ḿbyí bamu ba-fâ erím-bakye, n-né ekoo byifen enen.

³² N/chi m-bên esí enen kángkáng ké bukwóp ḿbú banet-bushwôn enen ḿbé ba/chi ba-nung ké nyǐ byiko byi/chi byi-kaa kámbé ké dyizong-obên ńdyí n/chi m-bên kányí.

³³ N/chi m-bâ běn ne byití, m-pwó běn ba-jâ byiryibyiryi ké esí-bacinbánet. Esí enen e/chi e-waa kafâ dyikáá, ne eshê enen e/chi e-firi biǐbwô-oshê.

^34-35 Ne esí kâng e/chi e-já aje nyí edajáng, dyijâng ńdyí ba/mû ba*fí ba-bángê e ekye kányí*. Ba/chi ba-mîng kányí e-já dyijâng ké nkéré ba/chi ba-kám běn ba-dim ne ben wǎ básóng ké esí nyí banet-bushwôn enen.

³⁶ N/chi n-chi běn ben mú ba/chi ba-kám běn ba-dim ne ben ba-firi ne bushî ḿbú kyicoge ńkyí bushǎan ḿbú afú nyi a-tugi ng kámbú kyida běn echi ba-byí ne ochéé. Ba-zóngê wǎ mbe ba-nwa ng ne ben ké byití, ne ba/chi ba-myii nang onet-bushwôn enen o*fí běn fáráng*.

³⁷ Ba/chi ba-kûkpán barî ké byiká nang onet mú mu o-zóngê e ne ben ké kyikû oo*chi* ne baa*ba/chi ba-man enwa ne onet-bushwôn enen nang obónge*.

³⁸ Ben ba/chi ba-waa ké kyikit ńkyí bada běn ekám ba-jâ ne ben ba-kpú, ba-ryii běn ké esí nyí banet-bushwôn enen.

³⁹ Booncen enen ḿbú bu/chi bu-waa okpó ké esí nyí banet-bushwôn enen bu-kpú u ké bubwô ḿbú byibî ebe ne ḿbú ḿbyí banchí ebe ḿbé kpákpá.

⁴⁰ Nké bwǎn enen ba/chi ba-sét byibî ebe ne ḿbyí banchí ebe ḿbé kpákpá ḿbé ba/kan mě enîm, ba-bwom bunwa ne me,

⁴¹ ba-chi mě m-bírî kámbé esim, n-chi ba-kám kámbé ba-dim ne mbé wǎ básóng ké esí nyí banet-bushwôn ebe. Ké nkuli kyikû, ké nkéré mú bwǎn enen baa/bwa ne byiko ebe kyísí, ba-ré dyifwá ńdyí byibî ebe ne bunwa ebe ḿbú ba/bírî ne me,

⁴² me n/chi n-zîim ocím ejí mú m/mû n/ryí ne Ébarahâm ne Ázik ne Jekôp, ne n/chi m-bwât ocím ejí eryí mú n/fu, n-kyâ banet ejí esí ńnyín.

⁴³ Ké mbwôp kashú, banet ba-man ba-byí ké kángkáng esí ńnyín, eringe nyí edajáng, ne banet ámbe ba-man ba-ré kángkáng dyifwá ńdyí ba/né kángkáng byije ejí.

⁴⁴ Nang kyi-bwa kyi-chi éné, ké nkéré mú mbé badakyú ké esí-banet-bushwôn ebe, mm*ba/chi m-mîng kámbé* n-ju kámbé kángkáng*. Â n/chi éné, ocím ejí mú n/ryí ne mbé o/chi o-man, ké nǎ, me n-chi i Óburúkpâbí mú mu Osówo ebe.

⁴⁵ Me n/chi m-bwât ocím ejí n-ryí, mú m/mû n/ryí ne banchí ebe ḿbé kpákpá ké nkéré mú n/tông ejíí emúmú busa ejí ḿbú n/fîm banet ejí ba-byí ké Éjip, eringe me Óburúkpâbí n/chi n-kyú Osówo ebe.

⁴⁶ Ḿbyín kángkáng nké mbyi byije ḿbyí Óburúkpâbí o/sét Músis kyíbóng-kaku ńké Sána o/fu, osét banet ḿbé Ézerel.