Lyívyítyíkus 25 - Bokyi Bible

Kyije ńkyí Aje Káchâtkányi

¹ Óburúkpâbí o/pem ne Músis kyíbóng-kaku ńké Sána, o-sét ǎ o/fu,

² okye banet ḿbé Ézerel byije ḿbyín o/fu, â ba/nung ké esí nyí Óburúkpâbí mu o-kyâ běn, ben ba/chi ba-kye Óburúkpâbí ofê mú baa*kpang byifát* ké kángkáng dyije ńdyí aje káchâtkányi*.

³ Kû n̂g ekwón byiryíng enen, ba-cébê byire-byichí enen, ba-fuu to byiryíng enen ké aje nyâchât.

⁴ Nké ké dyije ńdyí ké aje káchâtkányi, dyije ándyi ndyi ńdyí badamîng esí e-jáng, dyije ńdyí dyi/já Óburúkpâbí. *Da n̂g ekwón nang chwǒm* ba-cébê nang byire-byichí ké byichí enen*.

⁵ Nang esang-byichí nyí edabyí nyǐ eyén, nyí ba*da/kwón okwón* *da n̂g ebóng kányí*. *Da n̂g ebóng nang byirim-byichí ké byichí ḿbyí ba*da/cébê byire emen*. Dyije ándyi ndyi ńdyí esí edajáng.

⁶ Nang ba*da/kpang byifát enen ké dyije ándyi* esí eyén e-kyâ běn byiryíng ḿbyí badaryí ben bayén ne básóng enen ne banet-bǎmkpóngé enen ne bacinbánet ḿbé mbe ba-kyú u ne ben

⁷ ne byitú enen ne enyam-dyikán. Nang ebóng chwǒm ńkyí esí e/kye běn, ryí n̂g kánkyí.

Dyije ńdyí badabwa ne Byěm ba-sí Bayén

⁸ Pan n̂ aje káchâtkányi káchâtkányi kampén káchâtkányi, kyi/chi kyi-kye běn bajam-aje bafee esim kátángekányi.

⁹ Ké ací kâng diǐkpú nyí etukáku káchâtkányi, dyicí ńdyí byibî efîm, twóm m̂ onet o-jwá ntán ké oshê omúmú.

¹⁰ Â ba/chi éné, ba/chi ba-kúng dyije ńdyí bajam-aje bafee esim diǐkpú ba-tî wǎ dyije-ociring, ba-fu nang yeě mú mu ké esí enen o-firi ké byiko emen. Ké dyije ándyi, nang ebóng chwǒm ńkyí ba/mû baa/shee, babwa ne nkyí ba-só oyén nang bwǎn emen, nang yeě to mú ba/mû baa/shee ǎ wǎ ósóng, obwa esim o-kâm kyikû-banet emen.

¹¹ Ké dyije ándyi, baa*kwón byiryíng* nang esang-byichí nyí edabyí nyǐ eyén, baa*bóng* cibicibi ne byirim-byichí ḿbyí ké byichí ḿbyí ba*da/cébê byire*.

¹² Dyije ándyi dyimúmú dyi/chi dyi-kyú běn dyije-ociring. Ba-ryí i ńkyí esí eyén eda běn ekye nké nke.

¹³ Ké dyije ándyi, nang ebóng chwǒm ńkyí ba/mû baa/shee, ba-bwa ng esim ne nkyí ba-só oyén.

¹⁴ Ké bubwô ámbu, â a/shee orî-onet-Ézerel esí, nang a/ré esí ne nyǐ, *dachi a-ryí ǎ mpún*.

¹⁵ Tóbê n̂g kasî ka-tyeem ne aje nyí esí ányi edakye byiryíng ne nnyinyěng-dyije mú badasó byěm o-fyi.

¹⁶ Â aje a/chi a-rí chwóó, ocím-kasî o-jâ kyíbóng, nké â nkyi boǒnyín-aje, ocím-kasî o-shû ng kyísí, ké nǎ, ńkyí bamu ba-shee ng nkyi ocím-byiryíng mú esí edakye.

¹⁷ *Da n̂g eryí orî-onet-Ézerel mpún* nké shî n̂g Óburúkpâbí mú mu Osówo enen.

Afaníkong nyí adabyí ké Dyije ńdyí Aje Káchâtkányi

¹⁸ Tî n̂g kángkáng byije ḿbyí Óburúkpâbí, eringe nyí badakyú kanong ké esí nyí o/kye běn.

¹⁹ Esí enen e/chi e-bát byiryíng, ne ben ba/chi ba-já kángkáng byiryíng ḿbyí badaryí ba-kyú kanong chwǒm kii*chi běn*.

²⁰ Nké onet o-man n ebí o/fu, ebóng chwǒm kyidakyú ńkyí byidaryí ké dyije ńdyí aje káchâtkányi, â byi*da/kwón byiryíng* byi-fuu nang kámbyí*.

²¹ Óburúkpâbí o/chi o-jware esí ké aje nyâchât eringe nyí edakye byiryíng ḿbyí banet badaryí byi-kwárê kámbé ké aje afee.

²² Ké nkéré mú baa/kwón byiryíng ké aje nyíryinyi, ba-chî ng ekyú ne byiryíng ḿbyí ba/fuu ké aje nyâchât ḿbyí badaryí, ne ba-chî ng ejá byiryíng ḿbyí badaryí byi-kwárê tete ba-fuu byiryíng ḿbyí badakwón ké dyije ándyi.

Byěm esó

²³ *Da n̂g echi ba-shee esí enen eringe nyí edajá onet ámu ne banyá* ké nǎ, esí ányi e*da běn ejá*. E/já Osówo, ne ben bamu wǎ bacinbánet ḿbé o/kye běn o/fu, bachi byiryíng ké nyǐ.

²⁴ Â ba/shee esí, ba-man ba-nyît ba/fu, oyén o-man n echîré kányí e-bwa esim e-kâm ǎ.

²⁵ Â onet-Ézerel mu kyikpu ńkyí kyi/firi ńkyí odashee esí emen, wǎn-boné emen oré ǎ dyifwá ándyi.

²⁶ Onet mú o*fí ne wǎn-boné mú odaré dyifwá ándyi* o-man n ejá akpuga ké nkéré mú ké kashú nyí odaman echîré esí ányi e-firi nyí emen.

²⁷ Ké dyizong-bukwóp ámbu, o-man o-kye onet mú o/ré kányí akpuga nyí a/chi a-kwárê ké aje nyí edawaa ne nnyinyěng-dyije ńdyí badasó byěm dyi-fyi, ńdyí nang kyi-chi nǎ, o-man o-koo esí ányi e-chîfiri nyí emen.

²⁸ Nké â o*fí ne akpuga nyí odachîré esí ányi* e-waa ng ké abwô nyí onet mú o/ré kányí tete nnyinyěng-dyije ńdyí badasó byěm. Ké dyije ándyi, ba-bwa ng ne nyǐ ba-kye oyén.

²⁹ Â onet o/shee kyise ké oshê mú ba/bi ekpe ba-wáp kámú ba-fé ké kafâ, o-man n echîman eré kyise emen ánkyi ne dyije dyibónge dyi-man.

³⁰ Nké â o*da/man echîré kánkyí* ké kyikim-nkéré ńkyí dyije dyibónge* o*fí to ne busa ḿbú odachîré kánkyí* ne kyi-firi ng ńkyí onet mú o/ré kánkyí ne bwǎn emen ne banyá. Baa*bwa to ne nkyí ba-kye oyén* ké nnyinyěng-dyije ńdyí byěm esó*.

³¹ Nké byise ḿbyí mbyi ké eshê nyí ba*da/bi ekpe ba-wáp kányí* batî kámbyí wǎ eringe nyí ba/tî byifát. Oyén-kyise o-man n echîré kánkyí kyi-firi ńkyí emen, ne ba-bwa ng ne mbyí ba-só bayén ké nnyinyěng-dyije ńdyí byěm esó.

³² Nké bǎmgbán-banchi kyifen-Osówo ba-man n eré byise ebe ḿbyí mbyi ké eshê nyí ba/kye kámbé byi-bwa esim byi-kâm kámbé nang nkéré orá. [

³³ Â ḿgbán-nchi kyifen-Osówo o/shee kyise, ne oyén-kyise o*da/man eré kánkyí kyi-bwa esim kyi-kwam ǎ* ba-man ba-bwa esim ne nkyí ba-só oyén ké nnyinyěng-dyije ńdyí byěm esó,] ké nǎ, byise ḿbyí bǎmgbán-banchi kyifen-Osówo mbe ne mbyí ké eshê ebe, mbyi byise ḿbyí byi/já kámbé ne banyá ké burwám-banet ḿbé Ézerel.

³⁴ Nké byikit-baryî-byitú ḿbyí byi/wâng eshê nyí bǎmgbán-banchi kyifen-Osówo mbe ba-kyú u, ba*dachi ba-shee kámbyí*. Esí ányi e/já kámbé ne banyá.

Eringe nyí badapwoo Banet-Byikpu Byěm

³⁵ Â orî-onet-Ézerel mú mu o-kyú u fáráng ne wo o/róng kyikpu ńkyí oo*man to enyángê byiko emen* a-man a-kye ǎ byěm ḿbyí byida ǎ echwáp wǎ eringe nyí adakye onet mú ada ǎ eyámê, eringe nyí odaman ekyú fáráng ne wo o-ca kashú.

³⁶ *Da ǎ efé byěm ḿbyí oda ǒ etwôom kyíbóng* nké shî Osówo, a-mîng ónen-onet-Ézerel o-kyú ǒ fáráng.

³⁷ *Da ǎ esét a/fu, otwôom akpuga kyíbóng ké akpuga nyí a/pwoo ǎ* ne *dachi a-ryí mpún ké byiryíng ḿbyí a/shee ǎ*.

³⁸ Ńkyín kyije ńkyí Óburúkpâbí mú mu Osówo enen, mú o/fîm běn ba-byí ké Éjip eringe nyí oda běn ekye esí nyí Kínan, o-kyú to Osówo enen.

Básóng ezú Abwô

³⁹ Â ónen-onet-Ézerel mú mu o-kyú u fáráng ne wo o/róng kyikpu ńkyí kyi/chi ǎ o-yip byiko emen o-shee ǒ wǎ ósóng, *dachi a-chi ǎ o-chi bǎmkpóngé wǎ ósóng*.

⁴⁰ Okyú ne wo wǎ onet mú a/yámê ǎ, o-chi ǒ bǎmkpóngé tete nnyinyěng-dyije ńdyí badasó banet byěm.

⁴¹ Ké nkéré ámu, nyǐ ne bwǎn emen ba/chi ba-mîng ǒ, ba-bwa esim ba-kâm kyikû-banet emen ké esí nyí banchí ebe ḿbé kpákpá.

⁴² Banet ḿbé Ézerel ba-chi i básóng ḿbé Óburúkpâbí, ne nyǐ nké o/fîm kámbé ba-byí ké Éjip. Baa*man ba-shee kámbé wǎ básóng*.

⁴³ *Da n̂g etî kámbé ké bǎmkpóngé-busông* nké shî n̂g Osówo enen.

⁴⁴ Â bamu ba-ryuu ng básóng, ba-man n eré kámbé ne eshê nyí nyi fáráng ne ben.

⁴⁵ Ba-man n eré to bwǎn-bacinbánet ḿbé mbe ba-kyú u ne ben. Azong-bwǎn ányi nyí mbe ba-fwon n ké esí enen ba-man n efiri ḿbé enen,

⁴⁶ ne bwǎn enen ba-man n eryí kámbé bukyû, ba-chi bǎmkpóngé ba-kye kámbé tete ba-kpú. Nké baa*man ba-tî orî-onet-Ézerel ké bǎmkpóngé-busông*.

⁴⁷ Â ocinónet mú mu o-kyú u ne ben o/já esang kâng, ónen-orî-onet-Ézerel o-róng kyikpu, o-yip byiko emen o-shee mú ocinónet ámu nang onet-kyikû emen wǎ ósóng,

⁴⁸ ké nkéré mú oo/shee byiko emen, ba-chî ng ǎ eman eré o-bwa esim ké byiko emen. Wǎn-boné emen obónge

⁴⁹ nang onet mú o/fím ne bonchí nang boné emen, nang wǎn-boné emen okíri mú ba/fím kanong kanong, o-man n ǎ eré o-bwa esim ké byiko emen. Â nang oyén o/bwa o-já akpuga, o-man n eré byiko emen.

⁵⁰ O-man o-tóbê ne onet mú o/ré ǎ, ne ba-man ba-pan aje nyí a/fím ké nkéré mú o/shee byiko emen tete kyi-ribi ké nnyinyěng-dyije ńdyí badasó byěm, ne ba-man ba-tî ocím-kasî mú ba/chi ba-zú ǎ abwô ké akpuga-otukáku nyí badakpêe onet mú bada ǎ eyámê.

^51-52 O-man o-só kyicê-akpuga nyí ba/ré ǎ a-tyeem ne aje nyí a/waa,

⁵³ kyi-bwom wǎ ba/mû ba/yámê ǎ, wǎ eringe badayámê onet ké dyije dyibónge. Bonchí emen oo*man o-tî ǎ ké bǎmkpóngé-busông*.

⁵⁴ Â ba*da ǎ ezú abwô o-firi ké byiko emen ké akwóp ńnyín* ba-man ba-zú ǎ abwô ne bwǎn emen ké nnyinyěng-dyije ńdyí badasó byěm.

⁵⁵ Onet-Ézerel oo*waa ósóng ne banyá* ké nǎ, banet ḿbé Ézerel ba-chi i básóng ḿbé Óburúkpâbí. Óburúkpâbí nké o/fîm kámbé ba-byí ké Éjip, ne o-chi i Óburúkpâbí mú mu Osówo ebe.