Lyívyítyíkus 24 - Bokyi Bible

Eringe nyí badakûtún Etyuryíkáng

¹ Óburúkpâbí o/sét Músis o/fu,

² okye banet ḿbé Ézerel byije ḿbyín o/fu, bâ n̂g ne bakút-ólif ḿbé badanwa ba-shwôm, ḿbé badafé ké etyuryíkáng nyí ké mpyep mú Óburúkpâbí odakyú, eringe nyí okwâ odakûmang ké mǔ kángkáng nkéré.

³ Éron omee etyuryíkáng ányi ké kángkáng dyikurúku e-mang tete dyicófóróng dyi-cé, ányi ké bushú ḿbú Óburúkpâbí, ké esim-ékpígí nyí kyíjí, nyí nyi ké kashú-mkpukpu-byěm-Óburúkpâbí mú mu ké ochíchí-nfût-ociring. Batî kyije ńkyín ké kángkáng bankéré ḿbé mbe ba-bâ.

⁴ Éron nké o/chi o-kûtún etyuryíkáng ányi nyí ba/twôom ké kyikwap-etyuryíkáng ńkyí ba/chi ké gûl mú onong onong, ne o-man o-ri o/fu, nyi e-mang ng kángkáng nkéré ké bushú ḿbú Óburúkpâbí.

Berêt mú badachi Kyifen ba-kye Óburúkpâbí

⁵ O/fu, Éron okúng bakyílogaram-filáwa diǐkpú ne bafee ne o-chi byirim-berêt diǐkpú ne byifee.

⁶ Nap berêt ámu a-tî ké etáng efee, byirim nyâchât ké otáng obónge, ké ókpákpúrúk mú ba/cít kámú gûl mú onong onong, mú mu ké bushú ḿbú Óburúkpâbí.

⁷ Fé burwan ḿbú bunong bunong ké otáng-berêt nang orá eringe nyí budabwom wǎ kyifen-byiryíng ńkyí badachi ba-kye Óburúkpâbí, eringe nyí budakúng kyikit ńkyí berêt.

⁸ Ké kángkáng ací-ékwâbashi, ké kángkáng bankéré ḿbé mbe ba-bâ, ba-man ba-tî berêt ámu ké bushú ḿbú Óburúkpâbí. Nyín bǎmkpóngé ḿbé banet ḿbé Ézerel badakûchi ne banyá ne banyá.

⁹ Berêt ámu o/já Éron ne bwǎn emen, ne ba/chi ba-kûkyú ké kyikit-ociring ne ba-ryí kámú, ké nǎ, mǔ nké mu kiǐtí-byiryíng-ociring ḿbyí ba/chi kyifen ba-kye Óburúkpâbí ké bubwô-banchi kyifen-Osówo.

Mpan mú Óburúkpâbí o/két

^10-11 Onyinchéng obónge o/mû, mú bonchí emen o/fím Éjip, boné emen o/mû o-bángê e Shélomit, mú wǎn-Dyíbiri, mú o/fím Ézerel, ké kyikû ńkyí Dǎn. Onyinchéng ámu o/shwôn ne onet-Ézerel ké kafâ-oshê. Ńdyí mbe ba-shwôn n, o/shú Osówo, ne ba-kúng ǎ ba-ca ne nyǐ kyikit-Músis,

¹² ba-tî banet ba-kû ǎ ebám, ba/fu, mbé ba-bám m Óburúkpâbí o-sét kámbé ńkyí bada ǎ echi.

¹³ Óburúkpâbí o-sét Músis o/fu,

¹⁴ kúng onyinchéng ámu o-byí ké kafâ-oshê. Nang yeě mú o/jwo ǎ ké nkéré mú o/shú mě, otwôom onyinchéng ámu abwô ké dyishí o-sét o/fu, o/shú mě, ne oshê omúmú ba/chi ba-tím ǎ aká ba-ju.

¹⁵ Sét kâng banet ḿbé Ézerel a/fu, nang yeě nké o/shú Osówo, o-man o-ré dyifwá ké nkyí,

¹⁶ batím ǎ aká ba-ju. Onet-Ézerel nang ocinónet orá mú mu o-kyú u ké Ézerel nké o/shú Óburúkpâbí, oshê omúmú ba-tím m ǎ aká ba-ju.

¹⁷ Nang yeě nké o/ju onet, baju ǎ,

¹⁸ ne nang yeě nké o/ju kyitú ńkyí onet okíri, o-man o-kye ǎ kyitú kyikíri. Kyije kyi/bwom něen kyi/fu, â onet o/ju onet, baju ǎ to, â o/ju kyitú ńkyí onet, baju to ńkyí emen.

¹⁹ Â onet o/némê onet okíri, nang ebóng chwǒm ńkyí o/chi ǎ, bachi ǎ to.

²⁰ Â o/bún ǎ kyikúú, babún ǎ to kyikúú emen kyibónge, â o/sé ǎ dyichi, basé ǎ to dyichi, â o/bú ǎ busháng, babú ǎ to busháng. Nang ebóng onéme nké o/kye onet okíri, banémê ǎ to dyizong-onéme ándyi.

²¹ Nang yeě nké o/ju kyitú, okye kyikíri, nké nang yeě nké o/ju onet, baju ǎ to.

²² Kyije ńkyín kyi/ta běn ashí amúmú, banet-Ézerel ne bacinbánet ḿbé mbe ba-kyú u ne ben, ké nǎ, me n-chi i Óburúkpâbí mú mu Osówo enen.

²³ Ké nkéré mú Músis oo/sét banet ḿbé Ézerel byije ḿbyín, ba/kúng onyinchéng ámu ba-byí ne nyǐ ké kafâ-oshê, ba-tím ǎ aká ba-ju. Ké bukwóp ḿbún, banet ḿbé Ézerel ba/chi ńkyí Óburúkpâbí o/sét Músis.