Lyívyítyíkus 23 - Bokyi Bible

Ací-Byifen echi nyí badafé Óburúkpâbí

¹ Óburúkpâbí o/kye Músis

² byije ḿbyín o/fu, kángkáng banet ḿbé Ézerel bacibi kyikit kyibónge ba-fé ǎ ké ací-ociring nyí byifen echi.

³ O/fu, ben bamu ne ací nyâchât nyí badachi bǎmkpóngé, nké zîim m̂ ba/fu, dyicí ńdyí ací káchâtkányi dyi-chi i dyicí-ékwâbashi ńdyí badajáng. Ké dyicí ándyi, *da n̂g echi bǎmkpóngé* cibi n̂g kyikit kyibónge ba-fé mě. Dyicí-ékwâbashi dyi/já Óburúkpâbí, nang bamu ba-kyú u nyá.

⁴ Tî n̂g ací-ociring ńnyín ké ací nyí n/kye běn.

Dyijî-Kyifen ńkyí Shwôm ne Berêt

⁵ Dyijî-kyifen ńkyí Shwôm, ńkyí badachi ké ofê mú Óburúkpâbí, dyi-kpet ng ké nkéré mú esû edaríbî, ké ací diǐkpú ne anyii nyí mbwôp kashú-otukáku.

⁶ Ké ací onyiryiká, dyijî-kyifen ńkyí Berêt mú baa*fé bukye ké mǔ o-mut* dyi-kpet, ne ké ací káchâtkányi ben baa*man ba-ryí berêt mú ba/fé bukye ké mǔ o-mut*.

⁷ Ké mbwôp kashú-dyicí-kyifen ánkyi, ben ba-cibi ng kyikit kyibónge ba-fé Óburúkpâbí, baa*chi bǎmkpóngé enen nang babónge ké ací ányi*.

⁸ Chi n̂g byifen-byiryíng enen ba-kye Óburúkpâbí ké ací káchâtkányi. Ké dyicí ńdyí ací káchâtkányi, ba-chî ng ecibi kyikit kyibónge ba-fé Óburúkpâbí, nké baa*chi bǎmkpóngé enen nang babónge*.

^9-10 Ké nkéré mú baa/ribi ké esí nyí Óburúkpâbí mu o-kyâ běn, ne ba-kú ba-bóng ng esang-byichí enen, kúng n̂g mbwôp kashú-bukan ba-da-kye nchi kyifen-Osówo.

¹¹ Nyǐ o/chi o-kúng kámbú o-kye Óburúkpâbí wǎ eyáré-dyityém, eringe nyí Óburúkpâbí o/chi o-koo běn. Nchi kyifen-Osówo o/chi o-kúng kámbú o-kye Óburúkpâbí â ba/ryí ékwâbashi orî-dyicí.

¹² Ké dyicí ńdyí badakye eyáré ányi nyí esang-byichí, chi n̂g to kyifen ńkyí badashí kyirim-enyam ké wǎn-otyítǎm mú oo/rí dyije dyibónge, mú o*fí ne kyinêm ké byiko*.

¹³ Cibi n̂g ne ebû ányi ba-kye to bakyílogaram-filáwa bafee mú badachi berêt, ba-fé bakút-ólif ké mǔ wǎ kyifen-byiryíng. Kyinung ńkyí kyifen ńkyín kyi-nyîn n Óburúkpâbí. Kye n̂g to lyíta-bato obónge ba-cibi ne kyifen ánkyi.

¹⁴ *Da n̂g echi ba-ryí esang-byichí nyí efyîfî* nang nyí ekpó* nang ba/fwá ofwáng* nang ba/kúng kányí ba-chi berêt* tete ba-bâ ne byifen ḿbyín ba-ba-kye Óburúkpâbí. Kángkáng bwǎn enen ba-man ba-tî kyije ńkyín ké kángkáng bankéré ḿbé mbe ba-bâ.

Dyijî-Kyifen ńkyí Byiryíng efuu

¹⁵ Pan n̂ byipyán káchâtkányi kyi-fím ké dyicí ńdyí ba/ryí ékwâbashi orî-dyicí, ńdyí ba/kúng akan-esang-byichí enen ba-ba-kye Óburúkpâbí.

¹⁶ Ké dyicí ńdyí bajam-ací bafee esim diǐkpú, dyicí ńdyí ékwâbashi ee/shwôm káchâtkányi, chi n̂g echi kyifen kyikíri ńkyí esang-byichí nyí efyîfî ba-kye Óburúkpâbí.

¹⁷ Kyikû-banet nang kyirá kyibâ ne byirim-berêt byifee kyi-ba-kye Óburúkpâbí wǎ eyáré-bunyîn-dyityém. Kyirim-berêt nang kyirá, bakúng bakyílogaram-filáwa bafee mú badachi berêt ne ba-chi kánkyí, ba-fé bukye ḿbú budachi berêt o-mut ne ba-kúng kámú ba-kye Óburúkpâbí wǎ kyifen ńkyí mbwôp kashú-esang-byichí nyí baa/bóng.

¹⁸ Cibicibi ne berêt ámu, oshê omúmú bakye bwǎn-etám-ebû káchâtkányi ḿbé baa/rí dyije dyibónge, ne kyisu-otyép-mpong kyibónge ne ebúbǔu efee, ḿbyí byi*fí ne kyinêm ké byiko*. Bakúng kányí kángkáng ba-chi kyifen ńkyí badashí kyirim-enyam ba-kye Óburúkpâbí, cibicibi ne kyifen-esang-byichí ne kyifen-bato. Kyinung-kyifen ńkyín kyi-nyîn n Óburúkpâbí.

¹⁹ Kúng n̂g to otúbû obónge ba-chi kyifen-byibî efîm, ba-kúng bwǎn-etyítǎm bafee ḿbé baa/rí aje afee ba-chi kyifen ńkyí okwáre ne Óburúkpâbí.

²⁰ Nchi kyifen-Osówo o/chi o-kúng berêt ámu ne bwǎn-etyítǎm ámbe bafee o-kye Óburúkpâbí wǎ eyáré-bunyîn-dyityém ké dyishí ńdyí banchi kyifen-Osówo. Byifen ḿbyín byi-chi i byifen-ociring.

²¹ Ké dyicí ándyi, *da n̂g echi bǎmkpóngé enen nang babónge* nké cibi n̂g kyikit kyibónge ba-fé Óburúkpâbí. Bwǎn enen ba-man ba-tî kyije ńkyín ké kángkáng bankéré ḿbé mbe ba-bâ nang ba-bwa ba-kyú nyá.

²² Â ba-kú ba-bóng ng esang-byichí enen, *da n̂g echi ba-két asín nyí nyi ké bakô-kyifát*. Ne *da n̂g echi ba-bwa esim ba/fu, ba-da ng ebóng esang nyí e/waa*. Mîng n̂g banet-byikpu ne bacinbánet ne nyǐ. Óburúkpâbí nké mu Osówo enen.

Dyijî-Kyifen ńkyí Dyije ńdyí Dyifyîfî

^23-24 Ké mbwôp kashú-dyicí, ké etukáku káchâtkányi, tî n̂g kándyí wǎ kiǐtí-dyicí ńdyí badajáng, ba-bâ kyikit kyibónge ba-ba-fé Óburúkpâbí â ba/jwá biintán.

²⁵ Chi n̂g kyifen-byiryíng ba-kye Óburúkpâbí, ba-mîng kángkáng bǎmkpóngé enen echi ké dyicí ándyi.

Dyicí-Dyijî-Kyifen ńkyí Byibî efîm

^26-27 Ké ací diǐkpú nyí etukáku káchâtkányi nké nkyi dyicí-kyifen ńkyí badachi kampén kabónge ké dyije, ńkyí kyidafîm kángkáng byibî ḿbyí banet-Ézerel. Ké dyicí ándyi, *da n̂g echi ba-ryí chwǒm nang kyibónge*. Bâ n̂g kyikit kyibónge ba-ba-fé Óburúkpâbí, ba-chi kyifen-byiryíng ba-kye Óburúkpâbí.

²⁸ *Da n̂g echi ba-chi bǎmkpóngé ké dyicí ándyi* ké nǎ, nkyi dyicí-ociring ńdyí badachi kyifen ńkyí kyidafîm byibî.

²⁹ Nang yeě nké o/rí chwǒm ké dyicí ándyi, Osówo oo*kúng to onet ámu wǎ onet emen*.

³⁰ Â onet to o/chi bǎmkpóngé nang babónge ké dyicí ándyi, Óburúkpâbí oyén o/chi o-ju onet ámu.

³¹ Kyije ńkyín kyi/ta kángkáng bwǎn enen nang mbe ba-kyú u nyá.

³² Kyi-fím ké nkéré mú esû edaríbî, ké ací kátángekányi nyí otukáku ámu, kyi-ribi ké nkéré mú esû edaríbî ké dyicí ńdyí ací diǐkpú, tî n̂g dyicí-ociring ándyi wǎ kiǐtí-dyicí-dyijâng, ńdyí baa*ryí chwǒm nang kyibónge*.

Dyijî-Kyifen ńkyí Boompyep ebi

^33-34 Dyijî-kyifen ńkyí boompyep ebi kyi-kpet ng ké ací onyiryiká nyí etukáku káchâtkányi, ne dyi-rí i ací káchâtkányi.

³⁵ Ké mbwôp kashú-dyicí ké ací ńnyín, bâ n̂g kyikit kyibónge ba-ba-kye Óburúkpâbí ofê, ba-mîng kángkáng bǎmkpóngé enen echi.

³⁶ Ké kángkáng dyicí ké ací ányi káchâtkányi, ba-chi i kyifen-byiryíng. Ké ací nyíryinyi, chi n̂g ebê kyikit kyibónge ba-ba-kye Óburúkpâbí ofê, ba-chi kyifen-byiryíng. Dyicí ándyi dyi-chi i dyicí ńdyí badafé Óburúkpâbí ne baa*chi bǎmkpóngé enen nang babónge ké ndyí*.

³⁷ Ací-ociring ńnyín kángkáng nké nyi ací nyí badafé Óburúkpâbí, nyí badacibi kyikit kyibónge ba-fé ǎ, ba-chi byifen-byiryíng ne ḿbyí badashí byirim-enyam ne ḿbyí esang-byichí ne ḿbyí bato, wǎ eringe nyí Óburúkpâbí mu o-ryuu ng ké ací ányi.

³⁸ Chi n̂g byifen ḿbyín cibicibi ne ḿbyí ací-ékwâbashi enen, ba-cibi to eyáré nyí badakye kángkáng nkéré ne byifen ḿbyí badatî ocím mú ba/ryí ne byifen ḿbyí badatigi ne dyityém ba-kye Óburúkpâbí.

³⁹ Ké nkéré mú baa/fuu byiryíng ké byifát enen, chi n̂g dyijî-kyifen ńkyín, ńkyí boompyep ebi ké ací káchâtkányi, dyi-kpet ké ací onyiryiká nyí etukáku káchâtkányi. Mbwôp kashú-dyicí o-kyú u kiǐtí-dyicí ńdyí badajáng.

⁴⁰ Ké dyicí ándyi, kúng n̂g byirim-byichí enen ḿbyí byinong byinong, ba-kúng achiche ne byire-byichí ḿbyí mbyi ne eshǎan, ba-kpet echi kyifen ńkyí badafé Óburúkpâbí mú mu Osówo enen.

⁴¹ Chi n̂g kyifen ánkyi ké ací káchâtkányi. Bwǎn enen ba-man ba-tî kyije ńkyín ké kángkáng bankéré ḿbé mbe ba-bâ.

⁴² Kángkáng banet ḿbé Ézerel ba/chi ba-kyú ké boompyep ké ací káchâtkányi,

⁴³ eringe nyí bwǎn enen ba/chi ba-nyît ba/fu, Óburúkpâbí o/chi banet ḿbé Ézerel ba-rí ké boompyep ké nkéré mú o/fîm kámbé ba-byí ké Éjip. Nyǐ o-chi i Óburúkpâbí mú mu Osówo enen.

⁴⁴ Ké bukwóp ḿbún kâng nké Músis o/kye banet ḿbé Ézerel byije ḿbyí badakûtî ací-byifen echi nyí badakûkye Óburúkpâbí ofê.