Lyívyítyíkus 21 - Bokyi Bible

Eringe nyí Banchi Kyifen-Osówo badakyú Dyikpen ńdyí Dyinong ké Bushú-Osówo

¹ Óburúkpâbí o/sét Músis o/fu, osét banchi kyifen-Osówo ḿbé bwǎn-Éron o/fu, nchi kyifen-Osówo o*dachi o-bên byiko emen ké byěm-bukyû echi ḿbyí wǎn-boné odakpú*.

² Â onet ámu mú o/kpú o*fí boné* nang bonchí* nang wǎn emen* nang wǎn-boné emen mú onyinchéng*

³ nang wǎn-boné emen mú mu o-kyú u ké kyise emen* mú o*fí ne otyép*. [

⁴ O*dachi o-bên byiko emen ké bukyû echi ḿbú banet ḿbé ba/fím ne onyi emen*.]

⁵ Nchi kyifen-Osówo o*dachi o-pwát dyishí* o-kwárê nang kyiti* o-ját nang byiko emen o-tông o/fu, nyǐ mu o-ta ng dyikán*.

⁶ O-man o-kyú dyikpen ńdyí dyinong ké bushú ejí ne oo*man o-fé dyizîn ejí éshwân*. Nyǐ nké mu o-chi i kyifen-byiryíng o-kyâ mě, ne o-man o-kyú dyikpen ńdyí dyida mě enyîn.

⁷ Nchi kyifen-Osówo oo*man o-bé onyinyi mú oo/ryí akpara* nang onyinyi mú baa/rí ne nyǐ* nang mú oo/bé otyép dyibé dyi-man* ké nǎ, nyǐ o-kyú u dyikpen ńdyí dyinong ké bushú ejí.

⁸ Banet-Ézerel ba-man ba-kúng nchi kyifen-Osówo wǎ onet mú mu o-kyú u dyikpen ńdyí dyinong ké bushú ejí, ké nǎ, nyǐ nké mu o-chi i kyifen-byiryíng o-kyâ mě. Me n-chi i Óburúkpâbí. Me mu kanong ne mu n-chi i banet ejí ba-kyú dyikpen ńdyí dyinong.

⁹ Â wǎn-nchi kyifen-Osówo mú onyinyi mu o-ryí i akpara, bashí wǎn ámu o-kpú, ké nǎ, o/kye bonchí emen edángé.

¹⁰ Otu-nchi kyifen-Osówo mú onet mú baa/pwó ǎ bakút-ociring ké dyishí ne baa/jware ǎ o-firi nchi kyifen-Osówo mú odafé byídí-nchi kyifen-Osówo, ké bubwô ámbu, oo*man o-mîng dyishí emen cage* o-ját nang byídí emen o-tông o/fu, nyǐ mu o-ta ng dyikán*.

^11-12 Baa/jware ǎ o-firi onet ejí ne oo*man o-bên byiko emen* o-bên mpyep-ociring ejí* o-mîng kámú o-da-nung ké kyise ńkyí ba/tî kyikwóm-okúsí* nang okúsí ámu mu bonchí nang boné emen*.

¹³ O-man o-bé wǎn-onyinyi mú ba*da/rí ne ne nyǐ*

¹⁴ *chí onyǐnkú* nang onyinyi mú oo/bé otyép dyibé dyi-man* nang onyinyi mú oo/ryí akpara*. O-man o-bé wǎn-onyinyi mú o/fím ké kyikû-banet emen, mú ba*da/rí ne ne nyǐ*.

¹⁵ Â o*da/chi éné* bwǎn emen ḿbé ba/mû ba/chi ba-kyú dyikpen ńdyí dyinong ké bushú ejí ba-bên n byiko ebe. Me n-chi i Óburúkpâbí, ne nn/cá ǎ n/fu, okyú otu-nchi kyifen ejí.

¹⁶ Óburúkpâbí o/sét Músis o/fu,

¹⁷ osét Éron o/fu, wǎn eyên nang obónge mú mu ne kyinêm ké byiko o*dachi o-chi kyifen-byiryíng o-kye mě*. Kyije ńkyín kyi-waa ng ké kángkáng bankéré ḿbé mbe ba-bâ.

¹⁸ Onet mú mu ne kyinêm ké byiko o*dachi o-chi kyifen ánkyi* nang o/sêe achi* nang mu nkwa* nang mu ne kyinêm nang kyirá ké byiko*

¹⁹ nang bubwô nang kyiká emen kyi/nyîim*

²⁰ nang mu ne kyikong* nang mu orûn* nang mu o-rwôm m dyichi* nang orwôm-enyam-byiko* nang ba/pê ǎ*.

²¹ Wǎn mú Éron mú nchi kyifen-Osówo nang orá mú mu ne kyinêm ké byiko o*dachi o-chi kyifen ánkyi o-kye mě*.

²² Dyizong-onet ándyi o-man n eryí byiryíng ḿbyí badachi kyifen ba-kye mě, nang byiryíng-kyifen-ociring, nang byiryíng-kiǐtí-kyifen-ociring.

²³ Nké ké bubwô ḿbú mu ne kyinêm ké byiko, o*dachi o-cen o-fárâng ékpígí nyí edacít mkpukpu-byěm ejí* o-fárâng nang kyikit-kyifen ejí echi*. Oo*man o-bên byěm-ociring ḿbyín* ké nǎ, me n-chi i Óburúkpâbí, ne n/chi kámbyí byi-firi byěm-ociring.

²⁴ Byije ḿbyín kâng nké Músis o/sét Éron ne bwǎn-Éron ne kángkáng banet ḿbé Ézerel.