Lyívyítyíkus 20 - Bokyi Bible

Busông ḿbú badari ké Byije eróng

¹ Óburúkpâbí o/sét Músis o/fu,

² osét banet-Ézerel o/fu, nang yeě ké burwám enen nang ocinónet mú mu o-kyú u ne ben nké o/kúng wǎn emen nang orá o-kye ké kyifen echi ńkyí orím-bukye-Mólok, oshê omúmú batím onet ámu aká ba-ju.

³ Â onet nang orá o/kúng wǎn emen o-kye Mólok o-bên mpyep-ociring ejí, o-kye dyizîn ejí edángé, m-bírî ng onet ámu esim ne nn*kúng ǎ to wǎ onet ejí*.

⁴ Nké â oshê omúmú ba/cít ńkyí onet ámu o/chi, ba-ju ǎ,

⁵ me oyén m-bírî ng onet ámu esim, ne kyikû-banet emen kángkáng ne kángkáng banet ḿbé ba/cibi ne nyǐ ba-kye Mólok ofê, ba-mîng efé dyityém ne me. Mm*ba/chi n-chîkúng kámbé wǎ banet ejí*.

⁶ Â onet o/ce ké kyikit-banet ḿbé mbe ba-pem m ne bakúsí o-da-koo bacê, m-bírî ng onet ámu esim ne nn*kúng ǎ to wǎ onet ejí*.

⁷ Tî n̂g byiko enen ké dyikpen ńdyí dyinong ekyú, ké nǎ, me n-chi i Óburúkpâbí mú mu Osówo enen.

⁸ Tî n̂g byije ejí, ké nǎ, me n-chi i Óburúkpâbí, ne mu n-chi i běn ba-kyú dyikpen ńdyí dyi/kwárê ne me.

⁹ Óburúkpâbí o/kye byije ḿbyín něen o/fu, nang yeě nké o/shú boné emen nang bonchí emen baju ǎ. Oyén nké o/cen ne bukyû emen.

¹⁰ Â onet o/rí ne onyi mú orî-onet-Ézerel, nyǐ ne onyinyi ámu baju kámbé.

¹¹ Â onet o/rí ne onyi-bonchí emen, nyǐ ne onyinyi ámu baju kámbé, ké nǎ, wǎn ámu o/kye bonchí emen edángé. Mbé bayén nké ba/cen ne bukyû ebe.

¹² Â onet o/rí ne onyi mú wǎn emen, baju kámbé ashí amúmú. Mbé ba/chi kyibî ńkyí bwǎn-bané badarí ne barî, ne mbé bayén nké ba/cen ne bukyû ebe.

¹³ Â onet o/rí ne óbe-onyinchéng, mbé ashí amúmú ba/chi chwǒm ńkyí kyidanut, ne baju kámbé ashí amúmú. Mbé bayén nké ba/cen ne bukyû ebe.

¹⁴ Â onet o/bé wǎn-onyinyi ne boné-wǎn-onyinyi ámu, bashí kámbé ashí amúmú ba-kpú, ké bubwô-chwǒm-éshwân ńkyí ba/chi. *Da n̂g echi ba-bángê dyizong-chwǒm ándyi dyi-chi ké burwám enen*.

¹⁵ Â onet o/rí ne enyam, baju ǎ ne enyam ányi.

¹⁶ Â onyinyi o/kan o/fu, enyam erí ne nyǐ, baju ǎ ne enyam ányi. Mbé nké ba/cen ne bukyû ebe.

¹⁷ Â onet o/bé wǎn-boné emen mú onyinyi nang mú ba/fím ne nyǐ ké kyicê kyibónge, bawuri kámbé éshwân ké otyém-oshê ba-ró kámbé ké oshê. Onyinchéng ámu oo/rí ne wǎn-boné emen ne o-man o-ré dyifwá ké nkyí.

¹⁸ Â onet o/rí ne onyinyi mú mu ké bunyinyi, baró kámbé ashí amúmú ké oshê, ké nǎ, baa/bên kyije ńkyí byiko ebe ebên.

¹⁹ Â onyinchéng o/rí ne wǎn-boné-bonchí emen mú onyinyi, mbé ashí amúmú ba-man ba-ré dyifwá ńdyí bwǎn-bané ḿbé badarí ne barî badaré.

²⁰ Â onyinchéng o/rí ne onyi mú wǎn-boné-bonchí emen, o/dángê wǎn-boné-bonchí emen, ne nyǐ ne onyinyi ámu ba-ré ng dyifwá ké nkyí. Onet nang obónge ké burwám ebe oo*fwon wǎn*.

²¹ Â onet o/bé onyi mú wǎn-boné emen, ba-kpú u baa*fwon wǎn*. Onyinchéng ámu oo/chi kyibî-chwǒm ńkyí o/bên byiko emen, ne oo/kye wǎn-boné emen ámu edángé.

²² Óburúkpâbí o/raa o/fu, tî n̂g kángkáng byije ejí, eringe nyí esí nyí Kínan ee*ba/chi e-né běn* nyí mu n-kúng ng běn ba-jâ ké nyǐ*.

²³ *Da n̂g echi ba-kúng édúú nyí banet ḿbé mbe ba-kyú u ké esí ányi*. Me mu n-ró ng banshâng bakye ḿbén, eringe nyí ben badaman enung ké esí ányi. Ba-kú ba-nut ng mě ké kángkáng byibî-byěm ebe ḿbyí mbe ba-chi i.

²⁴ Nké me nn/ryí běn ocím n/fu, n-kyâ běn esí ńnyín nyí enong, nyí edabát byiryíng e-kyú nyí enen, ne n/chi n-kye běn kányí. Me n-chi i Óburúkpâbí mú mu Osówo enen, ne nn/cá běn n-tî cát ké burwám-eshê.

²⁵ Ké bubwô ámbu, ba-man ba-nyît kanong kanong kyi-kim ne enyam ne bunurung ḿbyí badaciring ne ḿbyí baa*ciring*. *Da n̂g echi ba-ryí enyam nang bunurung ḿbyí badaciring*. Me nn/kúng kámbyí wǎ byěm-ociring, ne â ba/ryí kámbyí, ba-firi ng to banet ḿbé bada běn eciring.

²⁶ Ben ba-man ba-kyú dyikpen ńdyí dyi/kwárê ne me, ba-já mě me kǎnchí, ké nǎ, me n-chi i Óburúkpâbí ne mu kanong. Me nn/cá běn ké burwám-eshê eringe nyí bada mě ejá kǎnchí.

²⁷ Nang onyinchéng nang onyinyi orá nké o/pem ne bakúsí, batím ǎ aká o-kpú. Nang yeě nké o/chi dyizong-chwǒm ńdyín o/cen ne bukyû emen.