Lyívyítyíkus 2 - Bokyi Bible

Byifen ḿbyí badachi ké Esang-Byichí

¹ Nang nkéré orá nké onet mu o-bâ ebachi kyifen ńkyí esang-byichí o-kye Óburúkpâbí, o-man o-bwóp kpá kashú o-kwa kányí e-bírî filáwa. O-man o-fé bakút-ólif ne burwan ké mǔ,

² o-yip kámú o-kye banchi kyifen-Osówo ḿbé bwǎn-Éron. Nchi kyifen-Osówo o/chi o-kpere dyikwâ-filáwa ámu ne bakút ámbe ne kángkáng burwan ámbu o-shí kámbyí ké kyikit-kyifen echi eringe nyí kyidatông kyi/fu, baa/kúng esang-byichí ányi kángkáng ba-kye Óburúkpâbí. Kyinung-kyifen-byiryíng ńkyín kyi-nyîn n Óburúkpâbí.

³ Filáwa mú odawaa kyísí o/já banchi kyifen-Osówo. Filáwa ámu o-firi ng kiǐtí-filáwa-ociring, ké nǎ, ba/kúng kámú ké byiryíng ḿbyí ba/chi kyifen ba-kye Óburúkpâbí.

⁴ Â o/kúng berêt mú ba/ká ké kafâ-katí-ecing ne o-chi kyifen ánkyi, o-man o-chi kámú oo*fé bukye ḿbú budachi kámú o-mut*. O-man n echi mú byirim ḿbyí byiryên ké filáwa mú ba/cibi ne bakút-ólif. O-man n echi to mú boorim boǒníngéníngê wǎ bakye, ba-sabe kámú bakút-ólif.

⁵ Â kyifen ánkyi nkyí ńkyí berêt mú badaká ké ḿkpângokunge, ochi kámú ké filáwa mú ba/cibi ne bakút-ólif, nké oo*fé bukye ḿbú budachi kámú o-mut*.

⁶ Osé kámú rugirugi, o-pwó bakút ámbe ké mǔ, ké nkéré o-kú o-tî ng kámú wǎ kyifen.

⁷ Â kyifen ánkyi nkyi ńkyí berêt mú badaká ké dyicáng, ochi kámú ké filáwa ne bakút-ólif.

⁸ Obâ ne mǔ wǎ chwǒm-kyifen echi o-kye Óburúkpâbí. O-kúng kámú o-kye nchi kyifen-Osówo mú o/chi o-kúng kámú o-ca na mǔ ké kyikit-kyifen echi.

⁹ Nchi kyifen ejí o/chi o-kúng kyicê-berêt ámu, ńkyí kyidatông kyi-fu, baa/kúng kámú omúmú ba-kye Óburúkpâbí, ne o/chi o-shí kyicê ánkyi ké kyikit-kyifen echi. Kyinung ńkyí kyidabyí ké kyifen-byiryíng ńkyín kyi-nyîn n Óburúkpâbí.

¹⁰ Berêt mú odawaa kyísí o/já banchi kyifen-Osówo. O-kyú u kiǐtí-berêt-ociring, ké nǎ, ba/kúng kámú ké byiryíng ḿbyí ba/chi kyifen ba-kye Óburúkpâbí.

¹¹ Esang-byichí nang erá nyí badachi kyifen ba-kye Óburúkpâbí baa*fé bukye ḿbú budachi kányí e-mut*. Baa*man ba-fé bukye ḿbú budachi byiryíng byi-mut* nang bakút-bukwan* ké byiryíng ḿbyí badachi kyifen ba-kye Óburúkpâbí*.

¹² Kyifen ńkyí mbwôp kashú-esang-byichí nyí badabóng kángkáng dyije, bakúng kányí ba-kye Óburúkpâbí, nké baa*shí kányí ké kyikit-kyifen echi*.

¹³ Fé n̂g bano ké kyifen-esang-byichí nang kyirá, ké nǎ, bano ba/bwom ké dyishí ńdyí ocím mú ba/ryí ne Osówo. Ba-man ba-fé bano ké kángkáng byifen enen.

¹⁴ Â ba/bê ne kyifen ńkyí mbwôp kashú-esang-byichí nyí ba/bóng Óburúkpâbí ebakye, chi n̂g kyifen ánkyi ké esang-byichí nyí ba/fwá ofwáng nang nyí ba/kwa okwǎng.

¹⁵ Fé n̂g bakút-ólif ba-pwó burwan ké nyǐ.

¹⁶ Nchi kyifen ejí o/chi o-kúng kyicê-esang-byichí ányi ne bakút ámbe ne kángkáng burwan ámbu, o-shí kámbyí eringe nyí kyidatông kyi/fu, baa/kúng esang-byichí ányi kángkáng wǎ kyifen-byiryíng ba-kye Óburúkpâbí.