Lyívyítyíkus 19 - Bokyi Bible

Byije kyi-kim ne Dyikpen ńdyí Dyinong ekyú, ńdyí baa*ryí Acît*

¹ Óburúkpâbí o/sét Músis o/fu,

² osét kángkáng banet ḿbé Ézerel o/fu, kyú n̂g dyikpen ńdyí dyinong, ké nǎ, me Óburúkpâbí mú mu Osówo enen mu kanong.

³ Nang yeě nang yeě ofé bonchí ne boné emen, ne o-man o-tî dyicí-ékwâbashi wǎ eringe nyí me nn/sét. Me n-chi i Óburúkpâbí mú mu Osówo enen.

⁴ *Da n̂g echi ba-bírî mě esim* ba-kye erím-bakye ofê*. *Da n̂g esím erím-bakye ké biǐré* ba-kûkye kányí ofê*. Me n-chi i Osówo Óburúkpâbí enen.

⁵ Â ba/ju enyam nyí badachi kyifen ńkyí kyikwáré ne me, tî n̂g byije ḿbyí nn/kye běn ne n/chi n-koo kyifen ánkyi.

⁶ Ba-man ba-ryí enyam ányi ké dyicí ńdyí badachi kyifen ánkyi, nang ké orî-dyicí. Â enyam ányi e/rí ací achât, ba-man ba-shí kányí,

⁷ ké nǎ, e/firi chwǒm ńkyí badaciring. Â onet o/ryí kányí, nn*koo kyifen ánkyi*.

⁸ Nang yeě nké o/ryí kányí, o-man o-ré dyifwá, ké nǎ, o*da/ciring chwǒm ńkyí badaciring* ne mm*ba/chi n-chîkúng onet ámu wǎ onet ejí*.

⁹ Â ba/bóng esang-byichí enen, *da n̂g ekét asín-esang-byichí nyí nyi ké bakô-byifát*. *Da n̂g echi to ba-bwa esim ba-da-kpádê boǒsáng ḿbú ba/mû baa/mîng*.

¹⁰ *Da n̂g ebwa esim ké kyifát-byirim-byichí enen* ba/fu, ba-da ng ebóng byirim ḿbyí ba/mû ba*da/ri* nang ḿbyí byi/mû byi/róng kyísí*. Mîng n̂g banet-byikpu ne bacinbánet ne mbyí. Me n-chi i Óburúkpâbí mú mu Osówo enen.

¹¹ *Da n̂g ejii kajii* ba-ryí nang onet mpún* ba-sét nang kyisédéng*.

¹² *Da n̂g echi ba-ryí ocím mú kaǎnínǐm ké dyizîn ejí*. Ńkyí ánkyi kyi-kyâ dyizîn ejí edángé. Me n-chi i Óburúkpâbí mú mu Osówo enen.

¹³ *Da n̂g echi ba-cít onet ké chwǒm* ba-jii ǎ nang kajii*. *Da n̂g echi ba-mîng onet akpuga emen ekye nyí ba/yámê ǎ* nang ké buchú bubónge*.

¹⁴ *Da n̂g echi ba-shú [onet mú mu o-rwôm m atông*] ba-yip nang chwǒm ba-tî nsêe achi ké bushú* eringe nyí odakpán ké nkyí*. Shî n̂g mě. Me n-chi i Óburúkpâbí mú mu Osówo enen.

¹⁵ Sét n̂g ntûntû, *da n̂g eryí acît* ké nkéré ba-kú ba-két ng bampan*. *Da n̂g ekét mpan o-nwa onet* ké nǎ, mu kyikpu nang mu onet-esang*.

¹⁶ *Da n̂g ekûsét byisédéng ba-câ kyi-kim ne onet* ne â onet mu ké mpan mú bada ǎ eju, sét wááng â kyiraa eyên kyi/chi kyi-nyángê ǎ. Me n-chi i Óburúkpâbí.

¹⁷ *Da n̂g echi ba-kûrôo chwǒm ńkyí nkyi ǒ ne onet ké dyityém* nké nap n̂g ńkyí kyi/róng běn [eringe nyí aa*ba/chi a-chi kyibî ké bubwô emen*.]

¹⁸ *Da n̂g echi ba-só onet ewa* a-waa nang ké busa-dyityém ne nyǐ* nké orî-onet ojê ǒ wǎ eringe nyí byiko eyên mbyi byi-jê ng ǒ. Me n-chi i Óburúkpâbí.

¹⁹ Tî n̂g byije ejí. *Da n̂g echi ba-chwáp baróng ḿbé byitú enen*. *Da n̂g ekwón azong-esang-byichí afee ké kyifát kyibónge*. *Da n̂g echi ba-fé byídí ḿbyí ba/zim ba-chwáp byídí-byichwábáng*.

²⁰ Â onet oo/ryí ocím o/fu, nyǐ o-shee ng onyinchéng okíri ósóng emen mú onyinyi o-bé, nké onet mú áku o*da/kye ne akpuga nyí oda ǎ eré* [baa*ba/chi ba-ju kámbé* â ba/rí ne barî*. Ba-kyâ kámbé busông nké nke,] ké nǎ, mú wǎn-onyinyi ámu o/tôong ósóng emen.

²¹ Onyinchéng ámu o-bâ ne otyítǎm ké ocím-dyifyi-mpyep mú Óburúkpâbí odakyú o-ba-chi kyifen ńkyí dyifwá eré,

²² ne nchi kyifen-Osówo o/chi o-kúng kámú o-chi kyifen ńkyí kyidafîm kyibî ńkyí mú onyinchéng, ne Osówo o/chi o-pwoo ǎ.

²³ Â ba/bê ké esí nyí Kínan ba/fu, ba-kwón n kyichí ńkyí kyidazím byirim nang kyirá, ciring n̂g kyichí ánkyi ké aje achât. Baa*man ba-ryí kánkyí ké aje ányi achât*.

²⁴ Ké aje anyii kâng, ba-kúng ng kángkáng byirim emen ba-kye mě me Óburúkpâbí wǎ kyifen ńkyí [bada mě ekó agafwó.]

²⁵ Nké ké aje atánge, ba-man n eryí byirim emen. Â ba/chi kángkáng ḿbyín, byichí enen byi-kû ng ezím byirim chwóó. Me n-chi i Óburúkpâbí mú mu Osówo enen.

²⁶ *Da n̂g echi ba-ryí enyam nang erá nyí baróng ba/tôong ké nyǐ*. *Da n̂g echi ba-sô epé nang erá*.

²⁷ *Da n̂g ekwárê eji nyí ké bakô-ashí enen* nang kyiti enen*.

²⁸ *Da n̂g echi ba-tî ekap ké byiko enen* ba-két nang byibáp ké byiko enen* ké dyikán eta ńdyí onet mú oo/kpú*. Me n-chi i Óburúkpâbí.

²⁹ *Da n̂g echi ba-dángê bwǎn-banyinyi enen* ba-yip kámbé ba-kye ké akpara eryí ké byise-bakye esháng*. Â ba/chi éné, ba/chi ba-bírî ba-kâm esówo ekíri, ne esí enen e/chi e-sú ne babép ebép.

³⁰ Tî n̂g dyicí-ékwâbashi, ba-kye kyikit ńkyí mbe ba-fâ mě ofê. Me n-chi i Óburúkpâbí.

³¹ *Da n̂g ece ba-kâm banet ḿbé mbe ba-jwo ng byiraa ne bakúsí* ba-kye běn bacê*. Â ba/chi éné, ba-firi ng banet ḿbé bada běn ekûciring. Me n-chi i Óburúkpâbí mú mu Osówo enen.

³² Kye n̂g bakâa-banet ofê. Shî n̂g mě. Me n-chi i Óburúkpâbí.

³³ *Da n̂g ekyé bacinbánet ḿbé mbe ké esí enen byiraa*.

³⁴ Tî n̂g kámbé wǎ eringe nyí badatî orî-onet-Ézerel, ne bajê běn wǎ eringe enyam-byiko enen nyi e-jê ng běn. Zîim m̂ ba/fu, ben to ba/mû bacinbánet nkéré obónge ké esí nyí Éjip. Me n-chi i Óburúkpâbí mú mu Osówo enen.

³⁵ *Da n̂g eyip byěm ḿbyí bii*kan byěm ḿbyí badashee kanong* ba-ryí onet mpún*.

³⁶ Kúng n̂g érúmá nyí enong ne byěm byikíri ḿbyí byinong ḿbyí badakan byěm. Me n-chi i Óburúkpâbí mú mu Osówo enen, ne me nké n/fîm běn ba-byí ké Éjip.

³⁷ Tî n̂g kángkáng byije ejí. Me n-chi i Óburúkpâbí.