Lyívyítyíkus 18 - Bokyi Bible

Byěm-Babép ḿbyí Bii*nwa*

¹ Óburúkpâbí o/sét Músis o/fu,

² osét banet ḿbé Ézerel o/fu, me n-chi i Óburúkpâbí mú mu Osówo enen.

³ *Da n̂g ekúng édúú nyí banet ḿbé Éjip* ké kyikit ńkyí ba/mû ba-kyú u* nang nyí banet ḿbé Kínan* ké kyikit ńkyí mu n-kúng ng běn ba-jâ*.

⁴ Tî n̂g byije ejí kángkáng. Me n-chi i Óburúkpâbí mú mu Osówo enen.

⁵ Kû n̂g etî kángkáng byije ḿbyí n/kye běn. Me n/chi n-nyii akpen enen â bamu ba-chi i éné. Me n-chi i Óburúkpâbí.

⁶ Óburúkpâbí o/kye byije ḿbyín o/fu, *dachi a-rí ne wǎn-boné eyên*.

⁷ *Dachi a-kye bonchí eyên edángé* a-rí ne boné eyên*. *Dachi a-dángê boné eyên*.

⁸ *Dachi a-dángê bonchí eyên* a-rí ne onyi emen nang obónge*.

⁹ *Dachi a-rí ne wǎn-boné eyên mú onyinyi* nang wǎn-onyinyi mú onyi mú bonchí eyên o/fwon ne otyép okíri* nang ba/nen ǎ nang ba*da ǎ enen ké kyikit ńkyí bonchí eyên*.

¹⁰ *Dachi a-rí ne wǎn-onyinyi mú wǎn eyên o/fwon*. Dyizong-chwǒm ándyi dyi-bâ ǒ ne éshwân ké byiko.

¹¹ *Dachi a-rí ne wǎn-boné eyên mú onyinyi* mú ba/fím kyicê kyibónge* ké nǎ, nyǐ to o-chi i wǎn-boné eyên.

^12-13 *Dachi a-rí ne onyinyi mú o/fím ne bonchí eyên* ne nang boné eyên*.

¹⁴ *Dachi a-rí ne onyi mú onet mú o/fím ne bonchí nang ne boné eyên* ké nǎ, onyinyi ámu o-chi i wǎn-boné-bonchí eyên nang mú boné eyên.

¹⁵ *Dachi a-rí ne onyi-wǎn eyên*

¹⁶ nang ne onyi mú wǎn-boné eyên*.

¹⁷ *Dachi a-rí ne wǎn-onyinyi mú a/mû aa/rí ne boné* nang wǎn mú wǎn emen o/fwon*. Bwǎn ámbe ba-man n ekyú bwǎn-bané eyên, ne â a/rí ne mbé kyi-chi i kyibî ńkyí adarí ne wǎn-boné eyên.

¹⁸ *Dachi a-kúng wǎn-boné-onyinyi mú onyi eyên a-fé dyibé* â onyi eyên o/tôong okpó*.

¹⁹ *Dachi a-rí ne onyinyi mú mu ké bunyinyi* ké nǎ, onyinyi ámu o/firi mú bada ǎ eciring.

²⁰ *Dachi a-rí ne onyi-onet*. Ńkyí ánkyi kyi-chi i ǒ a-bên byiko eyên.

²¹ *Dachi a-kúng wǎn eyên nang obónge a-kye ba-chi kyifen ba-kye orím-bukye mú badakó Mólok* ké nǎ, kyi-kyâ dyizîn ńdyí Osówo Óburúkpâbí edángé.

²² Onyinchéng o*dachi o-rí ne óbe-onyinchéng*. Dyizong-chwǒm ándyi dyi-sa ng Osówo kafâ.

²³ Nang onyinchéng nang onyinyi o*dachi o-rí ne enyam*. Dyizong-édúú ándyi dyi-chi i ǒ a-bên byiko eyên.

²⁴ *Dachi a-chi byiko eyên a-firi onet mú bada ǎ eciring* ké byěm ḿbyín echi* ké nǎ, éné nké banshâng bakye mbe ba-bên n byiko ebe, banshâng bakye ḿbé Óburúkpâbí mu o-ró ng ba-dim eringe nyí ben badanung ké esí ányi.

²⁵ Byěm ebe ḿbyí mbe ba-chi i mbyi byi-bên n esí ebe, ne nkyí nké Óburúkpâbí mu o-bên n esí ebe ányi ne mu o-chi i kányí e-né banet ḿbé mbe ba-kyú u ké nyǐ.

^26-27 Mbé ba/chi kángkáng banunut-byěm ḿbyín, ba-bên esí, nké ben baa*man ba-chi kámbyí*. Ben ashí kángkáng, nang banet-Ézerel, nang bacinbánet ḿbé mbe ba-kyú u ne ben, ba-man ba-tî byije ḿbyí Óburúkpâbí, ba-chi ńkyí mu o-sét ng běn.

²⁸ Â ba/chi éné, esí ee*ba/chi e-né běn* wǎ eringe nyí e/né banshâng bakye ḿbé ba/mû ányi ne ben ba-bâ*.

²⁹ Ben bamu ba-nyît ng ba/fu, nang yeě nké mu o-chi i banunut-byěm ḿbyín baa/kúng ǎ to wǎ onet-Osówo*.

³⁰ Ne Óburúkpâbí o-raa o/fu, kû n̂g etî byije ḿbyí mu n-kyâ běn, ne *da n̂g ekúng kyiká-édúú ńkyí banet ḿbé ba/mû ba-kyú u ké esí ńnyín ne ben ba-bâ*. *Da n̂g ebên byiko enen ké byěm ḿbyín nang kyibónge echi*. Me n-chi i Óburúkpâbí mú mu Osówo enen.