Lyívyítyíkus 17 - Bokyi Bible

Eringe nyí Baróng mbe Chwǒm-Ociring

¹ Óburúkpâbí o/sét Músis

² o/fu, osét Éron ne bwǎn emen ne kángkáng banet ḿbé Ézerel byije ḿbyín.

^3-4 O/fu, â onet-Ézerel o/ju mpong nang etám-ebû nang ebúbǔu o/fu, nyǐ o-chi i kyifen o-kye Óburúkpâbí ké kyikit kyikíri kyi-cibi ne ocím-dyifyi-mpyep mú Óburúkpâbí odakyú, onet ámu oo/róng kyije. Nyǐ oo/chi baróng ba-byí ké enyam ányi, ne oo*kyú to onet mú Óburúkpâbí*.

⁵ Dyishí-kyije ńkyín dyi/byí něen dyi/fu, banet ḿbé Ézerel ba-man ba-kûbê kántîk ne byitú ḿbyí ba/mû ba-ju ng ké byikit byikíri ba-ba-kye Óburúkpâbí. Ba-man ba-kûbê ne byitú ámbyi kántîk ba-ba-kye nchi kyifen-Osówo ké ocím-dyifyi-mpyep, ba-ju kámbyí wǎ byifen ḿbyí okwáre ne Óburúkpâbí.

⁶ Nchi kyifen-Osówo o-kúng ng baróng-enyam ámbe o-pwó ké bakô-kyikit-kyifen echi ké ocím-dyifyi-mpyep, o-yip bafwám o-shí ba-byí kyinung ńkyí kyidanyîn Óburúkpâbí.

⁷ Banet-Ézerel ba-man ba-fé dyityém ebe ne Óburúkpâbí kǎnchí, baa*ju to byitú ebe ké akán* ba-chi byifen ba-kye byibî-barím*. Banet ḿbé Ézerel ba-man ba-tî kyije ńkyín ké kángkáng bankéré ḿbé mbe ba-bâ.

⁸ Â onet-Ézerel nang ocinónet mú mu o-kyú u ké Ézerel o/chi kyifen ńkyí badashí kyirim-enyam nang dyizong-kyifen dyikíri,

⁹ wǎ kyifen ńkyí badakye Óburúkpâbí ké kyikit kyikíri, kyi-cibi ne ocím-dyifyi-mpyep mú Óburúkpâbí odakyú, onet ámu oo*kyú to onet mú Óburúkpâbí*.

¹⁰ Â onet-Ézerel nang ocinónet mú mu o-kyú u ké Ézerel o/ryí enyam nyí e/tôong ne baróng ké byiko, Óburúkpâbí o-bírî ng ǎ esim ne oo*kúng to onet ámu wǎ onet emen*.

¹¹ Baróng ba-kyâ nang ebóng chwǒm ńkyí nkyi kyikpó dyikpen, ne nkyí nké Óburúkpâbí oo/kye busa o/fu, bakúng kángkáng baróng ba-pwó ké kyikit-kyifen echi eringe nyí badafîm byibî ḿbyí banet. Baróng ḿbé badakye dyikpen ba-fîm m byibî.

¹² Nkyí nké Óburúkpâbí oo/sét banet-Ézerel o/fu, nang mbé, nang bacinbánet ḿbé mbe ba-kyú u ne mbé ba*dachi ba-ryí enyam nang erá nyí e/tôong ne baróng ké byiko*.

¹³ Â onet-Ézerel nang ocinónet mú mu o-kyú u ké Ézerel o/ju enyam nang kanurung ńké baa*ciring* o-man o-pwó baróng emen kyísí o-kpaa ecing o-cít.

¹⁴ Baróng ba-kyâ nang ebóng chwǒm ńkyí nkyi kyikpó dyikpen, ne nkyí nké Óburúkpâbí oo/sét banet-Ézerel o/fu, ba*dachi ba-ryí enyam nang erá nyí e/tôong ne baróng ké byiko*. Nang yeě nké o/ryí kányí, Óburúkpâbí oo*kúng ǎ to wǎ onet emen*.

¹⁵ Nang yeě, nang onet-Ézerel, nang ocinónet nké o/ryí enyam nyí e/kpú okpǔng, nang enyam nké e/ju, o-man o-soo byídí emen, o-kôo omu, o-kyú onet mú bada ǎ eciring tete dyikurúku dyi-fyi.

¹⁶ Â o*da/chi éné* o-man o-ré dyifwá ké nkyí.