Lyívyítyíkus 16 - Bokyi Bible

Dyicí-Dyijî-Kyifen ńkyí Byibî efîm

¹ Óburúkpâbí o/pem ne Músis ké nkéré mú bwǎn-Éron ashí afee baa/kpú, ḿbé Óburúkpâbí o/ju kámbé, ké nǎ, ba/kúng okwâ mú nyǐ o/mû o*da/kye busa o/fu, bakye ǎ*.

² O/fu, sét Éron mú wǎn-boné eyên a/fu, ké bachíchí-nkéré nké nke o/chi o-kûce ké esim-ékpígí o-da-nung ké ochíchí-nfût-ociring, ké nǎ, ányi nké mu m-byí i m-bwom ké ófíbí kyíbóng-kiinkíbí-mkpukpu-byěm ejí. Â o/né echi ńkyí n/sét ǎ, n/chi n-ju ǎ.

³ Â o*da/bê ne ne kyisu-otyép-mpong ńkyí odachi kyifen-byibî efîm* ne otyítǎm mú odachi kyifen ńkyí badashí kyirim-enyam* o*dachi o-nung ké ochíchí-nfût-ociring ámu*.

⁴ Ne Óburúkpâbí o-kye kâng byije ḿbyín o/fu, ne Éron o-da-nung ké ochíchí-nfût-ociring, o-man o-kôo omu, o-fé byídí emen ḿbyí nchi kyifen-Osówo, ágbádá-okpówo ne ebáta-okpówo ne emâp ne kyídí-dyishí.

⁵ Banet ḿbé Ézerel bakye Éron etúbû efee nyí odachi kyifen-byibî efîm, ne otyítǎm mú odachi kyifen ńkyí badashí kyirim-enyam.

⁶ Oyip otyép-mpong o-chi kyifen ńkyí kyidafîm byibî ḿbyí emen nyǐ oyén ne ḿbyí kyikû-banet emen.

⁷ O/chi o-kúng kâng ebû ányi efee o-ca ne nyǐ ké ocím-dyifyi-mpyep mú Óburúkpâbí odakyú.

⁸ Ányi nké o/chi o-kúng aká afee o-twóp dyímám, bubónge bu-bwom ké dyishí ńdyí Óburúkpâbí, ḿbú bubónge bu-bwom ké dyishí ńdyí Azázel.

⁹ Éron o/chi o-yip ebû nyí dyímám dyi/koo kányí dyi-kye Óburúkpâbí o-chi kyifen ńkyí byibî efîm.

¹⁰ O/chi o-kúng ebû nyí e/já Azázel o-kye Óburúkpâbí ekpó, o-ró kányí e-jâ ké kyikim-dyikán e-kâm Azázel, eringe nyí edakúng byibî ḿbyí banet-Ézerel e-dim ne mbyí.

¹¹ Â Éron o/yip mpong o-chi kyifen ńkyí byibî efîm ḿbyí emen ne ḿbyí kyikû-banet emen,

¹² o/chi o-kúng dyicáng ńdyí badayip okwâ o-fé amánge-okwâ ké ndyí súsú nyí a/fím ké kyikit-kyifen echi. O-kpere to akwâ-burwan ḿbú budanyîn kyinung afee o-bâ ne mbú ké ochíchí-nfût-ociring.

¹³ Ányi ké bushú ḿbú Óburúkpâbí nké o/chi o-fé burwan ámbu ké okwâ, ne erúkwâ nyí edabyí ké burwan ámbu e/chi e-cít kiinkíbí-mkpukpu-byěm-Óburúkpâbí eringe nyǐ oo*ri kánkyí o-kpú*.

¹⁴ O/chi o-kúng kyicê-baróng-mpong o-lip kafwa ké mbé o-myî ké bushú-kiinkíbí-mkpukpu, o-myî to kyicê kampén káchâtkányi ké bushú-mkpukpu-byěm-Óburúkpâbí.

¹⁵ Ké nkéré mú oo/chi ḿbyín, oyip ebû nyí odachi kyifen-byibî efîm ḿbyí banet-Ézerel o-ju, o-bâ ne baróng emen ké ochíchí-nfût-ociring, o-ba-myî kámbé ké kiinkíbí ne ké bushú-mkpukpu-byěm-Óburúkpâbí, wǎ eringe nyí o/chi ne baróng-mpong.

¹⁶ Ké bukwóp ḿbún, o/chi o-chi kyifen ńkyí odafîm byibî ké ochíchí-nfût-ociring, ké bubwô-byibî ḿbyí banet-Ézerel ne ociring ebe. O-man o-chi ńkyín ké bubwô-mpyep mú Óburúkpâbí odakyú, ké nǎ, mǔ mu ké otyém-oshê mú o*fí kyikit-ociring*.

¹⁷ Kyi-fím ké nkéré mú Éron odanung ké ochíchí-nfût-ociring o-wâa kyifen-byibî efîm ánkyi echi tete o-byí kyíjí, onet oo*man o-nung ké kafâ-mpyep ámu*. Ké nkéré mú oo/chi kyifen ńkyí emen nyǐ oyén ne ńkyí kyikû-banet emen ne ńkyí oshê omúmú,

¹⁸ o-man o-byí o-ca ké kyikit-kyifen echi o-da-chi kyifen ńkyí badashí byirim-enyam, o-fîm byibî ké kyikit ánkyi. O-man o-kúng kyicê-baróng-mpong ámu ne ḿbé ebû o-sabe ké etwóm nyí ké bakô-kyikit-kyifen echi.

¹⁹ O-man o-yip kafwa emen o-myî kyicê-baróng ké kyikit-kyifen echi kampén káchâtkányi. Ké bukwóp ḿbún nké o/chi o-fîm byibî ḿbyí banet-Ézerel ké nkyí, o-chi kánkyí kyi-firi kyikit-ociring.

Ebû nyí edakúng Byibî ḿbyí Banet

²⁰ Ké nkéré mú Éron oo/man kyifen ńkyí odafîm byibî ké ochíchí-nfût-ociring ne mpyep omúmú mú Óburúkpâbí odakyú ne kyikit-kyifen echi, o/chi o-kúng ebû nyí nyi ekpó, nyí e/já Azázel o-kye Óburúkpâbí.

²¹ O/chi o-yip abwô emen o-twôom ebû ányi ké dyishí o-bwom ányi o-sét kángkáng byibî ḿbyí banet-Ézerel baa/chi ne anwa nyí baa/bírî ne Óburúkpâbí, kyi-fím ányi o-fîm byibî ámbyi o-fé ebû ányi ké dyishí. Â o/chi éné, ofîm onyinchéng obónge mú odaró ebû ányi e-jâ ké kyikim-dyikán.

²² Ebû ányi e/chi e-kúng kángkáng byibî ebe e-dim ne mbyí ké kyikit ńkyí banet ba*fí ba-kyú u*.

²³ Éron kâng o/chi o-dim o-da-nung ké kafâ-mpyep mú Óburúkpâbí odakyú, o-pii byídí-nchi kyifen-Osówo ḿbyí o/mû o/fé ne o-nung ké ochíchí-nfût-ociring, o-mîng kámbyí áku.

²⁴ O-man o-kôo omu ké kyikit-ociring o-yip byídí ḿbyí emen nyǐ oyén o-fé. Â o/fé kámbyí, o/chi o-byí kyíjí o-da-chi kyifen ńkyí badashí byirim-enyam, ńkyí kyidafîm byibî ḿbyí emen nyǐ oyén ne ḿbyí banet-Ézerel.

²⁵ O/chi o-kúng bafwám-enyam ányi o-shí ké kyikit-kyifen echi, o-chi kyifen-byibî efîm.

²⁶ Mú onyinchéng mú o/ró ebû e-jâ ké kyikim-dyikán e-kâm Azázel o-man o-soo byídí emen, o-kôo omu ne o-bwa esim ké kafâ-oshê.

²⁷ Mpong ámu ne ebû ányi nyí ba/kúng ba-chi kyifen-byibî efîm, nyí ba/kúng baróng ebe ba-ca ne mbé ké ochíchí-nfût-ociring ba/fu, bafîm byibî, ba/chi ba-kúng enyam ebe ba-byí ne nyǐ ké kafâ-oshê, ba-shí. Ba-man ba-shí ekwop ne enyam eyén ne efong kángkáng.

²⁸ Onet mú odashí kámbyí o-man o-soo byídí emen, o-kôo omu ne o-bwa esim ké oshê.

Eringe nyí badakûtî Dyicí-Dyijî-Kyifen ńkyí Byibî efîm

²⁹ Ba-kû ng etî byije ḿbyín ké kángkáng bankéré ḿbé mbe ba-bâ. Ké ací diǐkpú ké etukáku káchâtkányi, banet-Ézerel ne bacinbánet ḿbé mbe ba-kyú u ne mbé ba-man ba-cíp esong, baa*chi bǎmkpóngé nang babónge*.

³⁰ Ké dyicí ándyi, bachi kyifen ńkyí kyidasoo kángkáng banet ké byibî ebe, eringe nyí badakyú banet ḿbé baa*ciring to kámbé*.

³¹ Dyicí ándyi dyi/chi dyi-kyú kiǐtí-dyicí ńdyí dyi/já mě, dyicí ńdyí ba/chi ba-cíp esong, baa*chi bǎmkpóngé nang babónge*. Ba-man ba-tî byije ḿbyín ké kángkáng bankéré ḿbé mbe ba-bâ.

³² Otu-nchi kyifen-Osówo mú ba/jware ǎ kanong kanong ne o-kúng kyikit ńkyí bonchí emen nké odachi kyifen ánkyi ńkyí byibî efîm. O-fâ byídí-nchi kyifen-Osówo

³³ ne o-chi kyifen ńkyí odafîm byibî ké ochíchí-nfût-ociring ne mpyep omúmú mú Óburúkpâbí odakyú ne kyikit-kyifen echi ne banchi kyifen-Osówo ne kángkáng banet ḿbé Ézerel.

³⁴ Ba-man ba-tî byije ḿbyín ké kángkáng bankéré ḿbé mbe ba-bâ. Ba-man ba-kûchi kyifen ńkyín kampén kabónge ké dyije, eringe kyidasoo kángkáng banet ḿbé Ézerel ké byibî ebe. Ne [Músis] o-chi kâng wǎ eringe nyí Óburúkpâbí o/sét ǎ.