Lyívyítyíkus 15 - Bokyi Bible

Byěm ḿbyí badaciring, ḿbyí byidabyí Onet ké Byiko

¹ Óburúkpâbí o/kye Músis ne Éron byije ḿbyín o/fu,

² basét banet-Ézerel ba/fu, â banunut-byěm mbe ba-byí i onyinchéng ké butî, byěm ámbyi byi-kyú u ḿbyí badaciring,

³ nang mbyi byi-byí i kángkáng nkéré, nang byi*fí byi-byí i kángkáng nkéré*.

⁴ Nang karíng kará nké onet ámu o/kyú ké nké, nang o/rí ké nké, ka/firi ńké badaciring.

⁵ Nang yeě nké o/ta karíng-onyinchéng ámu,

⁶ nang o/kyú ké kyikit nang kyirá ńkyí onyinchéng ámu o/mû oo/kyú, onet ámu o-man o-soo byídí emen, o-kôo omu, nké o-waa ng onet mú bada ǎ eciring tete dyikurúku dyi-fyi.

⁷ Nang yeě nké o/ta onyinchéng mú banunut-byěm mbe ba-byí i ǎ ké butî, o-man o-soo byídí emen, o-kôo omu, nké o-waa ng onet mú bada ǎ eciring tete dyikurúku dyi-fyi.

⁸ Â onet ámu mú banunut-byěm mbe ba-byí i ǎ o/shú onet mú ba*fí ba-ciring ng ǎ* akorong ké byiko, onet ámu o-man o-soo byídí emen, o-kôo omu, nké o-waa ng onet mú bada ǎ eciring tete dyikurúku dyi-fyi.

⁹ Nang kakyúng-kabyî-orá nké onet mú banunut-byěm mbe ba-byí i ǎ o/kyú ké nké, kakyúng ánke ka-firi ng ńké badaciring.

¹⁰ Nang yeě nké o/ta nang ebóng chwǒm ńkyí onyinchéng ámu o/kyú ké nkyí, onet ámu o-firi ng mú bada ǎ eciring tete dyikurúku dyi-fyi. Nang yeě nké o/yip chwǒm ńkyí onyinchéng ámu oo/kyú ké nkyí, o-man o-soo byídí emen, o-kôo omu, nké o-waa ng onet mú bada ǎ eciring tete dyikurúku dyi-fyi.

¹¹ Â onet mú banunut-byěm mbe ba-byí i ǎ o*da/wá o-soo abwô ne o-ta onet* onet mú oda ǎ eta éné o-man o-soo byídí emen, o-kôo omu, nké o-waa ng onet mú bada ǎ eciring tete dyikurúku dyi-fyi.

¹² Nang katí-ecing karé nké onyinchéng ámu o/ta, ba-man ba-sé kánké, ne nang kyiféng ńkyí ba/chi ké kyichí nang kyirá nké o/ta kánkyí, ba-man ba-soo kánkyí.

¹³ Â ba/chi onyinchéng mú banunut-byěm mbe ba-byí i ǎ o-nyange, onyinchéng ámu o-man o-rí ací káchâtkányi ne o-soo byídí emen, o-kôo omu ké kace ne o-firi mú bada ǎ echîkpet eta.

¹⁴ Ké ací nyíryinyi, okúng ámalê afee nang bootǒmtǒm bufee o-ca ne mbú ké ocím-dyifyi-mpyep mú Óburúkpâbí odakyú o-da-kye nchi kyifen-Osówo.

¹⁵ Nchi kyifen-Osówo ámu okúng kabónge o-chi kyifen ńkyí byibî efîm, o-kúng ńké kabónge o-chi kyifen ńkyí badashí kyirim-enyam. Ké bukwóp ámbu nké o/chi o-chi kyifen ńkyí odafîm onyinchéng ámu ociring ké byiko.

¹⁶ Â onyinchéng o/bên burê kyísí, o-man o-kôo omu, nké o-waa ng onet mú bada ǎ eciring tete dyikurúku dyi-fyi.

¹⁷ Nang ebóng chwǒm ńkyí ba/chi ké kyídí nang ekwop-enyam nké burê ámbu bu/ta ké nkyí, ba-man ba-soo kámbyí, nké kyi-waa ng chwǒm ńkyí badaciring kánkyí tete dyikurúku dyi-fyi.

¹⁸ Â onyinchéng ne onyinyi ba/rí ne barî, mbé ashí amúmú bakôo omu, nké ba-waa ng banet ḿbé badaciring kámbé tete dyikurúku dyi-fyi.

¹⁹ Â onyinyi o/ri bunyinyi, o-firi ng onet mú bada ǎ eciring tete ací a-rí káchâtkányi. Nang yeě nké o/ta ǎ, o-firi ng to onet mú bada ǎ eciring tete dyikurúku dyi-fyi.

²⁰ Nang ebóng chwǒm nké o/kyú nang o/rí ké nkyí ké nkéré mú bunyinyi emen ámbu, kyi-firi ng chwǒm ńkyí badaciring kánkyí.

^21-23 Nang yeě nké o/ta karíng ńké onyinyi ámu ne nang ebóng kyikit ńkyí onyinyi ámu oo/kyú, onet ámu o-man o-soo byídí emen, o-kôo omu, nké o-waa ng onet mú bada eciring tete dyikurúku dyi-fyi.

²⁴ Â onyinchéng o/rí ne onyinyi ámu ké nkéré mu ké bunyinyi, onyinchéng ámu oo/bên byiko emen, ké nǎ, mú onyinyi o/firi onet mú bada ǎ eciring, ne nyǐ to o-firi ng onet mú bada ǎ eciring, tete â ací a/shwôm káchâtkányi. Nang ebóng kyikit nké onyinchéng ámu o/rí ké nkyí, kyi-firi ng chwǒm ńkyí badaciring kánkyí.

²⁵ Â baróng mbe ba-byí i onyinyi, ḿbé baa/rí ací a-shwôm ací-bunyinyi emen, nang mbe ba-byí i ǎ ké nkéré o/mû oo*ba/chi o-ri bunyinyi* o-firi ng onet mú bada ǎ eciring ké kyikim-nkéré ńkyí baróng ámbe mbe ba-byí i ǎ, wǎ eringe nyí bada ǎ eciring ké nkéré mú odakyú ké bunyinyi.

²⁶ Nang karíng kará nké o/rí ké nké, nang ebóng kyikit to nké o/kyú ké nkyí ké nkéré ámu, kyi-firi ng kyikit ńkyí badaciring kánkyí.

²⁷ Nang yeě nké o/ta byěm ámbyi, o-firi ng onet mú bada ǎ eciring ne o-man o-soo byídí emen, o-kôo omu, nké o-waa ng onet mú bada ǎ eciring tete dyikurúku dyi-fyi.

²⁸ Â baróng emen ba/mîng ǎ ebyí, o-man o-rí ací káchâtkányi ne baa*ciring ǎ to*.

²⁹ Ké ací nyíryinyi, okúng ámalê afee nang bootǒmtǒm bufee o-da-kye nchi kyifen-Osówo ké ocím-dyifyi-mpyep mú Óburúkpâbí odakyú.

³⁰ Nchi kyifen-Osówo ámu okúng kabónge o-chi kyifen-byibî efîm, o-yip ńké kabónge o-chi kyifen ńkyí badashí kyirim-enyam. Ké bukwóp ámbu, o/chi o-chi kyifen ńkyí odafîm onyinyi ámu ociring ké byiko.

³¹ Óburúkpâbí o/sét Músis o/fu, onyibi banet ḿbé Ézerel atông kyi-kim ne byiko ebe ḿbyí baa*tî kanong* eringe nyí baa*bên mpyep mú nyǐ odakyú* mú mu ké otyém-oshê*. Â ba/bên kámú, nyǐ o/chi o-ju kámbé.

³² Ḿbyín nké mbyi byije ḿbyí byi/kim ne onyinchéng mú banunut-byěm mbe ba-byí i ǎ ké butî nang mú odabên burê kyísí.

³³ Byi-kim to ne onyinyi mú mu ké bunyinyi ne nang onyinchéng mú o/rí ne onyinyi mú o/firi onet mú bada ǎ eciring.