Lyívyítyíkus 14 - Bokyi Bible

Kyifen-Byiko esoo ńkyí Onet mú oo/nyange ké Kyibî-Orwôm odachi

¹ Óburúkpâbí o/kye Músis

² byije ḿbyín kyi-kim ne kyifen-byiko esoo ńkyí onet mú oo/nyange ké kyibî-orwôm. Ké dyicí ńdyí ba/chi ba-sét banet ba/fu, oo/nyange mú baa*ciring ǎ to* babâ ne nyǐ ké kyikit-nchi kyifen-Osówo.

³ Ne nchi kyifen-Osówo o/chi o-kúng ǎ o-byí ne nyǐ ké kafâ-oshê o-da-jebe ǎ. Â orwôm ámu oo/man,

⁴ nchi kyifen-Osówo o/chi o-sét ba-bâ ne bunurung-ociring bufee, cibicibi ne kaare-séda ne bucat ḿbú shíshét ne kaare-kajang.

⁵ Nchi kyifen-Osówo o/chi o-kye kâng busa ba-ju kanurung kabónge kyíbóng-mkpin mú ba/fé omu mú ba/tó abeabe ké kace.

⁶ O/chi o-yip kanurung ńké kabónge o-lip kánké cibicibi ne kaare-séda ne bucat ḿbú shíshét ne kaare-kajang ké baróng-kanurung ńké baa/ju.

⁷ O/chi o-yip baróng ámbe o-myî onet mú mu o-chi i kyifen-byiko esoo ḿbyí o/nyange ké kyibî-orwôm, kampén káchâtkányi, ne o-sét banet kâng o/fu, oo/nyange mú baa*ciring ǎ to*. O/chi o-mîng kanurung ńké kakpó ka-byí ka-jâ ké dyikán.

⁸ Onet ámu o/chi o-soo byídí emen, o-pwát dyishí, o-kôo omu, ne baa*ciring ǎ to*. Onet ámu o-man n enung ké kafâ-oshê, nké oo*nung ké mpyep emen* tete ací káchâtkányi.

⁹ Â ací a/shwôm nyâchât, ké ací káchâtkányi, o-chî ng epwát dyishí emen, o-kwárê kyiti ne egbúngbúng-achi ne kángkáng eríp nyí nyi ǎ ké byiko, o-soo byídí emen, o-kôo omu, ne o-firi kâng mú baa*ciring ǎ to*.

¹⁰ Ké ací nyíryinyi, onet ámu o-bâ ne batyép-bwǎn-etám-ebû bafee ne buma to bubónge ḿbú boo/rí dyije dyibónge, nyí e*fí ne kyinêm ké byiko*. O-bâ to ne bakyílogaram-filáwa mú badachi berêt bachât, mú o/fé bakút-ólif ké kafâ ne kaǎkím-lyíta-bakút-ólif.

¹¹ Nchi kyifen-Osówo okúng onet ámu ne byěm-kyifen emen o-ca ne nyǐ ké ocím-dyifyi-mpyep mú Óburúkpâbí odakyú.

¹² Nchi kyifen-Osówo kâng o/chi o-kúng wǎn-otyítǎm obónge ne bakút-ólif ámbe o-chi kyifen ńkyí dyifwá eré. O/chi o-kúng kámbyí o-kye Óburúkpâbí wǎ eyáré-dyityém ké bubwô ḿbú nchi kyifen-Osówo.

¹³ O/chi o-ju wǎn-otyítǎm ámu ké kyikit-ociring, ké kyikit ńkyí badaju enyam nyí kyifen-byibî efîm ne nyí kyifen ńkyí badashí kyirim-enyam. Nyǐ o-man o-chi ńkyín, ké nǎ, kyifen ńkyí dyifwá eré, wǎ kyifen-byibî efîm, kyi/já nchi kyifen-Osówo, ne kyi-chi i kiǐtí-kyifen-ociring.

¹⁴ Nchi kyifen-Osówo ámu o/chi o-kúng onyin-baróng-wǎn-otyítǎm ámu o-ta onet mú mu o-chi i kyifen-byiko esoo ké butông ḿbú bubwô-etyebéng ne ké otyép-kafwa mú bubwô-etyebéng ne mú kyiká ńkyí bubwô-etyebéng.

¹⁵ Nchi kyifen-Osówo o/chi o-kúng onyin-bakút-ólif o-ziri ké otyém-dyikwâ mú bubwô-eku emen,

¹⁶ o-yip kafwa ńké bubwô-etyebéng o-lip ké bakút ámbe o-myî kyicê emen ányi kampén káchâtkányi ké bushú ḿbú Óburúkpâbí.

¹⁷ O/chi o-kúng onyin-bakút ḿbé mbe ǎ ké otyém-dyikwâ ne kyicê-baróng-ebû ányi o-ta onet mú mu o-chi i kyifen-byiko esoo ké butông ḿbú bubwô-etyebéng ne ké otyép-kafwa mú bubwô-etyebéng ne mú kyiká-bubwô-etyebéng.

¹⁸ O-kúng kyicê-bakút ńkyí kyi/waa ǎ ké dyikwâ o-pwó onet ámu ké dyishí. Ké bubwô ḿbún, o/chi o-chi kyifen ńkyí byibî efîm.

¹⁹ Nchi kyifen-Osówo ochi kâng to kyifen ńkyí byibî efîm ne ńkyí byiko esoo. Ké nkéré mú oo/chi ńkyín, o/chi o-ju ebû nyí kyifen ńkyí badashí kyirim-enyam

²⁰ o-cibi kánkyí ne kyifen ńkyí esang-byichí ké kyikit-kyifen-Osówo echi. Ké bukwóp ḿbún, nchi kyifen-Osówo o/chi o-chi kyifen ńkyí byiko esoo ne o-soo onet ámu byiko o-firi mú baa*ciring ǎ to*.

²¹ Â onet ámu mu kyikpu ne oo*man ejá chwǒm kyikíri* o-man n ebê ne wǎn-otyítǎm obónge nké nke o-ba-kye ké dyishí-byibî emen ḿbyí kyifen ńkyí dyifwá eré, wǎ eyáré-dyityém nyí odakye Óburúkpâbí ké abwô nyí nchi kyifen-Osówo. Obâ ne kyílogaram-filáwa mú badachi berêt obónge, mú ba/fé bakút-ólif nké nke, mú badachi kyifen-esang-byichí ne kaǎkím-lyíta-bakút-ólif.

²² Obâ to ne ámalê afee nang bootǒmtǒm bufee, kabónge ńké odachi kyifen-byibî efîm, ńké kabónge ńké odachi kyifen ńkyí badashí kyirim-enyam.

²³ Ké ací nyíryinyi nyí odasoo byiko emen, o-kúng ng kámbyí o-ba-kye nchi kyifen-Osówo ké ocím-dyifyi-mpyep mú Óburúkpâbí odakyú.

²⁴ Nchi kyifen-Osówo o/chi o-yip wǎn-ebû ámu ne bakút-ólif o-kye Óburúkpâbí wǎ eyáré-dyityém ké abwô nyí nchi kyifen-Osówo.

²⁵ Nchi kyifen-Osówo o/chi o-ju wǎn-otyítǎm ámu, o-kúng kyicê-baróng o-ta onet ámu ké butông ḿbú bubwô-etyebéng ne ké otyép-kafwa mú bubwô-etyebéng ne mú kyiká ńkyí bubwô-etyebéng.

²⁶ Nchi kyifen-Osówo o/chi o-ziri onyin-bakút o-fé ké dyikwâ ńdyí bubwô-eku,

²⁷ o-yip kafwa ńké bubwô-etyebéng o-lip ké mbé, o-myî kyicê emen ányi kampén káchâtkányi ké bushú ḿbú Óburúkpâbí.

²⁸ O/chi o-ta ǎ bakút ké byikit ḿbyí o/ta ǎ to baróng, ké butông emen ḿbú bubwô-etyebéng ne ké otyép-kafwa mú bubwô-etyebéng ne mú kyiká ńkyí bubwô-etyebéng.

²⁹ O/chi o-bwa ne kyicê-bakút ńkyí kyi/waa ké dyikwâ o-pwó onet ámu ké dyishí, ne ké bubwô ḿbún, o-chi ǎ kyifen ńkyí byibî efîm.

³⁰ Nchi kyifen-Osówo kâng o/chi o-kúng ámalê abónge nang kaatǒmtǒm kabónge

³¹ o-chi kyifen ńkyí byibî efîm, o-yip ńké kabónge o-chi kyifen ńkyí badashí kyirim-enyam o-cibi ne kyifen ńkyí esang-byichí. Ké bukwóp ḿbún nké nchi kyifen-Osówo odachi kyifen ńkyí byibî efîm.

³² Ńkyín nké nkyi kyije kyi-kim ne onet mú oo/nyange ké kyibî-orwôm, mú o*fí ne bachíchí-byěm ḿbyí odachi kyifen ńkyí odasoo byiko emen*.

Chwǒm ńkyí kyidafip ké Kafâ-Kyise

³³ Óburúkpâbí o/kye Músis ne Éron

³⁴ byije ḿbyín kyi-kim ne chwǒm ńkyí kyidafip ké kafâ-kyise. Banet ḿbé Ézerel ba/chi ba-kûtî byije ḿbyín ké nkéré mú baa/nung ké esí nyí Kínan, nyí Óburúkpâbí o/mû mu o-bâ ebakye kámbé e-firi nyí ebe.

³⁵ Nang yeě nké o/ri chwǒm ńkyí kii/fip ké kafâ-kyise emen, o-man o-ca o-da-sét nchi kyifen-Osówo.

³⁶ Nchi kyifen-Osówo o/chi o-kye busa o/fu, bafîm kángkáng byěm ké kafâ-kyise ne o-dim o-da-jebe chwǒm ánkyi. Â ba*da/chi éné* nchi kyifen-Osówo o/chi o-sét o/fu, kángkáng byěm ké kyise ánkyi byi/firi byěm ḿbyí badaciring. Ne o/chi o-dim kâng ké kafâ-kyise ánke,

³⁷ o-da-jebe chwǒm ánkyi. Â o/ri byibît ḿbyí shíshét nang ḿbyí pyampyam ḿbyí bii/nung ké ekpe-kyise, byi-kpet ewubi kányí,

³⁸ nchi kyifen-Osówo ámu o-byí i ké kyise ánkyi, o-fín kánkyí ké ací káchâtkányi.

³⁹ Â ací a/ribi káchâtkányi, o-chî ng ebwa esim o-da-jebe kánkyí. Â byibît ámbyi byi/koo ké byikit byikíri,

⁴⁰ o/chi o-kye busa ba-fîm aká-ekpe-kyise nyí byibît mbyi ké nyǐ ba-pwó ké kyikit ńkyí banet badaciring, ńkyí kyi*fí ké kafâ-oshê*.

⁴¹ Ké nkéré oo/chi ńkyí ánkyi, o-man o-kwám kafâ-ekpe-kyise, o-wuri biintaa-ekpe-kyise ámbyi o-da-pwó ké kyikit ńkyí badaciring, ńkyí kyi*fí ké kafâ-oshê*.

⁴² Ba-kúng kâng aká akíri ba-fé ké byikit ḿbyí ba/zú aká nyí áku, ba-bwât byikit-ekpe ámbyi ba-kwa.

⁴³ Â byibît byi/chîbyí ké kyise ánkyi ké nkéré mú baa/zú aká ányi ba-kwám ekpe-kyise, ba-bwât kányí ba-kwa,

⁴⁴ nchi kyifen-Osówo o-chî ng ece o-da-ri. Â byi/chîbyí, kyise ánkyi kyi-firi ng ńkyí badaciring.

⁴⁵ Ba-man ba-bú kyise ánkyi ne ekpe emen ne byichí emen ne kángkáng byěm ḿbyí ba/kwa kánkyí ba-wuri ba-da-pwó ké kyikit ńkyí badaciring.

⁴⁶ Nang yeě nké o/nung ké kyise ánkyi, ké nkéré mú baa/fín kánkyí, o-waa ng onet mú bada ǎ eciring tete dyikurúku dyi-fyi.

⁴⁷ Nang yeě nké o/rí ké nkyí, nang o-ryí byiryíng ké nkyí, o-man o-soo byídí emen.

⁴⁸ Â ké nkéré mú nchi kyifen-Osówo oo/batún kyise ánkyi, byibît byi*da/chîbyí* ké nkéré baa/bwât kyise ánkyi ba-kwa* o/chi o-sét banet o/fu, kyise ánkyi kyi/firi kyikit ńkyí baa*ciring to* ké nǎ, baa/fîm byibît ámbyi kángkáng.

⁴⁹ Ne o-chi kyise ánkyi kyi-firi kyikit ńkyí baa*ciring to* o/chi o-kúng boǒnúrúng bufee ne kaare-séda ne bucat ḿbú shíshét ne kaare-kajang.

⁵⁰ O/chi o-ju kanurung kabónge kyíbóng-mkpin mú mu ne omu mú ba/tó abeabe ké kace ba-fé.

⁵¹ Ne o/chi o-kúng kâng boore-séda ne kajang ne bucat ámbu ne kanurung ńké kakpó, o-lip kámbyí ké baróng-kanurung ńké baa/ju ne ké omu ámu mú okpó, o-myî ké kyise ánkyi kampén káchâtkányi.

⁵² Â o/chi éné, o/chi o-soo kyise ánkyi ne baróng-kanurung ne omu mú okpó ne kanurung ńké kakpó ne boore-séda ne kajang ne bucat ámbu ḿbú shíshét.

⁵³ Ne o/chi o-zú kâng kanurung ánke ńké kakpó abwô ka-byí ka-jâ ké dyikán. Â o/chi éné, ányi oo/chi kyifen ńkyí badasoo kyise ánkyi, ne kyi/chi kyi-firi kyikit ńkyí baa*ciring to*.

⁵⁴ Ḿbyín nké mbyi byije ḿbyí byi/kim ne byibî-erwôm

^55-56 ne byibáp ne byifyí ne biimumudúng ne ḿbyí byi/kim to ne byěm ḿbyí byidafip ké byídí nang ké byise.

⁵⁷ Byije ḿbyín nké byidatông ba-nyît chwǒm ńkyí badaciring ne ńkyí baa*ciring*.