Lyívyítyíkus 13 - Bokyi Bible

Byije byi-kim ne Byirwóm-Enyam-Byiko

¹ Óburúkpâbí o/kye Músis ne Éron byije ḿbyín o/fu,

² â onet mu ne kyibáp nang kyifyí nang kiimumudúng ńkyí kyi/chi kyi-man ebírî kyibî-orwôm, babâ ne onet ámu ké kyikit-nchi kyifen-Osówo.

³ Nchi kyifen-Osówo o/chi o-jebe kyibáp ánkyi, ne â eríp nyí nyi ké nkyí e/firi kpárádádát, ne â kyibáp ánkyi kyi/ríbî kyi-shwôm bakô emen, kyibáp ánkyi kyi-chi i kyibî-orwôm, ne nchi kyifen-Osówo o/chi o-sét banet o/fu, bakû ǎ eciring.

⁴ Nké â kyibáp ánkyi nkyi kyi-cé ng kpárádádát, ne kyi*da/ríbî kyi-shwôm bakô emen* ne eríp emen e*fí e-cé ng kpárádádát* nchi kyifen-Osówo opap onet ámu ké burwám-banet, ké ací káchâtkányi.

⁵ Nchi kyifen-Osówo o-chî ng ǎ ejebe â ací a/shwôm nyâchât, ké ací káchâtkányi, ne â o/kabe o/fu, kyibáp ánkyi kyi/tôong eringe ebónge ne kyi*da/rêe ne kyi-shwôm eringe nyí kyi/mû* o-chî ng epap onet ámu ké ací akíri káchâtkányi.

⁶ Nchi kyifen-Osówo o-chî ng ǎ ejebe ké ací akíri káchâtkányi, ne â kyibáp ánkyi kii/dâp ne kyi*da/chîrêe kyi-shwôm eringe nyí kyi/mû* nchi kyifen-Osówo o/chi o-sét banet o/fu, oo/nyange mú baa*ciring ǎ to* ké nǎ, kyi*fí to kyibî-kyibáp* onet ámu o-soo ng byídí emen baa*ciring ǎ to*.

⁷ Nké â kyibáp ánkyi kyi/rêe kyi-shwôm eringe nyí kyi/mû ké nkéré mú nchi kyifen-Osówo oo/jebe ǎ, o-sét banet o/fu, ba*da ǎ eciring* o-man o-chîce o-kâm nchi kyifen-Osówo.

⁸ Nchi kyifen-Osówo o-chî ng ǎ ejebe, ne â kyi/rêe kyi-shwôm eringe nyí kyi/mû, o/chi o-sét banet o/fu, onet ámu o/firi onet mú bada ǎ eciring, ké nǎ, orwôm emen o-chi i kyibî-orwôm.

⁹ Â onet mu ne kyibî-orwôm, babâ ne nyǐ ké kyikit-nchi kyifen-Osówo

¹⁰ mú o/chi o-jebe ǎ. Â kyibáp emen nkyi kyi-cé ng kpárádádát ne nkyi ne eríp nyí kpárádádát ké otyém ne bafyí,

¹¹ kyibáp ánkyi kyi/firi ńkyí kii*wá to ekpú*. Nchi kyifen-Osówo o/chi o-sét banet o/fu, bakû ǎ eciring. Bukwóp bu*fí ḿbú bada ǎ epap opabáng* ké nǎ, kyi*fí to ne okân ké dyishí kyi/fu, nyǐ o*fí to onet mú bada ǎ eta*.

¹² Â kyirwóm-enyam-byiko ánkyi kyi/káng kyi-cít onet ámu kyi-fím ké kyishí kyi-ribi ké byiká,

¹³ nchi kyifen-Osówo o-chî ng ǎ ejebe. Â o/nyît o/fu, kii/cít ǎ byiko byimúmú, o/chi o-sét banet o/fu, o/firi onet mú bada ǎ eciring. Â enyam-byiko emen emúmú e/pín e-firi kpárádádát, onet ámu o-firi ng mú baa*ciring ǎ to*.

¹⁴ Nké â kyibáp kyi/chî ǎ ebyí ké byiko, o-firi ng onet mú bada ǎ eciring.

¹⁵ Nchi kyifen-Osówo o-chî ng ǎ ejebe, ne â o/ri o/fu, kyibáp emen kyi*da/kpú ne* o/chi o-sét banet o/fu, owaa onet mú bada ǎ eciring. Kyibáp ńkyí kyi*da/kpú ne* kyi-chi i kyibî-orwôm, ne onet ámu o-waa ng onet mú bada ǎ eciring.

¹⁶ Nké â kyibáp ánkyi kyi/kpú kyi-waa kiintíngene, onet ámu o-dim m o-kâm nchi kyifen-Osówo

¹⁷ mú o/chi o-chî ǎ ejebe. Â kyibáp ánkyi kii/kpú, onet ámu baa*ciring ǎ to* ne nchi kyifen-Osówo o/chi o-sét banet o/fu, o/firi kanong mú baa*ciring ǎ to*.

¹⁸ Â onet mu ne kyifyí ńkyí kii/kpú,

¹⁹ ne â chwǒm kyikíri kyi/chîmut ké kyikit ánkyi kyi-chi kyibáp, onet ámu o-câ ké kyikit-nchi kyifen-Osówo.

²⁰ Nchi kyifen-Osówo o-jebe ng ǎ, ne â kyibáp ánkyi kyi/ríbî kyi-shwôm bakô emen ne nkyi ne eríp nyí kpárádádát ké otyém, nchi kyifen-Osówo ámu o-sét ng banet o/fu, bakû ǎ eciring, ké nǎ, kyibî-orwôm nké kii/kpet ké kyifyí ánkyi.

²¹ Nké â nchi kyifen-Osówo o/jebe kánkyí o-ri o/fu, eríp nyí ké kafâ emen e*da/bírî ne kpárádádát* ne otyém emen o*da/ríbî o-shwôm bakô emen* nké nkyi kyi-cé ng kpárádádát, nchi kyifen-Osówo o-pap ng onet ámu ké ací káchâtkányi.

²² Nké â kyikit ánkyi kyi/rêe kyi-shwôm eringe nyí kyi/mû, nchi kyifen-Osówo o-sét ng banet o/fu, o/firi onet mú bada ǎ eciring, ká nǎ, o/firi ne kyibî-orwôm.

²³ Nké â kyikit ánkyi kyi*da/yángê* ne kyi*da/chîrêe kyi-shwôm eringe nyí kyi/mû* nkyi kiintíngene-kyifyí nkyí nkyi, o/chi o-sét banet o/fu, ba*da ǎ echîciring*.

²⁴ Â onet o/shí okwâ, nké kyikit ánkyi kyi/chi kyibáp, kyi-kpet ecé kpárádádát,

²⁵ nchi kyifen-Osówo o-jebe ng onet ámu. Â eríp nyí ké kafâ-kyibáp ánkyi e/bírî e-firi kpárádádát, ne â kyibáp ánkyi kyi/ríbî kyi-shwôm bakô emen, kyibáp ánkyi kyi-chi i kyibî-orwôm ńkyí kii/kpet ké okwâ ámu mú o/shí, ne nchi kyifen-Osówo o/chi o-sét banet o/fu, bakû ǎ eciring.

²⁶ Nké â eríp e*da/yángê e-firi kpárádádát* ne â kyibáp ánkyi kyi*da/ríbî kyi-shwôm bakô emen* nké nkyi kyi-cé ng kpárádádát, nchi kyifen-Osówo o-pap ng ǎ ké ací káchâtkányi.

²⁷ Nchi kyifen-Osówo o-chî ng ǎ ejebe â ací a/shwôm nyâchât, ké ací káchâtkányi, ne â kyibáp ánkyi nkyi kyi-rêe ng kyi-câ, kyi/firi kyibî-orwôm, ne nchi kyifen-Osówo o/chi o-sét banet o/fu, bakû ǎ eciring.

²⁸ Nké â kyibáp ánkyi kyi*da/rêe kyi-shwôm eringe nyí kyi/mû* ne nkyi kyi-cé ng kpárádádát, kii*chi kyibî-orwôm*. Nchi kyifen-Osówo o-sét ng banet o/fu, oo/nyange mú baa*ciring ǎ to* ké nǎ, kyi-chi i kiintíngene-kyibáp nkyí nkyi, ńkyí okwâ o/mû o/shí ǎ.

²⁹ Â onet mú ne kyibáp ké dyishí nang ké dyijâ,

³⁰ nchi kyifen-Osówo o-jebe ng kyibáp ánkyi. Â kyi/ríbî kyi-shwôm bakô emen, ne â eríp nyí ké kafâ emen nyi bukwa búkwa, o-kúng ng kyibáp ánkyi wǎ kyibî-orwôm ne o-sét ng banet o/fu, bakû ǎ eciring.

³¹ Â ké nkéré nchi kyifen-Osówo oo/jebe ǎ o-ri o/fu, kyibáp ánkyi kyi*da/ríbî kyi-shwôm bakô emen* nké eríp emen e*fí kanong* o-pap ng onet ámu ké ací káchâtkányi.

³² Nchi kyifen-Osówo o-chî ng ejebe kyibáp ánkyi â ací a/shwôm nyâchât, ké ací káchâtkányi, ne â o/ri o/fu, kyi*da/chîrêe kyi-shwôm eringe nyí kyi/mû* ne eríp nyí bukwa búkwa e*fí ké nkyí* ne otyém emen o*da/ríbî o-shwôm bakô emen*

³³ onet ámu o-kwárê ng eríp ké bakô-kyibáp ánkyi. Nchi kyifen-Osówo o-chî ng ǎ epap ké ací káchâtkányi.

³⁴ Â ací a/shwôm nyâchât, ké ací káchâtkányi, nchi kyifen-Osówo o-chî ng ejebe kyibáp ánkyi, ne â kyi*da/rêe kyi-shwôm eringe nyí kyi/mû* ne otyém emen o*da/ríbî o-shwôm bakô emen* o-sét ng banet o/fu, ba*da ǎ echîciring*. Onet ámu o-soo ng byídí emen, o-firi onet mú baa*ciring ǎ to*.

³⁵ Nké â kyibáp ánkyi kyi/bwa esim ké nkéré mú nchi kyifen-Osówo oo/sét banet o/fu, ba*da ǎ echîciring*

³⁶ nchi kyifen-Osówo o-chî ng ejebe kánkyí. Â o/ri o/fu, kii/bwa esim, oo*tún to nang eríp emen* onet ámu o-firi ng mú bada ǎ eciring.

³⁷ Nké â nchi kyifen-Osówo o/nyît o/fu, kyibáp ánkyi kyi*da/bwa esim* ne eríp nyí enong ee/byí ké nkyí, kyibáp ánkyi kii/kpú, ne nchi kyifen-Osówo o-sét ng banet o/fu, ba*da ǎ echîciring*.

³⁸ Â onet mu ne byibît kpárádádát ké enyam-byiko,

³⁹ nchi kyifen-Osówo o-jebe ng onet ámu. Â byibît ámbyi byi*fí byi-jang ng ecé kpárádádát* mbyi kyirwóm ńkyí kii*koo onet* baa*ciring onet ámu*.

^40-41 Â eji e/roo onyinchéng ké mbwô nang ké kyikû-dyishí, ńkyí ánkyi kii*chi onet ámu o-firi mú bada ǎ eciring*.

⁴² Nké â kyibáp ńkyí kpárádádát kyi/chi ǎ ké bufóng-dyishí, kyi-kyú u kyibî-orwôm.

⁴³ Nchi kyifen-Osówo o-jebe ng ǎ, ne â kyibáp ánkyi nkyi kpárádádát,

⁴⁴ nchi kyifen-Osówo o/chi o-sét banet o/fu, bakû ǎ eciring, ké bubwô-kyibî-orwôm ńkyí nkyi ǎ ké dyishí.

⁴⁵ Onet mú mu ne kyibî-orwôm o-man o-bwá bakâa-byídí, o-mîng dyishí emen cage, o-cít kyikim-bushú emen ńkyí kyísí, o-kûraa o-câ o/fu, me n-chi i onet-ociring, me n-chi i onet-ociring.

⁴⁶ Onet ámu o-waa ng onet mú bada ǎ eciring tete orwôm emen o-man, ne o-man o-byí ké oshê o-kûkyú kyíjí kǎnchí.

Byije byi-kim ne Byěm ḿbyí bii/fip

^47-48 Â kyídí-okpówo kyi/fip, nang ńkyí ba/chi ké eríp-etám-ebû nang ké ekwop-enyam nang ké ebóng chwǒm ńkyí ba/chi ké ekwop-enyam,

⁴⁹ â kyibît ánkyi nkyi shíshét nang pyampyam, kyi-kyú u ńkyí kyidakoo ké byěm byikíri, ne ba-man ba-tông nchi kyifen-Osówo kánkyí.

⁵⁰ Nchi kyifen-Osówo o-jebe ng kánkyí o-kúng chwǒm ánkyi o-tî cát ké ací káchâtkányi.

⁵¹ Â ací a/shwôm nyâchât, ké ací káchâtkányi, o-chî ng ejebe kánkyí, ne â kyibît ánkyi kyi/koo ké byikit byikíri, kyi-firi ng chwǒm ńkyí badaciring kánkyí.

⁵² Nchi kyifen-Osówo o-yip ng chwǒm ánkyi o-shí, ké nǎ, kyibît ánkyi nkyi kyi-koo ng, ne ba-man ba-shí kánkyí ké okwâ.

⁵³ Nké â ké nkéré mú oo/jebe kánkyí, nchi kyifen-Osówo o-nyît o/fu, kyibît ánkyi kyi*da/koo ne ké byikit byikíri*

⁵⁴ o/chi o-kye busa o/fu, basoo chwǒm ánkyi ba-tî kánkyí cát ké ací akíri káchâtkányi.

⁵⁵ O-chî ng ejebe kánkyí, ne â o/ri o/fu, kyibît ánkyi kyi/tôong shíshét nang pyampyam, ne kyi*da/koo ké byikit byikíri* kyi-waa ng chwǒm ńkyí badaciring kánkyí. Ba-man ba-shí chwǒm ánkyi, nang byibît mbyi ké esim nang erá.

⁵⁶ Nké â ké nkéré mú nchi kyifen-Osówo o/chîjebe kánkyí o-nyît o/fu, kyibît ánkyi kii/man, o-két ng kyikit ánkyi ké kyídí ánkyi nang ké ekwop-enyam ányi o-twóp.

⁵⁷ Nké â kyibît ánkyi kyi/chîbyí, ányi kyi/byí, nkyi kyi-chî ng ekoo kyi-câ, oyén-chwǒm ánkyi oshí kánkyí.

⁵⁸ Nké â o/soo chwǒm ánkyi, byibît ámbyi byi-rím, o-chî ng esoo kánkyí, ba*dachîciring kánkyí*.

⁵⁹ Ńkyín kâng nké nkyi kyije ńkyí kyi/kim ne kyídí-okpówo ńkyí kii/fip, nang ńkyí ba/chi ké eríp-etám-ebû nang ké chwǒm kyirá ńkyí ba/chi ké ekwop-enyam.