Lyívyítyíkus 12 - Bokyi Bible

Byiko ḿbyí Banyinyi badasoo ké Nkéré mú baa/fwon Bufwon

¹ Óburúkpâbí o/sét Músis byije ḿbyín

² o/fu, osét banet ḿbé Ézerel. O/fu, ké ací káchâtkányi nyí onyinyi odafwon wǎn-onyinchéng, onyinyi ámu o-waa ng onet mú bada ǎ eciring wǎ eringe odakyú ké bunyinyi.

³ Ké ací nyíryinyi, bacên wǎn-onyinchéng ámu.

⁴ Â ba/cên wǎn ámu, onyinyi ámu o-chî ng erí ací bujam esim diǐkpú ne achât ne baa*ciring ǎ to* ké baróng emen ḿbé ba/byí ǎ. Onyinyi ámu oo*man o-ta chwǒm-ociring nang kyibónge* o-nung nang ké mpyep mú Óburúkpâbí odakyú* tete nkéré mú oo/soo byiko emen o-man.

⁵ Ké ací diǐkpú ne anyii nyí onyinyi odafwon wǎn-onyinyi, onyinyi ámu o-waa ng onet mú bada ǎ eciring wǎ eringe nyí odakyú ké bunyinyi. Kyi-chî ng erí bajam-ací bachât esim-ací nyâchât ne baa*ciring ǎ to* ké baróng emen ḿbé ba/byí ǎ.

⁶ Ké nkéré mú odasoo byiko emen oo/man, nang o/fwon wǎn-onyinchéng nang onyinyi, o/chi o-bâ ne wǎn-etám-ebû mú oo/rí dyije dyibónge, mú odachi kyifen ńkyí badashí kyirim-enyam ne kaatǒmtǒm nang ámalê nyí odachi kyifen-byibî efîm, o-ba-kye nchi kyifen-Osówo ké ocím-dyifyi-mpyep mú Óburúkpâbí odakyú.

⁷ Nchi kyifen-Osówo o/chi o-kúng kyifen emen o-kye Óburúkpâbí o-chi kyifen ńkyí kyida ǎ esoo byibî ne baa*ciring ǎ to*. Onyinyi nang orá mú o/fwon wǎn o-man o-chi ńkyín.

⁸ Â onyinyi oo*man ejá wǎn-etám-ebû* o-man n ebê ne ámalê afee nang bootǒmtǒm bufee, kabónge ńké odachi kyifen ńkyí badashí kyirim-enyam, ńké kabónge ba-chi kyifen-byibî efîm, ne nchi kyifen-Osówo o/chi o-chi kyifen ńkyí kyida ǎ efîm kyibî ké byiko, ne baa*ciring ǎ to*.