Lyívyítyíkus 11 - Bokyi Bible

Enyam nyí badaman eryí

¹ Óburúkpâbí o/kye Músis ne Éron byije ḿbyín

² o/fu, basét banet ḿbé Ézerel. O/fu, ba-man n eryí enyam nang erá

³ nyí nyi ne afîp-byiká ne nyí edasâm ocím dyikáá,

^4-6 nké baa*man ba-ryí boonyam-atû ḿbú ne kyirún* ne bája* ne hâa*. Ba-man ba-kúng kányí wǎ enyam nyí badaciring. Enyam ányi e-sâm m ocím dyikáá, nké e*fí ne afîp-byiká*.

⁷ *Da n̂g eryí ekorók*. Ba-man ba-kúng kányí wǎ enyam nyí badaciring. Nyǐ nyi ne afîp-byiká, nké ee*sâm ocím dyikáá*.

⁸ *Da n̂g eryí enyam ányi nang ebónge* ba-ta nang byikwóm ebe ké abwô*. E-chi i enyam nyí badaciring.

⁹ Ba-man n eryí ekworê nang erá nyí nyi ne biipyipa ne biǐfágé,

¹⁰ nké nang ebóng chwǒm ńkyí nkyi kyi-kyú u ké kafâ-kace, ńkyí kyi*fí ne biipyipa ne biǐfágé* *da n̂g eryí*.

¹¹ Kúng n̂g chwǒm ánkyi wǎ enyam nyí badaciring. *Da n̂g eryí kányí* ba-ta nang byikwóm ebe ké abwô*.

¹² Baa*man ba-ryí nang ebóng chwǒm ńkyí nkyi kyi-kyú u ké kafâ-kace* ńkyí kyi*fí ne biipyipa* ne biǐfágé*.

^13-19 *Da n̂g echi ba-ryí bunurung ḿbún* ḿbú budajwáp baróng* wǎ biinkwa ne biikong ne bukô ne fálakan ne bázat ne biinfuu akun ne korô ne ósitirik ne ségul ne otu-kanurung ne boǒnúrúng-baya ne pélékan ne kómórat ne hópo ne biinkan.

²⁰ Kángkáng boǒnyâa ḿbú mbu ne abyibabang mbu boǒnyâa ḿbú badaciring,

²¹ kyi*da/shwôm boǒnyâa ḿbú badaman enyíp*.

²² Ba-man n eryí agurubí ne byisên ne biitu-ariro.

²³ Nké kángkáng boǒnyâa ḿbú boǒníngéníngê ḿbú áku, ḿbú mbu ne abyibabang, ḿbú boo*man enyíp* mbu boǒnyâa ḿbú badaciring eryí.

^24-28 Nang yeě nké o/ta kyikwóm-enyam ké burwám-enyam ńkyín, o-waa ng onet mú bada ǎ eciring tete dyikurúku dyi-fyi. Kángkáng enyam nyí nyi ne biǐcîcîp-biintaa-byiká, nyí byiká ebe byi*fí ne efwa* ne e-sâm m ocím dyikáá, ne kángkáng enyam to nyí nyi ne byiká byinyii ne biifwa. Nang yeě nké o/yip kyikwóm-enyam ebe, o-man o-soo byídí emen, nké o-waa ng onet mú bada ǎ eciring tete dyikurúku dyi-fyi.

^29-30 Enyam ńnyín, nyí edaryí bábe-enyam, wǎ ekông ne efêp ne kiǐmbirî ba-man ba-kúng kányí wǎ enyam nyí badaciring.

³¹ Nang yeě nké o/ta kányí ne kyikwóm ebe, o-waa ng onet mú bada ǎ eciring tete dyikurúku dyi-fyi.

³² Â nang byikwóm ebe byi/róng ké chwǒm, chwǒm ánkyi kyi/firi chwǒm ńkyí badaciring. Kyije ńkyín kyi/ta kángkáng byěm wǎ kyichí nang kyídí nang ekwop-enyam nang kiimbam, nang mbe ba-kúng ng kánkyí ba-chi i ebóng chwǒm. Bayip chwǒm ánkyi ba-lip ké omu, nké kyi-waa ng chwǒm ńkyí badaciring tete dyikurúku dyi-fyi.

³³ Â byikwóm ebe byi/róng ké katí-ecing, kángkáng byěm ḿbyí mbyi ké katí ánke byi-firi ng ḿbyí badaciring, ne ba-man ba-sé katí ánke.

³⁴ Nang ebóng byiryíng ḿbyí ba/mû ba/chi ba-ryí, nké â omu mú ba/pwó ké katí ánke o/ta kámbyí, baa*ryí to byiryíng ámbyi* nang ebóng chwǒm to ńkyí ba/mû ba/chi ba-jwáp ké katí ánke, baa*jwáp to*.

³⁵ Nang ebóng chwǒm nké byikwóm ebe byi/róng ké nkyí, kyi-firi ng chwǒm ńkyí badaciring, nang kyikit ńkyí badarám byiryíng, ba-man ba-bên kánkyí.

³⁶ Nké â byi/róng ké dyijwáng nang dyirá, ba-man n ejwáp omu ámu. Â nang chwǒm kyikíri kyi/ta byikwóm ebe, chwǒm ánkyi kyi-firi ng chwǒm ńkyí badaciring.

³⁷ Â kyikwóm ebe nang kyibónge kyi/róng ké osang-kyichí mú mbe ba-bâ ekwón, ba-man n ekwón osang-kyichí ámu.

³⁸ Nké â ba/fé osang-kyichí ámu ké omu ne kyikwóm ebe nang kyibónge kyi-róng ké omu ámu, baa*man ekwón to kámú*.

³⁹ Â enyam nyí ba/mû ba/chi ba-ryí e/kpú, onet mú odata kányí o-waa ng onet mú bada ǎ eciring tete dyikurúku dyi-fyi.

⁴⁰ Â nang onet obónge o/ryí kyipang-enyam ányi nang kyibónge, onet ámu o-man o-soo byídí emen, nké o-chî ng ewaa onet mú bada ǎ eciring tete dyikurúku dyi-fyi. Nang yeě nké o/yip kyikwóm-enyam ánkyi, o-man o-soo byídí emen, nké o-chî ng ewaa onet mú bada ǎ eciring tete dyikurúku dyi-fyi.

⁴¹ *Da n̂g echi ba-ryí boǒnyám ḿbú boǒníng* ḿbú budacen ké ecing*

⁴² nang mbu bu-tut ng kakim kyísí* nang mbu ne byiká byinyii* nang mbu ne byiká chwóó*.

⁴³ *Da n̂g echi ba-bên byiko enen* ké boǒnyám ḿbún eryí*.

⁴⁴ Me n-chi i Osówo Óburúkpâbí enen, ne ba-man ba-tî byiko enen kanong, ké nǎ, me mu kanong.

⁴⁵ Me n-chi i Óburúkpâbí mú o/fîm běn ba-byí ké Éjip eringe nyí me ndakyú Osówo enen. Ba-man ba-tî byiko enen kanong, ké nǎ, me mu kanong.

⁴⁶ Ńkyín kâng nké nkyi kyije ńkyí kyi/kim ne enyam ne bunurung, ne kángkáng byěm ḿbyí mbyi byi-kyú u ké kafâ-kace, ne kángkáng byěm ḿbyí mbyi byi-cen n ké ecing.

⁴⁷ Ben ba-man ba-bám byiko enen ba-kûnyît byěm ḿbyí ben badaciring ne ḿbyí baa*ciring* ba-nyît to kyi-kim ne enyam nyí badaryí ne nyí baa*ryí*.