Lyívyítyíkus 10 - Bokyi Bible

Kyibî ńkyí Nádap ne Abyíhu ba/chi

¹ Nádap ne Abyíhu ḿbé bwǎn-Éron ba/kúng acáng nyí badayip okwâ, ba-fé amánge-okwâ ké nyǐ, ba-fé burwan, ba-yip ba-kye Óburúkpâbí. Nké okwâ mún o/mû o*fí okwâ mú Óburúkpâbí o/mû o/kye busa o/fu, bakye ǎ* ké nǎ, Óburúkpâbí o/mû o*da/sét kámbé*.

² Óburúkpâbí o-waa ké abe ányi o-twóm okwâ o-shí kámbé ba-kpú ké bushú emen.

³ Músis o-sét Éron o/fu, ńkyín nké Óburúkpâbí o/mû mu o-raa ng ńdyí o/raa o/fu, kángkáng banet ḿbé mbe ba-chi i bǎmkpóngé ejí ba-man ba-kye kanong ejí ofê. [Me n/chi n-tông banet ejí busan ejí ḿbú ragerage.] Nké Éron [o*da/faa ojá*.]

⁴ Músis o-kó Myíshal ne Ézafan ḿbé bwǎn-Ózel, mú wǎn-boné-Éron, o-sét kámbé o/fu, bâ n̂g ba-ba-yip byikwóm-bakúsí-bwǎn-bané enen byi-byí ké bushú-mpyep-ociring ne ké kafâ-oshê, ba-da-tî kámbyí kyíjí.

⁵ Ne ba-bâ kâng ba-ba-níbî bakúsí ámbe ké byídí ebe, ba-yip kámbé ba-byí ne mbé kyíjí wǎ eringe nyí Músis o/sét kámbé.

⁶ Ne Músis o-sét kâng Éron bwǎn emen, Elyǎza ne Étama o/fu, *da n̂g echi ba-mîng eji enen cage* ba-ját nang byídí enen* kyi-tông kyi/fu, ben bamu ba-ta ng dyikán*. Â ba/chi éné, ba-kpú u, ne kafâ ka/chi ka-sa Óburúkpâbí ne oshê omúmú. Nké burwám-banet-Ézerel ḿbé áku ba-man n eta dyikán ńdyí bukyû ḿbún ḿbú bu/cen ká okwâ mú Óburúkpâbí o/twóm.

⁷ *Da n̂g echi ba-dim ba-mîng ocím-dyifyi-mpyep*. Â ba/dim, ba/chi ba-kpú, ké nǎ, ben baa/jware běn ba-firi banchi kyifen-Osówo ké bakút-Óburúkpâbí ḿbé ba/yip ba-pwó běn. Ne ba-chi kâng éné wǎ eringe nyí Músis o/sét kámbé.

Byije ḿbyí Banchi Kyifen-Osówo

⁸ Óburúkpâbí o/sét Éron o/fu,

⁹ wo ne bwǎn eyên baa*man ba-nung ké mpyep mú ndakyú* ké nkéré baa/jwáp bato ḿbé badabwóm*. Â ba/chi éné, ba/chi ba-kpú. Nyín kyije ńkyí bwǎn eyên kángkáng badakûtî.

¹⁰ Ben ba-man ba-kûnyît byěm ḿbyí byi/já Óburúkpâbí ne ḿbyí byi/já kángkáng banet, ba-nyît to byěm ḿbyí badaciring ne ḿbyí baa*ciring*.

¹¹ Ben ba-man ba-tángê banet ḿbé Ézerel kángkáng byije ḿbyí nn/kye běn ké abwô nyí Músis.

¹² Músis o/raa ne Éron ne bwǎn-banyinchéng emen ḿbé ba/waa ashí afee, Elyǎza ne Étama, o/fu, kúng n̂g kyifen-esang-byichí ńkyí kyi/waa ké byiryíng ḿbyí ba/chi kyifen ba-kye Óburúkpâbí, ba-chi berêt mú baa*fé bukye o-mut* ba-ryí kámú ké bukô-kyikit-kyifen echi, ké nǎ, kyifen ánkyi kyi-chi i kiǐtí-kyifen-ociring.

¹³ Ryí n̂g kámú ké kyikit-ociring, ké nǎ, kyicê-byiryíng ámbyi nké byi/já běn ne bwǎn eyên ké byiryíng ḿbyí ba/chi kyifen ba-kye Óburúkpâbí. Éné nké Óburúkpâbí o/sét mě.

¹⁴ Nké ben ne kyikû-banet enen ba-man n eryí kakim ne bunam-enyam ḿbyí ba/kúng wǎ kiǐtí-eyáré ne eyáré-dyityém ba-kye Óburúkpâbí ké bubwô-banchi kyifen-Osówo. Ba-man n eryí kámbyí ké kyikit-ociring nang kyirá. Baa/kye běn ne bwǎn enen byipang ḿbyín wǎ byipang ḿbyí byi/já běn ké kyifen-okwáre ne Óburúkpâbí ńkyí banet-Ézerel.

¹⁵ Ba/chi ba-bâ ne bunam ne kakim ké nkéré mú ba-kú ba-kúng ng bafwám-enyam ba-kye Óburúkpâbí wǎ kyifen-byiryíng. Byipang ḿbyín byi/já běn ne bwǎn enen ne banyá, wǎ eringe nyí Óburúkpâbí oo/sét.

¹⁶ Músis o-bí kyi-kim ne ebû nyí badachi kyifen-byibî efîm, ne ba-sét ǎ ba/fu, baa/shí kányí. Ńkyín kyi/chi kafâ ka-sa ǎ ne Elyǎza ne Étama, ne o-bí kámbé o/fu,

¹⁷ ebóng ben ba*da/kyú ké kyikit-ociring ne ba-ryí enyam-kyifen-byibî efîm*. Enyam ányi e-chi i kiǐtí-enyam-ociring, ne Óburúkpâbí oo/kye běn kányí eringe nyí odafîm byibî ḿbyí oshê omúmú.

¹⁸ Ké bubwô ḿbú ba*da/kúng baróng emen ba-bâ ne mbé ké kafâ-mpyep-ociring* ben ba/mû ba/chi ba-ryí enyam ányi áku, wǎ eringe n/sét běn.

¹⁹ Éron o-faa, o-bí Músis o/fu, â m/mû n/ryí enyam nyí kyifen-byibî efîm kurún, kyi/mû kyi/chi kyi-chi Óburúkpâbí o-kyú ké bunyîn-dyityém o-shwôm? Banet ḿbé Ézerel ba/chi kyifen ebe ńkyí byibî efîm kurún, ne ba/chi to kyifen ebe ńkyí badashí byirim-enyam, nké byibî-byěm ḿbyín byi/chî mě echi ké byiko.

²⁰ Ké nkéré mú Músis o/jwo ńkyín, kafâ emen ka-chee ǎ.